《押韵启应诗篇》

 | | | 转寄

台语押韵启应诗篇 62

作者 Tīⁿ Jî-gio̍k 2007.03.18

62　　Tāi-pi̍t ê si , chiàu Iâ-tō͘-tùn ê chòe-hoat ; kau hō͘ Ga̍k-koaⁿ.

1a　Góa ê sim chēng-chēng khut-kē , choan-bū thèng-hāu Siōng-tè ,
　　我 的 心 静 静 屈 低，专 务 听 候 上 帝，

1b　　　Góa ê chín-kiù sī tùi I chhut--lâi--ê .
　　　　我 的 拯 救 是 对 他 出 来 的。

2a　To̍k-to̍k I sī góa ê chio̍h-pôaⁿ,
　　独 独 他 是 我 的 石 磐 ，

2b　　　Chín-kiù góa ê soaⁿ.
　　　　拯 救 我 的 山。

2c　I sī góa ê koân-tâi ,
　　他 是 我 的 高 台，

2d　　　Góa bōe tōa iô -tāng chū-chāi.
　　　　我 不 大 摇 动 自 在。

3a　Lín tāi-ke kong-kek lâng,
　　恁 大 家 攻 击 人，

3b　　　Chiong i húi-hoāi bô làng,
　　　　将 他 毁 坏 无 阆，

3c　Chhin-chhiūⁿ húi-hoāi khi-chhiâ ê chhiûⁿ,
　　亲 像 毁 坏 攲 斜 的 墙 ，

3d　　　Beh tó ê piah chi̍t-iūⁿ.
　　　　欲 倒 的 壁 一 样 。

4a　In saⁿ-kap kè-bô͘ chham-gī ,
　　伊 相 与 计 谋 参 议。

4b　　　Choan-bū beh tùi i chun-kùi ê ūi kā i chhia--lo̍h-khì,
　　　　专 务 欲 对 他 尊 贵 的位 给 他 捙 落 去，

4c　In hoaⁿ-hí pe̍h-chha̍t bô siū iok-sok,
　　伊 欢 喜 白 贼 无 受 约 束，

4d　　　In chhùi chiok-hok, sim chiù-chó͘ ok-to̍k.
　　　　伊 嘴 祝 福，心 咒 诅 恶 毒。

5a　Góa ê sîn ah , lí tio̍h chēng-chēng, choan-bū thèng-hāu Chú,
　　我 的 神 啊，你 着 静 静 ， 专 务 听 候 主，

5b　　　In-ūi góa ê ǹg-bāng sī tùi I chiah ū .
　　　　因 为 我 的 盼 望 是 对 他 才 有。

6a　To̍k-to̍k I sī góa ê chio̍h-pôaⁿ,
　　独 独 他 是 我 的 石 磐，

6b　　　Sī chín-kiù góa ê soaⁿ,
　　　　是 拯 救 我 的 山，

6c　I sī góa ê koân-tâi,
　　他 是 我 的 高 台，

6d　　　Góa bōe iô-tāng chū-chāi.
　　　　我 不 摇 动 自 在。

7a　Góa ê chín-kiù, góa ê êng-kng, chāi-tī Siōng-tè ;
　　我 的 拯 救，我 的 荣 光， 在 于 上 帝；

7b　　　Góa ê khùi-la̍t ê goân-iû , góa ê siám-pī- -ê ,
　　　　我 的 气 力 的 源 由，我 的 闪 避 者，
　　　　ia̍h chāi-tī Siōng-tè . 　　
　　亦 在 于 上 帝。

8a　Lín chèng peh-sìⁿ,
　　恁 众 百 姓，

8b　　　Tio̍h sî -sî óa-khò I ;
　　　　着 时 时 倚 靠 他；

8c　Tī I ê bīn-chêng piàⁿ-chhut lín ê sim-ì ,
　　在 他 的 面 前 倾 出 恁 的 心 意，

8d　　　Siōng-tè sī lán tô-siám ê só͘-chāi, thang hō͘ lán bih .
　　　　上 帝 是 咱 逃 闪 的 所 在， 通 让 咱 匿。

9a　Pi -bî ê lâng chin-chiàⁿ sī khang-hi ,
　　卑 微 的 人 真 正 是 空 虚，

9b　　　Chun-kùi ê lâng iā sī .
　　　　尊 贵 的 人 也 是。

9c　Hē tī thian-phêng-óaⁿ, tek-khak phû--khí-lâi ,
　　下 在 天 秤 碗， 的 确 浮 起 来，

9d　　　In it-khài pí ho͘-khip ê khì khah-khin ná tîn-ai .
　　　　伊 一 概 比 呼 吸 的 气 较 轻 如 尘 埃。

10a　M̄-thang óa-khò pō-gio̍k,
　　　不 通 倚 靠 暴 虐，

10b　　　M̄-thang in-ūi chhiúⁿ-the̍h lâi kiau-ngō͘ boán-chiok;
　　　　　不 通 因 为 抢 提 来 骄 傲 满 足；

10c　Nā châi-pó ke -thiⁿ,
　　　若 财 宝 加 添，

10d　　　M̄-thang chù-ì hiah-ê chîⁿ.
　　　　　不 通 注 意 那 些 钱。

11a　Siōng-tè kóng chi̍t-hāng tāi-chì,
　　　上 帝 讲 一 项 事 情，

11b　　　Góa ū thiaⁿ-kìⁿ nn̄g-hāng tāi-chì,
　　　　　我 有 听 见 两 项 事 情，
　　　　chiū-sī koân-lêng sio̍k tī Siōng-tè I ka-kī .
　　　　　就 是 权 能 属 在 上 帝 他 自 己。

12a　Chú ah , chû-ài ia̍h sī sio̍k tī Lí ;
　　　主 啊， 慈 爱 亦 是 属 在 你；

12b　　　In -ūi Lí chiàu ta̍k-lâng ê só͘-kiâⁿ lâi pò-èng i .
　　　　　因 为 你 照 逐 人 的 所 行 来 报 应 他。