《《陈夫人》日译台e5台湾小说 第二部》

 | | | 转寄

《陈夫人》第二部 亲子 第二十六章（更新版）

作者 庄司总一着 赖永祥指导 林俊育台译 2017.04.30

Chit暗，阿明无事先通知一声，to̍h忽然tńg来厝里。

阿明m̄知厝里teh庆祝阿妈七十大寿。伊看tio̍h门口前kui阵人围teh看戏，厅堂ê宴席mā当teh闹热滚滚；伊m̄知到底是发生啥物tāi-chì，kah-ná是去看tio̍h别人ê厝。伊tī门口徘徊一下，然后进入门内，看tio̍h kui家伙lóng集中tī厅堂teh闹热，每一间房间显然lóng是空ê，所以伊就khiā tī前埕ê石阶teh看宴席。

「Ah，he是阿明ho͘ⁿh？」伊hō͘ 一个人客发见。因为真吵，大家无同齐发见，m̄-koh，伊ê出现kah-ná波浪一桌传过一桌。无一时á，大家ê目chiu to̍h lóng teh注意伊。M̄-koh，hō͘ 大家tio̍h惊 ê m̄是瑞文ê长男忽然出现，却是伊ê外表hō͘ 大家惊kah gāng去。伊无剃ê头毛留真长，嘴须mā无修，身上所穿ê洋服lah-sap koh破旧，hō͘ 人bē想tio̍h伊to̍h是hit-ê像老父hiah缘投ê阿明。而且一般人m̄知高等学校ê学生thiau故意án-ne无妆无thāⁿ ê习惯，chit-má tī当teh祝寿ê场面，伊án-ne行入来，致使大家lóng非常困惑，闹热滚滚ê宴席气氛mā kah-ná忽然消失。

瑞文催伊紧kā阿妈祝寿，讲吉祥ê话，向人客phah招呼。Tī光iàⁿ-iàⁿ ê场面，阿明ê面hō͘ 敏感ê人得tio̍h ê印象，比伊服装无整齐koh khah hō͘ 人有奇怪ê观感。伊m̄-nā是面色苍白，目箍深深，可爱ê圆面变kah瘦pi-pa而已；伊ê外表hō͘ 人看起来真刺凿（chhì-chha̍k），ná亲像犯tio̍h啥物大过失soah烦恼kah bē堪得，结果kā感情消磨了了，戆戆ê面lóng无表情；ē-sái讲是睿智ê影迹一点á都无ê戆呆面chhiuⁿ。

阿妈问伊，是m̄是破病？她虽然担心伊破病，m̄-koh，chit-ê孙á无bē记得阿妈ê生日，tùi远远ê台北赶tńg来，所以阿娇ê欢喜冲淡她ê担心。总是，瑞文tùi阿明kah平常时有koh样ê气色，看出伊一定是有问题。伊随时离席，kā阿明chhōa到伊ê房间。
「阿妈七十大寿，你beh tńg来，ná会无先写phoe讲一声？你是m̄是破病？Mài kan-taⁿ一直khiā-.leh，坐落来！Ngh，你tang时变kah hiah瘦？」
「我ê身躯并无啥物无爽快。」
「Án-ne，是为啥物特别ê tāi-chì chiah tùi学校请假tńg来？」 瑞文因为lim酒醉à，无法度控制家己ê情绪。
「Án-ne kui身躯kah-ná乞食ê款，koh是为啥物？若是服装整齐tńg来，he是为tio̍h庆祝阿妈ê大寿tńg来，大家会认为你是一个可取ê gín-á，m̄-koh，你chit-má chit ê款根本to̍h m̄是为tio̍h祝寿，kah-ná是痟ê。我实在真无面子，苦bē-tàng紧chhōe一个地洞钻入去。」

不管伊是啥物理由tńg来，chit-má伊hō͘ 老父感觉真见笑，而且伊koh无beh chhap老父ê责备。M̄知伊有听入耳á无？瑞文看tio̍h in kiáⁿ iáu是lóng无反应ê表情；阿明kan-taⁿ捷捷用手指尾ê指甲teh tiak薰屎。阿明本来无pok薰，瑞文认为伊是准讲pok薰mā无所谓ê坚定koh认真ê gín-á，m̄-koh，chit-má伊ê形看起来kah-ná是teh自甘堕落。
「Chiah-ê lóng免讲mā无要紧，总讲一句，你bē-sái无缘无故m̄去学校上课。」
「我无ài去学校ā。」
「无ài去学校？！」

瑞文机械式反应，重复讲一遍了后，就tùi椅á khiā起来。阿明突然出现ê时，瑞文凭直觉感觉不安。其实伊对阿明服装无整齐，á是可能破病ê担心，iáu是bē比对chit-ê问题koh khah不安；瑞文chit时chiah注意tio̍h chit点。阿明进入高等学校ê时，伊hiah-ni̍h-á ài beh读文科，非常无ài读理科，瑞文却硬硬ài伊读理科，读了后，阿明iáu是非常不满ê款。若因为án-ne来误入歧途to̍h惨loh；其实伊chit-má to̍h已经有一点á堕落ê款à。为啥物当初无beh顺伊ê意志neh？瑞文chit-má有teh后悔，所以伊用充分让步ê口气讲：
「阿明，你讲ê kám是真心话？若是你认为无论如何to̍h无适合读理科，án-ne，改读文科mā无要紧。」
「我已经无ài去学校ā。」
「你是teh对siáng讲话？」

In kiáⁿ到taⁿ iáu m̄坐落去，做伊悠哉悠哉teh pok薰。瑞文忍受bē-tiâu，phok一声siàn伊ê嘴phóe。瑞文想：我chit下出手kā伊处罚siuⁿ过重à，我从来m̄-bat kā伊phah过，伊一定会哭、愤怒，koh会骂人。若án-ne就hō͘ 伊去发泄，因为激动ê时啥物话都讲会出来。而且，伊kám会koh再去学校？伊一定无ài koh去à，伊会koh khah坚持无ài去上课。M̄-koh，瑞文koh想：伊jú嚷，只是嘴嚷嚷leh niā-niā，伊腹肚内根本都无想beh退学，伊kan-taⁿ想beh糟躂人。

M̄-koh，哭起来ê是瑞文，被phah ê阿明颠倒是kan-taⁿ瞬间面á臭臭；伊目chiu ta-ta，无流目屎，无愤怒，mā无骂人；kan-taⁿ讲：「这kah阿爸无关系！」这是伊唯一ê反抗表示。

瑞文ê气力tùi腰消失去。伊phiân来phiân去，行倒tńg来桌á边，面phak落去，哭起来。伊沿路chhǹg，沿路讲：
「你讲kah我无关系oh？你chit-ê不孝kiáⁿ！是án怎讲父kiáⁿ无关系leh？你tú-chiah kah-ná幽灵出现chìn前，你kám知我是当teh讲啥物？我tú tī人客面前讲你是我ê骄傲。我讲你koh一年to̍h beh去东京读大学，将来beh做一个有为ê医生，当然mā会得tio̍h博士学位；若无，最近工科万能，所以若成做工程师mā是bē bái。Tú讲到chia，你to̍h kah-ná幽灵突然出现。」
「医学博士、工程师....这只不过是咱ê梦niā-niā。」
「Chiah-ê有为ê人，tī咱台湾你想有gōa chē？阿明，你tú-chiah所讲ê是你家己一点á都无考虑清楚ê tāi-chì neh。Mài-koh hō͘ 老父烦恼à，这是罪孽neh！M̄-thang án-ne teh折磨老父！」

因为阿明无回应，瑞文无法度koh讲啥，最后露出认输ê可怜款，期待in kiáⁿ来kā伊同情，所以伊就kā头taⁿ起来。总是，阿明hō͘ 老父siàn嘴phóe ê时，伊pok ê薰soah lak落去，所以伊koh重新点to̍h一支薰。伊目头结结，微微á露出苦闷ê款，kan-taⁿ án-ne讲：
「人无法度折磨别人；我只是对家己厌倦，chiah来折磨家己。」

瑞文觉悟伊家己无法度苦劝in kiáⁿ，所以隔tńg工请大兄清文来kā伊开拆道理。 清文真了解in侄á ê脾气kah思想。Chit-ê青年表面看起来真温和，内心却有满腹激烈ê热情。伊一直teh幻想kah追求美梦；伊chit种倾向比一般ê青年khah强烈。伊有时会hō͘ 人感觉伊khiā tī性命ê桥顶，沉迷tī追求虚幻，有跋落深渊ê危险性。虽然是án-ne，伊chit-má iáu未完成学业，to̍h想beh去马来西亚ê Jio-ho-l州ê橡树园，实在是siuⁿ过hàm古koh乱来。
「你为啥物会有chit种想法neh？」
「我mā bē明白是为啥物；大概是hō͘ 南方ê风引诱去。」
「Án-ne，你m̄是进前，是teh逃避。Bē-sái得，绝对bē-sái得。」
「阿伯，你kám m̄是mā bat beh逃避现实？你年轻ê时bat出国过，he是....。」
「是ah，所以我了解你ê心情，mā ē-tàng对你提出充分ê忠告。总是，你显然比我khah脆弱；我虽然逃避现实，m̄-koh，he是为tio̍h beh回复到新ê现实世界所行ê路。我守tiâu知识分子最后ê城池，m̄-koh，你却无仝；你kám m̄是kan-taⁿ理智上ê败北？南方ê风，美丽ê大自然，劳动....等等，你想，这kám m̄是kan-taⁿ beh回复自然原始ê卢梭主义？」
「无办法lah，因为我ê世界真狭koh浊浊混杂。」
「你所描写ê广阔koh美丽ê世界，你kám掠准神会hō͘ 你？」
「总讲一句，我无法度知影，m̄-koh，我teh追求；我是一尾无法度活tī浊水里ê鱼。有一个猴gín-á bat耻笑我讲：若是日本kah支那战争，你beh óa tó一pêng？阿伯应该ē-tàng想像hit时我所受tio̍h ê侮辱是啥款？这to̍h是我ê处境。因为无崇高ê特权，mā m̄-bat有性命ê危险，所以我无法度达到智识á是理论ê最高境界；tī chit种环境之下，对hiah-ni̍h-á寂寞ê我来讲，beh赴战场来死，kám有啥物意义？」

美丽ê崇高幻想kah-ná蝴蝶tī阿明ê胸坎á teh展翼，伊tú beh kā它掠tiâu hit瞬间所发出ê闪sih目光，kah teh phâng茶入来ê安子ê视线相tú。
「昨暗我真正惊一tiô，差一点á盘á to̍h lak落去土脚。」

安子teh笑，有一点á「夸张」án-ne讲。她ê目光kah阿明闪sih ê目光相接ê时，安子掠准阿明大概已经看thàng她ê心，所以hō͘ 她惊一tiô。安子为tio̍h chit件事，昨暗kui暗一个人烦恼kah无法度困落眠。Kah chit件事比较起来，清文对阿明án-ne积极beh kā伊讲道哩，实在是lóng无抓tio̍h伊心中teh痒ê所在。
「安子，伊想beh去马来西亚，beh向高高在上ê傲慢挑战。」
「我有听tio̍h。你为啥物会忽然起chit种想法neh？Ná亲像teh眠梦leh。你是长男，而且学业koh iáu未完成。」

安子án-ne讲，她深深受tio̍h良心ê责备，因为伊寄hō͘ 清子ê phoe是安子kā它藏起来ê，清文并m̄知。
「阿明，你是一个真出色ê幻想家，m̄-koh，tùi阮ê目chiu看起来，总是感觉有一点á偏差kah不可思议。」
「梦大概lóng是偏差kah不可思议。阿伯ê事业kám m̄是一种梦想？总是，它显现出来ê m̄-nā m̄是偏差kah不可思议，而且因为siuⁿ过正派，soah有一点á khah现实，kám m̄是？这是我ê看法。毕竟chit种事业受tio̍h金钱ê支配，koh受tio̍h经济条件ê限制，结尾mā是枉然；kah-ná是一phō kē路ê通俗小说。」

阿明chit段话hō͘ 清文kah安子感觉tio̍h惊。阿明一向lóng是kā in ê事业á是精神美化，m̄-koh，hō͘ in感觉真意外ê，m̄是阿明对事物看法ê改变，却是伊平常时温驯koh谨慎ê态度，chit-má忽然变kah hiah-gâu讲话；hit种想beh讲啥to̍h讲啥ê态度，实在kah以前有真大ê无仝。
「阿明，你beh追求单纯，m̄-koh，这去马来西亚chhōe bē-tio̍h，去Ta-hi-ti（=Tahiti，华语译做：大溪地）mā chhōe无；准讲去到世界ê ta̍k角落mā lóng chhōe bē-tio̍h。」
「若chhōe无，我就一直chhōe到死为止。」
「你ê脑筋有问题，显然是teh钻牛角。你kā理由讲出来，阮若做会到，阮愿意为你做任何tāi-chì。」
「Mā有lín做bē到ê tāi-chì ā。」

阿明笑一下。安子想：如果伊chit-má提起清子ê tāi-chì，tio̍h án怎处理leh？她感觉脚底冷ki-ki。阿明chit种使khioh-ka̍k（自暴自弃）ê款，显然是因为爱情ê欲望无法度得tio̍h ê结果。清文完全无了解伊ê实情，所以m̄-nā感觉阿明ê回答真暧昧，而且对伊hit种相当傲慢ê态度起受气。
「人tī世间当然有做会到kah做bē到ê tāi-chì，m̄-koh，总是ē-tàng kā它讲出来kám m̄是？啥物是无可能ê tāi-chì？」
「我想beh tī空中飞。」
「啥物？你想beh成做一个飞行家？」
「北冥有鱼，其名为鲲；鲲之大，不知其几千里也。化而为鸟，其名为鹏；鹏之背，不知其几千里也。翼若垂天之云，将徙于南冥....。」

阿明khiā起来，有一点á挺胸，ná亲像一个豪杰，tī室内行来行去。伊确实kah平常时无仝；原本无pok薰，chit-má却悠哉悠哉teh pok。伊感觉不安，目chiu不断teh nih。伊对阿伯ê问题虽然有问必答，m̄-koh，kah-ná无充分意识tio̍h对方ê存在，态度ku怪koh冷漠。伊对老父瑞文沉默koh傲慢，差不多是无beh chhap伊ê态度；m̄-koh，对阿伯清文ê态度是认真，所讲ê话mā m̄是lóng无合理。无论如何，清文明白chit-ê侄á ê精神已经是tī无健康ê状态。Án-ne，若beh kā伊ê烦恼是啥物问清楚，á是苦劝伊mài休学，á是phah断伊想beh去远方ê无理想法，不如先hō͘ 伊静养，hō͘ 伊ê心情静落来，这chiah是目前ê先决问题。