《《陈夫人》日译台e5台湾小说 第二部》

 | | | 转寄

《陈夫人》第二部 亲子 第十一章

作者 庄司总一着 赖永祥指导 林俊育台译 2017.01.15

陈家真难得teh迎接无病koh平安ê新正（chiaⁿ）过年。阿娇因为轻度脑充血倒落来以后，无像以前hiah-ni̍h有元气，经常tiàm厝内，m̄-koh, 常常看tio̍h医生出入她ê房间，这是hō͘ 人欢喜ê tāi-chì。主治医师当然m̄是S医生，是台湾人。她hit工昏倒ê时，胸坎á艰苦想beh吐kah剧烈ê头壳痛，注一支射to̍h随时解决病痛，这hō͘ 阿娇tī所有ê治疗中间，原本惊kah phi̍h-phi̍h-chhoah ê注射成做她siōng欢喜ê。若用蒸馏水取代注射剂kā她注，她ê病痛mā会随时消失ê款。有chit款魔力效果ê注射剂，便（pân）宜kah无啥价值。价钱jú koân会jú满足病人ê心理，甚至有人嫌讲siuⁿ过sio̍k。医生体会chit种情形，就kā一圆ê注射剂提高到五圆，这是常常发生ê tāi-chì。像S医生chit种道学者会hông感叹讲无台湾人医生ê资格，伊仝一种药品对sàn-chhiah人收khah少钱，对好额人收khah chē钱。Chit种支那式ê博爱主义，tī阿娇ê情形来讲，mā的确是一种美德。

另外一方面，瑞文ê重病mā得救à。老母阿娇ê祈祷，兄嫂ê关心，in bó͘春鸾全心全意ê看顾，以及chē-chē人ê同情kah热心lóng总加起来，长久倒tī病床ê瑞文终于ē-tàng起身。第一pái行到外面看tio̍h天清ê时，内心感觉一股活命ê喜乐。总是，身体回复健康了后，伊一种感谢ê念头就渐渐淡薄去。连对伊hiah-ni̍h用心照顾ê春鸾，伊mā是kah以前仝款刻薄，讲她han-bān, 讲她无身材。总讲一句，伊koh回复以前hit种嫌东嫌西ê任性丈夫。就án-ne kah朋友phah四色牌á是phah麻雀，kah菜店cha-bó͘ sńg到半暝，惊hō͘ 兄哥看tio̍h就惊惊惶惶tńg来。Tiāⁿ-tiāⁿ hō͘ 人掠tio̍h受责备，m̄-koh, 一方面因为老母阿娇sēng kiáⁿ, 讲伊出世to̍h身体虚弱，厝里koh无需要伊做工来生活，chhut-chāi伊ê意思过日子to̍h好，因此koh khah助长chit-ê屘á-kiáⁿ ê放荡生活。 伊ê长男阿明已经中学三年级，老父m̄-bat kā伊phah过，mā m̄-bat特别kā伊责备过。总讲一句，瑞文是一个sēng kiáⁿ ê老父。总是，伊ê父爱真浅，kah-ná欠啥物重要ê物件。伊想beh正经说教ê时，in kiáⁿ to̍h想beh笑出来。Chit-ê老父ê生活意识kah能力真浅薄，阿明jú成长jú认bat老父ê生活态度，不安kah弃嫌ê心chiâⁿ jú来jú深。因此，伊对老父jú反感，soah对老母产生怜悯ê感情，siuⁿ过怜悯致使hō͘ 伊感觉讨厌。为tio̍h一个放荡lán-si ê cha-po͘人，一个温柔ê cha-bó͘人奉献她ê一生，忍受生kiáⁿ等等ê劳苦，伊认为这是真无合理ê tāi-chì。M̄-nā是二房ê老母玉帘，ē-sái讲是世间所有ê贵夫人lóng有尊贵ê派头，m̄-koh, 阿明ê老母却m̄是án-ne, 看起来kah-ná是一个cha-bó͘-kán-á。准讲是可怜ê老母，mā tio̍h露出圣马利亚hit种ê气味。In老母ê形象无法度充实阿明青春时代ê空虚心灵。

昨暗，阿明tī厝ê巷á内tú-tio̍h真暗chiah tńg来ê老父。
「Oh, 你iáu未困？认真读册真好，m̄-koh m̄-thang伤tio̍h身体。」 瑞文kui身躯烧酒味，阿明鼻tio̍h臭酒hiàn, koh khah感觉bē爽快。伊无应就行ǹg房间ê方向去。瑞文知影阿明讨厌伊，m̄-koh iáu是tòe后壁行入in kiáⁿ ê房间。
「Oeh, 阿明，阿爸有话beh kā你讲。」

瑞文装一副老父ê威严án-ne讲，想beh掩khàm伊酒醉tńg来hō͘ kiáⁿ看tio̍h ê pháiⁿ势。
「你kek he啥物面，十七岁à, 已经是明白亲子礼仪ê年龄。我虽然m̄是一个伟大ê老父，m̄-koh, 序大是序大，kiáⁿ儿是kiáⁿ儿。我对阿公á是阿妈lóng m̄敢应嘴应舌，早前亲子ê道德实在真严格。M̄-koh, chit-má ê少年人....，好à lah, mài koh讲à....」

阿明感觉说教到chit-ê程度若无soah, 伊专工beh建立ê老父威严颠倒会崩盘。万事lóng chit款形，瑞文做一个人完全无自信。
「顶pái我kā你讲过，高等学校tio̍h读理科，我án-ne kā你命令kám bē-sái？」
「我讨厌理科。」

阿明坐tī册桌á前，注目教科书，目chiu无看in老父。瑞文行到桌á边。
「讨厌？你想beh反抗？」
「我一点á都无反抗。」
「M̄听老父ê话，这kám m̄是反抗？」
「我ê头脑无适合读理科。」
「无啥物适合无适合。你若是kē路生成绩无好，我会同意你ê讲法。M̄-koh, 你ê成绩bē bái ā, 你是优等生。....Án-ne, 阿明，我ê命运无好，无进入上级ê学校。（瑞文想讲家己无读册做学问kám真正是命运无好？In kiáⁿ显然知影chit-ê tāi-chì，因此瑞文感觉bē爽快。）所以，我beh hō͘你修siōng koân ê学问，得tio̍h成功，我一直án-ne teh ǹg望。」

为tio̍h表示对kiáⁿ儿án怎teh设想，瑞文kā手hōaⁿ tī阿明ê肩胛头。Án-ne伊会知：in kiáⁿ hō͘ 讨厌ê人摸tio̍h，肩胛头kah心肝头lóng会gāi-gio̍h gāi-gio̍h。瑞文想到chia, 瞬间心闷起来，m̄-koh, 想讲这mā是不得已ê tāi-chì, 就脚手软。因为家己ê爱心kah热情无够额，家己无够用心，无法度摇动对方ê心。瑞文真清楚家己chit方面ê浅薄，无法度做甚么tāi-chì ê cha-po͘人。

Kah-ná真悲哀ê款，瑞文kā头额ê汗拭拭leh, 继续讲：
「M̄-koh, bē-sái读文科。我希望你做医生，只有chit-ê选择。你个性温和koh品行好，真适合做医生。总是，文科bē-sái得，除了律师以外....」

M̄-nā瑞文有chit种ê观念，台湾ê知识分子lóng有chit种ê想法。限制tī医生、律师á是工程师等等ê特种技术ê人，lóng希望tī非政治koh无思想性ê领域求发展。这是siōng安全koh有实际利益ê方法，其实tīchit方面已经有真chē成功ê人。因此，世间ê序大lóng劝家己ê子弟，子弟mā强烈意向往chit方面去发展。
「你想做文官了后会án怎？你看lín阿伯ê情形....」
「你讲阿伯是án怎？」

阿明感觉老父所讲ê是无符合事实ê狂妄之言，伊忽然oa̍t头过来，显露出kah-ná beh保护啥物ê专一热情，hō͘ 可怜ê十七岁少年人面臭臭。 「你chit-ê gín-á真奇怪，讲tio̍h lín阿伯ê tāi-chì to̍h随时认真起来....。Lín阿伯清文是杰出ê人物，m̄-koh, 我认为伊若m̄是读文科to̍h好，这是好ê实例。」
「好ê实例是甚么？」
「你iáu是gín-á m̄-bat, lín阿伯若做医生，chit-má已经真出名，至少m̄免hiah-ni̍h无聊ê劳苦kah烦恼。你ná有法度了解leh。」
「啥物无聊ê烦恼，阿爸chiah是m̄知。阿爸kan-taⁿ想beh得tio̍h幸福—无聊ê幸福。认为有钱、食好kah食饱闲闲teh chhit-thô喜乐to̍h是。」
「你讲啥！M̄是lah, m̄-koh, 人kám有比你讲hiah-ê khah好ê境遇？总是，讲我to̍h好，我本来mā m̄是kan-taⁿ chit-má ê现况。我tī你chit款ê年纪mā有梦想，梦想是án怎讲leh....」

瑞文忽然想起十几年前伊对阿嫂安子chit种家己mā m̄知ê激烈恋情，he kah-ná一去不回头ê白帆，tī伊ê生涯中siōng感伤，mā是siōng súi ê时期。Hit时hit种年轻ê纯情，chit时tī微微á醉ê脑海中，伊感觉tio̍h kah-ná细细流水ê微微á声。

「梦想m̄是kan-taⁿ指金钱kah名望，心志tio̍h追求koh khah koân, koh khah真实ê物件，用súi koh纯粹ê激情，不管死活来追求....真无简单，oh得讲明。」

无管对象ê年纪讲讲chiah-ê siuⁿ过正经ê话，瑞文家己mā感觉pháiⁿ势pháiⁿ势。而且，伊mā烦恼hit当时ê丑闻去hō͘ 伊ê kiáⁿ知影，瑞文koh回复到做老父ê态度，伊继续讲。

「总是，梦想归梦想，人ê年纪ê增加，岁月不饶人。我讲ê话你tio̍h听，án-ne, 你到我ê年纪，你一定会kā我感谢。总讲一句，你tio̍h做医生，知影无？」

瑞文án-ne讲，m̄-koh, 阿明无kā伊应。
「Oeh, 你知影无？Á-.sī m̄知？」

瑞文án-ne质问阿明ê时，伊chiah注意tio̍h阿明桌顶掀开ê一本册。
「啥物？我掠准你认真读册到chiah暗，原来你是teh读chit种册！这是甚么册？」

阿明真紧反应beh kā册藏起来，m̄-koh先hō͘ 老父夺去。
「An-nah....是An-nah Kha-le-ni-nah（译注：华语译做《安娜•卡列尼娜》）？Chit-ê cha-po͘人teh写啥物？Kám讲伊是社会主义者？」 阿明对老父可笑ê无常识，tī心内teh kā伊轻视，用án-ne来泄恨（siat-hīn）册被老父夺去。总是，下一瞬间，发现连老父mā知影Thol-su-thoi（译注：Tolstoy, 华语译做「托尔斯泰」）ê名，hō͘ 伊惨淡ê心chiâⁿ得tio̍h chē少ê欢喜kah安慰。
「Ah, 是oh, Thol-su-thoi, án-ne, 这是小说loh。Oeh, 阿明，你m̄-thang读chit种ê恋爱小说。你若迷chit种ê小说，你ê头脑会混乱去。」
「我感觉这m̄是恋爱小说，写kah真chán, 真súi ê故事。」
「年轻ê时读任何册lóng会真受感动，你有时间读chit种册，不如去做几个代数á是几何ê宿题，对你有koh khah大ê好处。你tio̍h听，阿爸坚决对你讲，tī你考tiâu高等学校chìn前，除了教科书以外，绝对m̄-thang看其它ê册。」

瑞文严肃ê神情中有一种奇妙ê欢喜。平常时教训阿明ê时，伊意识tio̍h家己无做老父ê资格，所以心底缺乏毅然ê气概。因此，chit时偶然发见in kiáⁿ有thang纠正ê缺点，伊忽然感觉理直气壮，kah-ná得tio̍h战利品，就kā伊认为in kiáⁿ无应该读ê优美恋爱小说the̍h来，行出房间。