《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第十三章
作者 庄司总一着 赖永祥指导 林俊育台译 2017.01.29
阿明想讲害ā, 腹肚痛koh tiāⁿ-tiāⁿ走便所。
Kám会tī庄脚感染tio̍h病？Kám有可能？拜托m̄是án-ne。 阿明一直ǹg望mài变严重，m̄-koh, 无久to̍h发烧，漏屎jú来jú厉害，伊ê病已经掩khàm bē-tiâu。
「你tī庄脚kám有食tio̍h啥物无清气ê物件？所以，若早知to̍h劝你mài去，就无tāi-chì。」
老母春鸾并m̄是teh质问，是因为她生本to̍h温和慈祥，所以她担心chiah án-ne讲。阿明一听，发烧ê头壳koh khah懊恼，kah-ná对待cha-bó͘-kán-á án-ne大声讲：
「Kám讲我去庄脚食tio̍h蛇？Mài管我！过一时á to̍h会好去，免叫医生。」
总是bē-tàng无管，病jú来jú严重。老父瑞文终于去请医生。诊断ê结果chiah知，阿明感染tio̍h a-me-bah赤痢（译注：华语译做「阿米巴痢疾」）。
M̄-koh, 对医生á是双亲ê质问，阿明lóng讲去庄脚农场kan-taⁿ食带去ê便当，无食其它ê物件。伊认为一定是前几工tī街路买枝á冰，食了引起ê。阿明无ài hō͘ 人知真正ê原因，伊tī农场有lim井水ê事实，一定tio̍h隐瞒到底。
Hit工tī树á脚食中昼小khóa歇困了后，清文kah安子因为beh办tāi-chì去事务所，阿明kah清子就tī农场四界se̍h。In带来ê水罐已经无水à, 阿明嘴真干。贯穿凤梨园ê一条九尺阔ê路边有一口井，两三个农场工人tī hia teh自由自在limhit口井ê水，听讲井水有用漂白粉消毒过。Hit时，in bē记得清文有提醒in m̄-thang lim无hiâⁿ过ê生水。阿明lim井水来解嘴干，hit时，清子mā toè伊lim。
因为无聊ê顾面子，阿明食hit-ê无ài食ê咸三文鱼卵，若无伊bē hiah嘴干，致使lim无保险ê生水。阿明咒诅hit-ê乌tò͘红、真咸koh黏黏糊糊ê日本食物。M̄-koh想起hit-ê快乐ê一工，伊一点á都无后悔去农场。因此，伊无beh hō͘ 双亲á是陈家ê人知影伊tī农场感染tio̍h a-me-bah赤痢。清文讲：「Koh无jōa久to̍h ē-sái来chia tòa暝。」安子回答讲：「来chia度周末，实在真好。M̄-nā是咱家己，若ē-tàng全家来chia chhit-thô，会gōa-ni̍h-á快乐leh！」阿明无bē记得chiah-ê话，想tio̍h阿伯kah阿姆chit种美丽ê希望kah理想，若因为伊ê无注意去染tio̍h病，致使in ê希望kah理想bē-tàng实现，阿明ê心肝真艰苦，实在忍受bē-tiâu。
所以，伊希望家己ê病无严重，ē-tàng紧紧来医好。 In老父入来，嘴teh pok薰、悠哉悠哉ê款式，tī伊因为发烧致使湿tâm ê目chiu前出现。阿明掠准老父大概老父iáu未发觉伊ê病因，就安心落来。
「Án怎？kám会真艰苦？」
M̄是烦恼á是同情心，瑞文用存心不良ê眼神，直接看对倒tī病床ê kiáⁿ。 「我一世人bē koh ài食枝á冰。」
后悔含恨ê阿明用小khóa chhoah ê声讲，为tio̍h beh逃避老父ê目神，随时koh péng-pêng困落去。伊无注意tio̍h老父kā因为péng-pêng歪chhoah ê冰袋chhiâu hō͘ 它正ê时面带笑容。
「M̄-koh m̄是大tāi-chì, 无久to̍h会好。注射了后会khah khùiⁿ活。」
「Án-ne 真好。」
瑞文m̄是teh苦笑，mā m̄是teh怜悯笑，m̄知什么原因到taⁿ阿明iáu teh隐瞒事实。
「M̄-koh, 若食枝á冰to̍h会中毒，这是tio̍h禁止ê社会问题。」
「M̄是大家lóng án-ne, 是我运气bái lah。」
「你kám m̄是有去hit-ê厝？....」
「有去阿伯ê厝....」
冰袋koh再歪chhoah去，阿明kā它chhiâu正。
「Oh, 阿爸，清子kám mā感染tio̍h？」
「大概kah你仝款ê症头。」
无需要加讲，简单ê一句话to̍h剧烈凿tio̍h阿明ê心。带来pháiⁿ消息ê老父瑞文，kah-ná是恶魔来临，瞬间tī红kì-kì ê目chiu前出现。伊已经无话thang讲à, 只有吐气niā-niā。
「Oeh, 阿明，你ná会编一套白贼话来欺骗lín父母？你真戆呆。Kám tio̍h需要讲白贼来hō͘ 家己陷落无聊ê痛苦？」
阿明haiⁿ-haiⁿ-chhan。心内重复「无聊ê痛苦？」hit句话，m̄-koh, 伊已经无气力thang来反驳。
「你想看māi leh, 你去农场lim lah-sap ê古井水—koh隐瞒讲白贼，你ê病m̄是破病niā-niā, 若有三长两短—责任kám m̄是lóng tī阮做父母ê身上？Kám讲你kah意lín阿伯kah伊ê厝soah无计代价来án-ne做？你tī lín阿伯ê厝内，连kha-na-li-ah（译注：华语译做「金丝雀」）ê屎都感觉是芳ê。Án-ne无打紧，你对家己亲生ê父母pháiⁿ款待，这是甚么法理？」
瑞文知影tio̍h利用chit-ê机会来好好á教示kiáⁿ儿，对破病中ê阿明有khah过头kā伊修理。
「你ná会kan-taⁿ感觉阿伯ê厝chiah是好？」
「阿爸m̄是仝款？」
「你讲啥物？」
「阿爸少年ê时chūn，你kah意hit pêng ê阿姆。」
若m̄是破病发烧，阿明bē讲chit种话。
阿明ê痛苦有双重。连家己ê叔伯小妹mā可怜感染仝款ê病，她ê病痛可能比伊家己khah严重。阿明想tio̍h这lóng是tùi伊来造成ê, chit-ê自责擒tiâu伊ê心肝头。肠á kah-ná受割断hiah痛苦，kui身躯kah-ná火teh to̍h hiah烧。这是家己ê苦难á是清子ê劫数？两个lām-lām做伙，伊soah分bē清楚。因为病痛kah hiah厉害，阿明想讲家己会就án-ne死去，清子mā会就án-ne死去。阿明因为发烧soah tuh眠困去，一定是做一个恶梦。梦醒ê时，感觉家己iáu活teh, koh奇怪想讲清子kám mā活teh。伊teh想像少女teh困ê面，soah想起苍白ê死人面。M̄-koh m̄是每pái lóng是恶梦，有时梦见tī hip热ê春宵，看tio̍h大厅新增ê新娘灯，伊beh去迎接坐美丽花轿ê新娘。伊ê心肝pho̍k-pho̍k跳，就án-ne hō͘ 炮á声吵醒。
家己beh迎接ê新娘是啥人？....Kám会是清子？阿明teh回想伊ê眠梦，身躯phi̍h-phi̍h-chhoah, m̄-koh总是比梦见死khah欢喜。清子感染tio̍h a-me-bah赤痢chit-má án怎？一定是真艰苦，情形演变kah án怎？等等不断teh烦恼。阿明想tio̍h两个做伙teh艰苦，心内感觉奇妙ê满足。
两三日了后，阿伯kah阿姆来探访，听过清子ê病mā大概真乐观，阿明烦恼ê艰苦心chiah得tio̍h tháu放。
过无jōa久，阿姆the̍h花来探访。
「Ah, 阿姆，he花....」
阿明不知不觉tī病床顶án-ne讲，体温真无简单chiah退烧，chit-má感觉koh chhèng koân起来。
「虽然m̄是真súi ê花，我叫cha-bó͘-kán-á去卖，她买chit束花tńg来。若是ba-lah（译注：华语译做「蔷薇」to̍h会khah好。）
安子真自然kā hit束花khǹg tī阿明ê读册桌á顶面。因为疑惑kah见笑，阿明无发觉家己脆弱ê感情kah-ná波浪起起落落。
Hit-ê花ê名叫做圆á花，淡淡紫红色ê头壳形，hō͘ 人想起kah-ná圆á，所以án-ne号名。圆á象徵家庭圆满，因此习惯上，圆á花成做婚礼装饰ê花。
安子kám会知影chit-ê风俗习惯chiah带来？He是无可能，因为她看起来m̄知chit-ê缘故。M̄-koh, 安子嫁来陈家已经二十年ā, 台湾ê风俗习惯知影真清楚chiah tio̍h。Tùi chit点来讲，她应该比新世代ê阿明koh khah台湾化。若是án-ne, 阿姆知影hit-ê花kah结婚有关系chiah带来，hit中间可能有啥物意函tī-.teh....。
有啥物意函neh？....Kám有hit款tāi-chì？若是án-ne, 无lah....。 安子tńg去了后，阿明虚弱ê目chiu久久sióng hit-ê圆á花。优雅ê花瓣，其实m̄是啥物花，kah它ê花名仝款，一蕊圆圆ê花，hō͘ 阿明ê目chiu看起来kah-ná红紫色ê鸡心脏。Mā hō͘ 伊感觉kah-ná是teh象徵新娘新郎ê心，天真浪漫，第一pái ê gāi-gio̍h gāi-gio̍h。无lah, he m̄是型ê问题，tī型ê中间koh加上传统ê意义。阿明一直lóng有teh参加陈家á是亲chiâⁿ ê婚礼，hiah-ê烦杂lô-lí-lô-so ê礼仪hō͘ 人感觉真烦。M̄-koh, chit-ê圆á花会hō͘ 人怀念，装饰tī大厅ê角头á是新娘房ê桌á顶，吐出热情ê chit-ê花。
破病ê回复期，对健康ê期待，根据回复ê确实性，会活出比健康koh khah幸福ê活跳跳性命。总是，阿明chit-ê少年人ê回复期无chit种明朗ê心境，伊有喜乐kah不安ê参杂，有时感觉tio̍h生死混合ê奇妙心情。伊ê希望无像甘甜koh重味ê奶，kah-ná薄薄ê露水随时消失去。阿明一pái ê破病，ē-sái讲是因为阿姆带结婚之花来探病，chiah hō͘ 伊第一pái想像将来beh kah清子结婚。Chit-ê思想m̄是冷ki-ki ê塑像，因为已经肉体化，致使hō͘ 阿明ê内心产生真正ê苦恼。
过几工了后，阿明离开病床，伊随时去阿伯ê厝探访清子。她无tī-.teh, 她ê病已经完全好，两三工前to̍h去学校上课。
可能因为怀恨lim古井水ê tāi-chì。总是，她比伊khah早好，ná会无来kā伊看一pái？阿明小khóa感觉不满kah幻灭，就行出去外口。 真久无suh-tio̍h室外ê空气，衰微ê胸坎á匀匀á phok起来。街路ê厝宅kah过路人kah-ná kā伊bē记得，看起来真生疏。四月ê日头光凿目感觉会痛....阿明ê病iáu未完全好。
街路ê头前传来队伍ê声，tùi闹热ê炮á声知影he m̄是出山ê行列。阿明tùi亭á脚ê柱á边teh看队伍ê进行。
Chhóa头ê炮á放kah jú来jú闹热，吹班（乐队）ê锣鼓声kah笛á声ê交响闹热滚滚，喜气洋洋。有几个𣛮（siāⁿ）hō͘ 人扛teh行，有ê𣛮顶面khǹg镜台、衫á橱、衫á裤、鞋、桌á kah椅á, lóng hē tī红布顶面。新娘坐tī几个轿中间ê一个，用刺绣ê红布围teh, 轿顶koh有装饰红球，一下to̍h认会出来。新郎mā坐tī其中一个轿，tòe记新娘kah新郎两个姓ê提灯kah新娘轿，向前行....。
Hit-ê结婚ê队伍，阿明起先感觉真苦闷，后来chiah有一点á喜乐进入伊ê脑海。吹班ê cha-po͘ 成员以及扛轿á是扛𣛮ê人，看起来lóng是khu-lih（译注：做粗工ê人，汉字有时写做「苦力」）ê款式。In穿长度到脚头u ê裤，露出小腿kah-ná涂漆茶色teh发光，thǹg赤脚踏tī烧烫ê tám-á-ka路面，pa-ta- pa-ta向前行。其中有人甚至因为天气热kā衫展（thián）开，á是本来to̍h破真大孔，露出kui身躯汗ê排á骨，hō͘ 人看tio̍h bē爽快。Chit-ê大好日，ná会无beh穿khah整齐leh？无论坐花轿ê新娘妆kah gōa súi, 迎（ngiâ）亲ê队伍jōa 行伍（hâng-ngó͘），这是美中不足ê遗憾。民族性ê粗野，tùi chit点显露kah现现现。
总是，chit种旧ê结婚式mā渐渐简单化，最近mā常常看tio̍h新娘新郎ê轿车ê行列。听讲mā有人tī大神宫ê神明前举行婚礼仪式，台湾人结婚mā有人排设西洋式ê婚宴。阿明想讲家己结婚ê时....如果kah清子结婚，会采取hit种方式。Tī神宫结婚ê方式会án怎leh？Kám会是宫主念祝词？新郎新娘交杯lim酒？详细情形lóng m̄知。Koh再讲西洋料理ê宴会是án怎？Kám会晓使用刀á chhiám-á？听讲用餐具bē-sái出声，然后开Siang-phián（译注：华语译做「香槟」），pòng-póng....伊tī一本小说中读tio̍h形容做kah-ná网球ê声。Iáu有蜜月旅行，火车kā两人载到真快乐ê所在，当然tio̍h有月娘ê暗时。月娘kah新娘仝款恬静、温柔koh清新，月娘是女性。台湾话kā月叫做「月娘」，月光微微á散发清芳（phang），hiah-ni̍h-á súi。Beautiful-beautiful, 月光恬恬á发出声音、唱歌，配合火车ê车轮声。月光....月光....moonlight, moonlight, moonlight....
