《《陈夫人》日译台e5台湾小说 第二部》

 | | | 转寄

《陈夫人》第二部 亲子 第十六章

作者 庄司总一着 赖永祥指导 林俊育台译 2017.02.19

陈家ê人渐渐去接近清文ê农场。

这并m̄是因为掠tio̍h lâ-lí-á ê宣传效果，是因为清文kah安子想beh建立khah好ê生活品质ê意志，对陈家ê人成做牵引力。

优雅ê别庄式ê厝，楼脚用大柴搭架ê大厅有十坪，楼顶有三间日本式ê tha-tha-mih房间。清文in tiāⁿ-tiāⁿ来chia度周末，到假日ê时，tī台北读高等学校ê阿明kah tī东京读私立大学ê景仁mā会来，大家聚集做伙真闹热。大家tī大厅话仙，听唱片á是收音机。安子种ê菜蔬—tho͘-má-to͘h（译注：华语ê番茄）、洋葱、荷兰豆等等，新鲜koh丰富。凤梨当然免讲，其它iáu有檨á、kin蕉、木瓜、莲雾、白柚....ta̍k季节ê水果lóng食会tio̍h。Tī厝内若久来会倦，ē-tàng去外面散步。Chia kah市内无仝，暗时凉风吹来，山附近安静kah真爽快。

农场hiah-ni̍h吸引厝里ê人，清文kah安子原本无想像tio̍h, án-ne真好。起初in无án-ne计画, soah自然而然想tio̍h chit种效果。大概是因为台南地方四kho͘ 围lóng是平原，缺乏地形ê变化；台南州内kan-taⁿ有一位温泉，mā是tī真远无方便ê所在。虽然是古都，有kóa风景区kah古迹，m̄-koh, 风景kah台北比起来，单调koh无趣味，thang游山玩水ê所在真少。Koh再讲，年轻ê一辈希望逃离家族制度ê束缚，厝里ê人tī无意识中mā有chit款ê心情。Tī厝里tio̍h受在来ê麻烦老规矩束缚，尤其是老母阿娇在世ê时，凡事lô-lí-lô-so。长幼ê区别真lô-so, 原则上，男女无仝桌食饭。Chit种ê封建生活，虽然日常bē感觉不便，m̄-koh来到农场，iáu是有解放ê感觉，大家轻松、自由自在。

Kan-taⁿ阿娇iáu m̄-bat去过农场。献上lâ-lí-á ê时，她欢喜kah讲beh去一chōa，m̄-koh, iáu是因为年老、固执kah lán-si行动，就无想beh去。

玉帘kah ta-ke tú好倒páiⁿ，她ài去农场，tiāⁿ-tiāⁿ来。她来到农场就kah平常时无仝，有元气起来；她o-ló讲：每pái来lóng心chiâⁿ真好、开朗，看tio̍h花草灿烂，开kah满四界，她就讲家己mā beh做kóa园艺，借她一koá土地thang来做花坛。她mā落厨房，炒tú挽落来ê菜蔬，用现刣（thâi）ê鸡肉á是买来ê猪肉料理。玉帘tī厝里m̄-bat落厨房，lóng是cha-bó͘-kán teh煮食；她来到chia to̍h穿围su裙，轻快料理煮食。
「玉帘ná会无啥tāi-chì tiāⁿ-tiāⁿ来农场？」

清文感觉小khóa不可思议，m̄知tang时án-ne问安子。 玉帘确实有khah过头热心，安子mā无真了解她ê心情。总是，她对ta̍k项tāi-chì lóng真固执、坚持；无婉转，欢喜to̍h欢喜，弃嫌to̍h弃嫌，极端ê性地。她ê信仰mā带（tài）chit种狂热ê色彩。

玉帘对农场hiah-ni̍h热心，安子并无挂意。M̄-koh, tùi农场传来一koá风声，讲农场监督游德仁kah玉帘中间ê关系有一点á怪怪。男女私下做伙讲话就hō͘ 人用奇异ê眼光来看待。安子掠准是án-ne ê程度, 所以她无kā它当做是重大ê tāi-chì。

总是，安子mā有两三pái看tio̍h玉帘tī农场ê温室内kah游德仁讲话。有一pái是偶然tú-tio̍h tùi温室出来ê玉帘，她chhoah一tiô。这并m̄是因为怀疑，实在是因为玉帘ê姿容看起来真súi，无像以前ê平素。安子感觉惊一tiô, 因为玉帘自从去教会以来to̍h无打扮，面皮是黄种人ê本色，穿朴素ê台湾服á是简单ê洋装，一点á都无感觉án-ne无好。玉帘无打扮ê姿容，看起来有寂寞感，m̄-koh, 她决定án-ne做就彻底无改变，安子认为真难得。总是，chit工安子看tio̍h以前有打扮ê玉帘，心肝chhoah一tiô。她ê面抹粉，头毛m̄是loah-kah ân-ân ê龟á头髻，是有波浪ê西洋发型，穿台湾服—乌色素花绸á ê长衫真合身，hō͘ 肢体显露出苗条ê优雅风韵，m̄-koh, 她ê腰、肩kah颔颈iáu是khah有肉淡薄á, 有中年女性ê体态。因为惯势看她无化妆打扮，chit-má看起来有kah-ná开花hiah súi。

对手ê cha-po͘ chiah三十岁而已，玉帘已经四十三岁à。虽然无法度想像有无正常ê关系，m̄-koh, 有人讲女性四十岁iáu是危险ê年龄。....若是发生chit款tāi-chì, beh án怎chiah好？若因为án-ne引起无聊ê纠纷á是争执，苦心经营ê农场吸引厝内ê人ê向心力，以及真无简单chiah上轨道ê事业，可能lóng会想tio̍h影响。

若往pháiⁿ ê方面想，安子bē免会烦恼。清文虽然有小khóa致意，m̄-koh, 伊是一个cha-po͘人，kah-ná对chit方面无深入去想ê款，清文讲：
「有人teh散布一koá无聊ê谣言。」
「是ah, m̄-koh, 谣言khah常是无根无据。」
「总是，人ê话真惊人，无论如何，对农场ê人无好。」
「当然是án-ne, m̄-koh, 免担心。玉帘比一般人koh khah谨慎，只是她成做基督徒了后忽然消极起来，凡事朴素koh严格teh生活，大概她家己mā有感觉tio̍h chit种ê生活有khah闷。来到chit-ê旷阔ê大自然庄脚，自然会心胸开朗，所以真ài来。」

有一工，安子见tio̍h游德仁ê时，kek m̄知影事情问伊：玉帘时常来你chia, m̄知lóng谈啥物tāi-chì。安子并无一定tio̍h试探清楚ê心情，m̄-koh, 对方有一点á紧张ê款。伊家己先讲出已经听tio̍h ê一koá谣言，伊表明绝对无hit种糊涂tāi-chì，只是玉帘beh引chhōa伊来信基督教。她是热心ê基督徒，á伊根本to̍h是无神论者。她每pái来lóng是讲宗教ê话á是向伊传教，伊无法度领受。这是伊ê讲法。

游德仁小心眼koh社会经验浅，挂意人ê话，平常时无嘴尾，chit-má soah厚话ài辩，极力辩解。因此hō͘ 随便提起来问ê安子感觉紧张，m̄知beh án怎chiah好。她并无深入思考玉帘接近游德仁ê tāi-chì, 因为对方ê辩解，安子soah开始怀疑起来。

事实上，玉帘对游德仁讲一koá正经ê tāi-chì, 而且是siuⁿ过正经。 「种籽tùipuh芽到成长，开花结果子，chit种现象，你感觉án怎？」 游德仁认真teh做khang-khoè, 玉帘来kah伊话仙lóng是chit种话。 游德仁当teh做凤梨新品种ê实验，沿温室北pêng ê窗á前，长形ê柴架á顶散散khǹg真chē玻璃浅盆á、瓶á、瓶á套组、试验管kah药品等等。伊kā凤梨ê雄蕊kah雌蕊交合来培养凤梨ê新品种，kā hit-ê种籽khǹg tī bu-lo-chin phé-phah（译注：ブロ—チング ペ—パ—=broaching paper, 培养种籽ê纸）顶面ak水，就会puh芽出来。Puh芽了后，用盆á tī温室培养，然后徙（sóa）去凤梨园种。游德仁从事chit种khang-khòe。
「游先生，你kám无感觉不可思议？你做ê khang-khòe。」
「无ah, ....是teh指啥物？」
「指植物tùi种籽到成长ê tāi-chì。」
「种籽若bē成长to̍h不妙loh。」
「是ah, án-ne, 为甚么种籽会成长neh？不可思议ah。」
「当然loh, 这是大自然ê力量。」
「无loh, m̄是lah, 这是神ê旨意。世间ê tāi-chì, 全世界ê tāi-chì, lóng是tùi神ê旨意来。你teh做无简单ê实验，培养出凤梨ê品种，表面看起来是án-ne, 其实m̄是án-ne。而且，你kám认为凤梨ê种籽是你培养出来ê？人类ê情形mā是án-ne, 男女做伙就会生婴á, m̄-koh hit-ê婴á跳动ê心脏，kám讲人有法度造出来？」

游德仁对chiah-ê话题oh得回答。伊小心处理，因为对方是董事长ê弟妇á，bē-tàng pháiⁿ面得，伊努力谨慎应对。总是，当伊流汗认真做工kah真thiám ê时，伊想讲：koh来ah, 真烦neh, 忍受够额à, 焦心无奈。Chit-ê cha-bó͘人m̄知她án-ne加添人ê麻烦，iáu koh一直来lô-so。
「所以，圣经讲：一只雀鸟á若无神ê旨意，bē lak落来地上。」
「若án-ne, 咱食烘鸡肉串mā是神ê旨意loh。」

游德仁感觉真烦，soah无心讲出chit种khau洗ê话。伊后悔无应该讲chit种无聊话ê时已经siuⁿ慢ā, 玉帘疼你火大。她讲正经ê tāi-chì, 伊却kā她khau洗，岂有此理，你是一个无药thang医ê人，应该受咒诅ê人。她沿路骂，气phut-phut行出去。

游德仁想讲taⁿ害ah, 若因为chit-ê小khóa tāi-chì来hông辞头路to̍h tāi-chì大条ā，伊心内不安。事实上，chhōe无比陈清公司hiah好ê待遇，想tio̍h若无离开bē-sái得，心情to̍h郁卒起来。M̄-koh, 伊koh再想：对无请家己来ê董事长ê弟妇á，伊只不过讲一句khau洗ê话，chit种小khóa tāi-chì致使造成hông辞头路ê siōng bái结局，不如讲是因为chit-ê cha-bó͘人tiāⁿ-tiāⁿ去伊hia，致使引起人误会in两人之间有关系，chiah是siōng大ê原因。

伊想讲hō͘ 对方受气一定会有好结果，因为她会愤慨讨厌伊，就bē koh再来温室chhōe伊。若是án-ne, 伊to̍h koh khah早kek她受气，beh hō͘ hit-ê cha-bó͘人受气真简单，只要讲出一句亵渎神ê话就ē-tàng。 不而过，想讲bē koh来ê玉帘又koh出现。
「游先生，神iáu tòa tī你ê心内，你家己可能无发觉。」
「Ah, sàn-chhiah ê神tòa tī我心内，一定tio̍h租厝来tòa。」

游德仁无嘴尾koh bē晓滚sńg笑，m̄-koh, 为tio̍h保护家己，伊有准备好一句话。

玉帘果然受气tńg去，游德仁tháu一口气。过无几工，玉帘koh忽然出现。还击tńg去koh攻击tńg来，还击tńg去koh攻击tńg来。Án-ne ê攻防战来回几pái了后，游德仁渐渐倦落来。

讨厌ê感受早to̍h过去，她所讲ê神mā听习惯à。当她àⁿ头祈祷ê时，伊目chiu kheh-kheh讲「阿们」，mā无感觉不可思议。她祈祷、读经á是细声吟诗，她hit-ê li-li-lak-lak ê日语，起头感觉好笑，无久习惯了后kah-ná teh唱歌，无啥物感觉。她hit两蕊目chiu仁发出狂热信仰ê光芒ê时，伊感觉无自然ê惊惶。插tī她头壳顶ê玉兰花ê芳味，kah身体散发出来茉莉花芳油ê微微á气味，刺激tio̍h伊ê鼻á。伊对chiah-ê可怕ê tāi-chì已经习惯à。伊认为习惯kah-ná无波浪ê水面，却kah-ná脚浸入去深水ê不安kah恐怖，iáu teh等伊。

游德仁已经m̄知án怎chiah好，伊ê头脑kui工lóng无法度离开神kah cha-bó͘人。Án-ne落去ê结果究竟会án怎leh？只好成做基督徒以外无别条路thang行。Á是，伊koh想，就án-ne不知不觉成做信徒，伊滚sńg笑teh讲ê sàn-chhiah ê神tùi伊心灵租ê厝出来，另外一位奇妙ê神koh chông入来，beh讲是神不如讲是魔鬼。伊teh培养凤梨新品种ê芽á是苗，伊ê身躯kah-ná mā生出奇妙ê芽。伊tī暗时做一个梦，梦见凤梨ê小芽快速成长，tùi锯齿状ê叶á中间开浅紫色ê花集，无久to̍h结实，kah-ná松杲ê果子有人头ê大，已经有够大ā, iáu koh继续变大，伊真烦koh不安。伊jú惊，果子jú成长，感觉变成一粒不可想像ê大果子。伊惊kah hoah出声，梦mā醒。

为甚么hit-ê cha-bó͘人对伊chit-ê无罪ê人凌迟kah án-ne chiah甘愿？伊想beh kā她咒诅。尽管如此，不可思议ê是：无看tio̍h她ê身影ê时，又koh kah-ná失落啥物。对chit-ê伊hiah-ni̍h惊koh讨厌ê人，为甚么无看tio̍h她ê身影会kah-ná失落啥物？她今á日kám会来？心内kah-ná án-ne teh盼望。

Án-ne kám讲伊是teh kah意玉帘？Kah-ná mā m̄是。若beh讲伊kah意hit-ê cha-bó͘人，不如讲是kah意hit-ê cha-bó͘人hō͘ 伊ê痛苦，kah-ná意爱食鸦片一样。Hit-ê cha-bó͘人无出现，tùi她所hō͘ 伊ê压力暂时得tio̍h tháu放ê时，因为he m̄是决定性ê永久tháu放ê暂时条件，所以并无tùi绝望中间得tio̍h解救。既然无感觉幸福，心内mā无平安，不如继续受压力来感觉痛苦，á是koh khah受凌迟chiah爽快。伊陷落chit种奇怪ê习惯性kah惰性。