《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第十九章（更新版）
作者 庄司总一着 赖永祥指导 林俊育台译 2017.03.12
游德仁倒tī农场宿舍ê房间teh困。
伊ê病况iáu未到会讲谵（chiam）语hiah严重，m̄-koh，发烧ê热度真koân，koh tiāⁿ-tiāⁿ头痛beh吐，真艰苦。总讲一句，因为医生真无闲，时常请bē来；koh因为是可怕ê传染病，农场ê人mā无想beh近óa去kā伊照顾。
清文随时kā红包附上伊ê名片，派人去请医生来。就án-ne，已经去tī离农场约六公里ê山地ê村医林文贵医生koh oa̍t tńg来。讲起来mā莫怪，因为近来传染病四界teh发生，伊实在非常无闲。
Tī医生teh治疗ê中间，清文tī病人ê边á照顾；安子因为m̄敢看病人艰苦ê情形kah治疗过程，她一个人离开，行ǹg别庄ê方向去。雨期已经过，土变黄色koh ta-khok-khok，四界pit裂。厝前庭院ê日日草，花开kah满四界，抢夺其它花蕊ê光彩；荫影下面露出tō͘-tēng绿色ê光芒。
别庄ê正门入口日头光iàⁿ-iàⁿ，安子摸tio̍h门，手感觉真烧。她一入门to̍h鼻tio̍h土粉kah臭phú ê味，她就phah开窗á，hō͘ 光线kah风入来。室内无像她有一暗所眠梦ê hiah荒废；挂tī暖炉顶面壁顶ê Ta-bin-chhih（译注：ダウィンチ，意大利文=da Vinci，华语=达文西）「最后ê晚餐」仿作油画，mā无去hō͘ ka-choa̍h咬过，m̄-koh，耶稣ê面kah-ná变kah真忧愁。空空ê厝内kah-ná墓穴，散发出阴沉ê气氛。
「游先生chit-má teh接受医生ê治疗，求祢m̄-thang延chhiân拯救伊。神ah，求祢m̄-thang夺取伊ê性命；医好了后，求祢m̄-thang hō͘ 伊变成哑口，á是筋肉麻痹，á是白痴ê恐怖后遗症头。」
安子kā手hē tī 图画头前ê椅á扶手顶面，她想beh祈祷。M̄-koh，她kan-taⁿ tī有土粉ê扶手顶面留落来手印，无法度祈祷落去。玉帘以前bat讲过保罗ê话「人因信称义，m̄是在tī行为」，安子抱tio̍h几分ê疑问，一直到chit-má她chiah了解真正ê意义。无支持信仰ê行为是无意义；kā义当做信仰ê第一重要ê是有理由ê。Chit-má ê安子惊破病koh惊死，一直等到最后chiah来chia；无信心kah勇气ê时，祈祷kám有啥物价值？
她对家己ê软弱感觉见笑，就离开「最后ê晚餐」ê hit幅图，peh起lih二楼。她tùi二楼ê窗á看出去，看tio̍h阔bóng-bóng ê农场。日头赤iāⁿ-iāⁿ，一片发白ê凤梨园，园中间ê路顶有一台hông弃sak ê牛车。无人teh做khang-khoè，已经是采凤梨ê时期，若无采收，kám m̄是会过头熟去？若siuⁿ过熟to̍h无适合做凤梨罐头；tio̍h tī iáu青青ê时采收chiah好。安子想tio̍h chiah-ê tāi-chì，忽然开始烦恼起来。M̄-koh，kah chit-ê土地ê众人tng teh受难ê不幸比起来，这实在是无tè比ê小事。
安子听tio̍h清文tùi病人所在tńg来ê声，就落去楼脚。
「游先生ê情况án怎？」
「我想是无问题，chit-má teh tùi龙骨髓抽骨髓液。」
「Án-ne to̍h真好。M̄-koh，iáu是bē放心得。Tio̍h chhiàⁿ一个附添，mā tio̍h请林医生ta̍k工来往诊。」
「我lóng安排好à。」
「真失礼！我lóng无做啥物。Án-ne，咱是m̄是随时来tńg？」
「Tio̍h koh顺续kā农场巡一下；游德仁是忠实ê人，伊tī病中痛苦ê时，iáu teh关心农作物neh。」
就án-ne，in两人来到凤梨园，土ná亲像烘烧烧ê面包。In两人lóng挂嘴lom，ta燥ê热气hō͘ in连喘气都有困难。 两人khû落来检查凤梨果实。
「害loh。」
清文无奈出声án-ne讲。前一chām-á 落大雨，致使凤梨受tio̍h相当ê伤害，有bē少出现乌斑ê毛病。
「Ah，这是乌目á lah。」
「无m̄-tio̍h，你知影chit-ê名词，你对凤梨mā ē-sái算是专家loh。」
清文用小khóa khau洗ê口气án-ne讲，m̄-koh，两人lóng无笑。 Ná亲像面对家己用疼扶养长大ê kiáⁿ teh破病，夫妇两人lóng心情忧郁。平常时看起来ná亲像真好看ê阅兵队伍ê凤梨园，长koh尖ê叶á ná剑一样ê凤梨队伍，今á日soah ná亲像倦tauh-tauh ê一队伤兵，无lám无ne。安子讲：
「你看，chit第一区ê凤梨若无上生产线ê机械来制造成品bē-sái得à。」
「时期有小khóa khah慢，做食用应该真tú好。」
清文有teh使khio͘h-ka̍k án-ne讲，安子kā伊安tah讲：
「Bē lah，koh两三工iáu无要紧，chia ê脚手若无够，咱thang tùi工厂派人来采收。」
「Chia有流行病，in会m̄肯来。M̄-koh，chhut-chāi它腐烂mā bē-sái，tio̍h紧kā in推出去市场chiah好。」
总是，若án-ne kā青凤梨供应市场，工厂ê机械就会hē teh闲。
「看起来今年ê营业会koh是红字。」
清文对chit项事业，到taⁿ iáu m̄-bat吐气，á是讲过失志ê话，chit时真难得流露出失望ê款式。一切ê tāi-chì lóng是tùi失去信心ê瞬间开始崩盘。Án-ne bē-sái得；安子平常时对清文ê大胆作风感觉不安，m̄-koh，chit时她ê信心坚定。
「Tī基础稳定以前是无可奈何，m̄-koh，明年起就会顺利。总是，为tio̍h beh应付chit种天灾所造成ê损失，iáu是需要设立一笔相当ê预备金。」
「当然是tio̍h án-ne。M̄-koh，若beh án-ne做，结局mā是tio̍h先每年有相当ê利纯。」
「有利纯chiah好，因为亏损to̍h无法度发展事业。」
「当然是án-ne。我并m̄是无ài咱ê陈清公司有大发展，成做几百万资本ê公司。总是，chit方面ê发展准讲有jóa大，若kah家己ê理想无一致，去妨碍tio̍h理想，án-ne就无啥意义；理想kah大发展实在是真oh得兼顾。」
清文讲了，就恬恬á起身，行向别庄，安子mā无koh讲话。照丈夫所讲ê，beh hō͘ 事业致富kah理想一致，确实是siōng困难ê问题。M̄-koh，安子忽然恬恬无讲话，并m̄是因为对丈夫ê话感觉已经无koh再表示意见ê余地，却是因为chit-ê问题以前to̍h tī清文ê思想中，安子知影其中含有啥物暧昧不明ê意思，m̄-koh，安子并m̄知he到底是啥物。
安子心内tú有chit种微妙感觉ê时，清文koh开嘴讲：
「安子，咱ê事业可能不得不tio̍h提早结束neh。」
「Ai-ah，是án怎leh？讲chit款失志ê话，这无sêng你ê作风neh。咱ê心神起初to̍h有准备beh面对困难，kám m̄是？」
「M̄是惊困难，是因为有听tio̍h凤梨公司有beh联合ê风声。」
「联合啥物？」
「你kám iáu未听人讲过？」
「M̄知影leh。」
「我mā是昨昏chiah对某方面听tio̍h，听讲全岛ê凤梨公司beh合并成做一间公司。」
「Kám是谣言？」
「Iáu m̄知。M̄-koh，若是án-ne，咱to̍h去了了à。」
「你讲情形iáu未明朗，kám m̄是？总是，若是án-ne，mā是无可奈何。 一切lóng是神ê旨意，m̄-koh，无到最后ê关头，咱iáu是tio̍h坚持落去。」
「我ê看法mā是án-ne，chit-má无需要急beh放弃。」
清文án-ne表示伊ê决意，又koh用自我khau洗ê语气讲：
「总是，因为有chit种变化，照tú-chiah所讲ê，准讲想beh hō͘ 事业壮大，mā大bē起来。」
无beh hō͘ 事业大起来。安子kā丈夫最后chit句话tī心内koh再思考ê时，忽然理解iáu tī她ê思想中teh缠ê暧昧意思。伊无希望用伊所拥有ê条件来创造一间一千万圆ê公司，这并m̄是kan-taⁿ因为无chit-ê资本。
虽然人常常teh讲台湾钱淹脚目，其实这只不过是对一阵十万、二十万ê小资本家来讲而已；tùi chit点来想to̍h ē-tàng明白。清文起初to̍h知影公司无法度真大，伊是用chit-ê做前提来开始伊ê事业。物质上发展ê限度，ē-tàng用精神ê充足来弥补。伊tī新事业开始ê时ê美好理想、抱负kah热情，若kā它想起来，m̄是tùi伊纯粹ê思想kah清廉洁白ê人格中直接放出ê映目光辉，却是透过伊暗淡ê无奈中所流露出来ê微微á光。
清文无掠利纯为主，却是对生产kah劳动本身欢喜，以及常常用人道精神ê协调kah融合做公司宗旨ê基础。总是，清文chit种崇高理想ê光，就án-ne有一点á暗淡落来。安子有了解，m̄-koh，她并无感觉理想幻灭。清文tī可能ê范围内lóng真正直；安子想tio̍h ē-tàng达到chit-ê境界ê人并无chē，她颠倒对丈夫感觉骄傲。
清文kah安子tùi凤梨园tńg来，koh去看游德仁一pái chiah tńg来厝里。
Tùi台南chhiàⁿ来ê包租车tī几百公尺外teh等；因为早前做大水，tùi大路到农场ê道路，有两个所在崩去，iáu未修理好势。林医生kah in做伙行到大路，因为路狭，三人soah tio̍h排一列来行。
「林医师，听讲脑炎ê流行有khah减弱à，chit-má ê情况到底是án怎？」
做头前ê清文用日语问。村医林文贵行tī中央，安子tòe tī siōng后壁，恬恬á teh听in两人讲话。
「看起来有teh减弱，m̄-koh又koh出现，亲像游德仁ê情形。Kan-taⁿ chit礼拜中间，我to̍h看tio̍h二十人死亡。虽然讲是行医ê职业，我mā是会感觉小khóa郁卒；若是有报酬to̍h讲khah会得过。」
林文贵是大约三十岁ê少年医生，平常时to̍h有一点á神经质，chit-má伊ê身体明显真倦（siān）ê款，苍白ê面色露出忧郁ê表情。
「而且今年流行ê是恶性ê，大约有70% ê死亡率。Mā有病人kah-ná去hō͘ 雷公kòng-.tio̍h，soah随时死亡。」
安子听tio̍h chiah-ê话，就起畏寒，加速她ê脚步，脚踏tio̍h投tī医生后壁ê身影。本来听讲量早医治to̍h会无问题，m̄-koh，chit-má游德仁ê现况koh引起安子ê不安。
「无隔离病院，chit种情形真困难。」清文讲。
「是ah，村里无chit-ê预算，每pái提出议案lóng无法度实现。」
「M̄-koh，hiah-ni̍h危险ê患者mā tio̍h好好á处理，kám讲to̍h kā in放tī各人ê厝？」
「当然m̄是，是收容tī一定ê场所。这koh是一个大问题；in kah-ná teh对待猫á kah狗á án-ne，teh款待病人。我chit-má to̍h是beh去hia往诊。Tio̍h lah....。」
林医师kah-ná想起啥物án-ne讲：
「患者中间，有一个人发烧nga̍uh-nga̍uh念ê时，有讲起府上ê tāi-chì neh。」
「是m̄是农场ê chhiàⁿ工？讲啥物tāi-chì？」
「因为是发烧，讲话听bē清楚，kah-ná是teh nga̍uh-nga̍uh念：瑞文....瑞文....阿舍。伊kám是你ê小弟？」
安子听了，忽然想tio̍h，她问讲：「He kám是cha-bó͘人？」
「Ah，是lah，我tú-chiah无讲tio̍h。」
「Án-ne，她to̍h是阿阵。」
安子án-ne讲了，行tī头前ê清文mā知影是她，小khóa惊一tiô回头看，脚步mā停落来。三个人óa做伙，距离近kah kiōng-beh相碰。
「Kám是kah府上有关系ê人？」
林医师án-ne问，继续向已经看会tio̍h ê大路行去。清文kah安子一tah久恬恬无应答。
「你tú-chiah提起ê患者，kám ē-sái会面？」
In来到tī街路teh等in ê车ê时，清文忽然问医生。医生感觉chit-ê问题真奇怪。
「Mài看khah好，hit-ê场面真bái。」
「无lah，kan-taⁿ小看一下to̍h好，hit-ê收容所kám真远？」
「无讲真远，m̄-koh，途中有一段路bē-tàng驶车，tio̍h用行路。你若想beh去hit款所在，siōng好是mài；hia kah-ná是地狱leh。」
林医师表示无同意，m̄-koh，清文坚持beh去。
「安子，你坐chit台车tńg去，我去看一下to̍h好。」
M̄-koh，安子若坐chit台包租车tńg去，清文tio̍h ài行路。所以，安子讲：
「我陪你去到收容所ê附近。」
Chit pái，in两人无像beh来农场ê时án-ne来回吵bē soah。Βat成做陈家一份子ê陈氏阵，chit-má面临生死ê关头，若是完全无chhap她，oa̍t头to̍h走，人情上kah义理上lóng讲bē得过；in两人有chit种ê默契。
三人就坐车，驶ǹg beh tńg去厝里ê反方向。车驶一段山路了后，来到车无法度koh继续驶ê所在，三人就落车。然后，in行落去狭狭ê落崎á路，进入山谷中间ê一个平埔族部落。Tī hia大约有十间简单粗俗ê厝，lóng是用土角kah竹篾á起造ê。Hit带ê山谷kah山坪，有一kóa亲像chit种ê部落。
Tú-chiah落山谷了后，koh小khóa peh上崎，tī半山腰有一个崩山ê遗迹，收容所就起tī hit顶面ê小小平台顶。Tú-chiah医生有讲过收容所真简单粗俗，m̄-koh，比清文in iáu未看tio̍h chìn前所想像ê koh khah bái。既然讲是患者收容所，掠准至少有小khóa简单ê设备，m̄-koh，in kan-taⁿ看tio̍h用菅草围teh ê简单寮á，患者倒tī菅草席á顶面，乱七八糟，而且二十几个患者ê衫裤lóng破烂，有一个kan-taⁿ穿一领裤，ná亲像赤theh-theh ê患者，看起来有够残忍。有牙齿咬teh发出kiⁿ-kiⁿ-kóaiⁿ-kóaiⁿ ê声；有ê痛苦kah mo͘h头壳，haiⁿ-haiⁿ-chhan，发出可怜ê声；有ê发烧teh nga̍uh-nga̍uh念，其中mā有头昏昏teh困ê。
清文感觉tio̍h kui个身躯变硬起来，勉强行oá去hit-ê寮á厝。安子koh khah免讲，她kui身躯sih-sih颤，心脏pho̍k-pho̍k跳；她靠tī丈夫ê身躯，掠tiâu伊ê手，勉强忍leh。
「Ah，果然是她，tī hia。」
清文tī寮á ê入口看对内面，细声kā安子讲。参杂tī真chē cha-po͘患者ê中间，cha-bó͘ 患者只有两个ê款，倒tī内角草席á顶hit-ê果然是阿阵。菅芒草席kā日头cha̍h-.leh，tī浊浊暗暗ê光线中看bē清楚。阿阵kah-ná teh困，真平静ê姿态。不可思议ê是，其他患者ê衫裤lóng是破糊糊，kan-taⁿ阿阵穿iáu算清气ê乌油绸ê衫kah裤。若beh讲是不可思议，不如讲是一种怀念情感进入安子ê心头。阿阵虽然是一个卑微ê田庄cha-bó͘ gín-á，m̄-koh，她bat做过好额人陈家ê第二夫人，她bat有过ê chit种品味iáu无失去。
林医师入去内面做治疗，因为村里kan-taⁿ支付伊有名无实ê津贴，以及已经无药医ê放弃治疗ê心chiâⁿ，伊kan-taⁿ为hiah-ê特别hoah痛teh滚liòng ê患者注射，所以真紧to̍h出来。
「Hit-ê cha-bó͘人án怎？Kám iáu有希望？」
「Chit-má kah-ná teh困，总讲一句，她he ná亲像是hō͘ 雷kòng-.tio̍h ê脑膜炎，一开始to̍h昏迷，意识不清。」
阿阵kah-ná根本to̍h无希望ê款，m̄-koh，tī死chìn前tio̍h尽力kā她拯救，这是安子ê真正心意，因为可能有时会出现奇迹。游德仁ê情形是有及时ê治疗，而且受tio̍h siōng谨慎koh siōng完善ê治疗，tùi腰椎穿入去，抽出脑脊髓液，koh用医药盐水洗，注射Chu-lu-hoa-mit（硫酸胺）。安子特别来到chia，她希望阿阵mā ē-tàng接受chit种ê治疗，所以她对医生讲：
「Chit-ê cha-bó͘人以前bat tòa阮tau，请你照游德仁ê方法kā她治疗kám好？医疗费用由阮负责。」
林医师the̍h伊ê医疗皮包，koh再入去草寮á内。M̄知情况án怎？清文kah安子迫切teh等á等，结果看tio̍h真无奈ê款行出来。
「Hit-ê cha-bó͘人tú-chiah to̍h死去à，我掠准她是teh困。」
