《胡文池牧师kap布农族》

 | | | 转寄

净化山地教会ê风暴

作者 胡文池 2009.09.06

「所以凡听见我这话就去行ê，ná准一个聪明人，kā厝盖tī磐石上。雨淋、水冲、风吹，撞tio̍h厝，厝总不倒塌。因为根基立tī磐石上。」(马太福音七：24－28)

一、长老会tī山地急速成长
台湾光复前，长老会信徒已经tī花莲县太鲁阁族kap阿美族中秘密传教，光复时chiah知影已经有四千gōa位族人暗中信主。光复了后山地得tio̍h了传教自由，长老会传教师争先到山地传道，接受福音ê人口日渐多，数年了后，差不多一半ê山胞成做长老会信徒，koh tī各地兴建礼拜堂。当时tī信徒中有热心能干ê，mā lóng自动出来领导聚会，受当局任命为嘱托宣道师，in每月只得tio̍h微薄津贴，但心中煞真感谢。

二、救济品ê冲击
天主教延慢了五、六年chiah进入山地传教。虽然án-ne，但因in当时有丰富ê美国救济品(面粉、奶粉kap衫裤)分送hō͘山地人。只要登记姓名ê，lóng thang得tio̍h救济品。战了后物质缺乏，所以hiah-ê因无愿意禁烟酒á尚未进入长老会ê人，差不多全部加入天主教，hō͘长老会和天主教tī山地中成做平分ê局势。

Tī长老会中，有kóa信心不足或挂名ê基督徒，mā因受tio̍h救济物质ê诱引，口口声声讲天主教chiah有爱心，无久就转往á去。虽然长老会tī量方面损失了一kóa，ē-sái讲是煞tùi án-ne得tio̍h净化，提高教会ê品质。

三、殃及池鱼
另外一方面，天主教mā以高薪雇用山地宣道师，hō͘长老会部分宣道师羡慕，进一步koh对当局抱不平，要求加薪。有一pái，趁山地宣道会主管孙雅各牧师来花莲巡回时，有kóa太鲁阁kap阿美族ê宣道师，自称代表全部宣道师，直接向孙牧师提出了加薪ê要求。孙牧师体会tio̍h战了后物资缺乏，物价高涨，in ê生活的确有困难。Ē-sái讲是，hiah-ni̍h chē ê宣道师，加薪一事，谈何容易!按照预算开支ê教会，将由何处the̍h来这大笔经费neh。

为tio̍h这事，孙牧师十分困扰、操心。最后伊决定关闭千山圣经书院，将hit-ê学院全部经费割爱分hō͘宣道师来平静风波。时为一九五七年ê春天。

四、转祸为福
当时，微仆为玉山神学院(旧名玉山圣经书院)董事长，所以bōe-sái坐视hit-ê学院夭折，soah致使影响山地教会将来传教事工，随时向芥菜种会孙师母求援。

上帝感动伊ê心，伊真慷慨地当面答应每月补助二千元为玉山神学院ê办公费kap二十gōa位学生ê伙食费。山地学生食量真大，有ê每餐食五、六碗饭，佳哉当时有救济ê面粉thang补贴，bē致使kah「小僧多粥少」á饥饿。

当时tī花莲hit-ê学院院舍租期已到，阮就暂时将书院搬到关山神应病院旧院舍继续上课。前院长已离职，所以我kap常务董事孙雅各、江天顺、戈锐义三位牧师商量了后，认为tī台中山地工作ê高俊明牧师条件kap能力是阮唯一ê人选，tùi án-ne随时写phe hō͘伊，请伊来做院长，主持校务。

高牧师生长tī台南富裕ê医生家庭，因为tio̍h tùi耶稣基督ê脚踪，自愿放弃舒适享受ê生活，乐意地前往sàn-chhiah偏僻ê山地，辛苦传教，伊ê精神实在hō͘人敬佩。而且高牧师是出于良好信仰世系，而且有善良ê性格，敬虔ê生活，神学时代既被称做「圣人」。阮ē-tàng聘请到伊，实在一大荣幸。了后ê几年，伊所行ê，证明了阮正确ê选择。

一九五八年，台湾长老教会总会接办玉山神学院，并得tio̍h外国经济上ê援助，tī花莲鲤鱼潭买tio̍h一片山坡地。十多年间，高俊明牧师带领同志教员kap学生半工半读，流汗劳苦，开荒整地，兴建校舍，惨淡经营，hō͘玉山神学院继续成长，成做够水准ê神学殿堂。

救济品风暴，虽然一时困扰当局，结果煞hō͘山地教会雨过天晴，koh-khah光耀。而且hō͘玉山神学院强壮长大，ē-tàng培养koh-khah chē优良传教者出来，hō͘山地教会有旭日东升气势发展到taⁿ，这是咱siōng大ê欣慰。