《台湾地名e5变更》

 | | | 转寄

1920年台湾地名变更kap语音变化(13)

作者 李南衡着/Uihim台译 2009.04.19

结论

「所谓地名权，就是号取地名ê权利。Siōng早为土地号名ê是原住民或者是开拓者，in以母语替地方号名，地名就成做一个地方ê自然生态kap历史文化ê代表。所以，kan-nā自古以来kap土地khiā作伙ê人民，才有号地名ê权利。后来ê外来者，理论上ài服从原有ê地名，但是历史上ê外来者，却tiāⁿ-tiāⁿ是征服者，用权威、礼教ê心态kap主观意识重新号地名。原住民族kap人民hông逼使接受一个kap家己完全无关联ê新地名、新族名、新人名，甚至是新语言。」(庄万寿 1996：48-49)

「地名是领域主权ê指标，地名是生态哲学，是生活空间kap社会组织ê锁链，是人kap地ê对话方式，地名是空间kap社会ê结构，所以地名是人ê名字，还我ê名，也tio̍h是还我地名。」(汪明辉 1997：296)

以上两位学者ê看法，笔者lóng赞同。不幸ê是，地名权往往操控tī统治者ê手内，统治时间久来，被统治者mā是ài遵照使用新地名，tī接受无接受之间ē有一寡变化ê过程。回顾1920年台湾地名更改以后ê语音变化，以「打狗」做例，变更地名初期，有真chē人、特别是有年岁或者是受日本教育无chē ê人，mā-sī讲「Táⁿ-káu」，无受新地名ê影响。受日本教育khah chē、a̍h-sī日常生活以日语交谈机会khah chē ê人，渐渐惯习用日语发音号做「Taka-o」。仝时，也慢慢开始有人将che新地名ê两个汉字「高雄」，以台语发音念做「Ko-hiông」，而且这种人jú来jú chē，成做主流一直到今仔日。回顾1920年更改ê一百五十几个地名，以这类型ê语音变化siōng chē。除了音之外，意mā有变动，以旧地名「湳仔」(Làm-á)做例，伊展现ê地貌是一片湿地，改新地名「名间」(Na-ma)之后，一开始有人惯习称呼旧地名，仝时有人以日语发音称呼新地名，时间久了后，jú来jú chē台湾人将新地名这两个汉字「名间」以台语发音念做「Bêng-kan」，就tī旧地名渐渐hông bē-kì ê同时，旧地名ê地理特色mā慢慢hông bē-kì。

少数例外，像「马宫」改名做「马公」以后，确实bat有一寡人以日语发音念做「Ma-ko͘」，趣味ê所在是，已经过八十几年，当地人从来bē念做「Má-kong」，大概只有外地人ē án-ne念。当地人讲起Má-keng ê时，mā ē kì-tit chia siōng有名ê妈祖宫。类似ê koh有「艋舺」、「水尾仔」、「阿里港」等地名，只是这类地名数量真少。

1920年台湾总督府更改台湾地名，事前公告，铁路沿线火车站名有更改地名ê，一律ùi十月初一改制日开始使用新地名；仝时全台湾邮局局名mā仝款，一律ùi十月初一开始使用新地名。Án-nē ê「配套措施」，hō͘台湾人全面、快速接受新地名，tī日常生活中惯习使用。

Ùi 1920年台湾地名大更改ê历史，hō͘咱了解，维护台湾地名siōng好ê方法，就是m̄通hō͘伊koh变做殖民地，khah免台湾地名koh hō͘殖民者黑白乱改，若无，地名ê语音可能ē变kah连咱tòa tī这块土地顶面ê人lóng感觉生分、或者是念bē出来，而且mā联想bē起来旧地名ê地理特色。(全文完)