《台湾人e5先觉―黄彰辉传》

 | | | 转寄

自序 黄彰辉牧师kap我

作者 张瑞雄 2009.02.22

我tī 1962年离开台湾了后，一心kan-tāⁿ想tio̍h无ài参与教会ê体制kap体制内ê政治纠纷。当时，实在无siuⁿ大ê梦（为tio̍h台湾教会，koh-khah m̄免讲beh为普世ê教会效力）。当时，我kap黄彰辉牧师ê关系是：老师kap学生，sī-tōa kap sī-sè，是一位有名气有地位、有世界舞台kap眼光ê人，kap来自chi̍t-ê小城市，无算是什么眼光ê小人物ê对比。

我koh一pái kap黄牧师相会、相se̍k-sāi，是tī 1976年，正当台湾ê地位hō͘世界上真济国家koh一pái评价定位ê时刻，15年ê时间就án-ne过去lah。

会记得我做兵退伍以后，m̄-nā一pái以『向雷公借来ê胆』，请教黄牧师以前bat提过..ê，有关留学进修ê代志。因为，当时我感觉伊高高在上，是chi̍t位khiā tī教会领导地位ê长者，我kan-tāⁿ是chai-á仝款ê少年囝仔，亲像士官见tio̍h大将军仝款，kan-tāⁿ 向望伊ē-tàng ke关心我ê前途。m̄-koh伊对我ê应答真简短，致使我感觉伊真冷淡，所以tio̍h决心放弃koh向伊请求任何进修ê机会..lah。

我ê留学，完全是家己去找美国ê神学院校ê简介koh决定去申请来..ê。无想tio̍h一申请，tio̍h得tio̍h核准入学。留学是上帝hō͘我ê大恩典，毕业了后ê工作机会koh-khah sêng是teh眠梦，真紧成真，受tio̍h生份ê教会领导者爱护，mā受tio̍h异族基督徒ê接受kap宠爱做主内ê兄弟。实际上是上帝ê奇妙安排。先是tī 1966年ē-sái进入tī加利福尼亚州里ê日本语系教会，tú好in需要chi̍t-ê会讲日本语kap英语两种语言ê讲道人。Koh tī 1967年得tio̍h chi̍t-ê机会，受tio̍h联合卫理公会ê采用，koh派驻tī加州ê Fresno教会牧会四年。后来koh tī Alameda ê Buena Vista日系教会牧会二年。Án-ne，chiah tī联合卫理公会做牧会，同时tī教区kap年会内底做短短五年ê活动，得tio̍h机会hō͘人选参与设tī美国联合卫理公会ê世界宣教委员会，兼海外kap女宣ê理事，he就是tùi 1972年9月开始。笔者因为kap世界海外宣教会有工作上ê关联，大开眼界，所以 ē-sái用环球（Global）ê眼光看美国、台湾kap全世界。

笔者进入世界宣教委员会了后，tī短短ê一年内，就se̍k-sāi tī卫理公会内底掌理世界宣道区里底ê干事kap世界各地教会ê领袖。会记得有一pái tī 1976年，tī俄勒冈（Oregon）开联合卫理公会总会(四年开一pái)前，举办海外宣教研讨ê时chūn，kap笔者tòa作伙四工ê室友（room- mate），正是Emilio Castro卡斯楚牧师 (玻利维亚卫chhap出身，当时tī日内瓦就就职) 。无到一年了后，伊就hō͘邀请提升做普世教会协会（World Council of Churches）ê总干事。

Tī联合卫理公会海外宣道处，笔者受hō͘人选做担任亚州委员会ê委员长，tùi án-ne参与负责考评教派内底，亚州宣道事工方面ê干事工作。通过海外宣道处tio̍h ē-sái kap世界宣教委员会内底ê领袖se̍k-sāi，甚至hō͘认定kap in『仝格』，去讨论kap查验宣教策略。就tùi hit时chūn开始，kap做总干事ê Tracy Jones成做同事。伊是kap 黄牧师se̍k-sāi真久ê朋友，出生tī山东省，讲得不止á好山东腔ê『北京话』。Mā真tú好伊是金陵神学基金会ê卫理公会代表，伊对台南神学院，算是有恩情ê。伊是绍介台湾（以黄彰辉为代表）hō͘金陵神学基金会ê人之一，而且tī基金会内底掌握真大ê影响力，因为tī美国ê基督教会联盟内底，卫理公会是siōng大ê教派，tī美国众基督教会内底，mā是kan-tāⁿ排tī天主教会kap南浸信会了后。

黄牧师tī伊ê回忆录内底（p.161）纪录描述ê Ralf Ward会督、Eugene Smith前总干事（除了Frank Cartwright金陵基金会总干事无得相se̍k-sāi以外），lóng变成我ê同工、同事，我kap in 之间又koh无长官上司kap部下ê牵制，所以透过chit种ê关系，我就真自然ê kap khah-chá感觉高高chāi上ê黄牧师自然交往，ē-sái自由自在ê kap黄牧师讨论，甚至批判伊ê言论思想。Chit种ê发展，实在是无预想tio̍h ê，这ē-tàng讲是上帝奇妙ê安排，mā ē-sái tī亲中国ê联合卫理公会内底，替台湾长老教会kap台湾ê将来，做一kóa进言kap贡献。

1977年5月，tī日本基督教团开会了后，有一个机会，先tī印度开会，后来koh到纽约开会之间大概有一礼拜ê时间，作了chi̍t-ê环绕世界一礼拜ê旅程，顺续到英格兰。来到黄牧师in tau ê时chūn，阮读tio̍h一份台湾教会公报，登载议长赵牧师ê总会讲道。Hit时，阮lóng感觉为tio̍h台湾长老教会感觉欢喜，为in ê勇气所高昂鼓舞。当时，黄牧师对伊ê学生赵牧师做议长所做ê表态kap言辞，真hō͘伊骄傲kap佩服。伊当时做ê评语，笔者从来m̄-bat bē记，因为赵牧师是我ê同班同学。黄牧师讲：『信愢tī学ê时chūn，我无特别感觉杰出，无想过有一工伊会khiā-tī领导教会ê顶点，伊真是chi̍t-ê真chán ê议长ah！你看，伊ê讲道，每chi̍t-ê字kap字之间，引起国民党以显微镜检查是m̄是有『细菌』bih-tī内底，我ê学生真了不起，ē堪leh考验，mā khiā ē-chāi，做教会ê领导。』

Tùi 1985年7月开始，一直到1991年6月，我tī北加州得tio̍h好机会做联合卫理公会ê教区长，替台湾争取名气，mā tī长老教会以外ê教派内底做台湾人实质ê参政kap公关。黄牧师欣赏我ê职位koh hō͘我嘉勉kap庆幸。可惜，伊已经尽程退休，又kap肺癌ê抗争。因为我ta̍k工差不多kui工hō͘会务缠身，无法度tùi教区kap年会离身，根本无算是拨时间，划出旅程去拜访伊，kap伊欢喜开讲。可惜，1988年10月，当伊归天家hit时，无人想tio̍h beh通知我。我m̄-nā无奔丧，连吊挽ê表现lóng怠慢，虽然无意，m̄-koh过去15年ê时间内底，一直感觉亏欠，siōng-bóe决心收集伊ê资料编写传记，作为报恩kap过失ê补偿。

黄牧师是一位坦白正直，无两面讨好ê人，tiāⁿ-tiāⁿ表现出伊独有特殊koh带有纯真善意ê bî-bî--a笑。Kap伊进一步交往ê人，总会发现伊无kā代志隐藏tī心肝内，无论任何人kā伊问问题，伊一定会hō͘ in充满热诚ê应答kap说明。伊ê感情chiok厚，尤其是对故乡台湾，因为伊立誓beh kā一生奉献，hō͘台湾国ê人民kap tī 岛上ê基督教会有光明ê将来。伊时常感慨ê讲，伊ê神学是：『m̄甘愿ê神学』。因为不管伊án-chóaⁿ表示善意kap合作，殖民主义ê日本kap中国lóng黑白不分，以二等国民ê身份苦毒台湾人。伊ê『m̄甘愿』，是因为伊kap有心ê台湾人以『无抵抗(基督教)ê方式』抗争一百年..a，iáu tio̍h ài忍耐，phah-piàⁿ完成台湾人『决定家己将来』ê伟业。我ê老师黄牧师虽然已经归天，伊tī在生ê时ê气魄kap话语iáu teh讲话，催逼tio̍h全台湾ê人民，ài有美丽岛民ê自觉kap基督徒giám-gēⁿ ê不断祈祷ê精神。

Tī 1980年4月，高俊明牧师hō͘国民党政权捉起来ê hit一工，tú好联合卫理公会tú-teh开四年chiah一pái ê总会，我mā hō͘选做代表参会，而且tī 1980年1月，派往台湾采访『高雄美丽岛事件』ê五个人（包括我tī内底）ê中间，有三个人就是hō͘选做北加kap内华达年会ê代表。阮动员十二个年会代表，发起动议，要求总会写批hō͘蒋经国，表达联合卫理公会对高俊明牧师ê宗教行为ê自由，kap人权受侵害ê关心，mā表达该会对国民党政权忽视台湾人ê自决意愿kap压制台湾人人权ê作为来关切。

黄牧师就是对联合卫理公会总会有关国民党政权、台湾人民，台湾基督长老教会kap高俊明牧师所议决ê指责、关怀表达安慰kap评估siōng高ê一位台湾教会人士。因为伊知影『亲共产中国』ê美国大教派，替台湾自决讲话，就是得tio̍h无简单，难得ê支持。

高俊明牧师hō͘人逮捕kap联合卫理公会ê正式支持台湾长老教会ê总会议决，进一步hō͘我真好ê机会，tī世界基督教协议会ê伞下参与一kóa活动。会记得就是tī 6月初，黄牧师tùi英国，我tùi美国，到日内瓦讨论普世性ê教会人士对台湾教会，特别是对高牧师ê援助。Tī日内瓦停留ê这两工，阮kap普世教会协会工作ê两位台湾出身ê宋泉盛牧师kap徐望志先生，作了一kóa讨论。Hit一pái，对我是siōng难忘ê两工，因为，我kap黄牧师tòa作伙chi̍t-ê旅舘，作伙食饭，mā kap伊tī日内瓦ê街á路散步。

下二页ê图是黄牧师亲笔写hō͘我ê批。伊得tio̍h世界归正教会联盟（WARC）ê总干事白逸文博士(Dr. Edmond Perret)ê同意，代表WARC kap WCC（普世教会协会）到台湾去访问，mā得tio̍h西柏林教会会督Bishop Kruse kap英国苏格兰教会ê总会议长Dr. Johnson ê同意，mā定好日期beh到台湾去访问高牧师kap蒋经国政权，以表示世界各教会ê关心。我所承受落来ê工作，就是为联合卫理公会ê黄彦才会督(Bishop Wilbur Choy)做国民党政府kap台湾长老教会现状ê简报kap资料ê更新。我一生感觉遗憾ê事，就是tī黄牧师kap日内瓦ê同工费了心血，kā推动卫理公会代表到台湾访问ê事，作好了计划，协调了行程以后，因为受tio̍h委托ê hit位监督soah无lêng-le̍k而且无尽责去实行伊所作ê承诺，致使我无法度完成愿望，为台湾长老教会尽一kóa卫理公会道义上ê支持。

当恩师黄牧师做神学院院长ê时chūn，tiāⁿ-tiāⁿ tī追悼纪念教界领导者ê礼拜内底引用希伯来书十一．4讲：『伊虽然死去，iáu-koh藉tio̍h这信心讲话』。伊ê话，是受压制、艰难困苦中所讲出来..ê，听了以后，有新鲜ê香气，mā有先苦后甘ê气味。我深深感觉tio̍h伊向台湾人ê良知有非常响亮ê呼召，伊ê神学理念养饲阮ê台湾意识kap自爱，因为伊所行ê途径，所讲ê话语是充满tio̍h爱kap希望..ê。黄牧师不愧是台湾人ê第一位牧师先知，mā是第一位模范导师。

2004年4月 张瑞雄

黄牧师(Ng Chiong-hui)亲笔书写hō͘我(Sui-hiong)ê批(裏页)

黄牧师(Ng Chiong-hui)亲笔书写hō͘我(Sui-hiong)ê批(外页)

黄彰辉牧师tī Sussex郡ê Seaford,黄家ê「我家」,叫做「The Bye」,前留影(1978).

下图是黄慰尔师母kap笔者tī黄院长ê「我家」后面庭园,由黄牧师操机摄相留影(1978)