《押韵启应诗篇》

 | | | 转寄

台语押韵启应诗篇 85

作者 Tīⁿ Jî-gio̍k 2007.09.23

85　　Khó-la̍h ê hō͘-è ê si; kau hō͘ Ga̍k-koaⁿ.

1a　Iâ-hô-hoa ah , Lí í- keng si-un tī Lí ê tōe-kài,
　　耶 和 华 啊， 你 已 经 施恩 在 你 的 地 界，

1b　　　Ngá-kok siū-lia̍h ê lâng, Lí kiù i tò--lâi .
　　　　雅 各 受 掠 的 人， 你 救 他 返 来。

2a　Lí sià-bián Lí ê peh-sìⁿ ê chōe-ok,
　　你 赦 免 你 的 百 姓 的 罪 恶，

2b　　　Lí jia-khàm in it-chhè ê chōe-kòa, siū-khì iā kiat-sok.
　　　　你 遮 盖 伊 一 切 的 罪 过， 怒 气 也 结 束。

3a　Lí siu-hôe Lí it-chhè ê siū-khì,
　　你 收 回 你 一 切 的 怒 气，

3b　　　Soah Lí béng-lia̍t ê lō͘-khì.
　　　　息 你 猛 烈 的 怒 气。

4a　Kiù goán ê Siōng-tè ah, kiû Lí hō͘ goán tò-tńg,
　　救 阮 的 上 帝 啊，求 你 使 阮 返 转，

4b　　　Soah Lí ǹg goán ê siū-khì bô koh kā goán sǹg.
　　　　息 你 向 阮 的 怒 气 无 复 给 阮 算。

5a　Lí beh siū-khì goán kàu éng-oán mah?
　　你 要 怒 气 阮 到 永 远 吗？

5b　　　Lí beh chiong Lí ê siū-khì lâu kàu bān-tāi mah?
　　　　你 要 将 你 的 怒 气 留 到 万 代 吗？

6a　Lí kiám m̄ koh chiong goán kiù oa̍h mah?
　　你 岂 不 又 将 阮 救 活 吗？

6b　　　Hō͘ Lí ê peh-sìⁿ in-ūi Lí lâi hoaⁿ-hí mah?
　　　　使 你 的 百 姓 因 为 你 来 欢 喜 吗？

7a　Iâ-hô-hoa ah, kiû Lí hō͘ goán khòaⁿ-kìⁿ Lí ê chû-ài ;
　　耶 和 华 啊，求 你 使 阮 看 见 你 的 慈 爱；

7b　　　Koh chiong Lí ê kiù-un siúⁿ-sù goán chit-tāi.
　　　　复 将 你 的 救 恩 赏 赐 阮 此 代。

8a　Góa goān thiaⁿ Choân-lêng ê Iâ-hô-hoa só͘ beh kóng ê tāi-chì,
　　我 愿 听 全 能 的 耶 和 华 所 要 讲 的 事 情，

8b　　　In -ūi I beh kóng pêng-an ê sèng-chí.
　　　　因 为 他 要 讲 平 安 的 圣 旨。

8c　I beh tùi I ê peh-sìⁿ,
　　他要 对 他 的 百 姓，
　　kap oa̍h tī I ê chû-ài ê chú-bîn chhut-siaⁿ,
　　及 活 在 他 的 慈 爱 的 子 民 出 声，

8d　　　Hō͘ in m̄-thang koh khì lām-sám kiâⁿ.
　　　　使 伊 不 通 又 去 滥 糁 行。

9a　I ê kiù-un si̍t-chāi kūn tī kiaⁿ-ùi I ê lâng;
　　他 的 救 恩 实 在 近 在 惊 畏 他 的 人；

9b　　　Hō͘ êng-kng tiàm-tī lán ê kéng-lāi ta̍k-kang.
　　　　使 荣 光 站 在 咱 的 境 内 逐 工。

10a　Chû-ài kap chin-si̍t saⁿ tú--tio̍h;
　　　慈 爱 及 真 实 相 遇 着；

10b　　　Kong-gī kap pêng-an saⁿ chim--tio̍h. 　　
　　　公 义 及 平 安 相 亲 着。

11a　Chin-si̍t tùi tōe--ni̍h hoat-siⁿ chhut--lâi,
　　　真 实 对 地 里 发 生 出 来，

11b　　　Kong-gī tùi thiⁿ khòaⁿ--lo̍h--lâi .
　　　　　公 义 对 天 看 落 来。

12a　Iâ-hô-hoa beh siúⁿ-sù hó-mi̍h hō͘ lán,
　　　耶 和 华 要 赏 赐 好 物 给 咱，

12b　　　Lán ê thó͘-tōe beh chhut i ê thó͘-sán,
　　　　　咱 的 土 地 要 出 它 的土 产，

13a　Kong-gī beh kiâⁿ tī I ê thâu-chêng,
　　　公 义 要 行 在 他 的 头 前 ，

13b　　　Hō͘ I ê kha-jiah chiâⁿ-chòe lō͘ bêng-bêng.
　　　　　使 他 的 脚 迹 成 做 路 明 明。