《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二十二章（更新版）
作者 庄司总一着 赖永祥指导 林俊育台译 2017.04.02
因为自动车故障，清文中途落车。落雨了后，tī郊外ê路teh行，沿路tio̍h设法闪开tâm糊糊ê路面。相闪身ê水牛ê kha脊phiaⁿ iáu tâm-lok-lok，牛ê目chiu显出真爽快ê款；甘蔗、棉花kah黄麻园，tī大雨中洗浴清气了后，hō͘ koh再出来ê日头照射，渐渐teh ta去。总是，清文ê心情kah-ná是踏tâm去ê鞋á，无法度随时ta去。
行入市区ê街路，伊ê心情郁卒；清文想讲án-ne bē-sái得，就想beh暂且做kóa啥物tāi-chì。伊想beh去剃头，m̄-koh，头毛iáu未长；伊koh想讲去一下á真久无去交关ê古董店，chit-ê主意mā bē bái。Hit间正面有三间店面阔ê古董店，光线无真光，m̄-koh会散发出历史ê气味。Tī hia经常有满载人类智慧á是美事ê图画流传出来ê历史。看支那ê古钱，顶面有映出in ê皇帝ê面；摸hiah-ê陶器，to̍h kah-ná摸tio̍h几百年á是几千年前ê人民ê肌肤；若是ē-tàng tī hia chhōe-tio̍h kah意ê珍贵ê出土之物，he是siōng kài好ê。
清文teh bóng行se̍h街，来到市中心圆环ê小公园ê时，看tio̍h对面有三个五个下课做伴beh tńg去ê女学生。Tī日头投落ê凤凰木、苦楝á树kah椰子树ê树影中间，众少女tī hia teh行过来。清文随时想tio̍h清子，想讲有可能会tī chia tú-tio̍h她。
清文kah女学生所行ê两条放射路tī圆环会合，koh向中央ê大路行去ê时，伊kah清子相tú。清文心内teh想：「Ngh，实在真好；tī雨停ê日头下已经行相当一段路，有一点á流汗，而且清子tùi学校下课mā thiám à，ē-sái chhōa她来去啥物所在食凉ê，若是她ê同学ē-tàng做伙去tàu闹热，to̍h会koh khah好。」伊beh去ê古董店tī chia附近，m̄-koh，伊就án-ne bē记得tú-chiah teh想像ê历史源流，换beh行oá去cha-bó͘-kiáⁿ hia。
「Ah，清子，小等一下！」
清文差不多to̍h beh叫出来à，m̄-koh，tī伊ê咙喉iáu未发出声ê时，清子m̄知为啥物，忽然赶紧走入去亭á脚。清子看tio̍h老父ê时，面色tńg白，koh面无表情。Kah她做伙ê同学hō͘ 她放tī后面，in mā感觉心闷；in teh看khiā tī hia ê清文。
清文出tī父女ê亲情，真自然beh近oá清子ê时，她soah真意外忽然走开，hō͘ 清文tī hiah-ê少女面前感觉真gāi-gio̍h，真pháiⁿ势；伊感觉家己ê cha-bó͘-kiáⁿ是一个奇怪ê cha-bó͘ gín-á。她ê同学随时jiok óa清子，大概是一直teh问她是啥物原因？续落来in to̍h消失tī人潮中。清文khiā tī hia，戆戆á teh看in ê背影。
然后，清文行入去古董店，m̄-koh，伊对历史ê悠久长流一点á to̍h无法度集中心神，伊ê脑海中一直teh想in cha-bó͘-kiáⁿ ê ku怪态度。 暗时，亲子三人围桌食饭；安子m̄知影今á日父á-kiáⁿ tī路里发生ê tāi-chì。
「我今á日去农场，看见菜头非常好；我忽然想beh煮 “hu-lo-hu-ki”（译注：风吕（hú-loh）吹き，请参考图：
）菜头卤；tho͘-má-to͘h mā真好，kan-taⁿ芦笋总是生长不良，真紧to̍h硬khok-khok。」
面hō͘ 日头曝kah乌金ê安子án-ne讲。台湾ê菜头kah日本内地ê比起来，滋味有khah差淡薄，而且菜头煮汤并无适合天气热ê时，m̄-koh，她想讲家己种ê，in应该会欢喜chiah tio̍h。
「滋味án怎？」
「好食！你讲chit项菜叫啥物名？」
「“hu-lo-hu-ki”，菜头卤。」
「Hah-hah！」
清文发出chit种勉强ê笑法，安子chiah注意tio̍h清文kah清子lóng无teh讲话；tú-chiah到taⁿ，lóng只有她家己一个人teh讲。
「今á日ê菜kah-ná lóng是素食ê料理，m̄-koh，阿爸控制食肉对身体bē bái；近来社长ê腹肚有一点á凸（phòng）起来neh。」
安子án-ne讲，m̄-koh，父á-kiáⁿ两人lóng无teh笑。
「清子若看tio̍h桌顶无肉，总是无意无意。可能是当teh成长ê期间，m̄-koh，chit-má kám m̄是停止成长à？以前量ê时，你已经比我koân两寸à，kám m̄是？你hō͘ 我看起来特别矮neh；he以后，有koh khah koân ho͘ⁿh？Oeh，清子？」
老母án-ne teh kah她讲话，m̄-koh，清子恬恬无应话，kah-ná希望ē-tàng紧食饱ê款。清文teh期待清子讲话，所以kā想beh tín动ê箸停落来，m̄-koh，清子iáu是恬恬m̄出声，无想beh应话ê款。清文讲：
「阿母teh问你，你是án怎leh？」
清文ê话虽然无严厉，m̄-koh，老父心内ê不满kah责备ê气氛，自然显露tī食饭桌顶；安子mā有感觉tio̍h。总是，观察tio̍h cha-bó͘-kiáⁿ teh无欢喜ê清文，tùi tú-chiah mā是面色àu-tu̍h-tu̍h，恬恬teh食饭。总讲一句，可能是有啥物不如意ê tāi-chì。M̄-koh，这是因为事业上的操心neh？Á是 kah cha-bó͘-kiáⁿ直接有关系ê tāi-chì？安子一直推测bē出来，她认为应该是清子ê m̄-tio̍h。平常时，她kah老父讲ê话无kah老母讲ê话ê一半chē；安子感觉她对双亲ê感情流露有分别。她是in唯一ê宝贝cha-bó͘-kiáⁿ，老父对她ê疼当然一屑á都无chham任何杂质；总是，cha-bó͘-kiáⁿ若无率直接受伊ê疼，án-ne，老父对她ê疼ê表达，mā会tī意识上khah bē自然。安子感觉近来父á-kiáⁿ之间kah-ná有小khóa代沟，她希望bē有chit种可能；m̄-koh，若是真正án-ne，tio̍h án怎chiah好leh？安子有时会家己一个人án-ne teh想。M̄-koh，她koh感觉是家己想了过头，看起来事实上mā是án-ne而已。总是，tī eng暗ê食饭桌顶面，她有感觉tio̍h父á-kiáⁿ之间hit种无自然ê气氛。
清文到taⁿ lóng m̄-bat责备过清子，所以安子虽然感觉tio̍h父á-kiáⁿ之间有小khóa代沟，m̄-koh，她iáu是真安心。
「你食饭ê时间，kám iáu teh想小说情节ê发展？Chit-ê gín-á有时kah-ná是一个读册狂leh。」
「Teh读一koá啥物册？」
清文án-ne问，清子iáu是恬恬；安子代替她回答讲：
「大概是昨日，她teh读To-su-tho-i-e-hu-su-kí（译注：日语：ドストイエフスキ—，英语：Dostoyevsky，华语：杜斯妥也夫斯基；Lo-se-a ê小说家；代表作：《罪kah罚》）ê作品。
「是To-su-tho-i-e-hu-su-kí oh？」
「她阅读ê速度非常紧，tī我teh做裁缝ê时，她就读完一本册ê款。」
「Tī英国一流ê国家，家长对gín-á ê读物有严格ê选择。」
清文ê讲法无真率直；暗顿已经teh beh结束，清子teh等机会beh khiā起来。
M̄-koh，老父ê话kah-ná hō͘ 她有后chan去夹tio̍h物件hit种感觉，清子soah不便khiā起来离开。气氛有一点á gāi-gio̍h，安子自然想beh hō͘ 两人之间ê气氛khah平和leh，她讲：
「M̄-koh，清子ê成绩m̄-bat lak落来第二名，chit方面无啥thang嫌lah。」
「学校成绩ê好bái，kah注意她阅读ê册是两回事。M̄是讲chhìn-chhái读chē册to̍h好；若是siuⁿ过沉迷小说，颠倒会m̄知应该有ê人情世事，kám m̄是？」
清文为tio̍h beh打破沉重ê气氛，án-ne随意讲讲leh。M̄-koh，清子趁老父ê话有一个坎站ê时khiā起来。
「清子，你小等一下！阿爸有话beh kah你讲，你等一下来我ê房间。」
安子听tio̍h án-ne，她想讲清文会受气是当然ê。
「真是ku怪ê gín-á，ná会有chit种性格？」
「讲tio̍h性格？虽然她自细汉to̍h脾气有一点á怪，m̄-koh，m̄是亲像chit-má án-ne。」
清文ê意思是beh讲这m̄是她本来ê性格，是因为tī特别ê境遇受tio̍h扭曲，chit种性格显然是tùi后天（hiō-thian）形成ê。安子mā是án-ne teh想，只是她无ài讲出嘴；若是án-ne讲出嘴，结果，kám m̄是会koh倒tńg去她kah清文结婚ê宿命？
「这kám可能是因为她身体无真健康？她只是身材生了khah koân，其实是外表好看头；若小khóa过度运动，á是读册过度，她随时to̍h会发烧，心脏mā chih载bē-tiâu。」
「身体lám的确会影响个性，希望她ê身体会勇健起来。你就kā她讲，eng暗免来kah我讲话，以后chiah koh讲。」
「所以清子tiāⁿ-tiāⁿ讲她ê体质无适合热ê所在，她chiok无ài热ê国家。我有看她最近交hō͘ 学校ê报告，她引用《气候kah文明》hit本册，kā台湾kah日本内地做比较来发挥。」
「她平常时无啥有嘴尾，写作ê时koh真无客气，想tio̍h啥to̍h写啥，不管人ê感受。」
「她画图真好，作文mā相当厉害。」
清子ê作文题目是「论贫惰」；早to̍h发展文明ê印度kah埃及，ná会无法度继续维持，soah衰败落去？In ê文化、文明，以及in ê盛衰，大概kah地球ê纬度有关系；人民ê性格mā免不了会受tio̍h气候kah水土ê支配。她án-ne论述，结尾ê时koh写讲：所以ǹg望各位老师，tio̍h特别宽容阮chiah-ê tī真热ê殖民地teh生活ê cha-bó͘ gín-á ê贫惰kah头脑bái；她án-ne用充满khau洗ê语气来做结论。
M̄-koh，清文读chit篇文章了后，伊无kā她夸耀，mā笑bē出来；kan-taⁿ有讲bē出ê寂寞感。伊看tio̍h文章中间有莫名奇妙ê虚伪，若讲是àu古（拙劣）mā ē-sái-.tit；文章若是ē-tàng koh khah天真kah真实to̍h好。所以讲chit-ê gín-á已经受tio̍h扭曲，已经失去她ê纯真；而且看ê人ê目chiu mā是有受tio̍h扭曲，kám m̄是？无论如何，对感觉hiah-ni̍h迷惑ê清文来讲，kám m̄是真寂寞ê tāi-chì？
安子对in翁ê心情真了解。伊kah少年ê时代无仝；经过充分ê磨练，伊chit-má无koh有激烈ê感情。安子mā真无奈ê寂寞感。Tú-chiah伊有受气，m̄-koh，清文kah cha-bó͘-kiáⁿ讲话ê中间，显然变kah真弱势。 清文tú-chiah讲「希望她ê身体会勇健起来。你就kā她讲，eng暗免来kah我讲话，以后chiah koh讲。」，chit句话显示出伊kah-ná beh放弃ê弱点；安子感觉he比激烈ê感情koh khah hō͘ 她感觉无奈。
「你án-ne，bē-sái得lah。你一直kā她théng-sēng，会成做习惯性，án-ne对她无好。eng暗，请你好好á kā她问看是啥物原因，koh开拆道理hō͘ 她听。」
过无一时á，清子tùi楼顶老父ê房间落来。虽然她ê面àu-tu̍h-tu̍h，m̄-koh无teh哭。安子想讲她有叫in翁tio̍h严格kā清子说教，m̄-koh，她想bē到清文对清子却hiah-ni̍h温和，安子就安心落来。Chit时，安子想讲家己无讲几句bē-sái得，就叫清子来，m̄-koh，清子连oa̍t头都无，tùi坐tī人客间teh等她ê老母身边快步经过，行入去家己ê读册房。
过无一时á，安子听tio̍h清子ê哭声。
「清子，你哭kah hiah凄惨，是m̄是hông责备kah真thiám？」
清子仆tī钢琴koà顶面，kha脊phiaⁿ起起落落teh哮；安子tùi她ê后壁亲切teh kā她安慰，讲：
「你莫怪hō͘ 人án-ne责备，是你家己m̄-tio̍h。今á日，你到底是án怎leh？阿爸tī路里看tio̍h你，欢喜beh chhōa你去食凉；m̄-koh，阿爸就近你ê时，你却假做无看见，án-ne当然是你m̄-tio̍h。M̄-koh，你ná会假做无看见，你án-ne做是出tī啥物心情leh？」
「无啥物lah，无tāi-chì。阿母，请你做你去。」
「有啥物tāi-chì，你kā我讲。心内若有啥物烦恼，á是痛苦ê tāi-chì，你m̄-thang khǹg tī心内，lóng tio̍hkā我讲。」
「免lah，我想beh家己一个人静静，mài管我！」
「无no͘h，án-ne bē-sái得。你若m̄讲，我to̍h beh一直tòa chia。」
准讲清子kah-ná贝类kiap-tiâu岩石án-ne，固执m̄开嘴，安子mā决心beh kā她sóa tín动，绝对无beh放弃战斗。她kā cha-bó͘-kiáⁿ桌前ê椅á giú óa来钢琴边á，坐落来。
「清子，你若是家己m̄讲，我来替你讲。」
清子ê面色苍白，tú亲像欠缺信心ê外科医生tī手术chìn前，teh担心手术了ê结果会颠倒变khah bái。
「你心内大概teh讨厌阿爸ho͘ⁿh？Tī学校上课中，有一位老师恶言批评基督教，koh kā你khau洗。听讲这hō͘ 你感觉真艰苦心，所以阿爸有去kah校长理论。Koh有上体操课ê时间，iáu有每年hit-ê四十公里ê行军训练，阿爸lóng坚持无ài你参加，因为你每pái参加了后，lóng会身体无爽快，发烧，心脏chih载bē-tiâu。每pái阿爸lóng会去学校陈情，m̄-koh，án-ne颠倒hō͘ 你ê立场无好；阿爸kah-ná是teh加做无需要ê tāi-chì，颠倒惹起麻烦，是m̄是án-ne？」
安子嘴内án-ne teh讲，心内却感觉显然m̄是chiah-ê原因。今á日gín-á对阿爸ê态度，一定是出tī完全无仝ê创伤。安子ǹg望ē-tàng chhōe出hit-ê创伤，thang减轻她ê痛苦；安子虽然án-ne teh想，m̄-koh，她对hit-ê重要ê因素有惊惶，所以，soah讲tùi别位去。
「总是，阿爸chiah-ê做法lóng是出tī疼cha-bó͘-kiáⁿ ê用心，你soah来讨厌阿爸。He若有一个程度是无要紧，m̄-koh，你今á日对伊ê态度无sêng对家己阿爸ê态度。Hit时，阿爸tī你hiah-ê同学面前ê心理感受是án怎？你mā tio̍h替阿爸小khóa想一下。」
「M̄-koh，我并m̄是讨厌阿爸ā....」
「Án-ne对待阿爸，kám ē-sái讲m̄是讨厌阿爸？」
安子知影清子的确m̄是讨厌阿爸；chit-má讲ê是极其表面ê tāi-chì，关键是在tī koh khah深ê因素。
「你并无了解阿爸，伊少年ê时食过苦，种种ê苦。」
「我完全知影。」
「你ná会知，he是你出世以前ê tāi-chì。」
安子想起清文少年时hiah-ê暗淡ê时期，目屎禁bē-tiâu to̍h流出来。阿爸hiah-ê满腹ê苦楚，清子自然会承受；安子chit-má想beh讲出来，hit-ê勇气却受tio̍h挫折。
「阿爸自细汉to̍h讨厌做m̄-tio̍h ê tāi-chì，而且tiāⁿ-tiāⁿ为tio̍h正直ê tāi-chì堂堂正正teh战斗。你有chit种出色ê阿爸，你tio̍h家己认为真幸福。M̄-koh，你总是显出kah-ná无幸福ê面色；无lah，并m̄是tiāⁿ-tiāⁿ án-ne。」
「我看起来kah-ná无幸福oh？」
清子讲tio̍h真gāi-gio̍h。她ê面虽然iáu仆leh，m̄-koh，哭声已经停；她又koh显露出她固执ê好（hò͘ⁿ）胜心。
「我m̄知你有chit种感觉。」
「阿母，你kám m̄是仝款无幸福？」
「Ai-ah，我kám无幸福？你tùi tó位讲起？你kám teh讲戆话？」
「因为我看过阿母ê日记。」
「啥物日记？」
安子因为cha-bó͘-kiáⁿ意料之外ê话，忽然soah m̄知beh án怎讲。He是她tī丈夫出国ê期间，家己一个人tī厝里闲闲无tāi-chì所写ê旧日记。Tú好hit时，chit-ê gín-á iáu tī腹肚内。这是真久以前ê tāi-chì，她kā日记khǹg tī衫á橱内面，chit-má连khǹg tī tó一个角落mā lóng bē记得à。总讲一句，he是十七年前写ê，到底是hō͘ 人看见无妥当，á是hō͘ 人看见mā无所谓，chit-má连chit点都bē记得à；后来mā无kā它koh the̍h出来读，所以到底写kóa啥物tāi-chì，安子mā一时无法度回想起来。Cha-bó͘-kiáⁿ讲她tùi hit本日记读出老母ê无幸福，安子记bē清楚写过hiah-ê tāi-chì，m̄-koh，她chit-má一定tio̍h否认家己有hiah-ê无幸福ê感受。
「你读了日记，to̍h认为阿母无幸福。你ê想法m̄-tio̍h，你对啥物tāi-chì lóng用无平正ê眼光teh看，所以会m̄-tio̍h；你真正是一个gāi-gio̍h ê gín-á！」
「因为我是阿爸ê cha-bó͘-kiáⁿ，有hit种老父to̍h有hit种cha-bó͘-kiáⁿ。」
「你认为阿爸怎样？」
「伊是一个真gāi-gio̍h ê人，名誉心重；伊希望家己了不起，希望幸福；伊做事仓仓pōng-pōng，却做bē到；伊tiāⁿ-tiāⁿ烦恼东烦恼西，hō͘ 阿母苦恼。伊既然是án-ne ê人，ná会beh娶日本bó͘ leh？」
「清子，你！」
「而且，伊后悔kah阿母结婚。」
「清子，你ná会án-ne讲？你讲ê lóng m̄是事实，he是你ê误解。」
安子极力否认；cha-bó͘-kiáⁿ讲ê确实有一半是误解，m̄-koh，mā有一半是tio̍h ê。Hit时，她kah chit-má ê心情无仝，有小khóa无开朗；mā ē-sái讲hit时是无幸福。
过去ê已经过去，m̄-koh chit-má leh？
安子án-ne teh想，心内郁卒；她kā两支手骨khòa tī钢琴koà顶面，面仆tī双手，开始哭起来。她就án-ne想起日记最后添写ê话：「我想iáu是kā chit本日记秘密khǹg tiám箱á底khah妥当；听候年久月深以后，时间会hō͘ 有缺角ê现实变成圆滑，koh阮ê心对hit件事会有理解kah宽容；到hit一工，若想起有chit件事，就ē-tàng笑笑á来读chit本日记。」总是，经过十七年ê久长岁月了后，甚至连她ê cha-bó͘-kiáⁿ都无法度笑笑á来读；如今，现实iáu是像菱角尖尖，会凿人。
「你认为阿母无幸福，我无法度接受。Hit当时，阿爸可能有kah-ná你所讲ê gāi-gio̍h ê缺点，因此hō͘ 我苦恼；iáu有，我ê软弱hō͘ 伊感觉不满，mā是事实。虽然是án-ne，我并m̄是你所认为ê无幸福。Iáu有hit当时ê情形，我无了解chia ê风俗习惯，chiah会引起阿妈á是阿婶对我ê种种排斥。M̄-koh，这是事实而已，我从来m̄-bat感觉家己是无幸福á是绝望。M̄-koh，我ê cha-bó͘-kiáⁿ却讲我....。」
老母感觉捶（tûi）心肝ê悲哀，凄惨teh哭；chit时soah变成清子khiā tī安慰者ê立场。
「失礼lah！阿母，是我m̄好。我m̄是恨阿爸，á是讨厌伊，我应该bē án-ne chiah tio̍h。我kan-taⁿ希望阿爸是日本人，若无to̍h是阿母是台湾人。想tio̍h chit点，我to̍h会忽然受气，我真戆。」
「Chit种心情，我真了解。」
「M̄-koh，阿母，我所讲ê无幸福，kah阿母所讲ê无幸福无仝款。我所讲ê m̄是烦恼lah、心酸lah、辛苦lah chiah-ê无幸福；我讲ê是我做一个陈氏清子ê tāi-chì，是chit种血统ê无幸福。我kan-taⁿ án-ne模糊感觉tio̍h chit点，m̄-koh，无法度讲khah清楚明了。」
「这to̍h是清子所giâ ê十字架，所以我beh kā你讲：tùi狭门入去。」
「Ngh，m̄-koh，我无beh逃避入去宗教。He看起来是脆弱koh感伤ê。」
「你chiah是有一点á感伤neh，kā tāi-chì看kah siuⁿ大。我感觉你对 陈氏清子虐待siuⁿ过份，án-ne bē-sái得；我想beh对你讲ê是：你成做陈氏清子ê chìn前是日本人；虽然你ē-sái讲是日本人，mā ē-sái讲是台湾人。M̄-koh，siōng确实ê，是你ê名是日本人ê名。你若有án-ne ê觉悟，你应该会khah开朗。」
「M̄-koh，阿母，án-ne讲kám有道理？」
「Ngh，m̄-koh，若无án-ne讲....。」
「我明白à。」
清子清楚回答，她ê语气露出罕得有ê开朗。起先安子感觉母kiáⁿ真oh得沟通意见，m̄-koh意料之外ê是云雾竟然一扫to̍h清清。安子ê心情爽快，清子ê感受显然mā仝款。
「M̄-koh，你chit-má tio̍h去向阿爸好好á解说，kā伊会失礼。」
「Ngh。」
「所以，是你m̄-tio̍h。」
「M̄-koh，我已经真清楚是家己m̄-tio̍h à。」
「清子，你真固执。」
老母án-ne讲ê声音已经是一点á都无责备cha-bó͘-kiáⁿ ê意思。她想讲án-ne ê固执to̍h是清子ê个性，若硬ài她koh再一pái上楼，她无一定会肯，不如家己去向清文解说，所以安子就上楼。
清文tī册房teh看册，安子tùi伊oa̍t头来看ê目chiu感觉tio̍h有目屎teh闪光；伊根本都无teh读册。安子teh kah清子讲话ê时，伊mā是teh想仝款ê问题；伊了解一切ê tāi-chì，所有lóng明白à。安子án-ne teh想，忽然感觉她真疼惜清文，所以她无意中编出一套谎言，讲：
「清子今á日是he来lah；he若来，她总是会身体bē爽快，心情ak-chak。今á日koh特别ku怪。」
