《《陈夫人》日译台e5台湾小说 第二部》

 | | | 转寄

《陈夫人》第二部 亲子 第十七章

作者 庄司总一着 赖永祥指导 林俊育台译 2017.02.26

最近玉帘ê困眠无好，有时到半暝无法度困落眠。而且，有时想beh早起时加困一时á, 却真早to̍h醒起来。总是，她bē因为困眠不足来身体厌倦，á是面色露出无元气ê款，颠倒精神活泼。

昨昏是她四十二岁生日，cha-bó͘-kiáⁿ美圆kah银澜phâng红卵来kā她做生日。近来她想tio̍h家己ê年岁，庆祝生日并无感觉快乐，m̄-koh, 看tio̍h两个cha-bó͘-kiáⁿ已经是身材好看kah-ná一蕊花，穿súi ê衫裤，齐声讲：「阿母，生日恭喜！」，玉帘心内充满幸福感，禁bē-tiâu soah欢喜kah哭出来。M̄是，并m̄是为家己欢喜kah哭出来，是因为想tio̍h美圆失去一蕊目chiu ê不幸来心酸，她家己án-ne解说。总是，暗时倒tī眠床顶，浮起来出现tī脑海ê并m̄是美圆。准讲想tio̍h美圆ê时，因为hit-ê义眼做kah真好kah-ná真正ê目chiu，m̄知ê人看bē出是义眼，对她ê出嫁大概bē影响，她án-ne简单自我解说。

Chit工tú好收tio̍h长男景仁tùi东京寄来ê phoe, 伊m̄是beh来恭贺老母生日快乐，是ài厝里寄钱hō͘ 伊。伊讲因为朋友有困难借钱hō͘ 伊，á对方soah一直无还钱；伊chit-má beh买参考书kah其它用品，需要一百圆，要求随时电汇过去。景仁去日本读册，当初她中（tiòng）in kiáⁿ chit种讨钱手法ê计，ài jōa chē to̍h hō͘ 伊jōa chē。想讲伊总是teh读大学，毕业了后就会像in阿伯清文成做出色ê人，抱tio̍h大ǹg望。M̄-koh, 经过时日了后，tiāⁿ-tiāⁿ有仝款ê讨钱经验，koh tùi别人传说ê话听来，chiah知影in kiáⁿ根本to̍h无认真读册，kan-taⁿ ài chhit-thô。可能mā有去咖啡厅á是舞厅。总讲一句，景仁显然陷落不良ê享乐。Tùi中学时代以来，景仁to̍h是父母苦恼ê因端；尤其是老母疼伊，玉帘ê苦恼koh khah深。她家己一人teh祈祷ê时，lóng是祈求神kā chit-ê放荡kiáⁿ chhōa tńg来正路。

总是，玉帘hit工宽谅kah莫名其妙，ē-sái讲是放任。....无lah, 伊一屑á都无放荡，是因为有景文hō͘ 人hiah讨厌ê chit种人。少年人ta̍k家mā lóng ài sńg, 她无hiah-ni̍h操心；学校毕业了后去社会工作，in kiáⁿ mā一定会认真phah拚。若一日到暗对伊chho̍p-chho̍p念，会失去chit-ê kiáⁿ, kah本来无kiáⁿ仝款。无法度lah, 明á载紧来去汇钱。 M̄-koh, 一百圆对chit-má ê玉帘来讲，m̄是一笔小数目。资产家ê bó͘ 连这一点á钱都ài烦恼，玉帘想到chia就感觉见笑koh懊恼。Hō͘ 她惨淡到chit-ê地步，完全lóng是因为景文ê缘故。景文无beh hō͘ in bó͘ 够额用ê钱，安子bat kā伊提醒chit点，伊爽快表示体会、了解；事实上伊mā对玉帘讲过：chit pái beh hō͘ 她手头有三万圆。景文hiah-ni̍h大方ê派头无法度hō͘ 人相信，玉帘感觉有一点á chhoah一tiô；她后来chiah知影，伊讲ê话无算啥。伊m̄是kā三万圆存入去玉帘ê银行口座，kan-taⁿ办理信托，用hit-ê利息当做她每个月ê lân-san费用。 她非常愤慨，m̄-koh, 玉帘至少表面上已经厌倦对in翁ê愤怒。真久以来，夫妇已经习惯各自困各人ê房间。最近，景文无论如何lóng khah chia̍p去细姨樱柳ê房间困。玉帘目chiu teh看，心有觉悟，kek做超然。看tio̍h她chit种ê表面，有人kā她o-ló, mā有人kā她耻笑。M̄-koh, m̄是因为她ê肉体无感觉，mā m̄是因为她无幸福。.... 总是，chit几工，尤其是她生日hit暝，她mā无想beh kā chit项tāi-chì对伊讲起。丈夫无tī身边，家己一人孤独tī-.teh—chit种自由自在ê快乐，到taⁿ无论án怎teh恨伊，án怎想beh闪避伊，lóng m̄-bat有过chit种不可思议ê经验。

早起时起床，精神真好，感觉暝时所想ê tāi-chì kah-ná香徙来身躯内面。成做信徒了后，她lóng早早to̍h起床，打扮正装好势就phah开东pêng ê窗á, ǹg神祈祷，一定读几节圣经。然后咒chóa无beh起邪念kah欲望、嫉妒、自夸，beh安份守己过一日。一直teh努力用严格ê戒律来保守家己，m̄-koh, 今á日真难得lán-si无照án-ne做。她真早to̍h精神，m̄-koh无想beh起床。过一时á chiah tùi眠床顶poe̍h开蠓罩落来，困衫iáu穿tiâu-.teh, 叫cha-bó͘-kán-á泡茶。

花茶流落去咙喉，茉莉花ê芳味传到心脏。然后，她chiah换衫裤面对梳妆台ê时，tùi外面入来ê景文出现tī镜内。Chit-ê意外hō͘ 玉帘惊一tiô, 她无回头，mā无phah招呼，继续化妆。

景文mā恬恬无出声，tī桌á边来回行两三步。伊ê影tī镜内真凿目，koh一直无beh出声，玉帘就问伊：
「Kám有啥物tāi-chì？」

景文iáu是恬恬，伊tī in bó͘ 后壁ê一张椅á坐落来。玉帘teh画目眉，并无oa̍t头，m̄-koh, 两人ê视线tī镜内相tú-.tio̍h. 玉帘koh问：
「你hiah早来，有啥物tāi-chì？」

景文kan-taⁿ微微á笑，iáu是无讲话。
「你chit-ê人真奇怪，为甚么m̄出声？Kah-ná哑口leh。」
「你化妆了后，看起来iáu算是美人，hō͘ 我惊一tiô。」
「惊一tiô ê是我，七早八早to̍h来人chia....」

景文ê感叹是真是假bē得知影，m̄-koh, 她看起来真súi是事实。玉帘因为感觉家己已经老ā, m̄知tang时开始m̄愿承认mā不得不tio̍h承认。景文chit-ê意外ê话hō͘ 她有自信，她注神看家己tī镜内ê面。
「你kah樱柳冤家chiah走来我chia ho͘ⁿh, hit-ê人听讲mā m̄是hiah条直。」

玉帘用同情ê语气án-ne讲。丈夫ná会hiah可怜ê款？玉帘chit-má真幸福，感觉其他ê人lóng真可怜ê款。
「看你嘴笑目笑，有啥物好事？」

她听tio̍h丈夫chit句话，应该会chhoah一tiô, m̄-koh, 玉帘kah-ná hō͘ 人teh抓痒，感觉非常快乐。
「Hō͘ 人真欣羡neh。我近来已经无啥物快乐ê tāi-chì, kám m̄是leh？长女一蕊目chiu失明，长男iáu是hiah-ni̍h放荡....玉帘，伊kám有kā你讲啥？」

景文chit时chiah露出认真ê表情，伊讲：「有关钱ê phoe。」
「伊有讲，kā钱借hō͘ 朋友，对方iáu未还钱，伊beh买册，所以....」
「寄一百圆来。
「Oh。」

景文无koh微微á笑，有一点á变受气。
「我料想tio̍h án-ne, 伊mā寄一张仝款ê phoe来店里hō͘ 我。伊掠准你kah我平常时无teh来往，伊ê诡计bē hông发见。向双方仝一样讨钱，企图得tio̍h两份利益。无no͘h, 伊到taⁿ m̄知几pái用chit套来kā咱瞒骗。做chit款大欺骗ê tāi-chì, 绝对bē-sái koh再宽容，tio̍h紧叫伊tńg来，免koh再读大学à lah。」
「所以，来匆匆pōng-pōng走来chia, 你chit-ê人面对钱ê tāi-chì to̍h....」
「M̄是钱ê tāi-chì, 是关系景仁一生ê tāi-chì。Chhut-chāi伊tī hia, 将来会án怎？」
「做父母ê m̄免hiah操心，伊ê本性m̄是一个戆人。伊若有出息成做律师á是法官，你ê头壳to̍h taⁿ bē起来。」
「将来ê tāi-chì bē按算得，我讲ê是chit-má ê tāi-chì。Lín kiáⁿ双重讨生活费，chit项tāi-chì你感无teh要紧？你对钱有洁癖，我掠准你知影了后会大受气....。Oeh, 你到底是án怎？你当做我是teh讲别人ê kiáⁿ leh。」

In翁ê小圆面有点á变硬，照tī镜里看起来koh khah细。玉帘无kā伊看，mā无kā伊ê话听入耳。她所看ê kah所听ê完全是别项事：
（今á日天气真好，早起时有微微á风teh吹，心情开朗koh爽快。Tī chit款ê好日子，若无去农场kám讲会得过？Hit-ê温室会比以往hō͘ 人有koh khah好ê感受。Tī繁殖热带植物ê温室内，án怎讲khah好leh？Kah-ná tī绿色ê浴槽内面，kah-ná白色ê兰花kah红色ê玫瑰花ê花瓣chiah好teh洗浴。今á日入去内面，无定tio̍h一定会迷醉。....Hit-ê人面ǹg工作桌，kah平常时仝款teh热心做实验。Hit-ê人ê手骨沿路摇动试验管沿路the̍h套组ê瓶，tùi短ńg衫露出ê赤鬃色手骨真giám硬。天真浪漫，面容清朗，大pān ê面挂一副se-lu-lo-it（译注：セルロイド=celluloid, 华语译做「赛璐珞」）框ê目镜，tī三十岁ê年纪顶面加添得定（tek-tiāⁿ）性kah深度。有人kā chit种人叫做「khiû koh俭」，无lim酒mā无开cha-bó͘ ê老实人，无kā金钱ê tāi-chì看在眼内。因此，我m̄-bat讲起hit-ê讨厌ê tāi-chì，伊mā一pái都无讲起金钱ê tāi-chì。伊可能mā han-bān算钱，kan-taⁿ埋头苦干，认真做学问ê研究。....M̄-koh, 思想模式khah死板无变窍（khiàu），清楚表示是án-ne to̍h是án-ne，he to̍h是科学ê规律。总是，世间事绝对bē-tàng án-ne, 人lóng tio̍h giâ家己ê十字架。认bat chit-ê道理ê时，你to̍h会知若无通过神就bē-tàng成事。我无对你hiah热心，m̄-koh, 我一下讲起神，hit-ê人就露出讨厌koh困扰ê面容。我家己mā感觉真奇怪，无lah, 若mài出面to̍h会随时了解。因此，我就渐渐想beh虐待家己，忍受艰苦来进行。）
「等景仁tńg来，我beh办好料理hō͘ 伊食。」

In翁话讲soah无jōa久，玉帘忽然开嘴讲。她ê款式是已经无beh回答啥物，mā无想beh koh保持恬恬，对in kiáⁿ ê问题mā无想beh讲甚物，m̄-koh, 景文无明白玉帘话中ê意义kah心情。无明白是当然ê, 因为玉帘m̄是teh讲hō͘ in翁听，她是收tio̍h圣经中《浪子回头》ê譬喻，致使家己án-ne讲。
「好料理，伊已经tī东京食够气à。....Án-ne好lah, 你m̄-thang koh寄钱hō͘ 伊，he对伊无利益。」

景文án-ne讲了想behkhiā起来，m̄-koh, kah-ná有话beh koh讲，踌躇一下。

Chit时，美圆用手掩（om）tiâu倒蕊目chiu入来。
「阿母，我害ā, tio̍h án怎好leh？」

美圆强beh哭出来。
「是án怎leh？」
「我害ā, tio̍h án怎好leh？」
「你kan-taⁿ讲án怎好leh, 阮ná会明白leh？你ê目chiu是án怎？」

玉帘án-ne问，tī cha-bó͘-kiáⁿ iáu未回答chìn前，景文插嘴讲： 「Kám是目chiu痛？」做目chiu移除手术了后chit几年，美圆tiāⁿ-tiāⁿ剧烈ê头壳痛，á是目窝痛，á是失眠。
「Kám m̄是早to̍h完全好à, 已经无koh再艰苦à？....」
「M̄是lah。」

美圆原来是性地温和ê gín-á, 真少chiah-ni̍h懊恼。
「我ê目chiu phah-m̄见à, 一直chhōe无。」

美圆án-ne忧愁teh讲，因为玉帘ê心神iáu未收tńg来，同时景文又koh讲啥物，她ê耳孔kan-taⁿ听tio̍h soah尾ê「目chiu phah-m̄见」，她误会soah冷淡讲：

「你真正是pháiⁿ运ê gín-á, 好好ê目chiu去hō͘ 它失明，m̄-koh, 已经失去à, chit-má mā无可奈何。」

玉帘chit kho͘ 人今á日是teh想啥物leh，景文想tio̍h一koá对她不利ê谣言，koh khah加深怀疑he无一定是无根无据。
「你真kē路neh, 讲甚么话。是她ê义眼lah, 她ê义眼phah-m̄见lah。Chit-ê gín-á真害！做kah hiah好手工ê义眼kan-taⁿ tī东京chiah有可能。」

景文án-ne对玉帘teh讲，为tio̍h chhōe义眼chhōa cha-bó͘-kiáⁿ出去，无一时á koh 倒tńg来，苦笑讲：
「Gia̍h灯m̄知脚影暗，家己藏（chhàng）起来ê所在也m̄知，kui厝间chhōe透透；做裁缝ê时koh kā墨水chhia倒....」续落来伊放低声音讲：「美圆已经到女大当嫁ê年岁à.... hō͘ 人真烦恼。」
「免烦恼lah, 她m̄是讲无ài结婚。」
「Cha-bó͘-kiáⁿ家己有讲beh结婚，chit-má koh讲án-ne, 到底是teh án怎leh？」
「无lah, 她确实有án-ne teh想。她真知影家己ê不幸，若嫁了无好来劳苦一世人，可能想讲án-ne会khah幸福....」
「Ná会án-ne？你mài讲好命á是业命。」
「我m̄是teh讲好命á是业命，我是讲幸运。」
「幸运to̍h是福。」
「你m̄-bat真正ê幸运是啥，thàn大钱享乐、长岁寿，你所想ê lóng是hiah-ê福气niā-niā。」
「若是án-ne, 美圆tio̍h án怎chiah好？她kám会有幸运？」
「免急hō͘ 她结婚，我想讲hō͘ 她去日本读册khah好。」
「女学校毕业kám m̄是to̍h真好à, beh去东京读啥物？」
「学裁缝....她家己mā ài beh去。」
「独眼ê裁缝师？Teh滚sńg笑leh, kan-taⁿ她ê目chiu to̍h够她懊恼。精密ê khang-khòe，目chiu容易疲劳。总讲一句，紧kā她嫁嫁leh, 一目nih久to̍h会变老葱。」
「若ē-tàng chhōe-tio̍h好对象to̍h bē bái, m̄-koh tio̍h真正体贴、温和ê好kiáⁿ婿....」
「Tio̍h加hō͘ 她一koá嫁妆，chiah ē-tàng得tio̍h好姻缘。」
「我无赞同你ê讲法，免附带金钱to̍h愿意娶她ê人chiah好。」
「M̄-koh, 你....」

景文tú beh回答ê时，因为玉帘照伊所料想ê反应，若beh设计hō͘ 她无爽快ê讲法，chit-má是siōng好ê机会，因此伊面无笑容kek kah真正经讲：
「其实我来你chia, 是为tio̍h美圆ê婚事。我感觉chit-ê不幸ê cha-bó͘-kiáⁿ, 一定tio̍h hō͘ 她五千á是一万ê嫁妆，m̄-koh, 我想你bē ài chiah-ni̍h卑屈ê做法....。」
「是ah, 我当然无ài án-ne做。」

玉帘真冷淡án-ne讲，她m̄知景文iáu会讲出啥物料想bē到ê话。
「所以，我对你讲ê真正体贴、温和ê未来好kiáⁿ婿，我已经有kah意一个人。」
「有hit款人？」
「我已经有一个目标。」
「啥人？」
「游德仁。」

玉帘chhoah一tiô, tú teh胡里胡涂做梦中，尻脊phiaⁿ hō͘ 人phah一下ê感觉。她就án-ne对景文透早来chhōe她ê目的，了解kah清清楚楚。
「伊无钱koh家境无好，总是，伊专科学校毕业，认真koh老实，恬恬á做khang-khoè ê踏实cha-po͘人，以人才来讲，我感觉伊kah美圆真sù配，你想án怎？」

玉帘kā她摇动ê心压制tiâu-.teh, kah-ná无tāi-chì tùi镜台前khiā起来，面上甚至露出微微á笑。M̄-koh, 已经无面对镜，到底露出啥物笑容，家己mā无把握。
「是án-ne oh, bē bái ā, 我mā有想tio̍h, 独独m̄知对方ê意思án怎....」
「这to̍h需要你做老母ê去好好á安排，因为你tī农场有时常kah伊交陪。」

景文án-ne讲了，chit pái家己行oá镜台，小khóa kā伊ê平头头毛摸一下。丈夫hit-ê小圆面，玉帘chit-chūn看起来，比平常时有khah大。