《《陈夫人》日译台e5台湾小说 第二部》

 | | | 转寄

《陈夫人》第二部 亲子 第十二章

作者 庄司总一着 赖永祥指导 林俊育台译 2017.01.22

市内ê罐头工场已经完成机械设备teh运转，m̄-koh, 庄脚ê农场进度khah慢一步。总是，农场大体上已经成形，开始teh种凤梨。 清文夫妇利用春假ê一工，chhōa cha-bó͘-kiáⁿ清子kah瑞文ê大kiáⁿ阿明做伙去农场。Tùi台南市开车ǹg西北pêng只有半点钟ê路程，有陈清文ê「陈清公司」ê农场。

农场总面积十甲步，其中凤梨园六甲，果子园一甲，建筑物用地一甲。其它河边ê山坪凤梨园有十五甲。 种凤梨ē-sái充分利用其它农作物栽种有困难ê土地—就是山坡地。因此，kah主要农作物ê稻á、甘蔗、茶叶等等ê用地无冲突，bē有摩擦ê顾虑。

四个人到位ê时，凤梨园当teh种凤梨。In沿路听农场监督游德仁ê说明，沿路巡视农场。Iáu是三月天，hit工真热，kan-taⁿ行路to̍h会流汗ê程度。Tī凤梨园khiā-teh做khang-khoè ê人，农夫ê脚腿kah-ná涂漆茶色teh发光，cha-bó͘ 工人罩面巾koh挂手套。栽种真简单，kā凤梨叶头puh出来ê芽插入去土内，无jōa久to̍h会成长结实。M̄-koh, tùi栽种到收割需要十五到十八个月ê时间。

农场事务所kah温室mā lóng已经完成，别庄mā chhun内部ê装修。别庄式ê厝，楼脚用大柴搭架ê大厅有十坪，楼顶有三间日本式ê tha-tha-mih房间。

四个人行入去iáu有柴屑四散ê楼脚khòng间。
「Koh无jōa久to̍h ē-sái来chia tòa暝。」

清文沿路巡视天花板kah四周围ê壁沿路讲。健康勇壮ê身体，脚穿便鞋，头戴phah鸟帽ê清文ê气势，tī安子看起来，m̄-nā是in翁á-bó͘ 两人ê场合，mā感觉会出陈家全家未来ê健康kah明朗。
「来chia度周末，实在真好。M̄-nā是咱家己，若ē-tàng全家来chia chhit-thô，会gōa-ni̍h-á快乐leh！」
「是ah, 周末度假ē-tàng避开世间操烦ê tāi-chì, 过恬静ê生活，因为世间êhi-hi-hóa-hóa 无啥意思。」

清文án-ne讲。伊心内ǹg望全家ē-tàng来chit-ê农场chhit-thô, 伊kā别庄起kah比家己家族三人需要ê koh khah阔大，这to̍h是证据。 「M̄-koh, 你邀请，人无一定beh来，因为大家对田园无趣味。」 「若ē-tàng tòa chia读册，m̄知góa好leh。景色súi koh安静。」 阿明用欢喜kah挡bē-tiâu ê口气án-ne讲。又koh问：「我kám ē-sái tiāⁿ-tiāⁿ来chia？」

「Ah, 当然无问题。M̄-koh, 可惜chia iáu m̄是健康ê所在，有时会有ma-lá-lí-á（译注：华语ê疟疾）kah其它ê流行病。」
「Ma-lá-lí-á无问题，已经有ki-ni-neh（译注：华语ê奎宁）ê药thang医。」
「Ah, 你讲ê无m̄-tio̍h...。Iáu-koh有，chia ê水质无好。M̄-koh,若各种ê设备完成了后，我想beh hō͘ chit-ê所在变成chit-ê安全ê所在。」
「Chia有山有溪，空气清气。若是无hiah-ê流行病，m̄知góa好leh。我chit-má ê房间照bē-tio̍h日头，阴暗koh无通风。到热天会热kah头昏昏，读册lóng读bē入脑。」
「你ê房间有khah....」

安子讲到chia就停止。阿明读册ê房间是第二夫人阿阵以前ê房间。阿明是一个神经质ê gín-á, 无tú好凿tio̍h伊ê心，会惹起大受气。 「Lín老父身体有khah弱，来chit-ê农场锻炼身体mā bē bái。」 「是ah, 我一定劝伊来。」

阿明热情表示赞同soah面色红起来，m̄-koh, 这是因为讲tio̍h in老父hō͘ 伊感觉见笑ê缘故。大家lóng了解伊êchit种心情，所以，lóng无koh提起瑞文ê tāi-chì。
「清子，你mā tio̍h tiāⁿ-tiāⁿ来chia，因为你ê身体mā m̄是góa好。」清文对cha-bó͘-kiáⁿ讲。
「我ê身体无hiah弱lah。」

清子有一点á反驳ê口气。安子无啥满意清子ê回答，因为清文是真正关心cha-bó͘-kiáⁿ ê健康chiah án-ne讲，清子回答一句「ngh」to̍h好。安子感觉清子有一点á kok-pih ê个性。总是，kok-pih ê态度kah语言，加上kā她théng-sēng, 到tāi-chì ê高峰会带来明朗ê快感。Chit-ê凿tio̍h意识神经ê健康议题，清子ê反驳kah kok-pih ê表现，m̄是意识使然，是tùi深深ê心底发出来ê。尤其是对老父，chit种倾向特别强。
「并m̄是真健康，最近kám m̄是倒床三工？」

清子ê身体m̄是讲有啥物无好，m̄-koh m̄是真健康勇壮。尤其是天气真热ê时，心脏会变弱，女学校ê体操kah作业，小khóa负担bē起。她有一点á无够挺胸ê缺点以外，身材体格算是bē bái，算是外表好看头niā-niā。清子真清楚家己ê身体并m̄是真健康，m̄-koh, 她讨厌人án-ne讲。她对所有ê tāi-chì lóng是án-ne倔强。
「虽然是án-ne, 我并m̄是hiah-ni̍h衰弱lah。Ē-sái讲无像阿明in老父hiah lám, mā无像阿爸hiah-ni̍h勇壮。」
清文听一下soah笑出来。
「清子mā真so-hui-su-khe-t（译注：英语ê “sophiscated”）。」 无人知影伊讲ê意思，三人lóng kā清文看一下。阿明问讲：
「阿伯, so-hui-su-khe-t是什么意思？」

阿明ê面显出对未知á是新ê物件ê探究心，清子却无teh致意。Chit-ê少年kah少女两人ê个性无仝，tī chit-ê细项tāi-chì顶面都表现出来。
「阿明，你m̄知oh, án-ne, 高等学校ê入学考试会有危险oh。」

清子án-ne kā伊作弄讲soah, 阿明用koh khah认真ê口气讲： 「Án-ne oh, 清子，你kám知？Hit-ê单字。」
「我m̄知。无要紧lah, 因为我iáu无beh考高等学校。」
「你chit kho͘ ！」

阿明koh khah感觉失望。想tio̍h去hō͘ khah少岁ê叔伯小妹作弄，牙齿根咬teh, 用骄傲ê眼光睨（gîn）清子。清子ê乌目chiu仁kah老母安子前相像（sio-siāng），带小khóa忧愁ê深影。相像是相像，m̄-koh有无仝ê所在。阿姆ê目chiu气势khah弱koh会吸引人，时时hō͘ 人有亲切ê感觉；清子ê to̍h有理智ê光辉，有小khóa傲慢koh刻薄，hō͘ 人有无真tiâu直ê感觉。—“so-hui-su-khe-t” to̍h是chit-ê意思，阿明tī花sà-sà ê中间推论出来。

农场ê南pêng有几丛树á, 其中有一丛大丛ê檨á树，树á脚lak真chē细蕊ê白花。In tī hia铺草席á, 大家围做伙，坐teh食中昼ê便当，呈现出一幅美好ê快乐家庭图。阿明真欢喜，感觉家己ná是阿伯阿姆ê kiáⁿ，kah清子kah-ná兄妹，深深亲密ê气氛kā伊包围teh。安子有为农场ê工人，用提篮té米糕带来，有chhun一koá，koh有包肉kah土豆ê粽真好食。清文讲：「Hō͘ 我一粒。」就peh开粽ha̍h, 食kah真好食。阿明假斯文，推辞肉粽，食便当内底ê饭丸、煎卵kah酱菜。便当内面有一个咸三文鱼鱼卵，伊bat听过，mā bat看过，m̄-koh, hit工是第一pái食tio̍h。Hit-ê鱼卵是乌tò͘红，黏黏糊糊，看起来to̍h心情bái, bē想ài食。虽然真pháiⁿ食ê款，m̄-koh, 阿明kah-ná无啥to̍h kā它食落去。这实在是无聊ê作为，m̄-koh, 阿伯kah阿姆lóng感觉真好食ê三文鱼鱼卵，家己bē-tàng食ná ē-sái。连chit种hiah细ê tāi-chì, 伊都担心家己会thut-chhê, 来破坏hit-ê亲和ê气氛。

食饱后，大家ê腹肚kah心情lóng有得tio̍h饱足，有目nih久ê恬静。阿明有感觉讲bē出ê幸福，真想beh唱歌ê心情。树á顶ê白目鸟teh唱歌，清凉ê颤音hō͘ 伊感觉kah-ná家己ê咙喉发出欢喜ê声，身躯mā tòe-teh起颤。为甚么kah阿伯一家人做伙to̍h有chit种幸福ê感觉？伊家己mā感觉真不可思议。若是阿伯一家人无tī chia, 天空kah大地看起来kám会chiah-ni̍h大？农场ê四kho͘ 围是阔bóng-bóng ê甘蔗园，一chūn一chūn ê春风吹来，hō͘ 绿白色ê甘蔗叶á kah-ná波浪teh起舞。Chit-má chit-ê农场，无久以前iáu是甘蔗园。Chia是in老父瑞文ê土地，m̄-koh, 伊mā知chia是in老父过去迷恋田庄姑娘，神魂颠倒惹事ê因端。今á日，阿伯chhōa伊来chia, 伊想tio̍h chit项事to̍h感觉无面子。In老父实际上拥有hiah-ni̍h阔ê土地，久长以来伊到底teh做啥物？甘蔗ê收割只不过是伊无聊ê chhit-thô费用。伊对土地无疼，完全无关心土地kah它ê生产，以及kah人ê意志之间ê关系....。M̄-koh, 阿明chit时ê幸福感hō͘ 伊对老父产生一种宽容ê心。总讲一句，kan-taⁿ因为chit-ê农场是老父ê所有地，阿明to̍h有一种自豪ê心情。
「阿伯，我mā想beh tī chit-ê农场做khang-khoè。」

阿明不知不觉án-ne讲。Tī边á ê清文无kā伊应，悠哉悠哉teh suh薰斗。
「我tiāⁿ-tiāⁿ无想beh去学校上课。」
「为什么？」
「M̄知为什么，感觉真无聊。」
「Bē使得，bē-sái chit-má to̍h起chit种念头。」
「Ngh, m̄是tiāⁿ-tiāⁿ起chit种念头，只不过是有tang时á无想beh去学校上课。」

阿明soah感觉m̄知án怎chiah好，伊m̄是对去学校读册感觉讨厌á是有怀疑心，是因为chit-ê旷阔ê田园kah对阿伯ê事业有súi ê欣羡，唤起伊对学校生活ê排斥。
「阿伯是án怎会着手chit-ê事业？是甚么款ê心情？」
「这oh....」

清文深深suh一嘴薰斗ê薰，小khóa想一下。阿明期待tùi阿伯ê嘴ē-tàng吐露出啥物súi ê言语kah深含思想ê话，m̄-koh, 阿伯ê回答却真简单。
「因为想beh án-ne做，所以就做。」
「总是，有啥物理想？大ê理想。」
「无特别大ê理想，至少无像lín少年人所想ê情形。我细汉ê时ài掠田婴，四界jiok无停，跋倒siak落去水沟á mā无要紧。M̄-koh, 年纪大to̍h bē-sái án-ne。」

阿明感觉欣羡ê梦有一点á幻灭。
「理想kah-ná是hō͘ gín-á ê chhit-thô物，sńg siuⁿ过头to̍h会chhòng pháiⁿ去。」
「Án-ne讲，阿伯无理想loh？」
「有是有，m̄-koh, tú亲像我tú-chiah所讲ê, siuⁿ过追jiok m̄放会有危险。Kā理想khǹg tī远远ê所在mā bē bái, 它颠倒会倒tńg来，会近oá来，án-ne ê想法khah khiáu。」
「是án怎讲leh？」
「是teh指行动。」
「行动！是ah。Án-ne讲起来，我mā有想beh giâ锄头来劳动ê意念。劳动是神圣ê。」
「无no͘h, 劳动本身m̄是卑微，mā m̄是圣神。总是，hit-ê行为kah思想合宜配合ê时siōng好，这beh讲它圣神mā ē-sái。M̄-koh, 行动beh kah思想一致真困难，连Thol-su-thoi mā无法度做到。」
「Thol-su-thoi！」

阿明ê心肝底tú想起chit位Lo-se-a ê文豪，世界上ê思想家Thol-su-thoi。Chit时阿伯提起伊，致使伊有双重ê感动。
「Thol-su-thoi有够chán！Kan-taⁿ ē-tàng读tio̍h伊ê小说，我to̍h感觉活tī chit-ê世界有价值，实在有够chán！」
「你真gâu！已经读过伊ê作品？《复活》á是《战争kah和平》？」

Hō͘ 人讲「真gâu」，阿明惊一tiô。伊想起in老父讲：「“An-nah Kha-le-ni-nah” 是写甚么leh？」Kā它看做是无水准ê煽情之类ê小说，koh kā伊疼惜ê册the̍h走。老父瑞文kah阿伯是兄弟，两个ná会hiah-ni̍h-á无仝。
「M̄是，我读ê是“An-nah Kha-le-ni-nah”。」
「你读了感觉án怎？」
「M̄知neh, 因为siuⁿ chán, 我ê嘴讲bē出来。小说ê结构真宏大，读chit款ê小说了后，会感觉台湾岛细kah ē-tàng挟tī koè-ē-lang the̍h teh走。....Lo-se-a ê社交phá-tih（译注：英语ê “party”）、舞会、赛马、美食料理....、hiah-ni̍h súi ê生活kám是真ê？Iáu有hiah-ê旷阔ê田园kah大地主ê生活。男子角Khon-su-tan-tin Le-bun（译注：英语译做 Konstantin Levin）ê精神发展....。文中充满生活kah思想，读kah目chiu会起花。」
「非常感动ê款。」

清文自然讲出，心中却真tio̍h惊，这m̄-nā是对阿明ê「早熟」kah头脑好ê tio̍h惊而已。见若优秀ê艺术作品lóng会超越时代kah国境，感动人心是事实。清文家己chit-má iáu ē-tàng清楚回想，tī年轻学生时代读《复活》ê时，因为心情siuⁿ过兴奋，soah到天光lóng困bē去。Tùi hit时起，清文kā Thol-su-thoi ê主要作品lóng读过。对chit-ê文豪ê伟大人格á是崇高ê理想，以及tùi人ê能力来看是稀有ê文学表现，一直抱tio̍h「崇敬」ê精神。Chit时，伊想beh借chit-ê机会，kā伊家己年轻ê时读了ê感想来kah侄á分享。总是，年龄一直hō͘ 感觉迟钝，加上理性ê份量。不管是Thol-su-thoi ê理想á是Ge-theh（译注：Johann Wolfgang von Goethe, 1749—1832, 德国诗人）ê哲学，伊chit-má认为若beh思考hit-ê本身ê价值，不如来探讨ná会产生á是自然而然产生ê社会条件，这是tùi时代kah民族ê中间引起ê必然性。 总是，以后ê发展leh？Lo-se-a变khah好á是khah bái？进步á是退步？幸福á是无幸福？....」

清文koh唤起对hit-ê伟大作家ê激情，同时伊mā厌倦Su-la-buh（译注：华语译做「斯拉夫」）族特有siuⁿ过活跳ê人性kah激情。
「Án怎leh, 阿明，tùi你ê观点来讲。」
「我m̄知neh。M̄-koh, 读hiah-ê作品了后，m̄知什么原因，会感觉咱ê生活变kah真细、真缺乏，soah感觉讨厌。」
「确实是án-ne, 咱台湾mā是án-ne, 少年时代到taⁿ比较起来，生活ê趣味kah气氛lóng减少。这m̄-nā是台湾án-ne, 全世界....讲khah「夸张」leh, ē-sái讲是全人类lóng有一种ê倾向，kám m̄是？所以，讲Lo-se-a帝国时代ê生活富裕、灿烂，hō͘ 人真欣羡，有啥物路用？因为这对咱生存ê现实生活无利益。譬喻讲，bē-sái kā chit丛hiah大丛ê檨á树徙（sóa）去种tī阿伯厝ê小庭院，若是án-ne做，就真hàm古loh。」 清文ê话hō͘ 阿明chhèng koân ê感情降温。伊bat听人讲阿伯以前是思想相当激进ê人，m̄-koh, 伊近来看会出是teh行东方ê中庸之道。伊讲ê话kah-ná句句lóng是beh phah-hoa阿明ê热情之火，m̄-koh, 并无吹熄阿明ê 幸福感。阿明虽然想beh kah阿伯继续讲落去，m̄-koh因为无ài伤tio̍h心中ê幸福感就phah消念头。伊就án-ne转换方向，想beh kah阿姆、清子讲话。

Tī伊kah阿伯谈道理ê时，安子kah清子提起虎头牌ê话题。虎头牌是teh指虎山hit pêng灌溉用ê水池，tùi农场看会tio̍h, 距离真近，只有四公里á是六公里而已。八十几年前ê光绪年间，听讲是名叫欧安修ê人起造ê, 水池四kho͘ 围ê风景真súi。阿明小学ê时bat去hia远足过，因为伊知影chiah想beh插入安子kah清子ê话题。伊ê面转向in hit pêng ê时，tú好in ê讲话停止，清子就tī草席á顶倒落来。

阿明kah in老父热心讲话，清子kah-ná感觉无味无素。（Ah, 安子目chiu看in cha-bó͘-kiáⁿ困ê姿势，心内想讲，清子假装冷淡是她ê缺点。）她一下倒落去草席á, 双手互相交合teh, khǹg tī颔颈下面，目chiu mi起来。无端庄ê款式，m̄-koh, 身躯ē-tàng伸展真爽快。安子平常时看惯势cha-bó͘-kiáⁿ ê发育情形，chit-má看tio̍h koh khah感叹。本来是短头毛ê发型改做留两条辫头鬃，露出阔ê额头，看起来忽然变大人款。原来感觉有一点á lap ê鼻孔，不知不觉ê中间，kah kui个面貌平衡点看起来，鼻á有khah koân淡薄。当她露出不满ê表情特别显着ê厚嘴唇，因为面khah 膨皮soah变khah好看。她ê面只有目chiu sêng老母，tòe年岁增加soah显露出老父清文ê面貌特徵。清子ê模样m̄是以早少女ê恬静端庄，已经是现代少女ê理智koh坚定ê面容。总是，只不过是身材长大，iáu是gín-á款，随便倒teh困, tùi树枝之间泄落来ê日头光，照（chhiō）tio̍h她ê小腿毛会闪sih发光。赤theh ê长腿tùi她ê水兵服ê短裙下露出。她不管年轻ê阿明就tī边á, 无啥物顾虑á是不安，做她目chiu mi-mi teh困。

安子面无表情注目cha-bó͘-kiáⁿ ê面，心内teh想—Chit-ê cha-bó͘ gín-á teh想啥，无lah, 可能lóng无teh想啥物。肉体ê成长tio̍h比思考物件优先，她tú tī chit-ê年轻时代。安子家己mā bat经过一种ê少女时代，她忽然对cha-bó͘-kiáⁿ ê成长感觉一种奇妙ê欣羡kah不安。Chit-ê cha-bó͘-kiáⁿ koh无久to̍h beh结婚，然后建立家庭、生kiáⁿ，安子想到chia就感觉m̄甘kah寂寞。总是，这是纯粹ê, 只不过流露出hō͘ kiáⁿ suh奶ê母爱。M̄-koh, 安子做人ê老母ê感情m̄-nā是án-ne而已，有一种参杂喜乐ê苦心。清子将来ê结婚对象会是日本人á是台湾人？想tio̍h chit点，安子总是会陷入一种复杂微妙ê不安心情。

所以，安子知影清文有想beh hō͘ 伊所kah意ê阿明kah清子结婚ê时，虽然这kan-taⁿ是清文ê想像，mā是hō͘ 安子chhoah一tiô。这m̄-nā是因为阿明kah清子是叔伯兄妹ê关系，另外koh有别种ê微妙感情tī-.teh。 清子m̄知老母ê chit种心情，恬恬á kā目chiu放mi-mi, 不知不觉已经teh困中昼，爽快koh无烦无恼，胸坎á因为喘气有微微á起伏。阿明ê目chiu去hō͘ 少女teh困ê姿态吸引tiâu-.teh, 胸坎á起伏ǹg顶面ê时，两粒木瓜形ê膨koân, tùi少女ê水兵服mā看会出来。因为天气热soah起红ê嘴唇，kah-ná teh吐露芬芳ê花蕊....

阿明注意tio̍h无应该án-ne看清子ê时已经siuⁿ慢ā, 伊ê视线kah阿姆安子oa̍t头tńg来ê视线相对头。阿明感觉gāi-gio̍h gāi-gio̍h, 无法度阻止血液chhèng起来伊ê面，就赶紧kā面转向边á。
「Chit-ê gín-á无成体统，ah, 清子，你起来！」

安子心内chhoah一tiô, 伸手去摇清子ê肩胛头，嘴角轻轻á露出有kah-ná无ê微微á笑。算讲án-ne做，mā是无法度避免同时四个人之间ê gāi-gio̍h场面，大家就恬静落来。树á尾溜ê白目鸟m̄知飞去tó位，季节风mā一时歇困ê状态，旷阔ê田园顶面，春天ê日头光无声无说照（chhiō）落来，四kho͘ 围恬chut-chut。....过无jōa久，清文kā薰已经变做灰ê薰吹头敲伊ê鞋尖，发出khok-khok声，大家tháu一口气。大家ê心肝头iáu感觉有声音teh开始响。