《《陈夫人》日译台e5台湾小说 第二部》

 | | | 转寄

《陈夫人》第二部 亲子 第二十一章（更新版）

作者 庄司总一着 赖永祥指导 林俊育台译 2017.03.26

过无gōa久，流行病to̍h结束。本来hō͘ 人非常担心ê游德仁mā因为有及时ê治疗，真意外ē-tàng早早to̍h回复健康，chit-má koh kah以前仝款，老实koh认真teh做工。安子感觉in夫妇冒tio̍h被传染ê危险去救治伊ê热心，并无变成无chhái工，所以心内感觉真欢喜kah安慰。

瑞文kah春鸾kā阿阵埋葬了后，有一段时间有茫茫失落ê款式，m̄-koh，hit-ê意料之外ê经验，kah-ná tī in夫妻之间puh出一个力量之芽。In去农场ê时，常常顺续去hit-ê公墓，tī阿阵ê墓前献花kah墓粿，koh烧银纸。总是，tī in kiáⁿ阿明ê目chiu看起来，he是双亲脆弱心灵ê迷失kah妄想，是无体面ê，所以伊感觉真不满。M̄-koh，夫妻两人对in kiáⁿ ê看法一屑á都无挂意；尤其是本来比一般人koh khah注重外表ê瑞文，chit-má已经厌倦hit种kan-taⁿ关心外表美观ê生活。以前，瑞文感觉像玉帘hit种会彻底表示爱kah恨ê人lóng比in bó͘ khah好；伊一向lóng认为春鸾无súi、无伶俐，根本都无kā她看在眼内；伊koh为tio̍h顾虑世间ê体面，一直过tio̍h犹豫不决ê生活。总是，hiah-ê情形对chit-má ê瑞文来讲，伊m̄-nā感觉无意义，mā感觉真可怕。「我若是án-ne死，你可能连我ê头毛都无beh摸一下。」春鸾讲ê chit句话，ná亲像猛烈ê鞭teh phah瑞文；hit-ê被鞭phah ê肌肤红肿ê痛iáu未消失chìn前，伊至少会做一个诚实koh温和ê丈夫。

玉帘虽然无像以前hiah-ni̍h chia̍p去，iáu是无停止去农场，m̄-koh iáu是继续teh去。神有垂听她ê祈祷kah ǹg望，hō͘ 游德仁得救，想tio̍h chiah-ê tāi-chì，她ê心内充满感谢之情。M̄-koh，游德仁活leh，mā ē-sái讲是农场，m̄-koh iáu是继续teh去。神有垂听她ê祈祷kah ǹg望，人人koh khah相信：她是为tio̍h chit种短暂ê虚幻安慰chiah去农场。

陈清公司ê农场koh再有活气起来，kah市内ê自营工厂ê配合mā顺序ā。总是，清文bat听过凤梨罐头公司beh合并ê tāi-chì，chit-ê消息iáu残留tī伊ê心内，hō͘ 伊ê心情一直无法度开朗起来。

有一工，tī落大雨ê下晡，清文去巡视工厂。
伊落车beh行入事务所ê时，目chiu看向对面khǹg原料ê仓库头前，竟然看tio̍h其中一箱乱七八糟koh无盖koà ê凤梨tī hia teh淋（lâm）雨。今á日伊是为tio̍h有一件无如意ê tāi-chì chiah来工厂，soah看tio̍h chit种hàm-kōa-kōa（粗心大意）ê tāi-chì，伊禁bē-tiâu，大受气起来。
「你为啥物án-ne处理？」

清文进入事务所，就责备工厂监督郭万春。郭万春辩解讲：凤梨中昼chiah送到位，我想讲beh随时kā in上机械，所以无必要特别koh收入去原料库。清文本来无必要当场kā伊责备，m̄-koh，伊今á日心内hit片无欢喜ê乌云mā是tùi郭万春所引起ê，he是比凤梨hō͘ 雨ak koh khah严重ê tāi-chì。所以伊讲：「总讲一句，凤梨án-ne khǹg tī hia hō͘ 雨ak，会感冒neh！」伊nauh一句半khau洗ê话，想讲问题以后chiah koh讲，所以伊就赶紧去巡视工厂。

因为落雨，工厂内面湿湿koh阴暗；平常时会散发出凤梨肉ê芳味，m̄-koh，今á日ê空气沉重koh沉闷，mó͘-tah á是蒸汽所发出ê响声，刺激tio̍h清文ê鬓边，hō͘ 伊听tio̍h感觉bē爽快。

落雨天，工厂ná会无beh开电火leh？清文án-ne teh想；m̄-koh，听候伊ê目chiu已经习惯室内ê光线了后，chiah感觉其实ia̍h m̄是真暗。两排ê机械mā kah平常仝款，无啥koh样teh运转；堆积ná山ê凤梨上（chiūⁿ）起lih电动输送带了后，一刻to̍h无停随送入去生产线ê机械。进入去机械ê凤梨，随时自动削皮清气，双头切除，koh除去凤梨心；黄色ê凤梨肉kah粗皮，以及凤梨心就án-ne lóng分开。这是极新发明ê机械，叫做「Ji-ná-khah（ジナカ）」，是世界罐头工业第一大产地ê Ha-óa-ih（Hawaii，华语译做「夏威夷」）所发明ê革命性ê新机械；陈清公司tùi当地用美金五千kho͘ 进口一台。用chit种机械，一分钟ē-tàng处理75粒凤梨；其它小规模ê工厂所使用ê机械，叫做「Sai-chá（サイザ—）」，tio̍h用手kā双头切除ê凤梨一粒一粒送入去机械，所以一分钟kan-taⁿ ē-tàng处理15粒á是20粒niā-niā。清文tú进口Ji-ná-khah来工厂ê时，kah其它工厂相对比，伊感觉真骄傲。总是，一旦开始使用，若因为无熟手致使机械失能，á是因为原料供应不足，bē-tàng符合原来ê预算，to̍h会感觉有一点á算bē hô。M̄-koh，农场确立以来，ē-tàng供应够额ê凤梨原料，所以机械有充分发挥功能，hō͘ 人感觉事业ê将来发展有希望。陈清公司真无简单chiah达到chit-ê境界，chit时却听讲beh成做合并制度，所以清文感觉真无奈。

清文就án-ne变kah真神经质；削落来ê凤梨皮tī地上siuⁿ过杂乱，伊会提醒员工注意；看tio̍h加工ê糖浆两三罐有土粉，伊交带讲bē-sái án-ne；切做环状ê凤梨，若有完全ê kah无完全ê lām做伙，伊就无满意nga̍uh-nga̍uh念。清文无心所讲ê hiah-ê话，tī员工看起来，却是社长tī巡视ê时teh挑毛病。

尤其是社长重视卫生，有一屑á都bē-sái马虎ê性格，加上伊以往是学校ê教师，纪律严格，讨厌无清气ê行为。若是顾虑tio̍h细菌á是腐化ê问题，最后一关有排气处理kah锅炉加热消毒，所以bē有问题。总是，无清气ê行为会影响tio̍h精神，所以清文禁止tī工厂内面pok薰，á是随地phùi澜，长指甲内mā bē-sái有lah-sap。Chiah-ê tāi-chì有一kóa kah生产效率无啥关系，m̄-koh，可能会污染tio̍h siōng重要ê产品。商品ê生产过程，常常是tùi劳动产生出来ê性命总量来表现；若无，to̍h无生产á是劳动ê喜乐。清文努力beh kā chit种理念匀匀á栽入员工ê心内，m̄-koh，真无容易ē-tàng达成伊ê愿望。因为in大多数无受过教育，kan-taⁿ用话语教导是无chhái工；一切lóng tio̍h用实际ê方法教导，其它无啥办法。工厂采用新式ê机械，伊想beh hō͘ 员工加减对科学有一kóa关心；伊koh用心费神建立光线好koh空气流通ê厂房设备，尽量beh hō͘ 员工有欢喜工作ê环境。工厂园地iáu有一栋真phāⁿ ê木造建筑物，成做员工ê休闲娱乐中心，ē-sái tī hia食中昼；tī hia有ē-tàng theⁿ á是坐ê藤椅条，有电唱机，mā有一koá册kah杂志。另外一间成做医护室，有酒精、io-lo-chìn-khih（华语译做「碘酒」）、hŏ͘ -tái（华语=绷带）kah药膏等等，有够额thang做小khóa tio̍h伤时ê医护。

员工若ē-tàng正确使用chiah-ê设备，清文有考虑beh做koh khah大ê设施；m̄-koh，in无hiah-ni̍h容易ē-tàng进步到chit种程度。起初，in真小心koh好奇teh使用chiah-ê设备，无gōa久惯势了后，就lām-sám用。男工kah女工tī hia做鬼做怪、吵闹、冤家；唱片顶面有pit孔，á是phah-m̄见；杂志破去，á是hông the̍h去做别种用途；酒精tiāⁿ-tiāⁿ减少，hŏ͘-tái kah药膏tú chiah加添to̍h随koh减少去。
「Chiah-ê物件m̄是属啥人ê，是属lín大家ê。Lín为啥物beh糟躂家己ê物件？为啥物beh偷the̍h家己ê物件？」

清文án-ne kā in教导，in mā是bē明白hiah-ê意义。In认为chiah-ê设备是属tī社长陈清文ê，m̄是员工所有ê；in无法度改变chit种观念。 清文teh想：实在是无办法thang教导in。伊行tńg来凤梨整理站，tùi Ji-ná-khah机械处理好势ê凤梨肉，tī chia koh做整修，hō͘ 它khah美观。女工坐tī细条长长ê输送台ê两pêng边á，kā输送带传来ê凤梨肉the̍h起来，用刀á kā留tī凤梨肉顶面ê皮削掉，koh kā凤梨肉ê乌目挖掉；凤梨不断tī输送带顶面传送过去。Chiah-ê女工大多数是小学毕业无gōa久ê台湾少女，穿白色ê制服，挂树乳手套，双手敏捷teh做khang-khoè，动作liú-lia̍h；in不时看起来lóng天真koh清气，hō͘ 人感觉心情愉快，tī单调ê工厂中散发出柔和ê气氛。

M̄-koh，今á日清文tùi in ê边á行过ê时，in lóng无露出微微á笑ê笑容。两礼拜前，伊偶然发现tī chia工作ê李渊渊小姐有无纯洁ê心，chit件tāi-chì chit-má iáu留tī伊ê脑海中，hō͘ 伊感觉挡bē-tiâu。 李渊渊是一个开朗，工作敏捷，koh会引人注目，hō͘ 人好感ê cha-bó͘ gín-á，无论tī khang-khòe上á是行为上，她lóng是无缺点ê模范女工。总是，两礼拜前，她无小心失误，去hō͘ 刀á割伤她ê手指，引起恶性病毒感染，结果必须切断手指。而且，想bē到tùi chit-ê意外，引起清文对她ê做法感觉失望。

李渊渊tòa ê所在是tī 出名ê繁华台湾人街ê hit kho͘ 围á。昨hng清文亲自去hia beh kā她探访。伊行入去到庙埕内角ê lah-sap巷路，tī小khóa头前ê十字路口有一个路边担á，有四五个cha-bó͘ gín-á tī hia teh食寒天ê食物。其中一个tú teh食物件ê十五六岁ê少女忽然看tio̍h清文，就kā碗放hē-.leh，雄雄狂狂tùi边á ê巷路消失形影。
「李万丁ê厝kám是tī chia？伊ê cha-bó͘-kiáⁿ叫做渊渊。」

清文问khiā tī路边担á边á ê人，in随时kā伊讲to̍h是tī hia。伊行入去一看，是一间真简陋ê khiā家；门柱ê对联破糊糊，红字mā lóng褪色。踏入门to̍h是厅堂，神佛ê像kah挂轴kan-taⁿ是形式ê物件；土粉满满是，致使厅堂中央ê桌á变成白色，顶面有排碗箸。主人李万丁出去作穑；女主人招待伊入去厅堂隔壁ê困房，壁ê双pêng有双层ê床，李渊渊倒tī下脚层。清文tùi赤iāⁿ-iāⁿ凿目ê厝外入来，kah-ná入去乌暗ê地穴；tùi灶脚斜斜射入一条参杂土粉ê光线，kan-taⁿ ē-tàng看tio̍h倒teh ê cha-bó͘ gín-á浅黄色ê面kah缚白色hŏ͘-tái ê手，其它lóng看无物件。
「渊渊，你chit-má情形án怎？你ài食chho-kho-liat-toh（华语译做 「巧克力」） ho͘ⁿh？」

清文án-ne亲切kā她安慰，m̄-koh，姑娘kiu手，无beh接受ê款，m̄-koh，房间内koh无thang hē ê所在，所以伊只好一直the̍h tī手里。清文一时bē-tàng了解，tī伊kā女主人讲是来探访渊渊ê时，为啥物渊渊本身无beh出来接待？Ia̍h m̄是tio̍h大伤，siōng无mā tio̍h来厅堂kā伊迎接ā。但是，渊渊m̄-nā无beh tùi a-cha惊人ê房间出来，而且伊入去房间ê时，koh看tio̍h她teh haiⁿ艰苦。
「Oh，iáu-koh hiah痛oh。」

清文小khóa感觉意外，oá去眠床头án-ne kā她问；渊渊用kah-ná蚊á hiah细声ê哭声回答讲真痛。
「Kám有发烧？」

清文想讲可能有pū脓，若无，kan-taⁿ一支手指—无名指ê尖头切tio̍h，chit-má bē iáu-koh痛kah连社长来探访都tio̍h tī眠床顶接待。伊teh问她有发烧无，soah无意中beh oá去眠床头；渊渊可能是惊人kā她摸，sut一下koh倒落去困；她无应，m̄-koh，chit pái发出悲痛haiⁿ-haiⁿ-chhan ê声。清文小khóa起怀疑，m̄-koh，伊无想beh koh摸她ê头额。因为，不管房间gōa简陋，ē-sái无需要顾礼仪；不管房间gōa-ni̍h a-cha惊人，á是有gōa-ni̍h想beh突破hit-ê秘密原貌ê无意识冲动，iáu是m̄-thang去动tio̍h少女ê身躯。

所以，清文koh khah感觉有真chē怀疑，实在有够意外；kám讲伊m̄免家己亲身来，派人来to̍h真好ā？伊一屑á都无考虑chiah-ê tāi-chì，直接to̍h来，kah-ná有小khóa无妥当；伊感觉in ná teh演奇妙ê戏。M̄是lah，chiah-ni̍h优秀ê cha-bó͘ gín-á bē án-ne lah，无可能lah！清文án-ne teh否定，m̄-koh，tī无意识中，kah-ná想beh做啥物pháiⁿ tāi-chì，所以伊kā房间内部巡视一遍。然后，伊ê目chiu看向灶脚，看tio̍h一个cha-bó͘ gín-á khû tī灶边，不断teh看伊hia。Tú-chiah tī路边担á teh食物件，雄雄狂狂tùi边á ê巷路消失形影ê cha-bó͘ gín-á，to̍h是她。她是渊渊ê小妹，hit时她会逃走，hō͘ 伊感觉真奇怪；这to̍h是起先引起清文产生怀疑渊渊ê原因，m̄-koh，伊尽量beh排除hit-ê疑云。
「真头痛neh，hiah-ni̍h严重，tio̍h紧去chhōe医生诊断。你若无beh去，我to̍h叫医生来chia。」

渊渊听tio̍h án-ne，chhoah一tiô，看对清文chit pêng来；她尽量teh掩盖内心ê惊惶。目chiu已经习惯乌暗ê清文，kā她ê狼狈kah困扰看kah清清楚楚。
「无要紧lah，免叫医生lah。」
「M̄-koh，指头á chit-ê物件bē-sái马虎tit。若有细菌留leh，有可能会湠到手腕，听讲tio̍h kā手切掉。」

清文责备家己ê疑心，chit pái真心án-ne讲。
「你kám惊hō͘ 医生kā你医治？实际上，手指确实会痛。我mā bat tio̍h过皮肤溃疡，痛kah三工lóng bē困tit。」
「M̄是lah，bē痛lah。M̄-koh，我感觉家己真可怜；若无手指，我会嫁bē出去。」

渊渊就án-ne哭出声。照清文ê预感，她是teh假哭。Tāi-chì发生已经无法度复原。社长虽然有不可侵犯ê严格个性，m̄-koh mā是感情丰富ê人；渊渊tiāⁿ-tiāⁿ抱tio̍h敬畏ê心。实际上，伊今á日koh亲身专工带礼物来kā她探访，kám m̄是？伊kah日本夫人mā常常来工厂，一屑á都无kek头家ê派头，lóng对in亲切讲话。Hiah-ni̍h好ê人，我ná会kā伊悖逆，想beh kā伊骗？她chit-má koh khah后悔，koh khah怨恨hit-ê hō͘ 她陷入chit种不义行为ê郭万春。手术kā无名指第一关节切断了后，郭万春bat有一二pái来探访她，kā她讲kóa亲切koh同情ê话，然后，教她tio̍h要求伤害赔偿金；koh教她讲手指是cha-bó͘人ê性命，一屑á钱是无法度解决ê，tio̍h向公司要求khah chē钱；伊对渊渊本人kah in老父李万丁lóng án-ne讲。Tú开始，渊渊对郭万春ê讲法感觉无理；她想讲家己ê tio̍h伤m̄是公司ê罪，只不过是她家己ê失错，án-ne向公司要求赔偿是无合理ê。她一再kā郭万春说明，讲她bē-tàng了解ná tio̍h án-ne做，m̄-koh，郭万春一直煽动，叫她至少mā tio̍h要求三百圆á是五百圆ê时，她kah in老父就不得不接受án-ne做。
「无手指to̍h无法度嫁，你kám án-ne teh烦恼，teh悲伤？」

清文无意中感觉苦笑。伊想讲tī chit-ê容易感伤ê年纪，准讲kan-taⁿ小khóa ê不幸，她mā会联想到结婚ê tāi-chì，he mā m̄是无理。M̄-koh，因为hiah-ni̍h小khóa ê tio̍h伤，to̍h随时想讲会嫁bē出去来感觉心痛，这对下层阶级ê少女来讲，koh khah是无可能；何况她koh会kā chit件事四界宣传，清文想讲这mā是心理上讲bē通ê tāi-chì。
「渊渊ê老父，请问是啥人教你án-ne做？」
「无lah，he是....。」

少女受tio̍h良心ê鞭phah，想beh讲出来，m̄-koh，她有受tio̍h交带，一定bē-sái讲，所以她无kā郭万春ê名讲出来。
「是啥人使弄你讲chiah-ê无聊ê话？」

渊渊无回答，kan-taⁿ胸坎á phi̍h-pho̍k-chháiⁿ teh哭。Tī chit-ê时刻，一定是jú催逼会jú m̄肯讲。清文想tio̍h有郭万春tī她ê背后teh使弄，伊非常无欢喜，m̄-koh，伊对chit-ê少女受气chìn前to̍h已经感觉真失望。伊若koh对chit-ê少女匀匀á教示世间ê道理，她一定会koh khah凄惨哭。清文无法度忍受chit种kô-kô缠ê感伤，伊想beh赶紧离开chit间破厝á。
「到底是啥人教你ê？你无需要担心hit种滚sńg笑ê话。一指无去无要紧lah，iáu有四指tī-.leh，beh挂手指（chí）无啥困难lah。」

清文讲chiah-ê话了后，伊kā chho-kho-liat-toh khǹg tī少女ê枕头边，无怜悯mā无弃嫌，就án-ne离开hit间厝。

清文kā工厂巡视一liàn，然后kā郭万春叫来狭狭ê医务室，对伊问起昨hng ê tāi-chì。
「渊渊一直哭讲无手指无法度嫁，你chit-ê cha-po͘人实在有够ài管闲事。」
「渊渊án-ne讲oh？」
「她无讲是你教ê，m̄-koh，用脚头u想mā知；你kám m̄是有专工去过她hia？」
「是ah，我有去。」
「Án-ne，好，你既然坦白承认，你kám相信你家己煽动她ê行为是正当ê？」
「我相信he是正当ê。」
「M̄-koh，正当ê事kám tio̍h暗中进行？有关渊渊慰问金ê tāi-chì，你kám bat kah我参详过？」
「总是，因为hit当时，你lóng无beh听我ê意见。」
「M̄-koh，若是正当ê tāi-chì，我ê心会有充分接纳ê余地。」
「我认为正当ê事m̄-nā kan-taⁿ是一面之词；你看做正当ê事，在我看起来....。」
「无m̄-tio̍h。」

两人做伙恬落来。窗á外iáu teh落大雨。清文心内teh念讲：tio̍h kā伊辞头路，伊控制bē-tiâu伊ê不满kah受气，chit种意思自然to̍h表现出来，所以郭万春ê态度变kah真无自然。话切断ê时，两人瞬间互相teh睨对方，目chiu射出koh样ê敌意火花。然后两双目chiu分开，m̄-koh，两人对tú-chiah所讲ê正当之事ê看法，iáu是kah-ná tī一块肉骨头前ê两只狗á仝款，彼此teh挑战。

银牛kah水牛ê角随时teh beh相tak ê款。郭万春是嘉义田庄sàn-chhiah作穑人ê独生kiáⁿ，少年ê时有一个叫做银妹ê未婚妻，是人所讲ê新妇á；父母用小khóa钱分（pun）一个cha-bó͘ gín-á来饲，将来thang成做家己ê kiáⁿ ê bó͘，án-ne ē-tàng省in kiáⁿ娶bó͘ ê一笔费用。郭万春对chit-ê新妇á无满意，所以小学毕业to̍h离开厝，四界流浪，结果tùi东京ê机械工业学校夜间部毕业。总是，八年后回乡探亲ê时，家己ê老厝kah一切lóng无了了，老父kah银妹mā lóng phah-m̄见去。四界探听了后，chiah知影tī伊无tī-.leh ê期间，in老父因为有小khóa负债无法度还，hō͘ 某地主kā伊ê田地kah厝lóng夺去，致使伊落魄kah去tòa乞食寮，koh死tī hia。

M̄-koh，清文m̄是因为同情伊ê境遇chiah kā伊雇用；ē-sái讲是因为伊tī逆境之下iáu-koh努力求进步，无失去戆直ê开朗个性，koh有敏捷ê行动kah理性ê头脑。清文认为tú kah游德仁适合处理农场事务仝款，郭万春mā适合处理复杂ê工厂事务。另外一方面，郭万春对陈清文ê人道主义真敬佩，而且tùi心底一开始to̍h赞同伊ê创业；不管伊ê力量无大，伊iáu是全力phah拚。总是，一旦实际开始作业，chiah发现双方ê观点根本to̍h无仝。

郭万春认为kā珍珠hō͘ 猪á是无意义，hō͘ in猪á食物to̍h够额；这是siōng重要ê，这已经成做郭万春不可摇动ê观念。所以伊提出ê问题lóng是：够额ê薪水、解雇津贴、反对辞头路、职业伤害ê补偿等等。总是，社长陈清文所重视ê是精神方面：教育kah慰劳；这虽然是需要，m̄-koh，这m̄是低水准ê现实生活所紧急需要ê，ē-tàng以后khah慢chiah来考虑。亲像讲扰乱风纪，无守卫生，偷the̍h物件等等，清文对chiah-ê道德性方面ê要求siuⁿ过严格。若是技术性ê缺点当然应该纠正，m̄-koh，tī chiah-ê道德性顶面mā beh对劳动者要求，讲起来有khah刻薄。所以，不管陈清公司ê工资比其它ê公司加付两成（siâⁿ），离职津贴mā bē少，郭万春对清文ê基本观念iáu是bē满意，认为伊ê人道主义大部分lóng是情感上ê物件，是siuⁿ过天真ê想法；郭万春ê心内难免会感觉幻灭，soah kā伊轻视。

总是，chit-má chit两人khiā tī奇怪ê对立状态，这kah-ná m̄是hiah单纯ê思想kah理论ê无仝产生ê。
「正当ê事m̄是kan-taⁿ一面，若无，所谓ê正当to̍h m̄是真正ê正当。你可能认为煽动渊渊是正当；你认为并m̄是煽动，只是beh kā她启蒙。M̄-koh，她用假病ê做法，koh用做戏ê行为；她kan-taⁿ是一个十八岁ê小姑娘。」
「社长就因为án-ne感觉bē爽快。M̄-koh，tī chit-ê社会这并无稀罕，这是丑陋（chhiú-lō͘）ê tāi-chì。总是，社长看tio̍h hit种情形，m̄-thang kan-taⁿ认为是丑陋，你kám无感觉in可怜á是好笑？」
「感觉in可怜，kah容允in án-ne做是无仝ê。」
「因为社长是一个极大严谨ê人。」
「毕竟人生ê终极目的是teh追求正义kah得tio̍h正义，你ê理论lóng是tī限定的范围内。你一屑á都无想到永远的方面，你kan-taⁿ kā注意力集中tī现实ê问题；ná亲像想beh起厝无设计，kan-taⁿ急beh收集材料。有一pái咱teh讨论问题ê时，你to̍h讲只要材料齐备，就ē-tàng kā厝起起来；这可能无m̄-tio̍h。M̄-koh，厝的设计图，hit-ê理想tī tó位？Án-ne起起来ê结构，它所留落来会tú-tio̍h ê问题，只有人类kah人类之间ê精神而已，无koh再谈tio̍h理想。」

清文ê目神显露出决意，伊停止讲话，决心tio̍h紧kā郭万春辞头路。 总是，清文心内iáu-koh有一kóa踌躇。这是因为伊bat hiah-ni̍h-á信任郭万春，kā一切khang-khòe lóng交托伊，而且伊对机械真了解，处理事务koh正确，beh chhōe一个来代替伊ê人有一点á困难。清文ê踌躇m̄是出tī chiah-ê弱点，是有koh khah基本ê纯粹人际关系，伊感觉chit-má in两人无法度koh和谐握手。M̄-koh，这已经是绝望ā。世间有银牛（财主）kah水牛（sàn-chhiah人），清文想tio̍h圣经ê话：「无欺贫重富，因为hiah-ê lóng是他ê手所造ê。」（约伯记34：19）。清文一心一意teh想：Tio̍h án怎chiah ē-tàng hō͘ 人得tio̍h光明？M̄-koh，伊chit-má iáu无法度hō͘ 人清楚看tio̍h光明。这m̄是在tī经济上á是金钱上，mā m̄是oh得bat ê理论上，却是在tī欠缺koh khah根本ê亲和力；简单来讲，就是本质无仝ê人之间ê合作关系；chit点kah-ná是永远bē交接ê铁枝á路。对手郭万春chit-má ê想法to̍h是án-ne ê款。 清文soah尾就提出kā郭万春辞头路ê决定，想bē到郭万春一声to̍h同意，所以表面上伊并无显露出pháiⁿ看面。两人行出室外了后，大雨tī不知不觉ê中间已经停止；tùi窗á外射入来ê下晡时烧lō ê日头光中，伊suh chhun ê薰烟tùi桌顶ê薰屎khok-á袅（niáu）袅升koân。