《押韵启应诗篇》

 | | | 转寄

台语押韵启应诗篇 64

作者 Tīⁿ Jî-gio̍k 2007.04.01

64　　Tāi-pi̍t ê si, kau hō͘ Ga̍k-koaⁿ.

1a　Siōng-tè ah , góa ai-siong ê sî , kiû Lí thiaⁿ góa ê siaⁿ;
　　上 帝 啊， 我 哀 伤 的 时，求 你 听 我 的 声；

1b　　　Kiû Lí pó-hō͘ góa ê oa̍h-miā,
　　　　求 你 保 护 我 的 活 命，
　　　　tùi-te̍k nā lâi, hō͘ góa bián kiaⁿ.
　　　　对 敌 若 来，使 我 免 惊。

2a　Kiû Lí chiong góa khǹg-ba̍t chiàu-kò͘,
　　求 你 将 我 放 密 照 顾，

2b　　　Hō͘ góa thoat-lī chòe-pháiⁿ ê lâng àm-chīⁿ ê kè-bô͘,
　　　　使 我 脱 离 做 歹 的 人 暗 静 的 计 谋，
　　　　kap kiâⁿ put-gī ê lâng ê jiáu-loān beh hāi bû-ko͘ .
　　　　与 行 不 义 的 人 的 扰 乱 欲 害 无 辜。

3a　In bôa in ê chi̍h chhin-chhiūⁿ to hiah lāi,
　　伊 磨 伊 的 舌 亲 像 刀 许 利，

3b　　　In pí-chún in ê chìⁿ, chiū-sī ok-to̍k ê ōe iā hiah lāi, 　　
　　伊 比 准 伊 的 箭， 就 是 恶 毒 的 话 也 许 利，

4a　Beh tī àm-chīⁿ ê só͘-chāi siā bû-ko͘ ê lâng;
　　欲 在 暗 静 的 所 在 射 无 辜 的 人；

4b　　　In hut-jiân siā-tio̍h i , ia̍h m̄-kiaⁿ siáⁿ-lâng.
　　　　伊 忽 然 射 着 他，亦 不 惊 甚 人。

5a　In saⁿ bián-lē siat pháiⁿ kè-bô͘ beh hāi-lâng,
　　伊 相 勉 励 设 歹 计 谋 欲 害 人，

5b　　　In chham-siông àm-chīⁿ tiuⁿ lô-bāng;
　　　　伊 参 详 暗 静 张 罗 网；
　　　　Kóng, chī-chūi ōe khòaⁿ-kìⁿ in ê hām-khang.
　　　　讲， 是 谁 会 看 见 伊 的 陷 坑 。

6a　In ūi pháiⁿ-tāi tô͘ -bô͘,
　　伊 为 歹 事 图 谋，

6b　　　Kóng, goán chīn-la̍t tô͘ -bô͘,
　　　　讲， 阮 尽 力 图 谋，

6c　Í -keng ū tú-hó ê kè-bô͘ ;
　　已 经 有 抵 好 的 计 谋；

6d　　　In ta̍k-lâng ê liām-thâu kap sim-su khùn-lân po̍k-lō͘ .
　　　　伊 逐 人 的 念 头 及 心 思 困 难 暴 露。

7a　Chóng-sī Siōng-tè beh ēng chìⁿ siā in ;
　　总 是 上 帝 要 用 箭 射 伊；

7b　　　In hut-jiân tio̍h-siong bia̍t sin.
　　　　伊 忽 然 着 伤 灭 身。

8a　In beh tio̍h-tak khut-kē ,
　　伊 必 着 触 屈 低，

8b　　　In ê chi̍h ōe hāi in pún-sin;
　　　　伊 的 舌 会 害 伊 本 身；

8c　Hoān-nā khòaⁿ-kìⁿ in--ê ,
　　 凡 若 看 见 伊 的，

8d　　　Lóng beh iô-thâu siám-sin.
　　　　拢 必 摇 头 闪 身。

9a　Chèng-lâng lóng beh kiaⁿ-hiâⁿ,
　　众 人 拢 必 惊 惶，
　　beh pò-iông Siōng-tè só͘ chòe ta̍k-kiāⁿ.
　　必 报 扬 上 帝 所 做 逐 件。

9b　　　Koh siông-sè siūⁿ I ê só͘-kiâⁿ.
　　　　复 详 细 想 他 的 所 行。

10a　Gī-lâng beh in-ūi Iâ-hô-hoa lâi hoaⁿ-hí , ia̍h beh óa-khò I ;
　　　义 人 必 因 为 耶 和 华 来 欢 喜，亦 必 倚 靠 他；

10b　　　Hoān-nā sim chèng-ti̍t ê lâng, lóng beh khoa-kháu tek -ì .
　　　　　凡 若 心 正 直 的 人， 拢 必 夸 口 得 意。