《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十五章（更新版）
作者 庄司总一着 赖永祥指导 林俊育台译 2017.04.23
暗暝ná亲像静静ê河teh流失；kah-ná m̄知影tang时开始流，mā m̄知影beh流向tó位去？厅堂ê桌顶hit台旧座钟，m̄知是tang时pháiⁿ去？远远传来ê鸡啼声，今á日犹原无变；天花板顶面吱吱叫ê仙尪á声，五十年、一百年lóng仝款。
「不知不觉已经有岁à，一切kah-ná是昨hng ê tāi-chì。世间事kah-ná做一个梦，所有ê lóng kah-ná teh眠梦；已经往生ê阿山tiāⁿ-tiāⁿ án-ne teh讲。M̄-koh，he是gōa-ni̍h-á好ê梦leh。」
陈家ê阿妈阿娇当teh beh迎接七十岁ê生日，真chē人会来庆祝她ê生日，而且hit工tú好是明治节（译注：记念日本明治天皇ê生日）ê好日。Koh khah ài庆祝ê是：她有享受长岁寿，又koh因为长年对社会ê贡献，荣获绿绶褒章，beh接受表扬。
总是，为啥物她会得tio̍h chiah-ni̍h尊贵ê「勋章」neh？阿娇bē明白。讲实在，她一向对贫民救济á是社会医疗ê功德，每pái lóng有适当ê捐款，m̄-koh，她并无做过啥物大ê社会服务，对世间mā无啥物特别ê善事，只有长岁寿是唯一明确ê事实。总是，她受tio̍h厝里ê人、亲朋好友kah社会人士ê祝贺kah称赞，阿娇就án-ne欢欢喜喜beh接受表扬。
昨暗她lóng有lim kóa红酒，tuh龟一时á了后，倒tī蓝色蠓罩内ê眠床，陷入kah-ná teh困，koh kah-ná无teh困ê茫茫渺渺状态，久久tī kah-ná眠梦ê恍惚心境中。Chit时已经是蠓á khah少ê季节，蠓罩门分开两pêng，阿娇时时ǹg窗á teh看天光bē？M̄-koh，她一直等bē天光。「Chit时阿山若iáu tī-.leh....」阿娇án-ne teh想，忽然感觉寂寞；她ê性命近来变khah年轻à。有年岁了后，她已经失去以前hit种固执无变化，beh kah时代倒péng行ê气力；婚丧喜庆ê惯例kah经常ê规矩，jú来jú简化；kah-ná teh剥洋葱ê皮，最后啥物都无chhun落来，hō͘ 人感觉寂寞；m̄-koh，她已经看开ā。她想讲家己tī陈家已经变成无路用ê人；tī她chit代，陈家ê大家族就会结束。以前家族之间若有啥物争执á是纠纷，她绝对无beh放松她心中hit只掌握ê手。家庭kan-taⁿ一个，m̄-koh，chit-má表面上kah-ná无啥物纠纷，其实lóng是随人家己自由teh行动。景文hiah-ni̍h phah拚teh thàn钱，增加财富，m̄-koh，重要ê夫妻和睦却无法度得tio̍h；in已经无koh冤家，mā无koh生kiáⁿ，已经彼此疏远。瑞文是一个好人，m̄-koh，伊一直bē ài做tāi-chì。长男清文不管老母ê反对，一意孤行去创业，听讲亏损bē少。她想起来，无一项tāi-chì有顺她ê意。虽然别家伙ê老人仝款对下一代有不满，会nga̍uh-nga̍uh念，m̄-koh，她感觉是家己ê家族特别hō͘ 人操心。讲起来，lóng是因为长男清文娶异族ê新妇；准讲in夫妻比两个小弟有khah出色，结局iáu是in teh破坏家庭siōng重要ê和谐；阿娇一直有chit款固执ê想法。总是，chiah-ê一切lóng是前世所注定，是无法度改变ê；她án-ne teh想。近来，她常常去竹溪寺念经á是听道理，有时甚至tī hia ê僧房tòa几工。
阿娇已经是来到chit-ê年岁，难免会有chit种心境。总是，幸福tī想bē到ê时来临，并且phah开阿娇封密ê心灵。世间人并无kā她bē记得，mā无kā她当做废物；án-ne teh想ê中间，她家己已经bē记得ê骄傲kah自信，忽然又koh回复。明á载，她beh出席州政府ê表扬大会，接受颁发绿绶褒扬奖章。阿娇一直teh想，她已经压bē-tiâu欢喜ê心情，所以天phú光ê旭日tú kā窗á照白，阿娇to̍h已经起床ā。
「素娥ah！素娥ah！你iáu未起来hio͘h？Chit种大日子，你iáu ē-tàng困kah m̄知thang起来！」
阿娇teh叫cha-bó͘-kán-á，家己一个人nga̍uh-nga̍uh念，m̄-koh，她kah平常时ê无满意无仝，是开朗欢喜。阿山往生了后，素娥改来事奉阿娇；她ê身体行动jú来jú有困难，素娥真细腻teh kā她照顾。素娥以前事奉ê头家人真好，所以伊往生了后，她iáu-koh是对伊ê遗孀尽忠，实际上她并m̄是对女主人心服。阿娇mā真清楚chit点，所以对chit-ê老cha-bó͘-kán-á ê尽心kah亲切，阿娇虽然iáu未有啥物感受，m̄-koh，今á日她to̍h会记得素娥ê亲切。
「夫人，你叫我有tāi-chì ho͘ⁿh？今á日，你hiah早to̍h醒。」
素娥无礼貌teh hah-hì，m̄-koh，阿娇并无发脾气。
「当然loh！今á日是啥物日子，你bē记得à hio͘h？」
「Ná有bē记得，今á日是庆祝夫人七十大寿ê日子，而且mā beh接受啥物尊贵ê....。」
「是ah！我因为心情兴奋，soah困bē落眠。」
「实在是....。M̄-koh，夫人，hiah-ni̍h早，顶面ê官员iáu teh o͘ⁿ-o͘ⁿ困neh。」
「M̄-koh，咱tio̍h量早准备。准备需要不止chē时间neh。Oh，我beh净身，紧叫hiah-ê cha-bó͘-kán-á起来hiâⁿ烧水。」
烧水无gōa久to̍h kōaⁿ来，阿娇就tī屏风后面净身斋戒。然后，cha-bó͘-kán-á帮她穿衫，kā参白ê头毛，梳成「大头鬃」ê发髻（kè），koh kā缚脚了kah-ná生姜ê小脚穿鞋。
「Ah，真好看；少年ê时美丽，年纪大mā仝款无人会比得。」
素娥kā阿娇o-ló，koh kā她点to̍h水薰草。
「老头家tī另外hit-ê世界mā会真欢喜。伊做人真好，温和koh慷慨，mā真有学问。M̄-koh，tī chit种大日子，伊mā是会困kah oàⁿ-oàⁿ chiah会起床；伊是悠哉悠哉ê人。」
有神经质ê阿娇，若有啥物tāi-chì to̍h会án-ne la̍k-la̍k-chhoah。老cha-bó͘-kán-á the̍h她来kah老头家做比较，是有小khóa teh khau洗ê款，m̄-koh，阿娇无啥感觉tio̍h，就koh讲：
「Hit-ê人若khah长岁寿，kám有法度kah我仝款得tio̍h奖赏？」 阿娇讲kah真可惜ê款。老头家iáu活leh ê时，阿娇lóng kā伊当做无能ê人teh对待。Chit-má阿娇讲chit款话，cha-bó͘-kán-á bē感觉奇怪。
「M̄-koh，夫人有今á日ê荣光，应该是老头家ê致荫ā。」
阿娇听tio̍h chiah-ê话，soah感觉无趣味。
「Kám án-ne？阿山mā无teh做啥tāi-chì，一日到暗kan-taⁿ四界teh hō͘-ló-sō͘.。」
「准讲夫人....。」
「我kah hit-ê人无仝，是我亲身去做seng-lí ê；是我kā陈家振兴起来，koh积聚财产。所以家庙mā起起来，而且mā有奉献，去做社会事业ā。值得欢喜kah安慰ê是，陈家已经成做khiā在bē摇动ê大家族，kiáⁿ儿mā随人lóng有发展。」
「讲tio̍h财产，he完全是景文ê经营成功，所以夫人今á日ê荣誉是伊ê功劳lah。」
素娥掠准她有推测tio̍h女主人真正ê心理，所以chiah án-ne讲。总是，阿娇无表示同意，这真正是料想bē到ê tāi-chì。Án-ne讲起来，chit位老夫人是kā一切lóng是归tī家己ê功劳，chit种自我感觉良好ê讲法，连素娥都感觉受气。
「M̄-koh，无论夫人gōa有才tiāu，我认为若m̄是lín kiáⁿ真gâu，夫人就无法度得tio̍h chit种ê荣誉。」
「Chit点免你讲我mā知，m̄-koh，是tó一个kiáⁿ khah有才tiāu neh？是siáng hō͘ 我有chit种荣誉neh？」
阿娇tú teh讲chiah-ê kah-ná teh做谜猜ê话ê时，景文忽然出现，行入来房间。
景文是第一个来kā老母祝寿kah祝贺她beh受表扬ê人，伊讲一大堆祝词，表示伊iáu是比siáng都khah有孝。伊家己mā ǹg望chit点会被肯定，所以透早to̍h来。伊讲chiah-ê hō͘ 老母欢喜ê吉祥话了后，tùi怀中the̍h出红包来。 「我自早to̍h想beh买一个好礼物，m̄-koh，我ê脑筋想bē出到底tio̍h买啥chiah好。若是买一个无适合ê礼物，不如献钱....。」
「你免hiah费神lah，我无特别需要用钱。若是以前，to̍h koh是另外一回事，m̄-koh chit-má年岁chē ā，近来是teh过拜佛ê生活，所以你若beh hō͘ 我钱，不如 hō͘ 玉帘á是lín kiáⁿ。」
景文掠准老母因为伊ê孝心，会欢欢喜喜kā红包收落来，m̄-koh，她竟然无照伊所期待ê。老母竟然对钱无兴趣，这hō͘ 伊感觉真意外。
「这是我ê一点á心意，thang hō͘ 阿母随意用；若是beh捐hō͘ 庙寺mā好，有一千圆，一千圆neh....。」
景文惊讲chit-ê金额会hō͘ 老母tio̍h惊，就kek kah-ná无啥tāi-chì ê款。可惜伊一来素娥就因为有tāi-chì ài办，soah随时离开无在场；景文感觉美中不足，若是有hō͘ 第三者tio̍h惊kah赞叹，án-ne to̍h会加真好。
「Án-ne，你ê心意我to̍h收起来，因为he是有收mā bē成做困扰ê物件。」
这完全tī景文ê意料之外。一千圆m̄是小钱，而且十张大钞，每张lóng有khap朱红色ê「寿」字，是伊专工准备来beh赠送她ê。伊真期待老母会感激，伊一直到tú-chiah iáu án-ne teh相信。以前，老母确实是chit种人，她对金钱比景文koh khah热心。自景文少年ê时起，对商业á是财务问题，in母kiáⁿ两人lóng会做伙参详。M̄-koh，今á日ná会án-ne leh？心境ê变化ná会是chit种ê？
「我献钱hō͘ 阿母，kám会hō͘ 你ê心情变bái？」
「无lah，你ê心意我真了解ā。总是，自从我去庙里念经，有修业了后，就kā金钱看淡ā。」
「连阿母mā讲chit款话oh？世间人一讲tio̍h钱to̍h看bē起，á是讲钱lah-sap，m̄-koh，啥人ē-tàng m̄免用钱leh？阿母mā是因为有财产，大家chiah会来kā你庆祝七十大寿，mā chiah会受tio̍h表扬，kám m̄是？」
「M̄-koh，准讲有财产，若是对社会无回馈（kūi），to̍h无一个人会对你有好印象。你tùi少年开始to̍h为家庭phah拚，我绝对bē bē记得。总是，我感觉清文mā bē bái，伊有学问，人格koh高尚；伊大学毕业tú tńg来ê时chūn，有一kóa做法受人批评，m̄-koh tùi中年起，伊有培养出温厚ê风度，我就m̄-bat koh听tio̍h人讲伊ê pháiⁿ话。安子kah你ê玉帘无仝，她人贤慧，mā是受tio̍h好风评ê原因。In ê凤梨罐头事业，起初我虽然有反对，chit-má感觉iáu是bē bái ā。因为有chit-ê事业，咱陈家chiah受tio̍h社会ê肯定；一讲tio̍h陈清公司，无人m̄知。」
「Án-ne，阿母认为一切lóng是清文兄嫂带来ê好光景loh？」
景文m̄知老母是以前to̍h án-ne相信，á是近来chiah有chit种看法。总讲一句，景文chit-má chiah知影老母hiah-ni̍h支持清文in夫妇。
「我并m̄是讲是in带来ê名誉，m̄-koh，众人lóng án-ne讲ā。In创设一间大公司，kah-ná iáu未开始thàn钱，m̄-koh，he是因为是tú开始，无办法。」 「你teh kā我教育chit项tāi-chì oh？若ài hō͘ 人对你尊敬，当然tio̍h án-ne。总是，事业若ē-tàng成功to̍h bē bái....。」
「Oh，kám讲亏损hiah大？」
「我无真清楚，kan-taⁿ有听tio̍h社会ê风声niā-niā。总是，无影无迹ê讲法会比实际ê大过十倍，靠bē住....。」
景文含含糊糊án-ne讲。M̄-nā kan-taⁿ对in阿兄ê tāi-chì，伊一向mā lóng bē讲人ê是非；若m̄是到最后无步ê关键时刻，伊bē去抵挡对手，伊bē ài kah人相争。M̄-koh，伊今á日真想beh讲出来，想beh iah孔讲：「阿兄ê事业已经强beh无命ā，kah阿母ê寿命仝款，已经面临破产ê边缘。你对chit点lóng m̄知，颠倒对in ê评价siuⁿ过koân，想讲家己ē-tàng得tio̍h表扬lóng是因为in ê缘故。阿母庆祝七十岁生日是好，总是人已经老糊涂ā。」话到咙喉，景文koh kā话吞落去，无讲出来。这m̄是不忍心hō͘ 欢喜kah kah-ná gín-á ê老母郁卒，却是因为景文家己已经失去hit种讲出chit款残酷ê话来hō͘ 愤慨得tio̍h tháu放ê气力 à。伊家己坚强ê意志á是信念，tú好是靠thàn钱来表现，所以，伊一直hō͘ 人耻笑讲是ài钱如命。支持陈家chit栋厝ê柱á若有软弱ê嫌疑ê时，伊认为准讲是chhun伊家己一个，伊mā tio̍h成做最后ê支持者，m̄-koh，众人对伊ê观感只是kā伊看做利己主义者而已。伊想讲只有老母了解伊，想bē到chit-má连老母mā对伊bē了解。
早起，清文陪老母阿娇出席典礼，接受颁奖表扬。清文穿正式ê礼服，tùi正门真体贴牵老母ê手上车，老母mā真欢喜接受伊ê体贴，满面笑容；chit一幕看在景文ê眼内，若beh讲是súi，不如讲是不可思议ê光景。嫉妒之情凿tio̍h伊ê胸坎á。清文m̄是老母ê亲生kiáⁿ，koh是chhōa日本bó͘，bat扰乱老母ê心，m̄-koh， chit-má她相信是清文夫妻ê功劳chiah hō͘ 她有今á日ê光荣。除了厝里决定hō͘ 老母ê生活费以外，为tio̍h beh保持她tī社会ê体面，景文常常私下hō͘ 她零用金；其他ê人lóng kā老母看做是麻烦，只有伊对老母有孝顺ê心。景文想讲家己是老母ê亲生kiáⁿ，m̄-koh，chit-má却....。
家庭亲像肉体内teh运行ê血液循环。充满煮食物ê蒸汽、油chìⁿ ê芳味kah糕á饼ê臭火ta芳味ê灶脚，ná亲像人ê胃肠不断teh制造血液。厅堂是心脏，tī hia有性命teh活动；烛台顶面teh烧ê蜡烛火、插tī花矸ê芳花，á是香炉ê乌沉香芳味，hō͘ 厅堂ná亲像有性命ê心脏teh鼓动。红色ê苎á布、绸á布á是呢á布顶面有「寿」字剪纸ê寿轴（te̍k），四面壁挂kah满满了后，koh挂到外面；赠送寿轴ê亲人朋友来祝寿，in讲了祝寿ê话，就面对厅堂正面ê寿位跪拜。厝里ê人kā红龟粿赠送所有ê厝边，in收tio̍h红龟粿了后，就tī家己厝ê gîm檐(chîⁿ)挂灯笼á。祝寿ê厝头前搭戏台teh演歌á戏，街头巷尾ê人lóng来看戏。厝里有连续几工办桌teh请人客。
像án-ne，以chit家伙为中心ê闹热滚滚，hō͘ chit所在发出kah-ná teh过节ê闹热气氛。
总是，chit种夸大ê旧式祝贺方式，因为近代文化ê复杂性kah快速ê发展，自然to̍h行向消失之路。陈家chit pái ê祝寿，本来想讲tī餐厅请一pái人客to̍h够额；这m̄-nā是清文一个人ê意见，景文kah瑞文mā感觉m̄-thang tī时代ê潮流落伍。M̄-koh，老母本人iáu是希望照旧例来办。她是陈家所留落来旧时代ê最后一个人物，mā无久to̍h会消失，所以，做kiáⁿ儿ê体贴老母ê心情，kā chit-ê最后ê记念盛大举行；众人mā无kā它当做笑话，颠倒热情赠送寿轴，可能mā是teh疼惜chit-ê to̍h beh消失ê传统。
M̄-koh，连农场监督游德仁mā送来贵重ê寿轴，这有一点á hō͘ 人无法度了解。伊只不过是陈清公司ê职员，kah陈家无亲无故，tùi领小khóa月薪ê身分来讲，chit种kek大pān ê做法并无合身分。景文用孽á话对伊讲：「实在不得了，你一下to̍h开去一个月ê薪水！」
总是，众人想讲这是游德仁暗中teh进行伊kah景文ê cha-bó͘-kiáⁿ美圆ê婚事ê证据。M̄-koh，tāi-chì kah谣传ê无仝，因为事实上并无具体ê提亲。玉帘报风声讲：想beh选伊来做in cha-bó͘-kiáⁿ美圆ê翁婿，这只不过是beh掩盖她家己ê弱点；景文会án-ne讲，mā m̄是出tī真心，he是伊thiau故意beh hō͘ in bó͘ bē爽快ê讲法。所以，in两人根本都iáu未对游德仁提起chit项事，连对cha-bó͘-kiáⁿ mā m̄-bat提起过。
游德仁kā chit种谣传ê话当做笑谈。若hō͘人讲：「你真幸福neh！」，á是hō͘ 人问起tang时beh结婚？伊就会掠狂，m̄知beh án怎chiah好？因为he是真hàm古ê tāi-chì。准讲伊有chit-ê意思，mā kah-ná是灯笼á kah吊钟ê譬喻；彼此门户差hiah chē，伊一开始to̍h m̄敢án-ne想。M̄-koh，伊耳孔所听tio̍h ê消息是：她ê父母tùi真chē人ê中间选tio̍h游德仁lah，嫁妆一万圆lah，美圆因此无beh去东京读册lah....等等，致使游德仁感觉kah-ná是真ê；伊有时án-ne teh想，m̄-koh马上to̍h koh打消chit种想法。就án-ne，憢疑、困惑kah不安ê心情kah-ná hē tī天秤顶面ê磅子，hō͘ 伊前后左右teh摇摆。头先hō͘ 伊无相信ê谣言soah变成清楚ê模式，而且成做某种理论：伊想讲hit-ê夫人teh kā伊kô-kô缠，hō͘ 伊ê头脑混乱kah真烦恼，原来并m̄是因为她本身有啥物问题，却是为tio̍h她所疼ê cha-bó͘-kiáⁿ teh chhōe对象ê一番热心。
为啥物我看bē出hit-ê夫人真正ê心意neh？我因为嫌烦、惊惶，kan-taⁿ想beh避开她，实在有够愚戆。而且我kā tùi她身上发出ê热情，误会做不可思议ê妖气，soah陷入奇怪ê感情，he是gōa-ni̍h-á hàm古ê见笑tāi。她tiāⁿ-tiāⁿ讲：美圆hō͘ 空气枪phah-tio̍h，soah一蕊目chiu失明，是一个可怜ê gín-á，想tio̍h她ê情形to̍h感觉人生暗淡。这mā是她信仰基督教ê原因之一。她为tio̍h不幸ê cha-bó͘-kiáⁿ chhōe一个ē-tàng hō͘ 她幸福ê对象，kan-taⁿ án-ne而已。讲是数学á是魔术lóng好，只要得tio̍h答案to̍h好；to̍h是hiah简单。M̄-koh，头家景文koh是án怎leh？伊是有名ê勤俭，伊ê意见neh？听讲in夫妇感情无好，家己ê bó͘ 经常出入年轻cha-po͘人ê工作场所，伊kám bē致意leh？
游德仁对陈家二房景文ê cha-bó͘-kiáⁿ美圆产生不可思议ê感情。讲是不可思议，是因为她kah其他厝里ê人无仝；她真少去农场，到taⁿ kan-taⁿ去过几pái，当然游德仁mā无kah她讲过话，而且看tio̍h她ê时，mā无留落来特别ê印象。她ê身材kah苗条ê老母无仝，她是一个瘦koh细汉ê cha-bó͘ gín-á，面色苍白，hō͘ 人感觉衰弱，kah-ná有病ê款；她ê面圆，m̄-koh bē hō͘ 人有丰满（boán）ê感觉；kah妖艳（iām）ê老母比较起来，她bē真映目；虽然是一蕊目chiu失明，因为有装义眼，外表看bē出来。她唯一sêng in老母ê所在是圆圆ê目chiu，其他ē-sái讲是真平凡ê面形。M̄-koh，她看起来是一个温柔koh惊见笑ê cha-bó͘ gín-á，tú亲像in老母所讲ê，hō͘ 人感觉kah-ná有一点á阴暗不幸ê形。Chit-ê cha-bó͘ gín-á ê影像，不知不觉显现tī游德仁ê脑海中。若是chit种情形ē-sái讲是恋爱，为啥物会变成án-ne leh？这tī肉体上á是精神上lóng真oh得解说。伊想beh kah陈家chit个大家族结缘，teh ǹg望嫁妆，chit种phah算bē-sái讲完全无。总是，jú有chit种phah算，热情却jú疏远，m̄-koh，伊ê心soah mā jú hō͘ chit-ê cha-bó͘ gín-á吸引；游德仁家己都感觉莫名其妙。
游德仁带寿轴来祝寿ê时，玉帘知影伊有严重ê错误想法。玉帘起紧张，taⁿ beh án怎chiah好leh？她家己掖ê种籽，只好用家己ê手去收割。游德仁kah美圆ê婚姻，人人相信是真ê；她ê丈夫景文kah-ná mā是希望án-ne。Án-ne，玉帘只有家己下决心；只有一条路thang行，而且最后chhun cha-bó͘-kiáⁿ家己ê意向。
「美圆，阿母想beh kah你讲话。」
「是啥物tāi-chì？阿母。」
玉帘下决心chiah讲出嘴，m̄-koh，她一讲出嘴，又koh后悔。若是顺其自然，可能会无tāi-chì to̍h结束。
「Án怎又koh恬恬leh？阿母，你紧讲ā。」
「你明年to̍h二十岁à；阿母十八岁to̍h嫁人。M̄-koh....。」
「Ah，出嫁ê tāi-chì？」
「女大当嫁，你已经到应该结婚ê年纪。虽然近来cha-bó͘ gín-á ê婚期比以前有khah慢，m̄-koh，cha-bó͘人早慢ài嫁，若是有适当ê人....。结婚tī人生讲起来ná亲像teh poa̍h-poe，kan-taⁿ会出现吉á是凶两种。阿母ê运气无好，所以婚姻失败，m̄-koh，并m̄是讲世界上无好ê婚姻，mā是有会hō͘ 人感觉tio̍h活tī世间真好ê婚姻。虽然这是thang tú-tio̍h却不可强求ê，m̄-koh，这是真súi koh真可贵ê；tio̍h án怎形容chiah好neh？To̍h亲像稀有ê宝石一样。」 玉帘讲出嘴ê问题，她却渐渐kā它拖远，连家己都m̄知究竟teh讲啥物；她发见chit点，惊一tiô，soah忽然间bē爽快起来。
「奇怪ê gín-á，ná会hō͘ 阿母家己一个人teh讲话？美圆，你到底想án怎？」
「Án怎oh？阿母无问我ā！阿母，你家己chiah是奇怪leh。」
「你真是感觉迟钝ê gín-á，你应该知影ā。我是问你有关婚姻ê tāi-chì，若有适当ê人，你愿意无？」
「Oh，若有适当ê人....m̄-koh，我ê目chiu án-ne，我无beh考虑结婚ê tāi-chì lah。」
Cha-bó͘-kiáⁿ án-ne ê回答消除玉帘心内ê不安。她是teh期待这，她忽然感觉轻松起来。
「是oh，若是像阿母chit种无意义ê婚姻，颠倒家己一个人khah轻松koh幸福。Án-ne，农场hit-ê青年，你感觉án怎？」
玉帘án-ne问，她teh等cha-bó͘-kiáⁿ ê回答有一两秒久。Tú-chiah ê安心只不过是瞬间而已，ná亲像日头tī云层之间仓仓pōng-pōng teh出入ê时，hit-ê不安忽然koh再出现；无希望cha-bó͘-kiáⁿ hō͘ 伊娶去ê心，kah希望cha-bó͘-kiáⁿ嫁hō͘ 伊ê心，teh激烈战斗。
「我mā认为伊人温厚老实，一定bē bái。」
显然伊是ē-tàng hō͘ cha-bó͘-kiáⁿ幸福ê人；玉帘想讲伊hiah-ni̍h吸引她ê事实to̍h是siōng好ê证据。Án-ne，她tī社会上ē-tàng成做一个好老母，m̄-koh....。
「只是因为伊ê家境无好，可能有teh phah算。昨昏趁阿妈做大寿，伊有送礼来，想beh巴结咱，chit点有小khóa hō͘ 人无满意。」
玉帘án-ne teh iah伊ê缺点。伊若kah别个cha-bó͘ gín-á结婚，玉帘iáu ē-tàng忍受，m̄-koh，若是beh kah她ê cha-bó͘-kiáⁿ结婚，kám m̄是会永远tī她ê心肝头吊一粒重铅？
「Ah，美圆，你认为án怎？为啥物m̄讲话leh？迟钝ê gín-á，阿母teh问你，你是有kah意á无？」
「M̄-koh，chit种tāi-chì....。阿母，你thiau故意teh kā我为难。」 美圆真pháiⁿ势，就án-ne走离开。玉帘感觉她一下to̍h加老十岁。
庆祝阿娇ê大寿闹热五工，ná亲像m̄知tang时chiah烧会尽ê大蜡烛，火焰一直真大。Tī陈家厝头前搭ê戏台，日暗lóng teh演歌á戏，尤其是暗时，观众kui大阵集oá来，点电土火ê食物担á mā来。戏台顶ê歌á戏，á是铜锣、大鼓、鑱（chhîm）kah弦á ê伴奏，场面非常闹热。厅堂内宴席当teh热场，一桌chē八个人，厝内排五六桌已经满满，致使桌á tio̍h排到庭院。一百个、二百个ê宾客，一时无法度lóng同时招待，结果是分做几nā日请客。
阿妈阿娇ê胸前pín荣誉ê绿绶褒章，每暗tī宴席中露面，向宾客致意。她每pái lóng感动kah流目屎。她iáu会记得已经是十五六年前ê这件tāi-chì：Hit年ê元宵节，厝里ê鱼池出现一只迷路ê大龟，大家大闹热一chūn。她认为he是陈家兴旺ê好兆头，果然是无m̄-tio̍h。Hit只大龟hông放tńg去大海ê时，她kah-ná真m̄甘teh对大龟讲：我家己年岁大ā，准讲你koh再来到陈家ê鱼池，我mā无可能koh看tio̍h你，m̄-koh，我有真chē kiáⁿ孙，你就做chit家伙ê守护神好lah。了后，丈夫阿山往生，m̄-koh，家己活到chit-má，大家teh庆祝她ê七十大寿。Kiáⁿ孙随人lóng有成就，cha-po͘ ê去读大学，cha-bó͘ ê teh beh出嫁。孙á辈ê gín-á lóng来宴席答礼，招待宾客；大房由清子，二房由美圆kah她ê兄弟，三房ê长男阿明去tī台北读册，所以由伊下面ê gín-á出来招待。Kah-ná bat有过ê兆头án-ne，tùi她ê树身生出真chē枝叶。Ē-tàng看tio̍h陈家hiah-ni̍h繁荣，感觉死mā甘愿ê阿娇，无有比这koh khah幸福ê lah。
只有一点，chit-ê老妇人kah-ná bē记得她hit当时对众kiáⁿ儿所抱ê观念：长男清文扰乱家庭ê秩序，三男瑞文lán-si无beh做tāi-chì，她相信只有次男景文chiah是siōng可靠koh有孝。总是，她chit-má ê看法有一点á改变ê款；这可能是老人ê健忘症，á是心境ê变化。总讲一句，老母无koh再kah以前仝款肯定伊ê做法这hō͘ 景文感觉真无趣味。宴席上一直成做话题ê是清文ê陈清公司；准讲是讲tio̍h in小弟瑞文ê长男阿明，伊ê头脑好，气质koh bē bái，是一个有前途ê青年，所以做老父ê 就有自信kah自夸来应对。只有景文hō͘ 人问起ê时，伊无一项thang hō͘ 伊感觉得意ê tāi-chì。Tī东京读大学ê长男景仁是一个放荡子，到taⁿ一直hō͘ 父母种种ê烦恼；最近koh kha̍p-tio̍h一个不良女子，向厝里索取大笔金钱；iáu有cha-bó͘-kiáⁿ美圆kah农场监督ê亲事谣言，mā造成景文ê困扰。
第三暗ê宴席，游德仁受邀请赴宴，伊一直是惊惊惶惶bē-tàng镇定ê款。景文无欢喜，m̄-koh mā是无办法。Chit-ê脚siàu想beh得tio̍h我ê cha-bó͘-kiáⁿ，伊认为亲事已经讲好势à。游德仁是一个惊见笑ê人，若hō͘ 人讲tio̍hê时，伊kah-ná否定koh kah-ná无否定，tī嘴内含含糊糊回答，真pháiⁿ势ê款，这已经是准kiáⁿ婿ê证据。美圆去到伊坐ê hit桌敬酒，她显然有意识tio̍h chit项tāi-chì，她m̄知beh án怎chiah好。想起来，实在是真奇妙ê tāi-chì，这是做老父ê景文起先料想bē到ê tāi-chì；taⁿ发展到chit-ê地步，这究竟是siáng án-ne做ê neh？是玉帘，是她m̄好。
Tio̍h lah，chit件婚事tio̍h ài决定。这是玉帘teh自做孽；hit-ê人若做她家己ê kiáⁿ婿，她kám是会痛苦一世人？这是她无kā丈夫看在眼内ê siōng好报应。好，chit-má是siōng好ê机会，今暗tio̍h来宣布婚约。
「来，游先生，咱来干一杯！」
景文行到游德仁hit桌。伊ê目箍（kho͘）红红，露出微微á醉ê欢喜款，但是心中却是kah平常时无仝；伊一直无法度冷静落来。
「真失礼！我有话beh kah你讲，请你小过来一下，kám好？」
景文phak tī游德仁ê耳孔细声讲，游德仁直觉：该来ê tāi-chìsoah尾就来ā。伊就án-ne tòe景文去teh演歌á戏ê外口。
景文从来m̄-bat有过chiah-ni̍h恶毒ê心情。Tú-chiah伊行向游德仁hit桌ê时，玉帘tī厅堂ê大门，她一直不安惊惶koh面色苍白teh注意景文，但是景文无发觉tio̍h，所以伊beh报复ê激情lóng无转温和落来。伊怨恨in bó͘，只是án-ne niā-niā。不管hit-ê脚siàu是啥人，mā不管cha-bó͘-kiáⁿ会有幸福á是无幸福，伊lóng无想tio̍h chiah-ê；伊只是对玉帘ê怨恨成做一把火，to̍h起来；伊从来m̄-bat chiah-ni̍h怨恨过in bó͘。反tńg来讲，伊一向kám m̄是lóng hō͘ in bó͘ 拘束？Kám m̄是lóng为in bó͘ teh设想？虽然伊ê心内有án-ne teh反问，m̄-koh，伊ê反省tio̍h到khah后来chiah会发生，今暗伊ê欲望kan-taⁿ想beh hō͘ 玉帘痛苦。伊chit-má beh问游德仁ê心意，伊若是同意，景文就beh随时tńg去宴席，向大家宣布游德仁kah美圆ê定婚。伊to̍h是chit-ê意思chiah kā对手叫来外面，m̄-koh，m̄知啥物原因，景文却恬恬，gāng-gāng tùi观众ê后壁teh看戏台。
景文讲是有tāi-chì beh对伊讲，kā伊叫出来外面，却一直恬恬m̄讲话，游德仁就起tio̍h急。景文看出对方ê心情，这比看戏台顶小丑á ê动作koh khah趣味。因为一时ê感情激动，忽然chhìn-chhìn-chhái-chhái决定behán-ne做，家己chit种ê做法，想起来kám m̄是koh khah笑诙？Cha-bó͘-kiáⁿ ê婚姻可能会hō͘ in bó͘感觉痛苦，mā hō͘ hit-ê cha-po͘人成做受因果报应ê人，m̄-koh，tùi另外一方面来看，本来想讲in bó͘会陷入痛苦，m̄-koh，无定tio̍h m̄是痛苦，颠倒是hō͘ 她感觉tio̍h花ê美丽kah芬芳经常tī身边ê快乐leh。总是，结果会án怎neh？景文tī chit种混乱ê心情中，伊iáu是失去最后ê理智。游德仁确实是专科学校毕业，个性温柔koh老实，m̄-koh，伊想beh成做陈家ê kiáⁿ婿，恐惊是有phah算tī-.leh，伊ê目的显然是在tī财产；准讲m̄是án-ne，对方ê家境真sàn-chhiah，kah陈家并无sù配。所以，景文自开始根本to̍h无kā伊kah美圆ê婚事当做一回事。这bē-sái得，这无可能，伊对家己án-ne下令。到chit种地步，伊iáu ē-tàng对真正ê家己忠实。
「请问有啥物指教？」
游德仁忍bē-tiâu án-ne问。
「Ah，是ho͘ⁿh，戏soah kā我吸引去à。人生ná戏，你讲是m̄是？Ngh，我想beh讲啥物？Kah-ná有一点á走精去。」
景文假做m̄知。游德仁却认为伊心内有数，thiau故意kek án-ne来kā伊戏弄。
「我认为我kah府上不配....。」
「你讲啥物？是teh讲kah阮cha-bó͘-kiáⁿ ê婚事oh？这真正是奇怪ê tāi-chì，你是tùi tó位听来ê谣言？」
「你beh kah我讲ê kám m̄是chit件事？」
「Oh，是为tio̍h chit件事。总是，照你tú-chiah讲ê，凡事若无sù配，kám m̄是会无趣味？Ah，hit-ê演员出来à，你看！」
景文用目chiu表示，叫伊看戏台顶hit-ê乌须英雄讲：
「像讲hit-ê做戏ê河原乞食，伊ê价值无三sián钱，m̄-koh，伊所戴ê嘴须却值四sián钱，这是无thang辩解ê事实。」
景文用灯笼á kah吊钟ê譬喻来kā伊暗示了后，就kā hit-ê gāng去ê青年放leh，赶紧走入去厝内。
