《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第十五章
作者 庄司总一着 赖永祥指导 林俊育台译 2017.02.12
工厂是起tī市郊。
四角形ê工厂建筑物油漆鸡卵色，tùi远远看起来kah-ná一块鸡卵糕khǹg tī四kho͘ 围ê绿地kah晴空中间。Mò͘-tah（译注：外来语ê モ—タ—/motor/马达）准时起动，bel-toh（译注：外来语ê ベルト/belt/运送带）开始se̍h, bo-i-lah（译注：外来语ê ボイラ—/boiler/热水炉）teh chhèng水气，烟筒teh出烟，chit时ê陈清文，心内ê喜乐大旗teh飘扬。伊tī日本ê大学毕业，chhōa安子tńg来家己ê故乡，随时换穿官服去官厅上班。Tùi hit-ê年轻光辉时代以来，从来m̄-bat有过ê新鲜感动。伊做中学教师到taⁿ有十年以上，hit-ê古老ê气息无致使伊ê心胸荒废，taⁿ koh khah hō͘ 伊感觉tio̍h chit点。He是培养宗教精神ê特殊学校，虽然kah普通ê教育工作无仝，ē-sái讲伊tī hia停止成长soah固定落来，伊ê思想无法度koh再充实是免不了ê tāi-chì。总讲一句，伊ê自我表现m̄是kan-taⁿ用嘴讲讲leh to̍h满足，伊是想beh有所作为hit种人。
经过三年，伊ê事业终于正式上（chiūⁿ）轨道。Tī这chìn前，陈清公司ê原料是对外采购（káng），m̄-koh从今以后，tùi家己农场生产ê凤梨，由家己工厂ê机械来制造罐头。Án-ne, 生产ê体制已经齐（chiâu）备，m̄-koh, 清文想beh做ê, mā是无做bē-sái得ê, 是今后ê tāi-chì。伊创设凤梨罐头公司m̄是想beh thàn大钱，若是chit种ê利益企图心，只不过是出tī富有ē-tàng转变khah好ê欲望。
清文对tī农场kah工厂，主要lóng是图谋提高劳动者ê生活kah精神。下面是hit当时台南ê农业工人每日工资：男性 60钱（sián），女性25钱。
台北ê工资是这ê两倍，因为hit时台南ê工资是全台湾siōng低。虽然有种种ê理由，总讲一句，因为hit当时ê南部社会pháiⁿ毛病真chē, 无teh进步。总是，工资tio̍h gōa chē chiah tú好是一个难题，像（chhiūⁿ）讲一个经济机构beh hō͘ 工人非常富有，却无一定是siōng好ê想法，因为in iáu未达到善用其富ê境界。所以，清文ê准则是：M̄-nā tio̍h hō͘ in tī丰富ê状态，mā tio̍h顾虑in ē-tàng充分维持生活，而且有chhun淡薄，m̄-koh, bē-sái hō͘ hiah-ê chhun钱致使in陷入物资主义。
伊tī工厂kah农场投入金钱来做设备上ê新构想。工人ê健康比啥物都khah重要，所以，清文为in设备「休闲」场所kah医务室，尤其是农场ê庄脚所在卫生无好，清子kah阿明tī hia染tio̍h a-me-bah赤痢。当地ê居民tiāⁿ-tiāⁿ tio̍h ma-lá-lí-á, mā有肠á热。所以，陈清公司ê农场时常请附近ê村医林文贵来，为工人做健康诊断，hō͘ in食khi-nih-neh（华语ê奎宁），kā in做肠á热kah其它ê预防注射，治疗砂眼。
总是，无知ê农民kah工人无对清文感谢，大概感觉hō͘ 人péng一下目chiu皮á是tuh一针，不如加领一个十钱（sián）ê铜钱á khah实在。对chiah-ê m̄-bat世事ê人，清文真伤脑筋，tiāⁿ-tiāⁿ真失望、受气。总是，伊无放弃ǹg望，ǹg望in有一工会了解；准讲in若是bē了解，in ê kiáⁿ孙mā会来了解。
安子起初无真chia̍p去农场，别庄完成了后to̍h chia̍p-chia̍p去。她tī hia做菜园，种各种蔬菜。她接受农场监督游德仁ê指导，伊半khau洗讲：若栽种不良会变成koân价ê蔬菜。安子认为成本koân mā无所谓，家己栽种家己收割，其中ē-tàng得tio̍h种种ê教示。生产ê辛苦kah喜乐，ē-tàng食tio̍h比市场买来ê khah新鲜ê蔬菜，准讲金银mā会生sian，要紧ê是物件tio̍h tiāⁿ-tiāⁿ保持新鲜。Chit种教示道理，是tùi家己亲身ê体验，chiah有法度得tio̍h。
她穿工作裤，手gia̍h锄头，手掌起泡（phā），面曝kah红kì-kì，倦tauh-tauh tńg来到厝。
有一工，安子洗身躯了后，kā in ta-ke报告农场ê情形kah她种菜ê tāi-chì。
「Ai-ah, 你....你做khang-khoè, kah-ná作穑人。」
对阿娇来讲，这是意外ê tāi-chì。安子无想beh hō͘ 人褒奖，想bē到会hō͘ ta-ke hiah-ni̍h tio̍h惊。大家（tōa-ke）sim-pū落田种作，安子ê头脑有问题，老大人ê面色显然露出pháiⁿ面chhiuⁿ。安子用无真liú掠 ê台语向ta-ke说明，m̄-koh, 阿娇bē了解，准讲开明ê ta-koaⁿ阿山在世，大概伊mā bē了解。阿娇chit阶层ê老大人认为做khang-khoè是卑微下贱，cha-bó͘人恬恬á快乐过日子to̍h好。所以， 她家己kā指甲留长一两寸，来表示家己免动手to̍h有thang食。早前有时mā看会看tio̍h chit种老大人。
Chit-má ê时代无koh有chit种人，m̄-koh, chit种思想kah传统iáu有少数存在。像瑞文chit类，kan-taⁿ一支嘴hô͘-lùi-lùi, 一日到暗食饱闲闲，感觉真满足，tiāⁿ-tiāⁿ受tio̍h清文ê警戒。Chit pái不管伊愿意á是m̄愿意，清文安排伊来负责农场方面ê事务。M̄-koh, 阿娇表示不满，m̄免hiah辛苦mā ē-tàng生活，ná-tio̍h走去hiah远ê庄脚做khang-khoè？总是，瑞文来农场工作了后，自出世to̍h衰弱tiāⁿ-tiāⁿ破病ê身体，看起来to̍h有khah结实。因此，伊为tio̍h健康比为tio̍h工作khah热心来庄脚。
有一工，安子来农场，瑞文mā来，伊beh去看早前施工chit-má完成ê河川堤防。
寒天ta-ta无水ê河川，到热天雨水期to̍h变成浊水teh流，有时泛滥致使凤梨园kah安子ê菜园淹水。所以tio̍h做堤防，这需要一笔费用，创设公司ê时无编chit-ê预算，m̄-koh, 无做koh bē-sái得。陈清公司一直teh亏损，安子私下有teh烦恼。凤梨tùi栽种到收割需要一年半ê时间，起初原料是对外采购，m̄-koh, 原料采购无够需要量。凤梨罐头已经成做民众ài食ê物件，罐头公司kan-taⁿ ē-tàng买tio̍h需要量10%（pha-sian）ê凤梨。而且制造工厂已经早一步完成，生产作业变成跛脚teh进行。一工ē-tàng生产60吨ê机械放teh空转。
所以，自营农场ê完成是siōng急ê tāi-chì, m̄-koh, tùi农场得tio̍h收割，经营上无真乐观。因为实际上，免有自营农场，直接向农民购买原料khah会hô，一般ê罐头业者lóng采取chit种方法。农民施肥，引水灌溉，关怀作物，tùi日出到日落lóng teh工作。Hiah chē时间kah劳动量，简单付款就ē-sái, 准讲成本小khóa khah koân, 结果iáu是chit-ê方法khah会hô。自营农场to̍h无法度án-ne, tio̍h考虑各种设备、肥料、劳动时间ê限制kah待遇等等ê问题，结果原料价数（siàu）提高。
M̄-nā án-ne, koh因为清文ê根本精神无以营利为目的，经营ná会bē有困难？所以，一直亏损mā无办法。安子想：若无法度经营来中途放弃，án-ne, in ê工作意义kám m̄是完全失去？清文对将来抱tio̍h ǹg望，m̄-koh, chit-má siōng要紧ê, tio̍h每个作为抱tio̍h快乐kah ǹg望ê心情，寄托美好ê将来。若无法度达成hit-ê愿望，过去ê日子只有流落来悲哀ê灰色后悔。
河边沿岸已经起好十尺koân ê土堤。安子tú-chiah对瑞文讲hiah-ê事业感觉不安ê话，chit时瑞文kā她安慰讲：「无问题，免烦恼」，简单to̍h结束话题。伊想beh去看堤防是藉口，kah-ná有甚么话beh对安子讲。
不而过，瑞文tī土堤坐落来teh pok薰，无要无紧ê态度，安子感觉kiōng-beh bē喘气。目chiu前ê河床真阔，大部分成做干地，kan-taⁿ中央有浊水teh流。河ê hit pêng有田园，chiah tú过六月一时á, 稻á已经结实变黄色，teh beh ē-tàng收割à。白鴒鸶双脚整齐伸tùi后壁，ná棉花轻轻á飞起来，降落tī田园khiā teh，chit幕kah-ná teh看快速ê影片。全身乌乌乌ê乌鶖用真猛ê气势飞起来，飞过田园对面ê山坪（phiâⁿ）中kúi-nā个山谷，一直飞到山脚。其中四界有小部落藏tī山谷下底，看bē-tio̍h, 只有阿里山山脉ê尾溜连接天空ê hit pêng。
「你teh看tó位？」
安子问瑞文，伊iⁿ-iⁿ-n̄g-n̄g无应答。安子想讲伊大概是teh回忆陈阵ê tāi-chì；伊期待安子会问起ê款式，m̄-koh, 安子thiau故意kek m̄知伊ê心思。伊就忍bē-tiâu, 深深感慨讲：
「阿阵，她chit-má m̄知情形án怎？」
「庄头就tī对面，你去看māi, án怎....」
安子随便kí一个方向，笑笑á讲。瑞文心灵ê创伤显然iáu有一点á痛，安子想beh摸伊ê伤口。
「奇怪ê cha-bó͘ gín-á, ná会恬恬á离开家庭？」
安子知影事情ê真相án-ne讲，瑞文气愤nih目chiu讲：
「用空气枪射gín-á, koh是家己ê cha-bó͘-kiáⁿ。M̄-koh, 阿阵是一个非常卑怯（khiap）ê人，无通知半项就m̄知去向，想讲án-ne阮会án怎。」
「真正是大tāi-chì, hit时我tú好tńg去日本，m̄-koh....」
「我去hō͘ 景文kah玉帘责备kah有够thiám, 尤其是玉帘hit款cha-bó͘人, 每工来要求看beh án怎chiah好，还我liâm-piⁿ to̍h beh出嫁ê cha-bó͘-kiáⁿ ê目chiu等等，teh要求, teh哭, teh骂....。Hiah-ni̍h艰苦心，我tio̍h去chhōe hit-ê cha-bó͘人！我受tio̍h to̍h想beh kā她paⁿ落去，kā她刣死。」
「M̄-koh, mā m̄是你讲ê hiah-ni̍h卑怯。你hō͘ 蛇咬tio̍hê时，她mā是尽力kā你救。想tio̍h这，你kám无想beh去见她？」
「Chit-má去见她mā无chhái工，我无想beh见她....」
「你是薄情郎，瑞文，你kám是因为好强chiah án-ne讲。」
瑞文感觉安子teh kā伊khau洗，虽然露出bē爽快ê面色，m̄-koh, m̄是她讲ê án-ne, 伊是考虑tio̍h koh khah严肃ê现实问题，伊用正经ê口气讲：「我已经m̄是以前ê我，kám m̄是？长男已经十九岁。我二十岁to̍h娶bó͘ 。」
瑞文teh苦笑，伊想tio̍h in kiáⁿ to̍h埋怨。长男chit-má是高等学校一年生，tī台北teh读册。伊本人起初希望读文科，瑞文为tio̍h伊ê将来设想，苦劝伊去读理科。阿明听伊ê话，瑞文放心吐一口气。想bē到阿明iáu是认为家己无适合读理科，读一年理科了后，又koh重新tùi一年级文科读起。伊讲若无伊beh休学。
「真正hō͘ 人伤脑筋ê gín-á，究竟án怎chiah好，我一屑á办法都无....听讲伊mā有写phoe hō͘ 清子，kám有写啥物pháiⁿ tāi-chì？」
「无lah, 无啥物....。只是清子mā bē了解，kah-ná有啥物艰难ê思想上ê问题，á是啥物....」
「真狡怪ê gín-á！」
「其实阿明真认真读册。」
「Kám讲反抗有好ê kah pháiⁿ ê双面意义？尤其是伊chit-má是反抗老父ê年龄。阮tau ê清文mā是án-ne, 对她讲啥物她lóng m̄听；我讲án-ne. 她偏偏beh颠倒péng。」
安子kan-taⁿ tī瑞文面前轻描淡写，其实安子ê心情比一般亲子ê问题koh khah复杂微妙。M̄知什么原因清子会kah清文疏远，近来连清文都有感觉chit点。老父为她买好册，她并无显露欢喜ê表情，食饭ê时mā无亲近讲话。她是唯一ê独生女，hē入去老父ê目chiu mā bē感觉痛，cha-bó͘-kiáⁿ对chit款ê疼，对老父应该koh khah亲密chiah tio̍h。M̄-koh, 清子却m̄是án-ne。这是为甚么缘故？是chit种甚么感情？安子kah-ná了解koh kah-ná无了解。照她tú-chiah所讲ê，若是gín-á ài反抗ê一时现象to̍h无要紧，免烦恼，度过chit-ê时期to̍h好。若无，问题to̍h严重，安子tiāⁿ-tiāⁿ想tio̍h chit-ê问题，心内不安。
安子无显露她ê不安，假做无tāi-chì讲：
「总是，瑞文，咱互相年岁大ā, 操心gín-á ê tāi-chì, 为gín-á来烦恼。」
「实在真寂寞！人若老，对啥物lóng感觉无意思。真讨厌，阿嫂kám有chit种心chiâⁿ？」
「Mā无一定，五十岁有五十岁ê趣味，到六十岁有六十岁ê快乐kah幸福，kah年轻时代无仝—。」
安子án-ne teh讲，忽然感觉kah-ná踏tio̍h秋天ê落叶，心情寂寞。她mā已经体验tio̍h进入冬天枯木前兆ê年龄。目chiu角有鱼尾纹，面皮松lēng，而且，年轻时苗条ê身材mā变大kho͘ 起来。若m̄是骨骼细支，看起来会有肥chut-chut ê感觉，ē-sái讲kah-ná kā以前ê瘦抽面影抹杀掉，加上她去田园做工，hō͘日头曝kah乌mà-mà。....Chit-má忽然感觉tī瑞文ê镜面前显出变bái ê姿态，她感觉见笑koh寂寞。
有一种ài beh回复年轻ê心chiâⁿ kah「岁月不饶人」ê感慨，同时溢上安子ê心头。她kah瑞文做伙落堤防，beh行tńg去农场。
「你是hō͘ 蛇咬tio̍h tó位？」
两人行过大片ê林投kah龙舌兰，安子参杂好奇心kah嬉弄ê心情án-ne问。
「Βē记得确实是tó位。总是，hit时若无阿阵做伙tī hia, 我有可能bē活。想起来真不可思议。」
「Án-ne讲起来，我hit暝tī反对墓地移转ê演讲会中，去hō͘ 人用刀凿tio̍h。若m̄是凿tio̍h腰带，会凿koh khah深....」
「总是，人结局会死。」
「一日一日行向死亡。」
「虽然是án-ne, 咱mā tio̍h好好á活落去，kah-ná有teh食不老长寿ê药á ê面容。」
「你mā有几pái死里求生ê经验。」
「已经无hiah惊死亡ā, 可能是年岁有khah大ê缘故。」
两人án-ne teh讲话，忽然听tio̍h林投kah龙舌兰中间传出sa-sa ê声。Tú teh讲毒蛇kah死亡ê tāi-chì, 安子惊一tiô, 脚步停落来。瑞文mā是无胆ê人，因为tú teh讲已经无hiah惊死亡ā, 虽然kek kah-ná无tāi-chì teh微微á笑，iáu是掩khàm bē-tiâu, 面色变苍白。 「Lâ-lí-á（译注：华语ê穿山甲）！」
并m̄是毒蛇，恐怖感消失，瑞文安心hoah出声。Kan-taⁿ看tio̍h一只kah-ná乌色小型战车ê动物teh走。瑞文随时jiok oá去，走到约90尺khah lap窝ê草地，伊大声叫安子。
动物钻入去土洞内底，瑞文知影ē-tàng安全kā它掠起来。伊做一气掠tiâu露出洞外ê动物尾溜，出力kah面红kì-kì，beh kā它khiú出来，看起来是气力相当强ê动物，伊khiú bē出来。
「Ah, 活掠lâ-lí-á！阿嫂，你替我掠tiâu它ê尾溜，我来去农场the̍h工具！」
「无ài lah, 他会kā我咬，beh án怎？」
Lâ-lí-á是食káu蚁ê动物，bē咬人，安子以前有听讲，m̄-koh, 她惊kah hoah讲：「他会kā我咬....」。动物kui身躯连尾溜mā有kah-ná指甲ê鳞，安子无勇气掠tiâu它ê尾溜。因此，iáu是瑞文掠tiâu动物ê尾溜，安子走去农场the̍h铁锹kah索á来。用铁锹挖洞，动物就kiu做圆团，无抵抗。就án-ne简单活掠lâ-lí-á。
Lâ-lí-á tī hit所在tiāⁿ-tiāⁿ hō͘ 人掠tio̍h。虽然是án-ne, 对in来讲这是意外ê收成，因为一只时价60圆。鳞thang做药用，真珍贵，肉mā有补药ê作用，食起来是天下ê珍味。皮thang做手提包，bē输鳄鱼皮。
Lâ-lí-á！ Lâ-lí-á！厝内ê人lóng轰动起来。若是人担来卖to̍h无稀罕，是安子kah瑞文两人掠tio̍h ê, 所以就稀罕。安子kah瑞文kā它当做礼物送hō͘ 老母，阿娇真欢喜，她讲有一工她mā beh去凤梨园看māi。
