《林茂生博士论文》

 | | | 转寄

第九章 实际问题

作者 英语：林茂生,华语：林咏梅, 台语：林俊育 2017.10.15

第九章 实际问题

一、质方面ê问题简介
共学ê理想基于两个民族接受教育机会ê平等做假设ê前提，m̄-koh，tī真正操作中，共学ê结果，chit种假设并无实现。因为真chē理由，无平等ê情形存在。Chit章ê目的to̍h是beh展示无平等ê事实，并探求它ê理由，koh再提供建设性ê批评。

Tī进入现今chit-ê领域问题chìn前，先一览主要殖民地国家所提供ê教育机会，会有所帮助。亲像下列数字所显示，大部分ê帝国政府对教育ê支持比关税、原料、港口kah铁路加真少。Tī 1923年，比属刚果用tī教育费顶面chiah 10万美金，这kan-taⁿ是她ê殖民地总预算ê百分之一。法属西非tī 1925年拨50万美金当做教育费用，是预算ê百分之八。 Hiah-ni̍h少量ê预算，表示殖民地教育机会真有限制。下列数字显示教育所得tio̍h ê真正关注是hiah-ni̍h少（注: 1）。

国家（注: 2） 每一千住民中入学儿童人数
阿尔及利亚 Algeria 46.0
亚马达加斯加 Madagascar 40.0
突尼斯 Tunis 22.0到28.0（数字不等）
法属西非 French West Africa 3.0
法属喀麦隆 French Cameroun 3.0
比属刚果 Belgium Congo 26.0
英属乌干达 British Uganda 50.0
南非 South Africa 40.0
黄金海岸 Gold Coast 7.0
葡属安格拉 Portuguese Angola 1.0到11.0（数字不等）
利比亚 Liberia 3.0到4.0（数字不筝）

Chiah-ê统计数字显示，殖民列强对促进教育方面所付出ê努力，是hō͘ 人感觉见笑ê无充分，而且往往是由传教团体大力付出。 讲tio̍h亚洲殖民地区，有无仝ê问题存在。虽然事实上存在明显ê文化，却kah非洲仝款，教育tī量方面犹原微小。

国家（注: 3） 每一千住民中入学儿童人数
英属印度 British India 37.7
法属中南半岛 Cochin—China 22.5
荷属东印度群岛 Dutch East Indies 38.0
朝鲜 Korea 20.0

台湾ê情形mā是án-ne，chia有岛内教育ê数字。Tī台湾，有仝款程度ê文化，她ê入学儿童ê数目，包括公学校以及中学校，是1千住民中间chiah有29.25人。29.25 chit-ê数字非常少，因为其中包括数目无相等ê女生，in mā被提供教育，tī公学校kah中学校ê男生人数是女生ê三倍。

台湾ê教育预算显示，kah前述欧洲国家殖民地ê教育预算比率相近。Tī 1926年chit年（注: 4），台湾ê教育预算为1千8百30万254日圆（约5百万美金）。Chit-ê数目分配亲像下面：
学校 金额
小学校 7,199,293
中学校 1,689,372
实业学校 526,516
专门á是职业学校 694,706
师范学校 720.367

1926年ê总预算大约是1亿日圆（五千万美金），这表示教育tī比率上是百分之10.8。

美国对提供教育hō͘她ê殖民地chit项tāi-chì比较khah认真，tī夏威夷实际上已经是普遍教育。其它殖民地ê比率亲像下面（注: 5）：

国家 每一千住民中入学儿童人数
波多黎各 Porte Rico 175.00
海地 Haiti 37.00
菲律宾 Philippines 120.00

根据1926年政府报告ê数字，日本人kah台湾人ê初等学校男女生入学比率亲像下面。日本人学校注册百分率真koân，男生达到 98.28，女生为98.11。台湾人学龄男生接受初等教育ê百分率是43.34，女生是13.11，台湾人儿童ê平均数是28.23。这kah日本人ê百分之98.2形成强烈ê对比。

第35表显示ê统计来自最近ê报告（1929年），它非常清楚呈现日本人kah台湾人tī中学校注册ê情形。Tī台湾，kah tī日本仝款，渴望进入中学校ê男女生，一定tio̍h考入学试验。Tī台湾，咱会发见一种特殊情况，chit-ê情况显示对台湾学生来讲，有真大ê障碍teh阻挡in进入中学校。Tī 1929年，有1万3千1百63位申请进入中学校，其中3千3百46人得tio̍h允准，á是讲总人数ê百分之25得tio̍h允准。这1万3千1百63位申请入学ê学生，由以下分子组成ê：

学校类别 申请者分类 申请者人数 得tio̍h允准入学人数 得tio̍h允准百分率
中学校 日本男生 1,353 609 45 中学校 台湾男生 2,801 443 16 高等女学校 日本女生 1,559 928 60 高等女学校 台湾女生 830 369 44 实业学校 日本男生 2,111 281 32 实业学校 台湾男生 1,551 374 18 师范学校 日本男生 2,075 253 16 师范学校 台湾男生 2,635 89 4

Chia总共有5千3百46个日本人申请；其中2千071人得tio̍h允准入学，它ê百分率是39。Tī 7千8百17个台湾人ê申请者中间，1千2百75人得tio̍h允准入学，它ê百分率是16。

高等教育学校ê统计数字mā仝款重要。

学院类别 申请者分类 申请者人数 得tio̍h允准入学人数 得tio̍h允准百分率 帝国大学 日本人 68 60 88 帝国大学 台湾人 6 6 100 台北高等学校 日本人 504 83 16 台北高等学校 台湾人 172 20 11 台北医学专门学校 日本人 230 44 19 台北医学专门学校 台湾人 219 31 14 台北商业专门学校 日本人 232 60 26 台北商业专门学校 台湾人 26 6 23 台北农业专门学校 日本人 216 38 18 台北农业专门学校 台湾人 35 1 3

Chiah-ê数字显示1929年ê台湾，日本学生kah台湾学生之间，中等kah中等以上学校ê入学百分率，存在tio̍h真大ê cheng差，而且根据统计数字显示，台湾男、女学生在学校，tùi siōng低到siōng kôan年级，tī百分比上lóng是少koh属tī不利ê情况（注: 6）。

Tùi以上ê研究，tùi量ê观点来看，咱thang得tio̍h结论，台湾ê教育，除了美国殖民地，kah其他主要国家ê殖民地，大约相差无gōa chē，而且岛内本身ê统计显示，无论tī小学年级á是高等学校，对当地儿童来讲，tī入学ê百分比上lóng是少koh不利ê。就án-ne显示现阶段ê教育作为，kah实现1922年ê教育令ê理想，iáu相差真远。

二、初等教育tī量方面ê缺失原因
Tùi顶一部分，咱已经看见日本人有百分之98，台湾人chiah有百分之28 chit种罕得有ê入学情况。日本学龄儿童ê入学率为百分之98，这显然是koân koh充分ê，所以，咱一定tio̍h思考另外一个降到28 ê百分率。对chit-ê百分之28 ê注册率，有两个主要ê理由hō͘人思考。

1.日本人siōng常提出ê理由是án-ne：听讲台湾人父母m̄送in ê kiáⁿ儿去学校读册。30年前，这是事实，m̄-koh然后几年来，台湾人民对日本人所提供ê教育价值ê认bat，对教育ê渴求增加，而且用真chē方式表明in ê心愿。事实是无空ê教室，á是koh khah具体来讲，无空位á等待台湾孩童去坐，这显示宣称ê理由是无正确ê。实际ê情况是，教室真kheh，尤其tī主要城市里，本来为tio̍h容纳40到50名孩童来起ê教室，竟然有70名孩童。另外一个事实ē-tàng反驳in ê讲辞，thang tùi图表一清楚显示出来。Chit-ê图表表示tī两个落后而且人口比较khah少ê州ê学龄儿童入学百分率，kôan过五个文化比较khah进步koh人口比较khah稠密（tiû-bi̍t）ê州；甚至人口siōng疏薄（se-po̍h）之一ê澎湖厅，mā有百分之29 ê入学率，仅次于（kīn-chhù-î）台北州。有关细节请看下列数字（注: 7）。

当地人人口kah入学儿童（1926年）
州 人口 每一百住民中入学儿童人数 儿童入学人数 百分率
台北 745,303 18.99 41,868 34.20
新竹 610,412 19.53 28,024 27.05
台中 876,333 19.92 43,042 28.35
台南 1,025,315 19.72 44,615 25.40
高雄 517,452 20.69 24,994 26.89
台东 11,747 17.54 1,066 58.06
花莲港 26,669 16.55 1,636 42.08
澎湖 59,389 19.13 2,921 29.14
总共 3,872,620 19.69 188,166 28.42

Chit种现象为下列事实提供证明：(1)本岛人父母对教育ê疏忽并m̄是入学百分率低ê原因，因为jú是进步ê州，伊ê百分率jú低，(2）人口jú稠密ê州，需要koh khah chē ê学校。

2.欠缺教育设备（欠缺资金）可能是主要ê原因。Hō͘ 咱tùi现阶段ê预算来思考，hō͘ in初等教育ê经费无均衡。Hō͘日本儿童ê小学校每一班ê年度经费为2千066日圆，m̄-koh，为仝一个目的，hō͘台湾人ê公学校ê年度金额为1千180日圆。Koh讲，每一名日本人儿童一年ê经费为49日圆，台湾人儿童就án-ne降为27日圆（注: 8）。Chit-ê事实显示，教育实践上，kah 1922年教育令以一视同仁为精神ê高超理想，互相无符合。

当局bat试探实行一种tùi初等阶段以上到大学ê教育计划。Tī chit-ê试探中，它ê开支真大，造成头重脚轻ê消费帐目。诚然（sêng-jiân），ē-tàng提供一种教育制度，完整包括教育阶梯ê第一阶到siōng kôan阶，是一件好ê tāi-chì。M̄-koh，当百分之72 ê台湾儿童被排除tī接受任何教育机会之外，咱一定tio̍h停落来重新考虑，这是m̄是siōng好ê遵循方向—为低年级奠定真好ê基础chìn前，kā金钱用tī高等教育顶面。

以设立新ê台北帝国大学为例。该大学ê设立是为tio̍h tī台湾提供高等层次ê教育。建筑计划规划出来à，58位教员被聘请à，而且第一年ê注册学生限1百名。Chit-ê人数看起来真少，m̄-koh iáu无够少，因为只有60名学生入学。为tio̍h chit-ê目的，已经拨款1百11万7千日圆。Tī chit种情形下，hō͘人不得不同意杰弗逊（Jefferson）ê话：「若是一定tio̍h放弃小学á是大学两者之一，我宁可弃sak后者，因为hō͘全民受tio̍h尊重ê启蒙，比起少数人知识崇高，soah hō͘大多数人tī无知ê中间，chit世界会khah稳当（注: 9）。」

台湾人儿童ê学校，tī设备方面是可悲ê kē路，koh khah重要ê是迫切需要校舍，有百分之72 ê儿童完全无受tio̍h照应，chit时，就因为有60名学生，in真容易tī日本本地受高等教育，却tī chia受tio̍h特殊ê照顾，in ê教育牵涉tio̍h一笔非常可观ê经费，而且chit笔经费可能用tī koh khah重要ê工作上。这是事实ê一个例—siōng需要ê所在却得bē-tio̍h预算ê分配。

三、义务教育ê问题
以上ê讨论自然kā咱引chhōa到义务教育ê问题。亲像以前所述，虽然tī日本本地已经实行义务教育，m̄-koh tī台湾kah朝鲜，无论是对当地人民á是日本住民，lóng无法律ê根据来强制执行chit种法令。虽然对日本人无严格执行法律ê要求，因为in过去tī日本义务教育ê经验，koh因为tī台湾为in做妥善ê安排，所以，日本人一定会送in ê kiáⁿ儿去学校读册。事实证明tī台湾ê日本人kiáⁿ儿ê就学百分率不断chhèng-koân，直到今á日已经是百分之98，kah日本本地ê百分率相等。所以当咱考虑义务教育ê问题ê时，咱是teh指它对当地人民ê意义，因为台湾孩童入学kan-taⁿ百分率28，án-ne chiah是咱争议ê要点。

尽管有真chē问题存在，日本政府非常诚恳试探来提高教育ê品质，kah供应大众教育hō͘台湾人民。Chit-ê态度是ē-tàng证实ê，若是咱考虑tio̍h田男爵ê行动。田男爵tī 1918年7月头一pái召集台湾评议会，chit-ê议会最近组成以思考tī台湾实行义务教育方式为宗旨(注: 10)。Hō͘人悲痛ê是，chit-ê议会kan-taⁿ是谘询性ê，并未被授与实权。Chit-ê议会ê成员对义务教育持有分歧ê意见，致使chit-ê问题hō͘ in暂时搁落来；in所关心ê是in认为koh khah重要ê事务，像讲推介民法kah商法ê适用tī台湾。所以，tī chit会议上因为欠缺共识，soah无产生具体ê决定。此后chit-ê议会被召集几pái，m̄-koh，义务教育ê问题无koh再向in提出。

虽然义务教育问题成做悬（hiân）案，m̄-koh，iáu-koh是急待解决，续落来几年，它成做koh khah紧piak-piak ê问题。Hō͘ chit-ê问题悬而不决是教育进展上一个严重ê障碍，对chit项tāi-chì只要有明确ê行动，这百分之28入学率to̍h会真明显增加。妨碍义务教育ê主要困难在tī经费ê考虑，几年前确实存在经费ê问题，m̄-koh，chit-má情况无仝ā。Tī提起自然资源hit章里，我ê结论提出1928年有可观ê余额，大约是1亿日圆(注: 11)。工业已经有惊人ê发展，因此可见有庞（pâng）大ê金额thang提供hō͘工业以外ê其它真chē行业ê发展上。Chit-má有钱thang用tī好学校、好教员以及必要ê教育重建上。

前已经叙述过，初等教育是由地方ê税收支付kah维持。像chit种来源ê收入真贫乏，无可能充分加添援助初等教育ê发展kah贯彻强制教育。Tī 1926年，kui个教育预算是1千万日圆，其中将近百分之80由地方税收供给。初等教育是一种沈重ê负担，大大超过地方税收所ē-tàng负担ê (注: 12)。所以，为tio̍h扩充教育规模并实施义务教育，应当由中央政府hō͘初等教育额外ê资助。Chit-ê工作纯粹是物质方面ê，一定tio̍h起造学校来容纳不断增加ê学龄儿童，in teh等被纳入教育制度内。

若是咱以百分之90为最后ê标志，咱希望tī 20年后达tio̍h chit-ê目标，这真容易看见增加hō͘ 中央政府身上ê财务负担以及所增加ê支出并无啥大。假设入学率百分之28所代表ê入学儿童人数是18万名，án-ne，每增加10万名代表增加入学率百分之15（大约计算）。每一名每一年所开销准做是27日圆，为达tio̍h增加百分之15 ê入学率，每一年增加54万日圆，五年就án-ne增加2百70万日圆。

年份 增加ê入学百分率 指定用途之拨款 1930~1935 28~43 7,200,000 加2,700,000日圆
1935~1940 43~58 9,900,000 加2,700,000日圆
1940~1945 58~74 12,600,000 加2,800,000日圆
1945~1950 74~90 15,400,000 加2,800,000日圆
1950 90 18,200,000日圆（大约）

笔者tī以上ê表中表示，以20年ê时间，渐渐进行增加拨款hō͘ 初等教育，这会促进台湾儿童tī量方面ê提升，它ê入学率tùi百分之28增加到90，同时mā顾tio̍h日本学生量之增加，án-ne chiah ē-tàng一贯保持现今ê 98百分率。以上数字显示以一年日币54万圆ê金额等差级数增加20年，hō͘台 湾ê小学制度有台湾学龄孩童百分之90 ê入学率，以及日本人孩童为百分之98 ê伟大成果；而且hiah-ê无入学ê学龄儿童会koh khah容易被引进教育kho͘-á内，chit时，义务教育就m̄是理想，却是事实à。

依过去30年来国家之税收来判断，中央国库tī 1895年到1925之间，由1千1百28万2千2百65日圆增加到9千1百59万33日圆，大约每一年平均增加2百70万日圆。因为工业已经有非常发展，而且iáu有真chē成长ê可能性，因为án-ne，国家税收会继续增加。所以，为tio̍h促进初等教育，由中央国库负担每年所增加ê经费54万日圆，并m̄是siuⁿ大ê负担。日本议会认bat日本本地由地方税收支付所有成长中ê初等教育ê经费是无可能ê，因为án-ne，soah不时以补助金支持帮助地方税收所得。
Chit-má无需要大koh真贵ê校舍，小建筑物ē-tàng容纳额外ê注册人数，chiah是siōng迫切需要ê。当入学人数增加，thang kā chiah-ê建筑物扩大，chiah-ê紧piak-piak需要ê建筑物thang经由地方税收来供给。

四、中等教育ê问题
中学校ê情况kah小学校无仝，因为一般人假设后者是每一个学龄儿童一定tio̍h进入ê，m̄-koh，中学校to̍h无包含chit种假设，因为真chē人tī小学阶段了后就停止接受教育。凡若想beh受中等教育者，to̍h会期待一个有效ê教育制度，ē-tàng供给适当ê设备来容纳所有想beh受中等教育ê人，而且期待已经有充分ê准备进入中等学校ê大门。

Tī chit-ê岛上ê两个民族受中等教育ê机会，亲像第九章第一节ê图表，显示有1万名申请者，包括日本人kah台湾人，无受得tio̍h允准入中学校，只有3千3百46名入学；换句话讲，约有四分之三ê人被排挤在外。这koh一pái提供证据来证明教育行政机关并无充分改革，教育计划无法度tòe-tio̍h时代，而且落后tī既存ê需求远远。咱只要用一点点á时间思考，tī工业kah农业方面ē-tàng造成hiah-ni̍h大ê进步，就不得不对真慢ê教育脚步感觉 tio̍h惊。当局koh一pái宣称教育预算siuⁿ少，以及岛上提供教育ê学校数目siuⁿ少ê真正原因是欠缺资金。经济繁荣、台湾大企业ê崛（ku̍t）起kah继续不断增加ê贸易顺差，象徵有够额ê财政资源。

Tī中学校教育，两个民族之间机会无平等ê问题仝款存在。得tio̍h允准入中学校ê主要规定是通过入学考试，所以，认为申请者（应考者）tùi仝款小学制度毕业tī入学考试中自由竞争是理所当然。M̄-koh，入学ê比例无真平衡—日本人ê百分率是45，台湾人是16；咱thang探讨机会无平等ê理由。若是chiah-ê竞争剧烈ê考试是公平koh公开ê，这to̍h kah-ná是台湾人儿童ê智能真低，因为án-ne，soah in khah输日本人。M̄-koh，自由竞争kah智能以外ê因素可能引用tī解释chit-ê低ê百分率。 台湾受教育ê两个民族tī智力上ê比较，从来m̄-bat做过决定性ê实验测验 (注: 13)。 M̄-koh，咱有一kóa数字关系tio̍h旅日台湾学生ê情形，应该tī chia引用(注: 14)。

有807名台湾人学生tī日本teh读中学校kah中等以上ê学校，in lóng tī台湾接受过预备教育。Chiah-ê学生真明显表现koân度ê智能，因为in ē-tàng kah日本人tī入学考试上竞争，而且chiah-ê日本人lóng在日本本土受中等á是小学教育。Chia有前几年ê数字，显示台湾学生tī日本顺利通过入学考试并接受高等教育ê情形。Tī 1924年，有813名学生tī日本进入中等á是以上学校；tī 1923年，有823名；tī 1922年，有737名；tī 1921年，有622名；tī 1920年，有473名。Chiah-ê数字表示jú来jú chē ê台湾学生，tī日本展现in ê能力并接受koh khah koân ê教育。Tī 1925年，tī日本留学ê 8百名学生中间，有150名是teh读专科kah大学，并且tī各种专业中从事工作。Tùi以上数字真oh达成定论，m̄-koh，in确实ē-tàng反证台湾人ê智能比较khah kē路，而且无法度kah日本学生tī中等á是以上学校ê入学考试上竞争ê讲法。

既然智力m̄是低百分率ê原因，就一定tio̍h chhōe看māi其它因素。台湾学生有两种障碍。第一，是语言ê障碍，chiah-ê入学考试只使用日语。第二，chiah-ê儿童，虽然tùi仝一个制度毕业，而且chit-ê制度理论上提供单一koh仝款ê准备课程程，m̄-koh事实上，in所接受ê是无仝程度ê教育，因为台湾人teh读ê公学校，tī课程内容方面，低于（kē-î）日本人ê小学校。另外值得考虑ê事实是，日本人ê小学校课程确实为儿童应考中学校ê入学考试做准备工作。台湾人teh读ê公学校并无án-ne做。

其它重要因素mā有所影响。台湾人儿童beh进入中学校处于（chhú-î）不利ê处境，m̄-nā因为来自课程khah低浅、设备khah简劣ê学校，而且是公学校教员ê教育训练不及小学校教员。Tī 1926年，根据chit年ê政府报告，小学校教员有780位，其中60位无正式教学证书，to̍h是有百分之8.4 ê教员无合格。根据仝一个报告，5千153位公学校教员中间，有1千497位无教学证书，á是讲有百分之29 无合格。

Chiah-ê不利情况有泄漏秘密。事(tāi)先，台湾儿童因为校舍真kheh，而且设备不良soah受对妨碍。第二，上课时ê语言障碍非常严重。第三，对课程内容，台湾儿童不及日本儿童容易了解，结果造成对将来升学准备上ê困难。最后，tùi以上数字ê显示，公学校教员tī能力上khah输小学校教员。 虽然chiah-ê障碍tī某种程度上造成中学校入学率ê低落（kē-lo̍h），另外iáu存在一个疑问，是m̄是以自由竞争方式处理chiah-ê入学考试。虽然中学校宣称向凡若ē-tàng通过入学考试ê人公开，m̄-koh，大家lóng知影有一股强烈限制性ê力量teh运作。亲像历年来以日本人学生为主体ê中学校，有一个不成文ê规定，限制台湾学生人数tī百分之十左右，因为án-ne，不管chiah-ê学生通过入学考试，chit-ê百分率m̄准提高。传统上招收台湾学生ê中学校，mā根据仝款ê规则，并且随意裁定百分之十á是koh khah低ê入学率，这tio̍h看日本学生渴望入学ê chē少来决定。无论án怎，chit种障碍to̍h是无平等，in为日本人设有真chē中学校，总共34间；而且主要招收台湾学生ê中学校kan-taⁿ有10间。所以，这m̄是理论却是实践，有中学校明明是为tio̍h日本学生来设ê，有中学校专门为tio̍h台湾学生来设ê，m̄-koh，为tio̍h实行「共学」ê方针，hō͘两个民族ê其中之一，以一个小百分率—百分之十，á是tī chit-ê数字左右，准in进入中学校，虽然表面上无明显，像现chit种情形，实际上是维持种族歧视。这m̄-nā对申请入学者无公平，对hit百分之十得tio̍h允准入学者mā无公平，因为in属tī少数，tī实际ê教学中，个别ê差别to̍h被忽略，结果chiah-ê学生无法度发挥siōng kôan ê表现。 为tio̍h去除顶面所讲述ê恶法，tī几个城市，像讲新竹、基隆、高雄kah嘉义，只有一间中学校ê所在，应当设立另外一间中学校。当每一个主要城市lóng有两间中学校ê时，中等教育一定tio̍h维持种族上ê单一化，亲像小学教育一般。To̍h是，应该有一间完全为日本人设立ê中学校，一间完全属tī台湾人ê中学校。朝鲜ê教育制度tī中等教育阶段mā维持种族区隔制度。Chit种做法mā应该使用tī cha-bó͘-gín-á ê中等学校。为tio̍h教育ê缘故，chit种分离是需要ê，m̄-koh，应该促进互相ê了解kah合作。大ê社交中心hō͘大家自由聚集，各种俱乐部hō͘大家加入，像讲戏剧、演讲、音乐á是体育团体等等；hō͘大家参与ê旅行，mā仝款ē-tàng帮助giú近关系。所有ê入学考试应由中央政府来举办，而且无应该由中学校个别举办，并且应该考虑公学校ê课程内容，án-ne chiah ē-tàng避免因为课程ê差别所造成入学机会ê无公平。

五、高等教育ê问题
培养日本人ê领导能力ê政策，tùi一开始to̍h遵循。Chit方向有鼓励日本学生进入中等以上学校ê入学人数，相对有减少台湾学生进入chiah-ê学校ê人数，这kā咱引入去高等教育ê问题。统计数字ē-tàng显示以上ê问题。

学校种类 日本人人数 台湾人人数 1921 1926 1921 1926
高等学校 (1922)79 368 (1922)2 43
医学专门学校 93 123 343 168
农业专门学校 0 111 110 7
商业专门学校 132 243 187 76

Chiah-ê数字真清楚证明：Jú来jú chē ê日本学生接受高等教育，台湾学生却jú来jú少。可见tī台湾有某种大ê激力teh鼓舞日本人进入中等以上学校；同时mā存在某种障碍致使台湾人人数继续减少，造成chit种特殊情形ê理由是应当思考ê。虽然培养日本人ê领导能力ê原则并未公开设定，m̄-koh，tùi chiah-ê数字便thang追踪明显ê形迹。该原则甚至tī日本本地ê日本人lóng知影(注: 15)。Tī日本本地招集学生来投考中等以上学校，tùi台湾差派教师到日本本地主要城市像讲东京、京都、大阪kah福冈，hō͘ in入学考试，thang hō͘日本学生到台湾tī中等以上学校ê名额占领kah空空空(注: 16)。

因为大量日本人受鼓励进入中等以上ê学校，当地学生ê数目就减少。政府当局宣称台湾人投考中等以上学校lóng以自由竞争方式；若是录取ê数目siuⁿ少，he是因为chiah-ê学生无通过入学考试。Chit-ê声明tī某种程度上是tio̍h ê，因为开放学校hō͘日本人tùi日本各地来投考，hō͘ 竞争变kah真激烈，致使台湾人beh进入中等以上ê学校非常困难。

Tùi中等以上ê学校毕业ê台湾人，会发见tī家己ê社区beh得tio̍h有责任ê职位ê机会是非常狭ê。差不多所有政府机关ê职位随时由日本人毕业生所占领，本地毕业生无法度kā伊所受ê教育转做有用并且藉chit-ê理由来谋生。Mā thang án-ne讲，高等教育紧速ê发展并无完全符合本岛ê需要，造成「白领阶级」teh chhōe有资薪ê工作却无空位ê现象，hō͘人ê担忧增加，这是真实ê现况 (注: 17)。

商业学校、职业学校以及农业学校ê课程lóng应当修改来配合成长中ê工业，因为kan-taⁿ一味抄袭日本ê学校课程，soah忽略台湾实际ê需要。教育应当kah工业配合，chiah ē-tàng hō͘各种工业吸收所有毕业生去工作，这m̄-nā thang hō͘ 学生得tio̍h有报酬ê工作，而且ē-tàng hō͘ in kā实际所学ê去促进工业ê进步。Tī可能ê范围内，中等以上学校ê当地学生应当仝款充实有用ê训练，当in毕业ê时chiah ē-tàng踏入学以致用（ha̍k-í-tì-iōng）ê职位，并且参与一kóa责任性ê工作。

六、结语
经过调查，有一kóa问题ê实际解决方法已经分别显示列出来à，m̄-koh，建设性ê教育修正有成功á无，tio̍h依赖行政者ê教育态度，以及in tùi传统政策转变方向ê程度，to̍h是目前in ē-tàng认bat历年来ê变化，以及现阶段ê迫切需要，对决定将来教育内容ê基本原则，kā ē-tàng做有明智ê选择。

历史显示，tī台湾ê日本教育行政一直采取实验性ê态度，并且跟tòe帝国主义典型ê路线。它ê教育工作，一眼着手tī促进新殖民地ê经济发展，另外一眼促成hō͘ 台湾人民近代化kah日本化，来利便开发。事实上，当in一旦着手探chhōe原料kah工业发展ê资源ê时，就kah其它任何帝国主义国家所做ê就无明显ê差别。Chit-ê实验证实是成功ê。

教育方面仝款有惊人ê进展。差不多所有tī台湾ê日本gín-á lóng进入小学校，虽然台湾人儿童chiah有28.42 ê小百分率进入公学校，m̄-koh，咱iáu有hō͘人注目的开始，所有chiah-ê lóng tī短短ê 34年之间完成。日本真严肃teh处理kah教育有关ê ka-ia̍h ê工作。它设立一个制度，供给日本人kah台湾人受tùi siōng初等到siōng kôan等ê教育。Tī全岛推广真符合日用ê日语教育，用chit-ê文书kah日译ê近代作品以及经典，lóng tī真chē人ê接触范围内，chit种ê贡献，应当o-ló日本从事chit-ê大工作ê诚意。无论tó一种缺点á是矛盾ê出现，一部分是来自帝国主义本身ê缺点kah矛盾。

日本真有勇气宣称台湾人kah日本人仝款一定tio̍h受教育。它ê努力大大超过其他殖民列强，而且试探实行极端ê同化政策，假设台湾人民会放弃in家己ê文化koh用「日本文化」来取代，她已经发见chit种政策jú强调，当地人民ê民族情绪jú增高。

基于同化方针á是m̄承认chit-ê方针，固执继续发展教育；继续tī岛上培养日本人领导能力ê方针，soah违背in ê自由平等教育ê声明，á是培养台湾人民帮忙担起chit-ê岛屿ê责任—今á日ê日本处于（chhú-î）路ê分岔口，beh挑tó一条路来行？Chit种双重ê决定悬tī半空中jú久，就án-ne tòe leh而来ê问题就会变kah jú严重。

Chit项研究ê结果，咱达tio̍h以下ê结论：

1, 透过教育ê文化同化是一种无意识ê付出kah得tio̍h ê过程。一旦同化成做一方有意识kah片面ê强迫，kan-taⁿ会造成离心力ê反弹。Tī kui个台湾ê教育历史中，文化接触ê问题有提供真chē ê例。

2, 日本人kah台湾人民两者有本质上仝款ê文化，khiā起tī台湾，透过教育ê媒介，台湾人民基于互相尊重所衍生自然ê感情，主动hō͘ in接近日本人ê理想，透过互相尊重来得tio̍h koh khah koân度ê同化。

3, 建设性ê教育规划beh完全有效，它ê先决条件是一个支持教育机会平等ê政策。

一个教育计划ê施行，用有教无类ê理想做出发点，摒除（pèng-tî）极端ê同化，用尊重互相ê文化，并且透过教育来提高chit种尊重；这以外，互相重视大众教育kah扩展高等教育，thang好tùi两个民族中，提供生活中各方面ê领导人才，笔者就抱tio̍h大愿望，希望tī教育界建立一个实际可行ê实例，tī hit-ê种族ê差别被减到siōng少ê程度，á是用各界人士ê互相配合来取代，tī hia有一个伟大ê政策ê可行性被承认mā被接受，mā to̍h是，藉tio̍h探讨误会ê根源有智慧来运用权力，引chhōa殖民地人民ê运命，并且谨慎运用近代教育来建立精神上ê契合，to̍h是心灵kah思想ê契合。

注释
（1）数字引自Moon, Imperialism and World Politics, pp.558-566。
（2）引自Moon前引册，pp.558-566。
（3）Moon，前引册，pp.558-566。
（4）见图4。
（5）Moon，前引册 , pp.558-566
（6）见表35。
（7）总督府报告第二十五号 (1928)，页75一790
（8）见《台湾民报》第二六五期，1929年6月16日。
（9）1823年1月13日杰弗逊（Thomas Jefferson）hō͘ 卡贝尔（T.C.Ca-bell）ê phoe中ê话，见Jefferson and Cabell, Early History of the University of Viginia, Richmond, 1856, p.267
（10）见第五章第一节。
（11）见第二章第一节，kah《进步中の台湾》，页68、690
（12）见图4。
（13） tī 1926年，东京帝国大学阿部教授来到台湾，tī几个主要ê学校做智力测验，据作者所知，测验ê结果iáu未公布。
（14）见表37。
（15）见山川均，《殖民政策下の台湾》第三版，页63-77，东京，1926;
矢内原忠雄，〈帝国主义下の台湾〉，《国家协会》，第四十二卷，第九号，1928
（16）有一例外。台北商业专门学校，tī 1929年宣布bòai向日本本地chhōe日本学生，虽然tùi日本本地来ê学生会得tio̍h允准入学。
（17）东乡实，《植民政策と民族心理》，页222一226。