《押韵启应诗篇》

 | | | 转寄

台语押韵启应诗篇 17

作者 Tīⁿ Jî-gio̍k 2006.04.23

Tāi-pi̍t ê si.

1a　Iâ-hô-hoa ah, kiû Lí thiaⁿ chin-chiàⁿ ê sin-sò͘ ,
　　耶　和　华　啊， 求Lí　听　真　正　的申　诉，
1b　　　Liû-sim thiaⁿ góa ê kiò-khó͘.
　　　　留　心　听　我　的叫　苦。

1c　Góa ê kî -tó m̄ -sī tùi kan-chà ê chhùi-tûn chhut-siaⁿ,
　　我　的祈祷　不是　从　奸　诈　的嘴　唇　出　声，
1d　　　Kiû Lí àⁿ hī-khang lâi thiaⁿ.
　　　　求　Lí　俯耳　孔　来　听。

2a　Goān Lí tùi góa ê phòaⁿ-sû, tùi Lí ê bīn-chêng hoat-chhut,
　　愿 Lí 对 我 的 判 词，从Lí的 面 前 发 出，
2b　　　Goān Lí ê chhiú ēng chèng-ti̍t lâi kàm-chhat, bô óng-khut.
　　　　愿Lí的 手 用 正 直 来 鉴 察， 无 枉 屈。

3a　Lí í -keng chhì-giām góa ê sim,
　　Lí已 经 试 验 我 的 心，
3b　　　Lí tī mî--sî in-ūi kàm-chhat góa, só͘ -í ba̍k-chiu kim-kim.
　　　　Lí在 暝 时 因 为 鉴 察 我，所以 目 珠 金 金。

3c　Lí thoàn-liān góa,
　　Lí　锻　链　我，
3d　　　Bô chhē-tio̍h sím-mi̍h chōe-kòa.
　　　　无 找 到 甚 么 罪 过。

3e　Góa li̍p-chì sêng-si̍t,
　　我 立 志 诚 实，
3f　　　Hō͘ góa ê chhùi bô ū kè-sit .
　　　　让 我 的 嘴 无 有 过 失。

4a　Lūn-kàu lâng ê kiâⁿ-chòe,
　　论 到 人 的 行 做，
4b　　　Góa thàn Lí só͘ kóng ê ōe ,
　　　　我 趁Lí所 讲 的 话，

4c　Ka-kī kín-siú Lí chhùi-tûn ê ōe ,
　　自 己 谨 守Lí嘴 唇 的 话，
4d　　　Bô chiàu kiông-ok-lâng ê lō͘ lâi chòe.
　　　　无 照 强 恶 人 的 路 来 做。

5a　Góa ê kha tiāⁿ-tiāⁿ kiâⁿ Lí ê lō͘ ,
　　我 的 脚 定 定 行Lí的 路，
5b　　　Góa ê kha bē-bat ta̍h-chhū chi̍t-pō͘ .
　　　　我 的 脚 不 曾 踏 斜 一 步。

6a　Siōng-tè ah , góa beh kiû-kiò Lí bô soah,
　　上 帝 啊， 我 要 求 叫Lí 无 息，
　　kiû Lí lâi ìn-tap góa;
　　求 Lí 来 应 答 我；
6b　　　Kiû Lí àⁿ hī-khang thiaⁿ góa khún-kiû ê ōe , bô koh thoa.
　　　　求Lí 俯 耳 孔 听 我 恳 求 的 话，无 又 拖。

7a　Kiû Lí hián-bêng Lí kî-biāu ê jîn-chû chi̍t--ē ,
　　求Lí 显 明 Ｌí奇 妙 的 仁 慈 一 下，
7b　　　Kiû Lí ēng chiàⁿ-chhiú kiù óa-khò Lí--ê ,
　　　　求 Lí 用 右 手 救 倚 靠 Lí 的，
　　　　thoat-lī hiah-ê khí-lâi kong-kek in--ê .
　　　　脱 离 彼 个 起 来 攻 击 伊 的。

8a　Kiû Lí pó-hō͘ góa chhin-chhiūⁿ pó-hō͘ ba̍k-chiu-jîn,
　　求 Ｌí 保 护 我 亲 像 保 护 目 珠 仁，
8b　　　Chiong góa khàm-ba̍t tī Lí ê si̍t ê lāi-bīn.
　　　　将 我 盖 密 在Lí 的 翅 的 内 面。

9a　Hō͘ góa thoat-lī hiah-ê chhiúⁿ-kiap góa ê pháiⁿ-lâng,
　　让 我 脱 离 彼 个 抢 劫 我 的 歹 人，
9b　　　Chiū-sī ûi-khùn góa, beh hāi góa sìⁿ-miā ê tùi-te̍k ê lô-bāng.
　　　　就 是 围 困 我，要 害 我 性 命 的 对 敌 之 罗 网。

10a　In ê sim hō͘ ka-kī ê iû pau-ba̍t teh pháiⁿ--kòe,
　　伊 的 心 让 自 己 的 油 包 密 在 歹 过，
10b　　　In ê chhùi kóng kiau-ngō͘ ê ōe .
　　　　伊 的 嘴 讲 骄 傲 的 话。

11a　In ê kha-pō͘ hiān-chāi teh ûi-khùn goán,
　　伊 的 脚 步 现 在 在 围 困 阮，
11b　　　In chù-ba̍k beh chhia-tó goán tī tōe--ni̍h chiah kam-goān.
　　　　伊 注 目 要 翻 倒 阮 在 地 里 即 甘 愿。

12a　In chhin-chhiūⁿ sai siàu-siūⁿ beh kā mi̍h;
　　伊 亲 像 狮 数 想 要 咬 物；
12b　　　Koh chhin-chhiūⁿ béng ê sai-á-thûn tī am-ba̍t ê só͘-chāi teh bih.
　　　　又 亲 像 猛 的 狮 子 屯 在 掩 密 的 所 在 在 匿。

13a　Iâ-hô-hoa ah , kiû Lí khiā-khí-lâi tí-tng tùi-te̍k,
　　耶 和 华 啊， 求 Ｌí 站 起 来 抵 挡 对 敌，
13b　　　Chiong in táⁿ-tó bô koh ū khí-sek.
　　　　将 伊 打 倒 无 再 有 起 色。

13c　Ēng Lí ê to kiù góa ê sìⁿ-miā,
　　用 Ｌí的 刀 救 我 的 性 命，
13d　　　Thoat-lī pháiⁿ-lâng ê hāi-miā.
　　　　脱 离 歹 人 的 害 命。

14a　Iâ-hô-hoa ah , ēng Lí ê chhiú tùi sè-kan
　　耶 和 华 啊，用 Ｌí的 手 从 世 间
　　toān-choa̍t hiah-ê pháiⁿ-lâng,
　　断 绝 那 些 坏 人，

14b　　　Chiū-sī toān-choa̍t hiah-ê tī oa̍h-lâng ê tiong-kan,
　　　　就 是 断 绝 那 些 在 活 人 的 中 间，
　　　　m̄ eng-kai siū hok-hūn ê sè-kan-lâng.
　　　　不 应 该 受 福 份 的 世 间 人。

14c　Kiû Lí chiong Lí ê bí-niû chhiong-móa hō͘ bih tī Lí hia ê lâng,
　　求 Ｌí 将 Ｌí 的 米 粮 充 满 让 匿 在Ｌí 彼 的 人，
14d　　　In ê kiáⁿ-jî iā kàu sim-móa ì-chiok kòe-tang,
　　　　伊 的 子 儿 也 到 心 满 意 足 过 冬，
　　　　chiong kì -ū ê châi-bu̍t lâu hō͘ in ê kiáⁿ-sun chhin-lâng.
　　　　将 既 有的 财 物 留 给 伊 的 子 孙 亲 人。

15a　Lūn kàu góa, góa beh siū Lí khéng-tēng góa ê gī ,
　　论 到 我， 我 要 受 Ｌí 肯 定 我 的 义，
15b　　　Lâi khòaⁿ-kìⁿ Lí ê bīn ê chû-pi ,
　　　　来 看 见 Ｌí 的 面 的 慈 悲，

15c　Góa khùn-chhíⁿ ê sî , khòaⁿ-kìⁿ Lí ê bīn-iông ê siù-khì,
　　我 睡 醒 的 时，看 见 Ｌí 的 面 容 的 秀 气，
15d　　　Chiū sim-móa lâi hoaⁿ-hí.
　　　　　就　心　满　来　欢　喜。