《《陈夫人》日译台e5台湾小说 第二部》

 | | | 转寄

《陈夫人》第二部 亲子 第二十章（更新版）

作者 庄司总一着 赖永祥指导 林俊育台译 2017.03.19

阿阵死了后，她ê埋葬成做一个问题。因为清文以前bat去过瑞文发生灾难ê所在，hia mā是阿阵出世ê部落，所以伊就去hia，想讲看chhōe有她ê亲人，thang托in安排埋葬。

安子就坐teh等in ê hit台自动车tńg去厝里。到厝了后，她就叫瑞文来，kā今á日发生ê tāi-chì讲hō͘ 伊听。
「阿兄án怎teh处理leh？」
「伊去阿阵出世ê所在，因为总是bē-sái kā死人放hē-.leh；伊去hia chhōe看有她ê亲人á无。」
「她可能是无亲人。」
「Án-ne，只有chhun你一人ā。」
「我beh án怎chiah好leh？」

瑞文忽然感觉真困扰，连面to̍h变苍白。
「Beh án怎？当然tio̍h办葬式。」
「Kám tòa陈家办？Hit-ê cha-bó͘人有khah....。」
「M̄是lah，tio̍h去in hia，你tio̍h kā她埋葬。」
「请mài叫我，我连看tio̍h死狗都会kui工phi̍h-phi̍h-chhoah，心情真bái。」

瑞文为tio̍h beh隐瞒伊ê惊惶，thiau工án-ne teh嬉笑；伊挥动双手，微微á teh笑。
「这m̄是心情好bái ê问题。」

安子注目kā瑞文睨，koh真严肃án-ne对伊讲。因为她今á日kui工lóng tú tio̍h惨淡ê场合kah意外ê tāi-chì，已经真thiám，所以她ê口气加真刻薄。
「阿阵病kah真艰苦ê时，一直teh叫你ê名，实在真可怜。你kám无beh好好á替她想一下？」
「我当然bē bē记得她ê tāi-chì。M̄-koh，我....我家己一个人去处理死人，真恐怖neh，我无法度lah，而且hia koh有流行病；当然我以后会去拜她ê墓。」

纯情专一ê瑞文毕竟是kan-taⁿ án-ne ê程度nā-tiāⁿ。安子听tio̍h伊án-ne讲，chhoah一tiô，m̄-koh就无koh受气。

总是，过无jóa久清文tńg来，伊对无良心ê小弟非常愤慨，就赶紧叫伊来，真受气对伊讲：
「阿阵，她kám m̄是你以前ê bó͘？而且hit当时，咱厝里ê人自开始to̍h反对，是你强强kā她娶入门。无lah，是m̄是春鸾希望án-ne做，这m̄是问题。无论如何，她m̄是lín bó͘ ê姊妹，她是你kā她当做bó͘ á是细姨ê cha-bó͘人。你确实bē bē记得少年时hō͘ 蛇咬tio̍h ê tāi-chì；我忽然接tio̍h通知，随时to̍h拚去到hit-ê cha-bó͘人ê厝ê时，你tī hia teh haiⁿ-haiⁿ-chhan，强beh死去。你应该知影hit-ê人情kah义理chiah tio̍h，m̄-koh，你知mā无路用，因为你软弱。总是，你想看māi leh，像阮kah hit-ê cha-bó͘人并无真深ê关系，m̄-koh一去到hit-ê病人kah-ná hông弃sak ê恐怖所在，mā是会去到hit-ê庄头kā她看māi leh，kám m̄是？其实，我起初mā想beh kā chit件tāi-chì当做m̄知，m̄-koh....。」

清文去拜访阿阵出世ê部落，hit时ê心情是án-ne：Chit种不幸ê关系，若传出去，hō͘ 人批评，对陈家来讲是真不利，而且kā阿阵死去ê tāi-chì报瑞文知，mā是无chhái工。若是有人ē-tàng kā她埋葬，实在是无比这koh khah好ê tāi-chì，m̄-koh，lóng chhōe无她ê亲chiâⁿ。本来想讲不得已ê时，只好chhiàⁿ人去处理；hiah-ê人一定会要求小khóa ê报酬，m̄-koh，钱若ē-tàng解决，m̄免费气，he是siōng好ê。当清文teh想beh用钱来解决ê时，伊chiah忽然明白这是陈家ê人tio̍h负责处理ê tāi-chì；埋葬阿阵当然to̍h是瑞文ê义务。

事实上，瑞文无承担chit-ê责任mā bē-sái得。因为伊感觉家己一个去惊惊，所以就hō͘ in bó͘ 春鸾陪伊去。

第二工，天iáu未光，in两人to̍h chhiàⁿ车，恬恬á ǹg庄脚出发。因为chit种tāi-chì若hō͘ 人知，无啥体面，而且清文有事先kā伊交带，mài吵tio̍h厝里ê人，tio̍h尽量选无人看tio̍h ê时刻起身。

In来到前一工清文夫妇落车改用行路ê所在，chhōa路ê人已经tī hia等in。瑞文kah春鸾hō͘ 伊chhōa路，tùi患者收容所ê方向行去。过无一时á，in行落去山谷，koh tùi山腰peh起lih。In行近收容所ê时，听tio̍h kah-ná野兽远远teh吼（háu）ê声，瑞文夫妇惊kah ná无teh活ê款；尤其是瑞文，伊惊kah kui身躯硬piàng-piàng，tiāⁿ-tiāⁿ因为忍受bē-tiâu，soah sih-sih颤，kah-ná强beh哭出来。

寮á边已经khǹg一副棺材，边á ê菅芒草席顶面，用菅芒叶盖teh ê是尸体。除了chhōa路ê以外，koh有三个beh扛棺材ê cha-po͘人tī hia teh等；chiah-ê lóng是昨昏清文所安排好势ê。瑞文m̄-nā无感谢伊ê好意，koh kan-taⁿ感觉家己kám m̄是mā成做丧葬工人？为啥物清文tio̍h kā伊安排来chit-ê hō͘ 人sih-sih颤ê恐怖所在leh？为啥物kā伊安排来chit-ê hō͘ 人sih-sih颤ê恐怖所在？伊án-ne teh咒诅清文多管闲事。
「Oeh，khah紧leh好m̄？Ná会iáu tī hia teh慢sô-sô？」

好佳哉天暗暗iáu未光，寮á内ê活地狱kah死去ê cha-bó͘人ê面看bē清楚；瑞文苦bē-thang紧kā尸体khǹg入去棺材埋葬，m̄-koh，hiah-ê cha-po͘人慢sô-sô，khiā teh无beh动手。
「头家，阮lóng是农民，是受拜托来ê，阮lóng m̄-bat扛过死人；阮kan-taⁿ会晓扛棺材，收尸入棺ê tāi-chì tio̍h lín家己做。」
「Hiah kē路！Lín kám无想beh thàn khah chē钱？」
「若是头家你án怎都无法度做，án-ne to̍h无办法，只好阮来做。」

瑞文心中ê恐怖感hō͘ 伊非常为难，所以若是ē-tàng用钱解决，开koh khah chē钱都无要紧。Hiah tú好，hit时春鸾已经kā盖尸体ê菅芒草掀开，想beh kā尸体ê头扶起来。
「Oeh，你teh chhòng啥物？Chiah-ê人讲in会kā尸体扛入去棺材，你mài摸！你kám m̄惊去hō͘ 她煞tio̍h？」

瑞文无意中oá去in bó͘ teh khû ê所在。虽然是乌暗暝，春鸾挂ê白色嘴lom映入瑞文ê目chiu；伊随时oa̍t头m̄敢看死人。
「你扛下身kám好？」
「你teh起siáu hio͘h？」

瑞文根本都无法度相信春鸾ê胆量，而且hiah-ê cha-po͘人to̍h已经答应beh处理à，所以伊非常受气春鸾ê愚戆。春鸾一向lóng真服从丈夫，瑞文掠准kā她heⁿh惊一下，就会hō͘ 她收手，m̄-koh，chit时ê春鸾kah平常时无仝。
「瑞文，你实在真无胆，koh无情无义neh。Chit-má你án怎骂我，phah我，我lóng m̄惊你。」

瑞文感觉真意外，soah无她法。
「你想beh án怎bú leh？」
「无，是beh án怎bú？你chiah是m̄知án怎bú ê戆大呆。阿阵已经án-ne死去à，实在真可怜；我若是án-ne死去，你可能mā是连我ê头毛都无beh摸一下。」

春鸾严厉责备丈夫。翁á-bó͘ tī chit款所在冤家实在是真pháiⁿ看，所以瑞文讲：「我来chhòng。」就póe开hiah-ê tàu脚手ê cha-po͘人。瑞文mā有想讲，若koh拖时间，天一下光，就会koh khah可怕；所以除了伊kah春鸾两人kā尸体hē入去棺材以外，其它无啥办法。伊kah-ná teh用拚死ê心情，目chiu kheh-kheh m̄敢看，tī「无我ê梦中」，伊啥物都m̄敢想。因为siuⁿ过拚命，虽然无经验过扛尸体，真oh得想像它ê沉重，m̄-koh，chit-má瑞文hit两支瘦瘦ê手，竟然hiah轻松to̍h kā阿阵ê尸体扛起来。
四个cha-po͘人扛棺材，瑞文夫妇tòe in后壁，行向公墓。

In两人穿麻衫。In准备来ê物件只有麻衫、银纸kah鲜花；无和尚、道士，无kòng钲、念经，mā无亲人ê哭声；这是真寂寞ê野外出山。In经过乌暗ê山路，除了扛棺材ê棍á声，无人开嘴讲话；连瑞文掠准会沿路行沿路哭ê春鸾，mā kah-ná哑口恬恬无声。瑞文感觉chheⁿ-chhìn，有挡bē-tiâu ê款。总是，伊无koh惊惶；伊扛过尸体，已经无比这koh khah恐怖、讨厌ê tāi-chì ā。
过无gōa久，in行到hit带部落ê公墓山坪。

当然hia无风水先在场来决定坟墓ê地理方向，夫妇两人决定kā坪顶有五六欉相思树ê所在选做墓地，叫hiah-ê cha-po͘人开始挖墓穴。挖土用了相当久ê时间，已经渐渐天phú光。春鸾忍tiâu kui腹肚ê悲伤，kui路恬恬无出声。Chit时，她忍bē-tiâu，kah-ná堤岸崩去，大声哮出来。她phah开棺材koà，kā带来ê夜来香kah黄栀á花，掖（iā）tī阿阵ê面kah身躯，koh chia̍p-chia̍p烧银纸。瑞文khiā-.leh，kah-ná钉根tī大地，身躯lóng无tín动；伊teh看人挖墓穴，kah-ná想tio̍h家己teh beh hō͘ 人埋（tâi）落去ê款。

伊心内ê惊惶chit-má已经消失去à，m̄-koh，有新ê哀伤koh再涌出来。挖土ê铁锹kah铁铲sa-sa teh响ê声，kah-ná一下一下深深teh挖掘伊ê哀伤。春鸾ê哭声mā渐渐提高，tī四kho͘ 围teh回响；hit-ê沿路低声诉求沿路哭ê声，有时是哭kah beh死beh活ê低低哭声，有时是kah-ná远远传来婴á暗时teh哭有节奏ê哭声。He是她bat tī街路听过ê出山孝女ê哭法，mā是她自细汉to̍h听惯势ê；tī这不幸ê场合，她mā无bē记得tio̍h加上音乐节奏ê技巧。Kám讲使用技巧ē-tàng减轻悲伤，á是这是teh假哭？其实lóng m̄免án-ne；chit种柔肠寸断ê个人哀伤，koh khah ē-tàng表现活人beh活落去ê哀伤形式。春鸾是一个khah迟钝ê女子，她原本tī亲人死亡ê不幸中ê哭法lóng真臭笨，m̄-koh，今á日她ê哭kah-ná是teh奏哀乐ê高手，一声一声打动瑞文ê心。

墓穴挖好，beh kā棺材hē入去ê时，瑞文kā tàu脚手ê人讲chhun ê khang-khòe in家己来处理to̍h好，就hō͘ hiah-ê人tńg去；伊beh用家己ê手来kā阿阵埋葬。她bat是陈家ê一员，家己ê bó͘；m̄-koh，chit-má án-ne kah-ná teh埋葬乞食，实在真可怜。伊若连kā她埋葬都beh回避，伊会对家己ê无情，koh khah感觉惭愧。

Chit-ē女子bat救过伊ê性命，家己tio̍h án怎来回报neh？根据前一工清文tī hit-ê部落小khóa听tio̍h ê话，有讲起阿阵死前ê遭遇真悲惨。以前她离开陈家tńg来田庄ê时，她ê穿插真华丽；hit种都市ê打扮引起人人ê注目，无gōa久to̍h成做某一个财主ê bó͘。M̄-koh，he并无维持jóa久ê时间；m̄知是她家己离开，á是hông赶走，她过三个月to̍h离开hit间厝，去到某一个部落。就án-ne，她tùi chit-ê部落到hit-ê部落，四界teh流浪；每到一个部落，就成做某人ê细姨á是女婢。总讲一句，她是入去好额人ê厝，m̄-koh，入去无gōa久，就koh离开。她chit种反覆无常kah意爱流浪ê性格，m̄知是tùi tó位来ê。总是，她带猎枪入山，á是tī溪里洗浴ê形影，偶然会去hō͘ 人看tio̍h；大家lóng认为她是一个粗野ê cha-bó͘人，m̄-koh，人人无她法。Koh有人认为她打扮kah ná像花teh展súi，chit种奢华koh骄傲ê女人，准讲一时受tio̍h她ê服事，mā会无gōa久to̍h对她厌倦。Tī chit种ê情形之下，她就tùi hit所在消失形影，lóng无koh有啥物消息；有关她ê传闻mā不知不觉消失去。一年前，tùi chia有通到阿里山ê铁路，有人看tio̍h她tī火车顶kah一个原住民teh讲话。听tio̍h chit件tāi-chì ê人，lóng ioh讲她无tòa ê所在，就án-ne成做原住民ê bó͘。总是，她忽然tī几工前tńg来到她出世ê所在。有人问她tńg来chhòng啥？她kan-taⁿ回答讲：听讲chit带已经成做陈家ê凤梨园，我ē-tàng去hia hō͘ 人chhiàⁿ做工人。M̄-koh，hō͘ 人问tio̍h她以往án怎teh生活，á是chit-má teh做啥物tāi-chì，她lóng无beh提起家己ê境遇。M̄-koh，她穿kah真整齐，头毛梳kah真sù-phoè；她穿乌油绸ê衫kah裤，甚至mā有穿鞋á，hō͘ hiah-ê认为她ê境遇凄惨ê人惊一tiô。总是，hō͘ 人koh khah tio̍h惊ê是她外貌ê改变；她ê年纪并无大，看起来却真臭老；略á带茶米色ê头毛ta燥koh无金滑，看tio̍h她臭火ta款ê浮肿肌肤kah倦tauh-tauh ê大目chiu仁，会感觉她一定是身躯tó位有问题。早前她iáu是姑娘á ê时，kah-ná豹母，m̄-koh，她hit种一摸to̍h tiô起来ê活跳，已经lóng看bē-tio̍h à，所以可能是她已经破病chiah会tńg来故乡。若是有像以前hit种结实ê身躯kah饱足ê精神，准讲tńg来村里ê第三工to̍h去染tio̍h流行病，mā bē án-ne随去hō͘ 病魔打倒。

总是，对瑞文来讲，阿阵离开伊以后ê境遇，m̄是伊ê大问题；伊唯一后悔ê是伊hō͘ 她致到死亡ê境地。伊án-ne teh想，跪tī墓穴边á；注目看棺材内ê尸体，出声哭起来。
「阿阵，求你原谅我！是我hō͘ 你成做落魄ê cha-bó͘人！是我hō͘ 你死kah chiah凄惨！」

春鸾看tio̍h丈夫哭出来，她停止iáu未烧完ê银纸，静静á oá近丈夫ê身边，她讲：
「无lah，是我m̄好，空气枪射tio̍h美圆目chiu ê是我。Hit时，阿阵为tio̍h beh袒护我，chiah会顶替我ê罪来离开厝。」

瑞文头一pái听tio̍h in bó͘ ê告白，m̄-koh，伊kan-taⁿ讲「是oh」，并无非常感动ê款。伊所想tio̍h ê阿阵并m̄是hiah-ni̍h深bat道理，mā m̄是照一般人所讲ê有高尚ê牺牲精神；她是tùi伊hō͘ 蛇咬tio̍h ê孔嘴suh血，mā是chhōa伊闪避暴民ê火烧打劫，koh hō͘ 伊骑牛tī暗暝逃走ê姑娘。M̄-koh，chit-má ê瑞文kám ē-tàng甜蜜回忆chiah-ê事实？Chit-ê cha-bó͘人已经死去à，teh beh hō͘ 人kā她埋葬落去土底。Chit-má打击瑞文心灵ê是koh khah严肃ê tāi-chì。阿阵m̄是出tī她ê自我意识，所以她ê行为ē-tàng讲是善，而且她有一屑á都m̄知beh要求回报ê心。Chit种世间罕有ê自然kah朴素，已经去hō͘ 社会上chē-chē ê花心cha-po͘人污染，soah消失去à。瑞文想：我kám有chit种权利？虽然he是她ê德性，是罕有ê自然kah朴素，m̄-koh，mā有可能是一蕊无值得挽ê野花。虽然是án-ne，啥人有权利kā它挽起来，hō͘ 它ta去？瑞文想：像伊家己chit种对人生无坚定ê信念，而且任何信心lóng无ê人，koh khah无权利kā它挽。

天渐渐光，m̄-koh，墓穴内iáu是暗淡，hō͘ 花盖teh ê陈氏阿阵ê面雾雾看bē清楚，看bē出中年ê衰老。瑞文无ài看清楚，希望ē-tàng紧kā她埋葬。瑞文印象中ê阿阵，是年轻koh充满生命力ê田庄姑娘，是射豹、洗水浴、骑牛ê山顶姑娘。她个性直爽、急性、任性、无欲望、m̄知thang惊....。Tio̍h lah，瑞文想：她绝对bē恨伊，bē chheh伊。她生tī大地，就hō͘ 她归tī大地。她chit-má看起来kah-ná真懊恼teh讲：「真烦neh，你ná会iáu teh哭bē soah？Hō͘ 我倒tī chit-ê冰冷ê所在，不如hō͘ 我变成牛行来行去。Mài koh tòa hia慢sô-sô，紧kā我tâi落去土里lah！」
「Ah，春鸾，有来iáu是有khah好；我感觉变成ē-tàng挺胸，心情真好。」
「你tú-chiah iáu teh惊kah phi̍h-phi̍h-chhoah leh。」
「我已经无koh再惊惶，准讲tio̍h入去墓内mā无teh惊。」
「你若ē-tàng，我mā ē-tàng入去。」
「总是，咱tio̍h紧kā她埋葬，若无，阿阵会受气；她急性koh脾气无好。」

因为跪tī土脚siuⁿ久，脚头u hō͘ 露水湿tâm去。In两人khiā起来，盖棺材koà，用hiah-ê人留落来ê铁锹kah铁铲盖土。Tī早起时ê露水中，两翁á-bó͘ 喘phēⁿ-phēⁿ喘teh流汗做工。无gōa久，in做成一个馒头形ê土堆墓ê时，东方ê天顶已经变kah ná草莓ê色，无一时á，日头to̍h tùi山岭升起来。
「Ah，soah尾就天光ā。」
「Hiah-ni̍h súi ê天空，是tī街á lóng m̄-bat看过ê。」

In两人ê胸坎á深深teh呼吸。In无koh哭à，因为in感觉阿阵ná亲像tùi死koh活起来。Tī相思树枝teh唱歌ê鸟á，以及tī偏僻ê山廕thí开目chiu醒起来ê动物，kah-ná lóng是阿阵变成ê；阿阵ê性命to̍h tī chia附近teh展翼，亲像世界一切ê山川、草木、禽兽kah生物。今á日mā出日头ā，已经beh开始有活命ê一工。

就án-ne，tī比个人ê后悔á是悲哀koh khah大ê力量kah作为ê面前，夫妻两人ê心内充满m̄-bat有过ê新鲜感情。