《台湾人e5先觉―黄彰辉传》

 | | | 转寄

张德香牧师 序

作者 张德香 2009.02.15

心肝充满了欢喜感谢上帝ê恩典、怜悯、仁爱赏赐hō͘台湾人chit-ê宝贝：台南神学院院长黄彰辉牧师。学生张瑞雄写作《台湾人ê先觉－黄彰辉》――tùi法师归顺基督接受神学教育ê阿公黄能杰牧师（1853－1924），父亲黄俟命牧师（1890－1950），到黄彰辉牧师（1914－1988），三代lóng总135年。读者ē-tàng看出上帝慈爱ê摄理、安排、引chhōa黄彰辉ê一生。

前半段（1914－1947）是讲伊ê出生、生长、教育。上帝赏赐彰辉有chi̍t-ê siōng好ê家庭环境，接受基督信徒基督化家庭信仰生活教育ê影响，koh有教会环境受tio̍h基督教会团体宗教生活ê培养，建立彰辉ê圣经信仰坚定基础。

上帝koh赏赐彰辉有充足ê恩赐kap机会经历正规ê高等教育（1922－1947）；前后历经台南师范附属公学校、长老教中学、东京青山学院中学部、台湾高等学校、东京帝国大学、英国伯明罕西利屋学院kap剑桥西敏斯德神学院深造，建立了彰辉ê基督教会神学教育、神学学术造诣。

上帝koh kā彰辉安排tī特殊ê政治环境之下，因此锻炼出一位ē-sái克服困难服从「生命ê主」ê信仰斗士。了后欧洲列强进入别ê洲殖民占有地区居民，亚洲台湾mā ká入去世界ê动乱当中。中日战争、中法战争、第一pái世界大战、第二pái世界大战，权力互相斗争，动乱lóng bē停。

1895年中日战争改变了台湾ê运命，m̄-koh1945年第二pái世界大战结束了后，koh一pái改变了台湾ê运命。满清割让hō͘日本ê台湾成做中国国民党军队kap政府所接收ê台湾。经过1947年2月28日ê屠杀事件了后戒严、威权制裁、统辖，社会上、政治上ê变动扰乱，hō͘台湾社会人群bē-tàng过tio̍h安宁ê生活。若m̄是上天保佑kap上帝ê摄理，án-chóa ē-tàng突破chit种困境。

1937年8月11日彰辉tī时局真bái、紧张ê时刻，tùi基隆港离开台湾去英国留学。Hit日，明明有上帝ê摄理kap引chhōa。Hit工日本高等特务tòe-tiâu-tiâu kap监视彰辉到码头，情况万分惊惶不安。上帝安排了日本船员铃木敏道检查彰辉ê船票kap证件。伊是彰辉chìn前tī东京青山学院中学部ê日本人基督信徒同学ê至亲密友，就ná-né，彰辉ē-sái安全顺利上船到英国完成学业。十年了后1947年2月28日台湾屠杀事件了后，9月平顺tńg来台湾，1949年就担任台南神学院院长，完成台湾土产出色ê神学教育家大使命。

黄彰辉牧师tńg来台湾了后（1947－1965）18年久，kā战后koh-chái开办ê台南神学院，成做编制上、实质上东南亚第一大koh好ê神学教育机构；mā帮赞台湾长老教会ùi大战后ê孤儿宣教区成做坚强koh有活力ê少壮教会，tī十年内（1955－1965）完成教会加倍kap信徒倍加，担当教会总会议长主持ê教会设教一百年感恩礼拜庆典，又koh引领教会进入宣教第二世纪ê宣教任务。

siōng尾一段（1965－1988），黄彰辉牧师以台湾经验kap亚洲经验接任普世基督教会协会ê神学教育基金会副主任ê职务，驻tī英国伦敦办公；1971年晋升hit-ê基金会ê主任，总览亚洲、非洲、南美洲等地区ê神学教育kap神职训练工作ê提升；1977年退休。

黄牧师tī 1965年秋末离开台湾以后tio̍h一直流浪tī海外23年hiah-nih久。Tī 1987年热天透过当时副总统李登辉从中协调，特别允准入境；感恩「生命ê主」上帝神奇、美妙ê摄理安排引领，有前南神同事、副院长安慕理牧师ang-á-bó ê陪伴，稳稳chāi-chāi双脚踏tī幼、少年时期生长ê台湾土地，kap 1947年开始工作生活ê所在－台南神学院，欢喜kah bē讲得，真真正正是有上帝讲bē尽ê恩赐。

虽然肉身渐渐衰退，信仰，确信斗智无衰退，tī台湾故乡恩典ê日子，日夜为tio̍h神学教育、教会宣教大使命，kap台湾前途、自由民主、自决空前大任务，奔走奋斗。

1988年10月27日tī伊乡蒙主恩召，安息tī主ê怀抱。

下底ē-sái讲是一神信仰、基督宗教ê圣经信仰告白：「耶稣基督道成肉身，ùi人仆，非以役人，乃役于人，tī本丢彼拉多任内受苦，钉十字架，死；上帝伸张公义kap真理，hō͘耶稣基督tùi死人内底活过来，拍开一条koh新koh活ê路引到永生，彰显神恩、奇异大能，救赎人类，脱离恶法、罪孽、乌暗死亡权势，hō͘受造ê宇宙、森罗万象、众生有一日ē-sái同齐分享上帝儿女荣光ê自由。」

这tio̍h是黄彰辉牧师ê基本信仰确信ê一部分，mā是伊神学教育ê磐石基础。常常tī南神教室听tio̍h黄院长引用保罗ê话讲：「上帝若ùi咱（帮助咱），谁ē-tàng敌挡（对敌）咱？」……「m̄-koh，靠tio̍h爱咱ê主，tī诸个（ti chiab-e）lóng总ê事，已经得胜有chhun lah。」黄彰辉院长虽然死去，soah因信iáu-koh讲话。

Tī神ê恩典下，hō͘《台湾人ê先觉－黄彰辉》kap黄彰辉牧师ê英文「回忆录」（Recollections and Reflections，安慕理编、序）ê读者ē-sái共享十字架苦难、死、复活ê基督信仰生活生涯，koh得tio̍h上帝儿女荣光ê自由幸福平安。