《押韵启应诗篇》

 | | | 转寄

台语押韵启应诗篇 83

作者 Tīⁿ Jî-gio̍k 2007.09.09

83　　A-sat ê si koa .

1a　Siōng-tè ah , kiû Lí m̄-thang chēng-chēng bô siaⁿ,
　　上 帝 啊， 求 你 不 通 静 静 无 声，

1b　　　Siōng-tè ah , kiû Lí m̄-thang bô khui-chhùi tiāⁿ-tiāⁿ,
　　　　上 帝 啊，求 你 不 通 无 开 嘴 定 定，
　　　　ia̍h m̄-thang bô chhut-siaⁿ;
　　　　亦 不 通 无 出 声；

2a　In -ūi Lí ê tùi-te̍k hoa-hoa-jióng;
　　因 为 你 的 对 敌 哗 哗 嚷；

2b　　　Oàn-hūn Lí ê lâng kia̍h-khí thâu chin béng-ióng.
　　　　怨 恨 你 的 人 举 起 头 真 猛 勇。

3a　In ēng kan-chà ê kè-bô͘ beh hāi Lí ê peh-sìⁿ bô bāng.
　　伊 用 奸 诈 的 计 谋 要 害 你 的 百 姓 无 望，

3b　　　In saⁿ-kap gī-lūn, beh hāi Lí só͘ khǹg-ba̍t ê lâng.
　　　　伊 相 及 议 论，要 害 你 所 藏 密 的 人。

4a　In kóng, lâi--ah, lán lâi bia̍t-bô Siōng-tè chú-bîn,
　　伊 讲 ， 来 啊，咱 来 灭 无 上 帝 子 民，
　　hō͘ in bōe chiâⁿ kok-bîn,
　　使 伊 不 成 国 民，

4b　　　Hō͘ Í-sek-lia̍t ê miâ bô koh hō͘ lâng kì-liām thang chhin-kīn.
　　　　使 以色 列 的 名 无 复 使 人 纪 念 通 亲 近。

5a　In tâng-sim saⁿ-kap chham-siông,
　　伊 同 心 相 及 参 详，

5b　　　Saⁿ-kap kiat-iok beh tí -te̍k Lí ê khoan-iông.
　　　　相 及 结 约 要 抵 敌 你 的 宽 容。

6a　Chiū-sī khiā-khí pò͘-pîⁿ ê Í- tong kap Í- si̍t-má-lī-lâng,
　　就 是 居 起 布 棚 的 以 东 及 以 实 玛 利 人，

6b　　　Mô͘-ap kap Hā-kah-lâng.
　　　　摩 押 及 夏 甲 人。

7a　Ka-pa-le̍k, A-bûn, kap A-má-le̍k ê peh-sìⁿ,
　　迦 巴 勒，亚 门，及 亚 玛 力 的 百 姓，

7b　　　Hui-lī-sū , í- ki̍p Chhui-lô khiā-khí ê peh-sìⁿ ;
　　　　非 利 士，以及 推 罗 居 起 的 百 姓；

8a　A-su̍t ia̍h kap in liân-ha̍p chhōe kiû-siû,
　　亚 述 亦 及 伊 联 合 寻 仇 雠，

8b　　　In chòe Lô-tek ê kiáⁿ-sun ê pang-chhiú.
　　　　伊 做 罗 得 的 子 孙 的 帮 手。

9a　Kiû Lí khoán-thāi in ,
　　求 你 款 待 伊，

9b　　　Chhin-chhiūⁿ chá khoán-thāi Bí-tiân án-ni bia̍t in .
　　　　亲 像 早 款 待 米 甸 按 呢 灭 伊，

9c　Chhin-chhiūⁿ tī Ki-sūn-hô ,
　　亲 像 在 基 顺 河，

9d　　　Khoán-thāi Se-se-lah kap Iâ-pin án-ni bia̍t bô .
　　　　款 待 西 西 拉 及 耶 宾 按 呢 灭 无。

10a　In tī Ún-tô-jíⁿ bia̍t-bô ,
　　　伊 在 隐 多 珥 灭 无，

10b　　　Chiâⁿ-chòe tōe-chiūⁿ ê pùn-sò .
　　　　　成 做 地 上 的 粪 圾。

11a　Kiû Lí hō͘ in ê léng-siù chhin-chhiūⁿ O͘-li̍p kap Se -i-pek bia̍t-ka,
　　　求 你 使 伊 的 领 袖 亲 像 俄 立 及 西 伊伯 灭 家，

11b　　　Hō͘ in ê kun-tiúⁿ lóng chhin-chhiūⁿ Se-pa kap Sat-bûn-ná .
　　　　　使 伊 的 军 长 拢 亲 像 西 巴 及 撒 文 拿。

12a　In kóng, lán tio̍h chiong Siōng-tè khiā-khí ê só͘-chāi,
　　　伊 讲 ， 咱 着 将 上 帝 居 起 的 所 在，

12b　　　Chiàm lâi chòe ka-kī ê só͘-chāi.
　　　　　占 来 做 自 己 的 所 在。

13a　Góa ê Siōng-tè ah ,
　　　我 的 上 帝 啊，
　　kiû Lí hō͘ in chhin-chhiūⁿ kńg-lê-hong ê tîn-ai ,
　　　求 你 使 伊 亲 像 卷 螺 风 的 尘 埃，

13b　　　Chhin-chhiūⁿ hong-chêng ê tiū-sap chin pi-ai .
　　　　　亲 像 风 前 的 稻 屑 真 悲 哀。

14a　Chhin-chhiūⁿ hé sio chhiū-nâ ê siaⁿ,
　　　亲 像 火 烧 树 林 的 声，

14b　　　Chhin-chhiūⁿ hé-iām sio soaⁿ-niá.
　　　　　亲 像 火 焰 烧 山 岭。

15a　Kiû Lí ia̍h chhin-chhiūⁿ án-ni ,
　　　求 你 亦 亲 像 按 呢，
　　 ēng Lí ê kông-hong tui-kóaⁿ in cháu-bōe-lī ,
　　　用 你 的 狂 风 追 赶 伊 走 不 离，

15b　　　Ēng Lí ê tōa-hong hō͘ in kiaⁿ-hiâⁿ bô tē thang khì.
　　　　　用 你 的 大 风 使 伊 惊 惶 无 地 通 去。

16a　Iâ-hô-hoa ah, kiû Lí hō͘ in móa-bīn kiàn-siàu,
　　　耶 和 华 啊，求 你 使 伊 满 面 见 诮，

16b　　　Thang lâi kî-kiû Lí ê miâ ê su-iàu.
　　　　　通 来 祈 求 你 的 名 的 需 要。

17a　Hō͘ in éng-oán kiàn-siàu kiaⁿ-hiâⁿ;
　　　使 伊 永 远 见 诮 惊 惶；

17b　　　Hō͘ in làu-khùi bia̍t-bô chiū bô siaⁿ.
　　　　　使 伊 漏 气 灭 无 就 无 声。

18a　Hō͘ in chai chí-ū Lí , miâ chòe Iâ-hô-hoa--ê ,
　　　使 伊 知 只 有 你，名 做 耶 和 华 者，

18b　　　Sī choân-tōe-chiūⁿ Chì-koân--ê .
　　　　　是 全 地 上 至 高 者。