《台湾人e5先觉―黄彰辉传》

 | | | 转寄

怀念恩师黄彰辉牧师

作者 翁修恭 2009.02.08

1948年1月6日第九届南部大会tī斗六召开，会议当中通过台南神学院重新开办ê议案。仝年4月1日chái-khí 11点tī神学院ê礼堂举行隆重ê复校典礼。新学期订tī 9月开学，tī 2月中办理招生，我真庆幸我hō͘录取，三月提前进入学校，所以tio̍h参加复校典礼。

黄彰辉牧师tī 1947年9月ùi英国tńg来国内，1948年开始tī长荣中学担任圣经kap英语教师，明年九月按立牧师又koh就任台南神学院第三任院长。伊是头一位担任台南神学院院长ê台湾本土人。

神学院头一年，彰辉牧师教阮哲学史，tī我印象中，伊开ê另外一门课是创世记释义；第二年教宗教哲学；第三年开ê课是教理史kap系统神学；第四年继续上伊ê系统神学。神学院四年期间（当时ê神学院是四年制），逐年lóng有伊ê课，接受彰辉牧师ê指导。

上彰辉牧师ê课是一大享受，thang讲ē-sái学tio̍h chiok chē ê物件，伊使用启发式ê教学法，有系统、有条理清楚ê讲解，教阮beh án-chóaⁿ思考，这对阮以后研经、准备讲章、宣讲信息，帮赞非常ê大。伊是一位出色ê神学教育家，伊m̄-nā教人beh án-chóaⁿ做学问，又koh结合学问、生活、kap工作，去从事牧会ê工作、教导信徒。

除了教学以外，彰辉牧师又koh真热心投入普世教会ê事工，不时参加各项国际会议kap活动。伊每一pái开完会ia̍h-sī参加国际活动tńg来，一定kā伊所听tio̍h、所看tio̍h、kap所接触tio̍h ê事项lóng一一kā阮讲，hō͘阮ia̍h-koh tī学习阶段ê学生知影普世教会ê动向，又koh分享伊所得tio̍h ê经验kap感受。伊拍开阮ê眼界，除了 koh-khah 了解普世教会ê情况、mā来kap外界koh-khah接近。这是别ê神学院学生得bē tio̍h ê福气。后来台湾基督长老教会总是会参加普世基督教协会（World Council of Churches）成做会员教会，是透过伊ê鼓励kap拍拼奔走促成..ê。伊是普世教会运动一位真受敬重ê导师。

我个人得tio̍h彰辉牧师真大ê关爱kap真chē ê照顾。1952年神学院毕业了后，为tio̍h促我出国进修，透过当时ê总会传道处特别安排我tī台南附近chi̍t-ê农村小教会服务，一面牧会、一面tńg去学校接受语文训练kap作出国进修前ê预备。m̄-koh tī毕业后ê kè-tńg-nî，身躯小khóa感tio̍h无爽快，hō͘强迫暂时请假疗养，所以出国进修ê计画tio̍h延落来。 台湾教会tī 1965年举行福音tī台湾宣教一百年庆典kap活动结束了后，彰辉牧师辞掉台南神学院院长ê职务，去英国伦敦就任普世教会神学教育基金会总干事（Theological Education Fund. WCC）比彰辉牧师khah早离开台南神学院ê前副院长安慕理牧师（Rev. Boris Anderson）mā是我ê新约学教授，tńg来参加福音tī台湾宣教一百年庆典ê时鼓励我出国进修，我用年纪大koh可能身体检查无法度通过当做理由来拒绝，伊soah讲留学英国无要求身体检查，除了 koh kchiann5我，koh主动kā英国长老教会为我申请全额奖学金，因为伊真热心只好接受伊ê好意。tī 1966年8月去英国剑桥卫斯敏士德（Westminster）神学院进修两年了后，koh再透过彰辉牧师申请得tio̍h美国纽约协kap神学院（Union Theological Seminary）ê奖学金留学一年，tī 1969年tńg来国内服务。

Tī英国ê期间几pái到彰辉牧师伦敦ê事务所kap英国长老教会总会拜访kah-chá两位老师。安慕理牧师当时担任英国长老教会总会海外宣道会干事。有一pái受邀请去Seaford彰辉牧师寓所，当时kan-tāⁿ有伊kap师母tòa tī-hia，gín-á lóng已经成年各自成家，无kap父母tòa作伙。我tī-hia得tio̍h真好ê接待。师母kā我讲，彰辉牧师爱食猪头皮，伊kā kui-ê头ê肉lóng买tńg来，加香料卤过了后，彰辉牧师lóng 食bōe-siān。因为师母m̄食chit-ê物件，所以每一pái lóng是伊一ê人享用。这是彰辉牧师日常生活ê小故事，ùi这 ē-sái知影伊生活简单朴实，无过份ê要求，满足tī伊khîn-khiām ê生活。

我tī纽约期间，彰辉牧师经过hia一定会来看我。有一pái伊ài我负责联络，邀请tī纽约地区留学ia̍h-sī工作ê同学ta̍k-ke来tàu阵作伙。无想tio̍h ta̍k-ke接tio̍h通知lóng推东阻西，结果连chi̍t-ê mā无露面，hō͘伊非常失望。后来伊the̍h出十元美钞hō͘我（35年前十元美钞是大钱）交代我去买食材，食材买tńg来了后，伊亲自落灶脚，同时iáu hō͘我机会教育，指导我安怎做菜，hit工阮两个人食了真phong-phài。

彰辉牧师真会照顾学生，mā真会提拔后辈。透过伊申请tio̍h奖学金安排到国外留学ia̍h-sī进修ê人bē少。In tńg来国内了后ē-tàng贡献in所学tio̍h ê物件，这是彰辉牧师ê期望，soah有一部分人去了就无ńg来，出了国门就一直留连tī国外，小khóa hō͘彰辉牧师感觉伤心失望。

1987年伊最后一pái tńg来，当时已经知影家己得tio̍h癌症，嗽bē停。伊交代我安排kap李登辉总统见面，陪同伊晋见总统ê有安慕理牧师夫妇、高俊明牧师kap我。出来了后，伊交代阮beh hō͘ 李登辉先生critical support（批判性ê支持），意思是：khiā-tī基督徒信仰ê立场去支持伊，m̄-koh必要ê时mā应该提出建言、批评、甚至纠正。彰辉牧师1988年10月27日安息tī英国Sussex ê Seaford。