《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十四章（更新版）
作者 庄司总一着 赖永祥指导 林俊育台译 2017.04.16
Tī女子中学ê校园有劳动服务ê时间，四界lóng有几个人做伙khû-.leh teh挽草ê学生。已经是十月天ā，m̄-koh，一丝á秋意都无；无同情心ê日头lóng无留情，kā hiah-ê少女曝kah乌sô-sô。
清子chit-má kah in老父生做koh khah仝款，身材koân，m̄-koh瘦koh软弱ê身体大概是传承tio̍h in老母。所以，tī体操kah劳动服务ê时间，她tiāⁿ-tiāⁿ申请免参加，一个人tī树荫下歇困，静静teh看「岩波文库」之类ê册。
「Oeh！陈同学，你生做hiah大汉却hiah lán-si，你头脑好to̍h感觉了不起hio͘h？你chit种无认真ê心态，kan-taⁿ成绩好有啥路用？」
清子受tio̍h新任体操老师ê误解kah侮辱以后，她决心死mā beh参加劳动服务。清子体材koân大，虽然有khah瘦，m̄-koh，无虚弱ê款；所以，tī老师kah同学眼中看起来，她无beh参加劳动服务，是因为骄傲kah lán-si。其实她若硬参加，了后ê一两工to̍h无法度来上课。若讲她是身躯有啥缺陷，医生koh诊断bē出有啥毛病。所以，清子家己认为她ê身体无适合台湾hiah-ni̍h炎热ê天气。事实上，tī冬天寒冷ê季节，她ê身体情况to̍h非常好，m̄-koh，chit种爽快ê气候，一年总共只有三个月niā-niā。她对家己成长tī chit-ê殖民地ê奇异反感，其中之一ê原因to̍h是chit种生理上bē适应所引起ê。
清子生日hit工，老母讲今暗beh kā她做生日，叫她chhōa几个á同学来厝里食饭。清子无法度决定beh邀请tó几个；平常时做伙chhit-thô ê同学虽然有几个，m̄-koh，她真正ê好朋友却无半个。
老母叫她chhōa几个á同学来厝里食饭，m̄-koh，清子感觉mài请任何人，一个人kah双亲tī厝里过十六岁ê生日mā bē bái ā。若是阿明tī厝里，她一定beh请伊，阿明mā一定会欢喜来为她庆祝生日；只有阿明会kah她同欢喜同悲伤。阿明对她了解kah清清楚楚；记bē起来是tang时，阿明bat对她讲：「Oeh！Chiok好neh，你ê面有猎户星座teh闪sih！」清子去照镜详细看，她看tio̍h有三个雀斑整齐排做伙。她家己lóng无发见tang时生雀斑，因为真微细，所以连家己都无发见，m̄-koh，阿明却早to̍h发见。阿明实在真可怜，伊写几张phoe hō͘ 她，她lóng无读tio̍h。Cha-bó͘-kán-á讲phoe是hō͘ 老父没收ê；若是老母án-ne做，她一定会极力争取the̍h tńg来，m̄-koh，因为是老父没收ê，她就无想beh露出她ê缺点....。
「怜子，你今暗kám有闲？」
清子对chit时行oá来ê一个同学讲。她为啥物专工beh邀请chit位同学neh？清子家己mā bē清楚家己ê心态；柏木怜子m̄-nā m̄是她siōng好ê朋友，tī班上koh是竞争ê对手。
「啥物？陈同学，我ta̍k工lóng有闲，我tńg去厝里了后，真少写学校ê功课。」
Chit位同学一开嘴to̍h露出她ê对抗意识。柏木怜子是一位高级官员ê cha-bó͘-kiáⁿ，成绩好，人koh súi，tī班上真有人缘。M̄-koh，她自入学以来，成绩m̄-bat有一年超过清子。这大概hō͘ 她感觉真遗憾，所以每pái考试ê时，她ê面色苍白，可能是因为父母有teh kā她督促鼓励ê款。尤其是颁奖典礼ê时，清子lóng是受奖者ê代表，怜子ê老父穿礼服坐tī来宾席，koh khah ē-tàng发觉她ê心情无好。清子并m̄是有意beh kah她竞争，m̄-koh，若是免输她却来输她，自尊心bē允准清子án-ne做。怜子真少kah清子讲话，若讲tio̍h啥物，lóng是带有khau洗ê语气；像讲：清子in tau ê cha-bó͘人虽然真致意外表ê打扮，m̄-koh m̄知tùi tó位带来ka-cháu，kui厝里ê人lóng被咬；清子ê阿叔是chit-ê城市算有tio̍h ê好额人，却从事污秽ê臭行业等等。怜子提起清子ê阿叔景文ê事业，thiau故意大声讲hō͘ 清子听tio̍h。
清子无tiuⁿ-tî去邀请怜子，她mā无方便kā话收tńg来，就讲：
「今á日是我ê生日，你若肯来....。」
「Ah，是án-ne oh？多谢！Kám是beh去lín tau？生日mā一定tio̍h盛大庆祝oh！婚礼kah丧事都lóng hiah-ni̍h chhia-giâ ā。」
清子听了，真受气。班上ê同学lóng叫她「清子」á是「小清子」，只有怜子叫她「陈同学」。她ê话内底有含意，她chit-má ê讲法to̍h是teh嘲笑：Lín tau kui家伙iáu teh过旧ê pháiⁿ风俗生活，到taⁿ iáu kan-taⁿ热心喜庆á是拜拜；她甚至连丧事都讲出来。清子chit-má chiah发觉家己邀请chit-ê同学ê用意：怜子从来to̍h m̄-bat去过in tau，她想beh hō͘ 怜子看in tau ê文化水准ê程度，所以chiah会趁她无意中来kā她邀请，想beh hō͘ 她看māi-á leh。今暗tio̍h叫老母加准备kóa好食ê料理；koh hō͘ 她看支那ê陶器，kā她讲这是「万历赤绘」，总是她听了mā m̄-bat；mā beh用电唱机放「贝多芬第九交响曲」hō͘ 她听；清子koh想beh穿长ńg ê和服来弹钢琴....。
清子无意识中涌起kah怜子抗争ê心，就án-ne beh kā她giú来到厝里。
「Ngh，只是小小ê庆祝生日，m̄-koh，怜子若ē-tàng来，我会真欢喜，你kám m̄是当teh学弹小奏鸣曲？我真想ài听你弹。Án-ne，你beh来ho͘ⁿh？」
「是ah，我想看māi leh。M̄-koh bē-sái neh，阮老父真罗嗦neh。」
Chit-ê同学自开始to̍h无意思beh接受邀请，她拒绝ê理由koh是因为双亲真罗嗦，其中ê意函真深。
清子hngh-hngh teh冷笑。她tńg到厝，chit-ê笑影iáu未消失，看起来颠倒有啥物欢喜ê tāi-chì。生日当然mā欢喜；所以in老母安子mā án-ne感觉。M̄-koh，是清子家己kā家己生日ê星光chhòng暗去，她感觉悲哀，所以她teh笑；tī欢喜ê时，她颠倒无显示啥物欢喜ê笑容，这是她ê毛病。
「小清子，你今á日去穿hit领台湾衫，bē bái neh。」
In老母án-ne建议；几工前tú做好ê乌色长衫，真合清子瘦抽ê身材，实在真súi；年轻ê少女穿起来，会比穿笨chhiâng ê和服khah爽快。
「我看你顶pái穿kah真合躯。我若有kah你仝款ê身材，会常常穿台湾衫，m̄-koh，chit-má已经有khah大kho͘ ā。」
「我无想beh穿，我穿kám真正有合躯？」
「有lah，lín阿爸iáu m̄-bat看过你穿neh。」
「无ài lah，我穿he kah-ná是支那姑娘。我mā无像阿母hiah súi。」
「我已经是老古董ê妇人人面，我真kah意你chit种意志坚定ê现代女子ê面。」
「我无kah意家己ê面，鼻á短，面形圆liàn-liàn。我无ài穿类似支那服ê衫lah。」
清子虽然嘴án-ne讲，m̄-koh，她知影若穿类似支那服ê衫，siōng ē-tàng清楚显示她ê个性。如果她是日本人，她会穿；he kah-ná是一种ê欣慰kah趣味，á是ē-tàng改变一下á心情。总是，chit-má ê情形无仝；虽然穿台湾衫kah她ê个性一致是无话讲，m̄-koh tī她家己感觉一半适合一半无适合ê观念之下，她soah陷入莫名奇妙ê偏见kah迷失；讲穿和服，她mā是有chit种ê感觉。
「Án-ne，beh穿tó一种chiah好？」
「Iáu是穿新做ê hit领，阿爸 一定会kah意，伊iáu m̄-bat看过你穿neh。」
「M̄-koh，我iáu是无beh穿hit领，因为同学会来，我感觉pháiⁿ势pháiⁿ势。」
柏木怜子m̄来，清子就邀请另外两位同学。她感觉竞争心强ê同学来chiah有趣味，taⁿ只有极其平凡ê同学来，清子有一点á bē起磅；beh穿啥物衫，á是beh做啥物，她lóng免伤脑筋，mā bē感觉pháiⁿ势。她无beh穿台湾衫，kan-taⁿ因为老母讲án-ne会hō͘老父欢喜；老母用chit-ê理由一直teh劝她穿，hō͘ 她感觉是屈身teh求得人疼，所以她tī无意识中就起反抗ê心。
清子穿长ńg ê和服，he是紫色底有菊花ê花样，腰带是用金银织ê车轮形。 受招待ê hit两位同学看tio̍h清子ê美丽穿插，惊叹kah o-ló讲：「根本to̍h kah-ná是公主leh。」
「Mài à lah，lín mài án-ne teh kā我chîn。我本来无想beh穿chit种衫，长lòng-sòng，腰带koh ân，真bē爽快neh。」
「M̄-koh，真súi neh，iáu是和服khah好。」
「阿姆真有日本气味neh！」
两位同学án-ne讲。
「阮老父mā是仝款。」清子补充讲。
「Tio̍h ho͘ⁿh，我从来m̄-bat看过lín老父穿台湾衫neh。」
清子就án-ne用理所当然ê口气讲：
「我mā m̄-bat看伊穿过，伊无ài穿hit种衫，lóng穿西装á是和服。」
总是，讲绝对m̄-bat穿是teh讲白贼，讲老父bē ài穿台湾衫是真ê；m̄-koh，厝里ê祭祀kah喜庆ê时，她bat看过老父穿台湾礼服。
清子一点á都无需要装好看头á是采取假仙ê做法，因为西道子kah岛田豋枝常常来陈家chhit-thô。In kah清子家己所体验ê仝款，不管hit两人tang时来，清子ê厝lóng hō͘ in充分感受tio̍h日本内地ê气氛。高雅ê客厅，装饰台顶时时有插花，有时清子ê老母koh会泡茶hō͘ in lim。比较起来，in ê厝是kā有白蚁蛀过ê台湾厝改建，koh铺tha-tha-mih而已；in ê家庭是teh过koh khah有台湾味ê生活。道子ê老父是一间金融公司ê职员；豋枝ê厝经营一间无大间ê杂货á店。Chit两位同学ê家境虽然m̄是sàn-chhiah，m̄-koh，mā m̄是富裕；两人lóng欣羡清子ê家境。清子ê家庭富裕，koh有高尚温和ê父母，á清子家己koh有非常超群ê好头脑，画图kah音乐mā是无人kah她会比得。就混（lām）血ê条件来讲，并m̄是ná东洋人kah西洋人ê混血，她kah台湾人ê外貌真相siâng，显然无啥物复杂ê感觉。道子kah豋枝是tī台湾出世ê日本人，in lóng感觉家己kah日本内地有割bē离ê奇妙感情。
「清子，你毕业了后ê升学学校kám决定ā？Kám是beh去读女子美术学校？Á是读音乐学校？你ê英文á是国文lóng真好，究竟是beh读tó一系，á是beh选择啥物学校，lóng真伤脑筋ho͘ⁿh？」
道子是一个性情温和ê大kho͘ cha-bó͘ gín-á，挂银框ê目镜，虽然有一点á随便无够稳重，却是心地善良ê好人。她佩服理智koh冷静ê清子，经常tòe-tiâu清子。另外hit位豋枝，她ê身体瘦，恬恬无嘴尾，鸡卵面kah-ná gín-á hiah天真。M̄-koh，tú-chiah道子是用尖叫ê声teh án-ne讲，颔颈瘦抽ê豋枝却细细声á讲：
「Án-ne真好，我neh，无一项ē-sái得，根本无可能hō͘ 我去日本内地ê学校读册。」豋枝真欣羡án-ne讲。
豋枝有九州ê口音，听起来怪怪。M̄-koh，教育ê普及kah有声电影ê发达，读正确ê语文kah视听学习ê机会jú chē，台湾已经采用标准语化ê关西腔。敏感ê少女对殖民地ê语言有自我意识，koh再对殖民地语言ê性格有产生作用tī-.leh。 「乌白讲，我知影她是因为未来ê丈夫已经决定ā。」
道子一下kā她ê tāi-chì讲破，豋枝ê面变kah红kòng-kòng，她摇头极力辩解讲：
「道子乱讲，她乌白讲lah。我m̄知lah。」
清子听tio̍h mā惊一tiô；chit-ê瘦抽koh薄板ê cha-bó͘ gín-á已经有未婚夫ā ，清子感觉好笑koh可怜。
「Ah，重大ê新闻，án-ne，未婚夫是tó位ê人？」
豋枝kah-ná受tio̍h侮辱，恬恬koh头lê-lê。道子无了解她ê心情，代替她讲：
「伊tī市内ê一间机构工作。豋枝tio̍h继承杂货á店ê经营，所以tio̍h紧招kiáⁿ婿。因此，唱了「青青校树」ê毕业歌，马上to̍h是结婚进行曲。后年春天，学校ê木棉花开花ê时....我想tio̍h to̍h真感伤。M̄-koh，清子，chit项tāi-chì bē-sái对别人讲，tio̍h保守秘密oh！」
道子半kún笑án-ne说明。Kah-ná iáu未熟ê果子ê豋枝，目屎含leh，强beh哭出来ê款。清子同情她，用有一点á指责ê口气对道子讲：
「M̄-thang欺负弱者。我若是án-ne hō͘ 你戏弄，我会kah你绝交oh。」
「Ah，惊死人！」
「当然，豋枝m̄是家己ài招kiáⁿ婿。我知影，无人ē-tàng照家己ê意思来行。你kan-taⁿ会晓讲别人ê tāi-chì，你家己neh？听讲你毕业了后beh进入女装裁缝师ê行业。
「Ngh，成做职业妇女。我不得不tio̍h án-ne，he是面包ê问题。」道子无lam无neh án-ne讲。
因为清子责备道子，所以豋枝控制家己，无哭出来。她chiah gia̍h头，m̄-koh，她iáu是怨叹家己kah人bē比得，就欣慕道子讲：
「M̄-koh，道子，你bē bái，你ē-tàng去日本内地ā。」
「He是暂时ê幸福lah，无久tio̍h koh tńg来台湾。阮tī日本内地已经无近亲ā，真无意思。」
「阮家族tī台湾已经有前人ê墓。」
「真郁卒ah，人生四界lóng有墓地。日本内地ê秋天真súi neh。清子，你bat去过日本内地两pái ho͘ⁿh？我kah豋枝lóng m̄-bat去过neh。」
「我真想beh去neh。看tio̍h清子穿长ńg ê和服，我真感伤。」
豋枝kah道子同时看tio̍h清子ê美丽身影，这m̄-nā是单纯出tī嫉妒á是欣羡，koh是看见家己淡薄á ê乡愁。
「Tùi咱chiah-ê tī台湾ê日本人看起来，hia是咱ê故国山河。」
「这是湾生ê悲哀。」
两个少女外表显出ê只是kún笑ê口气，in无真清楚ê内心却是teh吐气。「湾生」是台湾出世ê日本人ê俗称，chit-ê词汇带有一点á怜悯kah轻视。道子kah豋枝lóng是湾生ê cha-bó͘ gín-á。道子ê父母来台湾已经二十五年ā；来台ê时to̍h讲：马上就beh tńg去日本内地，马上beh tńg去。结果in却tī chit-ê土地生根；准讲chit-má tńg去，若beh chhōe维持生活ê头路，in mā已经来到无自信ê年龄。豋枝in厝里ê人koh khah早来台湾，四十年前日本占领台湾了后无gōa久，in阿公to̍h来到chit-ê南方ê台湾岛；豋枝tī chia已经是第三代。她koh无gōa久to̍h beh招kiáⁿ婿，对chiah-ê人来讲，chit-ê殖民地已经是in ê故乡。M̄-koh，in又koh想beh否定chit-ê事实，意识中iáu有一个真正ê故乡tī远远ê所在，这致使in ê感情bē调和。台湾已经m̄是以前ê台湾，chit-má ē-tàng gia̍h头挺胸，大步行路；tòa tī台湾kah tòa tī日本内地已经无啥差别；若beh去日本内地随时to̍h ē-tàng去，beh来往几pái mā lóng ē-sái。总是，第二代ê湾生有一种奇妙ê乡愁，he m̄是一种oh得忍受ê强烈怀想，却是kah-ná tùi厌倦生出ê悲哀。故国山河，有幸tòa tī hia ê人，in认为to̍h是东京；其实并m̄是真正有形ê东京á是大阪，是koh khah「笼统」ê，大概是想beh tńg去殖民地化以前原本ê家己，是tī无意识中产生ê一种叛逆ê心态。
食了种种好食ê料理以后，两个受邀请ê同学请清子弹钢琴，她就弹Sio-pháng（译注：Chopin，1810~1849年，波兰作曲家）ê《梦幻曲》。清子并m̄是为tio̍h in ê心情来选曲，是因为这是她最近chiah teh练习ê曲。
清子弹琴ê中间，音乐ê节奏ná亲像悲哀ê波浪teh滚绞起泡。日本内地，日本内地....；chit两位同学m̄知它生做啥款，因为in m̄-bat看过；m̄-koh，清子小khóa知影。
她想起小学ê时，老母chhōa她tńg去外家。Hit时，大风雪吹kah窗á门枋ko̍k-ko̍k响。因为kā窗á门枋关起来，所以厝内无光线；日时虽然有日头，内面mā是暗bîn-bong，人tī hit中间生活，感觉真tâm湿；火炉teh烧柴，闪sih ê火光hō͘ 室内有一kóa光线，而且看起来kah-ná有teh kā湿气烘ta。Gín-á kā马铃薯khǹg入去火炉内ê火hu里pû，pû马铃薯the̍h tī手里，se̍h-se̍h-.leh了后chiah食。暗时，tī暗淡ê灯火下面食柑á，hia ê柑á细粒koh酸。In kā几块á煎饼用针穿起来，吊teh sńg；庄脚gín-á teh sńg chit种简单ê游戏，sńg kah真欢喜。无铺地板ê室内土脚亲像砂糖ê色，koh阔bóng-bóng。有人tī土脚铺草席á，tī hia teh搓(so)索á。房间ê边á to̍h是马寮，暗时听会tio̍h马ê鼻孔teh喘气ê声，这一切lóng无啥趣味。行出门外，厝顶垂落来ê冰柱，用棍á一phah，to̍h hoa-la hoa-la lak落来；kā雪chhòng做一团，用红豆装做目chiu，用山茶花装做耳孔，做成一只兔á ê形状。
「Ai-ah，真寒neh！Kám hiah-ni̍h有趣味oh？」Hiah-ê gín-á对清子sńg雪ê经验感觉真不可思议，清子家己mā无感觉真有趣味，m̄-koh，m̄知为啥物，ná会想beh tòa tī hia？她想tio̍h老母双手合十，tī祖先ê像头前teh哭；这to̍h是老母ê厝，老母ê故乡，m̄-koh，对清子来讲neh？清子án-ne teh想。
对清子来讲，这kám是她ê故乡？M̄是。她身心所体验tio̍h ê是：阿公阿山ê葬式，á是厅堂挂leh ê新娘灯，á是庙祭kah弦á ê声；这to̍h是她ê故乡。M̄-koh，她koh感觉mā m̄是；这是gōa-ni̍h-á矛盾ê心理？
Chit两位同学大概是感觉tio̍h日本人tī台湾出世ê郁卒，m̄-koh，安子想讲家己连湾生都m̄是；我既然是日本人，又koh是台湾人，这等于是讲我m̄是日本人，mā m̄是台湾人。Chit两个ná亲像是oh得调和ê水彩色料，lóng无法度调配出清爽ê好色彩。
Chit两位同学ê心内有in ê故乡，hit-ê故乡tī遥远ê所在，茫茫渺渺，mā有可能是虚幻ê，m̄-koh，in ē-tàng想像，koh ē-tàng去走chhōe；有时像chit首优美ê音乐飘出ê乡愁，有一点á病态ê心灵。总是，家己neh？清子想tio̍h家己所感受ê是莫名奇妙ê不安kah无趣味；有一点á bái，ná亲像bē协和ê音乐。 弹完chit首，同学phah pho̍k-á，要求她koh弹一首。音乐真美好，清子感觉心情tháu放，兴趣满满。然后，in三人就开始ī khe-chi-bang（译注：「扑克牌游戏」ê一种），气氛就án-ne闹热起来。
「Ah，lín teh ī khe-chi-bang oh。」Chit时，清子ê老父满面笑容行入来。
清文穿台湾式ê礼服；伊去赴某一个名门世家ê宴会，tú-tú tńg来。清子tú-chiah kā同学讲in老父绝对bē穿chit种衫裤，她从来m̄-bat tī同学ê面前hiah-ni̍h pháiⁿ势过。因为心理作用，清子感觉同学lóng露出不可思议ê表情。她chit-má chiah后悔，ná会无beh穿hit领台湾衫来hō͘ in老父欢喜？老母劝她穿ê时，为啥物她无beh听老母ê话neh？而且老父ná会今á日特别穿chit种衫裤？这kám m̄是伊事先设计好势ê报复手段leh？
清子soah同时怨恨chit两种衫：她家己穿ê长手ńg ê华丽和服，kah老父chit-má穿teh ê台湾衫。
