《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十三章（更新版）
作者 庄司总一着 赖永祥指导 林俊育台译 2017.04.09
清文chit-má tú-tio̍h一个真大ê困难。
因为伊已经kā郭万春辞头路，所以必须赶紧chhōe一个适当ê人选，若无，机械ê运转会bē顺序，而且，今年到明年公司ê业绩是伊事业成长ê关键；已经每年连续赤字，chit时若无来一个快速ê成长，公司koh khah会产生危机。伊ê资产已经大部分lóng投入，为tio̍h beh弥补亏损kah期待今后ê发展，公司已经进入需要贷款ê状态。清文心内ê不安渐渐扩大起来；án-ne继续落去，会án怎leh？清文想讲家己无适合经营事业，有时会感觉tio̍h难堪ê后悔，á是心情疑惑。Chit时，伊一定有产生想beh反驳kah对抗小弟景文ê意识。
景文以前从事ê稻米买卖，tī收音机出现了后to̍h停止，改做经营杂项ê买卖商业。Tāi先，伊siōng大ê收入是约二十甲ê鱼塭；鱼塭kah田地无仝，池á内饲ê虱目鱼、鲢鱼á是鲤鱼ê数目有几万尾，oh得以面积来推测，所以税金ê核算bē真严格。Tùi盐田，伊mā有得tio̍h利益；而且koh tī三年前，开设海产批发店，kah对岸ê福建交易，mā有thàn钱。Án-ne应该是已经有够额à，m̄-koh，会thàn钱ê seng-lí，伊lóng mî-nóa去做；若有两台货车ê拍卖俗物出来，伊to̍h kā它买来，koh当做三台车ê货卖出去。伊koh kā几间老旧teh出租ê房屋买来，mā是得tio̍h真好ê利纯。景文án-ne经营种种ê行业，事业无论大细lóng有thàn钱；其中有一个听起来to̍h hông感觉无好听ê，是伊接受别人让渡hō͘ 伊ê处理屎尿ê权利，当伊去做hit-ê行业ê社长ê时，连无关心丈夫事业ê玉帘都受气。 Chit种无顾体面，kan-taⁿ顾thàn钱，koh精神旺盛ê商业根性，只有tī hit-ê行业锻炼过ê人chiah有hit-ê本事；生手koh受过教育ê人，无论如何都做bē来。清文tī经营方面无beh kah景文竞争，m̄-koh，对景文ê坚强精神，伊kan-taⁿ怨叹kah伊bē比得。清文当然有伊真koân ê理想，这是in小弟所无ê，mā是伊连想都想bē到ê理想。总是，chit种理想，若是经营失败，就会kah-ná美丽ê彩虹消失去，这是无可奈何ê事。景文问清文讲：
「阿兄，经营方面近来án怎？」
景文án-ne问起；伊有可能m̄是teh khau洗，m̄-koh，清文听起来感觉m̄是好滋味。伊tú beh开始凤梨罐头事业ê时，景文teh阻挡伊ê忠告，一幕一幕浮起来伊ê脑海中。景文极力teh kā伊苦劝；伊并无讲阿兄m̄是创业ê料，mā无耻笑伊ê美梦真戆，伊kan-taⁿ讲：从事hiah-ni̍h大ê事业，若bē顺利，he并m̄是阿兄一个人ê问题，却是关系tio̍h陈家全家ê浮沉，所以tio̍h慎重考虑。在tī景文来讲，这是伊罕得看tio̍h ê认真态度；而且hit时景文不断teh kā清文苦劝kah阻挡，m̄-koh，清文kā伊sak开，讲：你掠准我若事业失败会去求你hio͘ h？做你放心，我死mā bē kā你讨饭食。清文bat án-ne讲大话，所以，对清文来讲，若是事业失败，实在是真无面子。
清文近来tiāⁿ-tiāⁿ teh tiak算盘，用真chē心神teh关心农场ê收成á是工厂ê效率。伊研究劳动时间ê延长，á是工资ê减少，á是各种经费ê节省；虽然是不得已chiah tio̍h án-ne做，m̄-koh，mā是tio̍h kah当初ê理想倒páiⁿ来行。这虽然是暂时ê措施，m̄-koh，chit种不得不tio̍h违背家己意志ê tāi-chì，hō͘ 伊感觉真无奈。 Hiah chē年来，清文ê心情m̄-bat hiah-ni̍h bái kah ài嫌东嫌西。最近所发生ê清子thiau故意逃避伊，以及安子对chit件事ê说明方法，lóng hō͘ 伊感觉无欢喜；因为伊ê心情无法度开朗，kui个家庭mā lóng欠缺光明。
安子ê心情mā是真bái。
Hit暗，安子kah cha-bó͘-kiáⁿ沟通了后，她peh起lih清文ê册房，想beh kā实情kah cha-bó͘-kiáⁿ ê心情对清文讲明，m̄-koh，她一时失去勇气，soah讲是因为月经ê关系。M̄-koh，隔tńg工，清文听tio̍h清子亲嘴讲m̄是án-ne，soah hō͘ 伊koh khah陷入双重，甚至三重ê无爽快。
「安子，昨暗你ná会讲hit种无聊ê白贼话？」 清文已经真久无chiah-ni̍h激烈teh责备in bó͘ à。伊koh继续发脾气讲：
「咱已经结婚beh二十年ā，你iáu-koh án-ne teh对外掩盖tāi-chì。」
「真失礼lah！我m̄是beh掩盖tāi-chì；hit当时我to̍h m̄知beh án怎解说chiah好，所以soah无意中讲出hiah-ni̍h无应该ê话；何况，你hit时kah-ná teh哭....。」
「我感觉真遗憾；我无ài人kā我同情。」
「Ai-ah！He m̄是同情，我m̄是teh kā你同情。Beh án怎讲chiah好leh？我m̄免加讲，你应该mā真了解。咱三人ê心底lóng互相真了解，因为我有án-ne ê同感，所以....。」
「若是án-ne，你ná tio̍h用hit种奇怪ê藉口？」
「是án-ne oh，我真kē路，真无应该。」
「你讲是腹肚内lóng无án-ne想，你想讲我若m̄知就准tú好；你实在真gâu。你kám无想tio̍h受骗ê我会án怎？」
「我m̄是beh kā你骗，m̄-koh，我却hō͘ 你想做是án-ne....。」
「你家己无想beh kā我骗，m̄-koh，你ê想法是teh sēng gín-á，án-ne hō͘ 我真伤心。讲tio̍h hit本日记，你讲是无写啥物pháiⁿ事，所以就单纯决定kā它留落来，结果soah hō͘ cha-bó͘-kiáⁿ有机会读tio̍h。Hiah-ê已经是过去ê tāi-chì，无要紧，m̄-koh，chit-má你对清子ê态度mā是无定性，无气魄；所以，清子会渐渐对我疏远，这是因为你m̄好。你若是无幸福，to̍h讲无幸福，幸福to̍h讲幸福；tio̍h对她表明清楚，tio̍h hō͘ 她明确知影你ê心情，tio̍h做到「残残猪肝切五角」ê地步。我昨暗确实有teh哭，因为我实在真艰苦心。所以，你mā tio̍h用真实来面对问题，kám m̄是？」
「请你mài koh讲大道理，是我m̄好lah！我实在kā tāi-chì想kah siuⁿ天真，是一个软弱ê人。所以，我ê体质无法度去突然tak-.tio̍h活活ê kah容易受伤害ê tāi-chì。这你应该了解kah真清楚，我想你mā无需要hiah认真，m̄免hiah-ni̍h受气。你若ē-tàng认定我是善意ê，án-ne to̍h....。」
总是，清文一时无法度tháu放郁卒ê心情，伊有洁癖ê心bē-tàng容允无理由ê谣言。Chit时，清文心内有讲bē出嘴ê事业烦恼，所以khóa tāi-chì to̍h会惹起伊ê无欢喜；安子mā变kah真无元气。
父母ê烦恼，gín-á ê感受siōng-kài敏感；清子想讲父母可能iáu是无gōa幸福。Tú亲像Mô͘-pak-sàn（译注：1850~1893，法国作家，Henry-René-Albert-Guy de Maupassant，华语译做「莫泊桑」）tī伊出名ê《女人ê一生》小说最后所讲：人生是无幸福，mā m̄是无幸福，只是程度ê问题。异族婚姻，平常时看起来和谐无事，m̄-koh，mā可能会因为小khóa tāi-chì to̍h来破裂，bē-tàng讲是一种ê融合；老母想beh kā它美化。总是，he只不过是老母哀伤ê愿望；清子án-ne teh想。
清子是一个bē ài「多愁善感」ê人，m̄-koh，她ê个性mā无容易感伤；她凡事lóng看它ê实际情形，然后冷静思考。所以，她无法度亲像in老母hiah-ni̍h单纯to̍h认为家己是幸福ê。她生长tī富裕ê家庭，有值得骄傲ê父母，生活自由自在koh啥物都无欠缺，这当然to̍h是别人眼中ê幸福。总是，因为她是陈清文ê独生kiáⁿ，就被决定无法度离开陈家kah台湾；混（lām）血ê宿命是无要紧，m̄-koh，她被决定无法度离开陈家kah台湾，致使她感觉无自由，soah悲哀起来。准讲招一个kiáⁿ婿来继承陈家，若是lóng无成就任何事业to̍h来死去，chit种人生有啥物意义leh？她想beh选择一条无仝款ê道路，想beh从事别种ê工作；m̄-koh，因为她iáu未成年，所以对将来想beh从事ê工作iáu未清楚。总是，她to̍h是想beh做有价值ê tāi-chì。Chit种野心kah愿望ê产生，tú亲像in老父清文ê性格。她bē ài安居tī一个小小ê所在，kah-ná是一只ǹg望beh去外面展翼飞koân ê鸟á；tú kah以前ê清文一模一样。
Cha-bó͘-kiáⁿ对老父ê反抗，并m̄是针对老父chit-ê人，只不过是对老父所造成ê限制做出反抗而已。所以，若有人问她khah kah意老父á是老母ê时，清子有可能会回答khah kah意老父；虽然是án-ne，她ê表面行为却是倒páiⁿ。她ê心理感觉老父真好，m̄-koh，为啥物会对伊hiah冷淡leh？清子家己mā bē清楚ná会án-ne。老父最近显然因为事业bē顺teh心情苦闷，m̄-koh，清子iáu是bē去亲近老父。这必须tio̍h老父发脾气，kā kui腹肚ê苦情吐吐出来，á是清子自动飞入去伊ê心怀，án-ne chiah有法度伐(hoa̍h)过两人之间ê沟á。总是，清文对cha-bó͘-kiáⁿ lóng采取开明ê放任态度，这m̄-nā是因为清子是台日婚姻所生ê gín-á必须付出ê代价，mā是因为独生kiáⁿ是掌握父母幸福ê关键；如果她叛逆，就会有致命ê创伤；若是她起变面á是误入歧途，he to̍h会不得了。所以，清文消极teh控制家己，无beh kā她教训，mā bē对她受气。总是，清文án-ne jú顾虑，清子jú感觉无趣味，soah变成thiau故意beh反抗老父。
像讲关系家庙完工ê话题，清文若jú o-ló花岗岩柱á ê雕刻bē bái，清子to̍h jú kā它贬低讲：
「Kám án-ne？我认为he无够看。台湾ê艺术无sêng艺术；chit句话m̄是我讲ê，是阮ê历史老师讲ê。Kan-taⁿ雕刻ê工夫复杂koh幼工，m̄-koh无注入灵魂。」
Koh有一pái，她明知老父无ài她去夜市á，她却thiau故意去。
「我今á日去夜市á食排骨酥kah ian肠，koh有杂错汤。」
「你chit-ê gín-á，若食pháiⁿ腹肚beh án怎？M̄-thang koh去hit种无卫生ê所在。」
「M̄-koh，虽然讲无卫生，大家lóng讲真好食。近来连一koá高等官员mā lóng大大方方去食；虽然讲是大大方方，当然m̄是穿官服，是穿便服去夜市á。」
清文目头结结。台湾人夜市á ê点心担，lóng是一koá煎ê、煮ê、炸ê食物，koh hō͘ 人感觉无卫生。Siōng大ê原因是，去hit所在ê人lóng是低阶层ê市民；清文希望kā清子tùi细汉to̍h培养高尚ê气质，所以m̄-bat hō͘ 她去过夜市á。其实清子家己mā无真ài去，她感觉chiok gāi-gio̍h；她ê目的只是beh惹父母受气。
她thiau故意做出惹人受气ê tāi-chì，m̄-koh，老父却无当面对她受气；因为无得tio̍h反应，清子soah感觉真寂寞。家己做人ê cha-bó͘-kiáⁿ，ná会做出hiah-ni̍h邪恶ê tāi-chì？对其他任何人，甚至是对pháiⁿ人，她mā m̄-bat án-ne；她kan-taⁿ ài有老父真实ê疼，成做老父所疼ê cha-bó͘-kiáⁿ。虽然她tiāⁿ-tiāⁿ án-ne热切teh期待，结果lóng是无聊ê结局，她iáu是无法度投入老父ê怀抱。Tī小说á是电影时常有chit款ê情节，lóng只不过是感情上ê发泄；讲kóa哀伤ê话，á是哭哭leh，听候激情过了后，就变成kah-ná真见笑ê无聊，然后因为无聊，就án-ne来放弃。清子期待beh做甜蜜ê少女，结果soah倒反。
如果老父bat对她大受气，koh kā她siàn嘴phóe，这to̍h会成做严肃ê问题，án-ne她可能会讲：「阿爸，真失礼！」清子当teh án-ne思考ê时，有一工下课tńg到厝ê正门，她看tio̍h cha-bó͘-kán-á tùi信箱the̍h一张phoe出来；她看tio̍h清子to̍h chhoah一tiô，kek做无tāi-chì ê表情，讲：
「小姐，你tńg来à。天气真热ho͘ⁿh？今á日有做好食ê枝á冰，夫人讲等你tńg来to̍h the̍h hō͘ 你食；她去农场，无tī-.leh。」
「Hit张phoe hō͘ 我看一下！」
清子一时kah-ná想tio̍h啥物tāi-chì。总是，cha-bó͘-kán-á无啥愿意hō͘ 她看，清子koh khah怀疑。阿英iⁿ-iⁿ-n̄g-n̄g，kā the̍h phoe ê 手iap去kha脊后，就想beh逃走。
「阿英，你kám bat字？」
「Ngh，一点点á，我kan-taⁿ bat咱厝里ê人ê名。」
「你kám有看m̄-tio̍h？若是偷the̍h人ê phoe，你kám知影会án怎？会hông押去派出所，真严重neh！」
阿英已经有岁à，koh bat人情世事，清子ê话hō͘ 她不得不认输。她就勉强kā kha脊后hit张phoe the̍h出来。
「Oh-ho͘h，你看，果然是你偷the̍h人ê phoe。He是阿明寄hō͘ 陈瑞文先生ê phoe。」
「真ê oh？真失礼！我看m̄-tio̍h à。」
「所以，咱mài kā你失误去the̍h tio̍h别人ê phoe chit项事讲出去；你kā phoe khǹg倒tńg去，chiah免hō͘ 人怀疑。」
Cha-bó͘-kán-á听了真放心ê款，笑一下，就行倒tńg去信箱。清子kek kah-ná无tāi-chì，紧紧行入去厝内。
清子想讲阿明寄hō͘ 她ê phoe to̍h是án-ne被没收ê。暑假了后，叔伯兄哥阿明tńg去台北ê学校以后，清子kan-taⁿ收tio̍h伊一张phoe，然后就án-ne断绝音讯。清子chit pêng无常常写phoe hō͘ 伊；若是有写，mā只是kā伊回phoe niā-niā。总是，阿明讲离开远远了后，写phoe成做一种快乐；所以自从伊进入台北ê高等学校了后，koh khah殷勤teh写phoe hō͘ 她。M̄-koh，伊却突然无来phoe，hō͘ 清子感觉真心闷；今á日，她chiah偶然了解其中ê秘密。
一定是有啥人吩咐阿英án-ne做；因为tú-tio̍h清子，她一时紧张，kan-taⁿ看tio̍h信封写「阿明」两字，就收起来。阿英知影家己做m̄-tio̍h tāi-chì，tùi大门口入来厝内，随时替清子开电风，the̍h枝á冰hō͘ 她，koh讲kóa扶tháⁿ ê话，努力beh kā tāi-chì掩饰起来。
「今á日，你对我特别好neh。」
清子起先kek kah无tāi-chì ê款，然后kā她叫来走廊ê椅á头前。
「阿英，我有一点á tāi-chì想beh问你。我已经真久无收tio̍h阿明ê phoe ā，你kám有看tio̍h伊寄来ê phoe？」
清子显出做你隐瞒，我mā是知影ê态度teh问话，m̄-koh，cha-bó͘-kán-á摇头，坚持讲m̄知影。清子忍受bē-tiâu，讲：
「你讲白贼，若无，你tú-chiah看tio̍h寄phoe ê人是阿明，ná tio̍h仓仓pōng-pōng kā它收起来？」
清子用强烈ê话kā她逼问。Cha-bó͘-kán-á因为做m̄-tio̍h tāi-chì hō͘ 人发见，不得不坦白承认。
「只有三张phoe。」
「是siáng吩咐你án-ne做ê？」
Cha-bó͘-kán-á m̄肯坦白讲。
「Kám是阿母？」
「M̄是。」
「好，你m̄讲，我直接来问to̍h会知。」
「M̄是夫人，是头家。」
阿英讲了，to̍h惊kah赶紧逃走。
清子感觉真意外；因为她认为kah-ná是老母teh担心她kah阿明之间ê tāi-chì，所以一定是老母ê意思，想bē到竟然是老父ê主意。 清子虽然kah意阿明，m̄-koh，mā m̄是无收tio̍h伊ê phoe to̍h会感觉烦恼á是bē爽快；准讲有一点á心情郁卒，m̄-koh若阅读三十分钟ê册，á是弹一曲钢琴，á是kah同学开讲一下，就会回复正常。所以，无读tio̍h阿明ê phoe并m̄是啥物大tāi-chì。Ē-sái讲因为藏阿明ê phoe是老父ê主意chit-ê事实，koh khah刺激tio̍h她ê感情；所以她m̄-nā是单纯因为chit项tāi-chì teh受气，她认为真正直ê老父，竟然会使用chit种小人ê诡计，hō͘ 她koh khah受气。Án-ne讲起来，这应该m̄是kan-taⁿ cha-bó͘-kiáⁿ会gāi-gio̍h，kám讲老父to̍h bē gāi-gio̍h？所以，清子会有chit种个性，做老父ê mā有责任。清子tú想beh伐过眼前ê大沟，hit-ê大沟却kah-ná jú来jú阔。
被藏起来ê phoe
可爱ê小清子：
请容允我án-ne称呼你。你可能会笑讲he kah-ná是少女歌剧ê意味，m̄-koh，你mā是叫我阿明ā。
今年ê热天真无意思，因为脑炎ê流行，soah无法度去农场。春假ê时，我tī hia读一本Hiat-seh（译注：Hermaⁿ Hesse，1877~1962，德国作家，华语译做「赫塞」）ê原文册。暑假kan-taⁿ tiàm tī厝里，糊里糊涂teh过日子，m̄-koh，有读完To-su-tho-i-e-hu-su-kí（杜斯妥也夫斯基）ê《罪kah罚》。了后，我忽然tio̍h热病。你应该iáu会记得，咱两人去安平海水浴场，穿游泳衫倒tī树影下面ê沙滩ê时，hit-ê作者真长ê名我念几十遍，m̄是，是几百遍neh—La-su-khoh-li-é-kho-huh•Su-ta-ló-gín•I-boe-an•Ta-lí-ah•A-li-io-siah....。Chit种ê亡灵tī我ê语言中跳来跳去。就án-ne，我lô-lí-lô-so讲差不多二点钟，结果你讲：「To-su-tho-i-e-hu-su-kí mā无啥物趣味，我无kah意hit种阴阴苦闷ê宗教。」我感觉kah-ná去hō͘ 人phoah一盆冷水，hō͘ 我真失望。「你chit-ê人，这m̄是用欢喜á是无欢喜来判断ê文学。」我kan-taⁿ ē-tàng án-ne讲，因为chhōe无别种话thang讲。
你ê心到底是有热情á无？我甚至感觉怀疑，我hiah热狂teh谈To-su-tho-i-e-hu-su-kí，你却kah-ná lóng无听入耳leh。
我tńg来到台北ê学校了后真惨，iáu是讨厌读册；学校只不过是破坏青春之梦ê所在。有人teh讲，高中生活是人生ê黄金时代，m̄-koh，in却是一点á都无teh疼惜性命，in kan-taⁿ随便teh浪费时间。In穿破旧ê衫á裤，腰hâ旧旧ê毛巾，脚穿大木屐，tī街á路大步行，发出kho-lok-kho-lok ê声。你kám bat看过chit款ê学生？这只不过是一种极端ê打扮，in却来掠tiâu chit-ê普通打扮ê我，koh断定我是软弱ê人。为tio̍h chit点，我受tio̍h仝班ê一个人ê制裁；伊kā我giú去学校ê后埕，kā我siàn嘴phóe。因为对方是练柔道ê高手，像我chit种瘦koh薄板ê人beh kā伊反击，ē-sái讲是草猴对斧头。M̄-koh，我下决心beh迎接挑战；当然tī第一回合我to̍h倒落去土脚。我目chiu乌暗眩，鼻血流到嘴边，m̄-koh，我koh peh起来迎接对敌。然后又koh倒落去，又koh再peh起来....。因为chit种执拗而且无chhái工ê反击，我m̄知重复几十遍ê被phah倒；ná亲像几nā pái被phah倒；koh再phiān来phiān去，紧去缠tiâu对手ê拳头。就án-ne，到最后，对手ê同学kā我东倒西歪ê身躯扶leh，讲：「Oeh！阿明，mài koh án-ne继续落去，停止！你若无停止，我会哭出来。」伊án-ne teh讲，koh用手指ngiau我ê koeh-lang-kha，我看见伊ê目chiu有目屎teh闪sih。
Hit暗，我kui暗无法度困落眠；m̄是因为被phah m̄甘愿，mā m̄是因为我战赢暴力，当然mā m̄是因为心内怨恨chiah来失眠，可能是因为我kah伊lóng尽力战斗到底，所以两人lóng达到无法度无和解ê感情境界。
Hit种怨恨、愤怒，á是丑恶ê斗争ê结局，竟然表现出来ê是chit种美好koh单纯ê人类ê疼。Hit-ê粗暴ê猴gín-á是真正teh哭；我án-ne teh想，koh因为siuⁿ过感激，soah无法度落眠。
M̄-koh结果neh？我倒tī眠床两三工了后，我koh去学校上课，我掠准两人见面一定会互相握手。总是，伊面无任何表情，kan-taⁿ讲：「Oeh！我掠准你已经死去à。你若无信táu to̍h koh来，你beh koh hông phah是m̄是？」伊án-ne讲，koh kan-taⁿ哈哈大笑而已。
我美好ê想像就án-ne kah-ná玻璃破碎去；我to̍h是chit种人。 我chit-má非常悲惨，这m̄是因为受phah；我m̄是受tio̍h chit种暴力to̍h被phah落ê细只鸟á。总是，我满腹沉重，kah-ná身躯siuⁿ重soah飞bē起来ê鸟á，感觉无吐bē爽快，á是tio̍h kā kui腹肚ê食物消化掉。你kám知影有啥物良药？总讲一句，请你写kóa啥物kā我回phoe kám好？ ...... ...... 小清子：
我m̄知影顶pái为啥物会专工对你讲hiah-ê戆话？聪明ê你大概会感觉出来，我ná鹿欣慕水án-ne teh渴慕爱情。Chit种爱情绝对无任何杂质，bē-tàng有空缝thang夹任何物件ê单纯，ē-sái讲是有母爱chìn前ê爱。Kah hit-ê粗暴ê同学ê最后相lám ê瞬间，我真正体验tio̍h hit-ê闪sihê光。M̄-koh，hit-ê súi ê物件kan-taⁿ瞬间存在，完全无持续性。 我chit-má为tio̍h chit种ê爱teh苦恼。像讲我是台湾人，你是混（lām）血ê，m̄-koh，我一时á都无chit种自我意识á是偏见。我koh感觉你是鱼，因为是tī水里，所以看tāi-chì会有偏差。Án-ne讲起来，我mā是鱼，m̄-koh，我真ǹg望ē-tàng kā你chhōa离开水。Tú亲像《庄子》内底ê鲲变成大鹏鸟一样，咱彼此成做koh khah大，thang tī碧蓝ê天空teh kho͘飞。这若靠一个人ê力量是无法度完成ê，我需要你，你mā需要我。Oeh！你会koh kā我冷笑ho͘ⁿh？这是你ê毛病，m̄-koh，不管你笑我，á是kā我chhòng-tī，lóng无要紧。久长以来，你lóng是用chit种gāi-gio̍h ê态度teh对待我。你自细汉to̍h hō͘ 陈家ê gín-á排斥，hō͘ 人用奇怪ê眼光来看。总是，我无án-ne做，我只有kā你护卫；我了解你ê立场，有一粒疼你ê心。M̄-koh，你对我无和气，thiau故意beh chhōe我ê孔缝。你是一尾可怜ê鱼á neh，我无法度koh再忍受，我无beh hō͘ 你iáu是一尾鱼á。
我真浪漫，为tio̍h beh hō͘ 我ê梦ē-tàng实现，我bē-tàng无一直保有一个无ài hō͘ 她溜走ê对象。
你kám无beh成做大鹏鸟tī天空kho͘-poe？你kám无想beh有chit种大koh健全ê热情？你究竟有想beh ài á无？我ê心肝充满ǹg望kah绝望，欢喜kah苦恼ê不安情绪一直占领我ê心。求你一定tio̍h kā我回phoe。 ...... ......
无回phoe。准讲一chōa、两chōa mā好，我ta̍k工lóng gōa-ni̍h-á teh ǹg望你ê回phoe。
Chit几工，我无去学校上课，闲闲tiàm-tī宿舍；我无ài上数学、物理kah化学ê课，m̄-koh，成绩一向并无bái。总是，我iáu是bē ài上hiah-ê课；我对2+2=4无兴趣。Tī我ê心内，2+2总是=3 á是=5。
我ê头壳一直为chiah-ê问题teh烦恼，不如带Li-lu-kheh（译注：Rainer Maria Rilke，1875~1926，德国诗人）ê诗集出去外口，tī淡水河边坐落来，我真ài chit种悠哉悠哉ê时间。我眺望大屯山、观音山kah七星山，mā眺望秋阳照射之下，有平底船teh来来去去ê河面，会感觉tio̍h不可思议ê诱惑。南风经过我ê心，吹向马来西亚，我真想beh去南洋。马来西亚ê Jio-ho-l州（译注：Johor State），阮老父ê朋友tī hia teh经营橡树园，我想beh去hia工作，m̄-koh，我又koh想beh就án-ne跳落去淡水河。总是，描写自杀者心理ê To-su-tho-i-e-hu-su-kí（杜斯妥也夫斯基）并无自杀，我mā绝对bē án-ne自杀。就是决心明á载beh自杀ê人，若头壳顶忽然lak一支铁锤落来，伊mā会反射性来避开。人生短短，虽然知影早慢会死，却koh感觉死亡iáu tī真远ê所在；有时甚至感觉kah死亡iáu有无限ê距离，所以用chit种kok-pih ê意识，安心teh过日子。自杀ê人并m̄是无想beh活chiah来死，不如讲是希望活落去；to̍h是讲siuⁿ激烈ê生kah死ê欲望同时重叠teh。
Ah，我到底是想beh讲啥leh？总讲一句，我非常无健康；暗时bē困tit，身躯相当瘦。M̄-koh，请mài kā我误解，mā免惊我。我真正希望ê是啥物，聪明ê你一定已经知影。
我想beh知影ê只有一点，我究竟有生存ê价值á无？Kám有被拯救ê价值？这有两个方法thang证明：被爱á是无被爱。所以，准讲你ê phoe kan-taⁿ写一句：「你是戆大呆」mā好。因为án-ne我就thang成做一个有被拯救价值ê人。Chit-pái，请你一定tio̍h kā我回phoe....。
