《林茂生博士论文》

 | | | 转寄

第五章 台湾教育令时期

作者 英语：林茂生, 华语：林咏梅, 台语：林俊育 2017.09.17

第五章 台湾教育令时期（1919年到1922年）

一）政治kah社会ê情况
1）武官总督统治ê结束 Tùi 1895年4月，清廷kā台湾chit-ê岛屿割让hō͘日本，直到1919年9月末。Chit-ê岛屿连续由八位军人总督统治，所有ê chiah-ê陆军á是海军将军lóng由民政长官辅助。Tī chiah-ê年内，引进真chē教育方案ê改革，chiah-ê改革中间，siōng引人瞩目ê是明石下村当政时期ê改革。经过24年长时期ê实验，终其尾tī 1919年1月颁布第一个教育令，具体编入对本地人确定ê教育方案，它ê发起人是明石总督，m̄-koh ，tī实行伊ê教育政策chìn前，伊tī仝hit年死tī任上。这是武官总督时期ê结束。

2）田总督划时代ê行政改组
Tī 1919年10月1日，田健治郎男爵，是一个出身文官ê政治家，继明石总督了后，出任台湾总督，这是台湾史上划时代ê重要大事。当田男爵总督出任伊ê职务ê时，得tio̍h有自由作风ê总务长官下村宏博士ê帮助（注：1），实行行政制度ê全面改革，是chit-ê岛屿史无前例ê，伊减少到taⁿ iáu有主要影响力ê中央集权制度，来利益地方ê自治制度。 照chit-ê改革，台湾总督tī岛上组成至koân无上ê政府机器，由总督执行，并由掌理总务局ê总务长官辅助。政府包括总督府官房kah四局：内务局、财务局、殖产局kah警务局。这以外，特别设立一个专卖局—递信局—中央研究所kah税关。以上chiah-ê机关lóng tī各自范围内处理政府ê事务。

为tio̍h beh达成地方施政ê目的，全岛分做五州（主要县）kah两厅（tī「州」之下，它ê地理范围khah细）。该岛ê西半部，人口siōng密集kah文明进步，设立五个州政府，to̍h是台北、新竹、台中、台南kah高雄，每一州设有州知事（首长）。东半部，包括文化落后、人口稀少ê地区，分做两厅，to̍h是台东kah花莲港（注：2），并各设一个厅长。五州koh分5市、47郡kah 260街kah庄。Chit两厅koh再细分做7个郡、2街、1座kah 19区。

Tī每一州、市、街kah庄，lóng设有协议会（谘问性质之议会）；州kah市ê协议会员是由总督任命；街kah座协议会员由各地方首长tī各自地区ê贤达中挑选。 讲tio̍h台湾总督，有一个附属ê台湾评议会，这是siōng kôan ê顾问机关，它ê议员由总督委派。Chit-ê议会ê功用是，对政府谘询ê问题表达公众ê意见。

3）田总督对「六三法」ê解决办法
Tī 1896年3月，文官统治代替武官统治。In认为台湾处tī一种特殊ê情况下，帝国政府当局认为需要授权hō͘ 总督，去发布有法律效力ê命令。To̍h是tī仝hit年3月30日得tio̍h议院ê同意，帝国政府随时颁布有顶面所讲ê功效ê法律第63号。Chit-ê法律有清楚ê附加条件：自生效日起三年有效，m̄-koh，一再继续得tio̍h帝国议院第13届议会、第16届议会kah第21届议会ê同意，得tio̍h延长。Tī 1909年1月，另外一法律「三一法」通过，tī议会ê下半届，kā权限tùi三年延到五年。Tī第27届kah第37届，第四pái同意chit-ê法律期限ê延长。最后tī 1921年，第44届议会中同意宣布一个新法律「第三号」，chit-ê法律实行到taⁿ。这是值得去概述实行中ê法律，kah 1896年ê「六三法」以及 1909年ê「三一法」重要ê无仝ê所在。直到1921年法律第3号宣布以前，所有tī台湾beh规定法律ê事务，原则上由总督以命令ê方式来公布，只有一kóa个别ê日本法律，认为thang适用tī chit-ê岛屿殖民地，就án-ne以天皇敕（thek）令颁布。1921年新法律第3号取消chit-ê原则，用敕令kā国内法律施行tī台湾，只有因为台湾ê特殊情况，一定tio̍h制定法律ê时，由总督颁布法令。以往，法律ê期限限定三年到五年，m̄-koh，chit-má却完全取消à（注：3）。

4）田总督ê统治政策
真chē研究殖民政策ê学者相信，田总督ê政治改革，是因为为伊ê统治方针ê结果，伊ê统治方针，换一句话讲，to̍h是「内地延长」方针，讲tio̍h教育方针，伊主张同化（注：4）。当1919年11月11日，伊以总督ê身分第一pái来到台湾，伊发表ê演讲词中，显示伊ê教育kah政治意向如下:
伊讲：「台湾是构成日本帝国领土实质ê一部分，当然是属tī帝国宪法统治下ê版图。无法度kah英国á是法国殖民地ê情况仝款看待，因为in kan-taⁿ是她ê本国政治ê策源地á是经济ê利源地。所以，对台湾ê统治方针，应当以日本帝国宪法做基础ê基本精神做出发点，所有ê施设经营，hō͘ 本岛人民成做纯粹ê帝国臣民；所有ê施设经营，是为tio̍h beh教化善导本岛人民，对我朝廷忠诚、对国家有义务观念。」伊koh khah进一步讲：「Tāi先，一定tio̍h尽一切力量hō͘ 教育普及化，一方面启发in ê智能kah德操。一方面hō͘ in感受tio̍h我朝廷ê抚育精神kah一视同仁ê圣旨。Hō͘ in醇化融合，ē-tàng直接kah日本本地ê人有社会接触ê地步。最后教化善导in达tio̍h政治平等ê境界（注：5）。」

无thang怀疑ê，chit-ê统治方针kah实现伊ê前任总督明石将军所发起并颁布ê教育令，有真重要ê关系。

5）台湾人民民族意识ê醒起来
若是咱认为过去十年hit阶段，是台湾人民对日本政府引进ê新文明表示敬意，咱thang讲，chit-ê阶段（1919年到1921年〉，当地人民ê民族意识已经被唤醒à，有展显in ê个性kah特色，chit时期是续落来大战ê结束。Chit-má想起来，固然台湾真孤立，新ê政治意义kah大战后真chē ê改变，tùi真chē来源传入chit-ê岛屿，并留落来深刻ê影响。台湾学生tùi欧洲、tùi美国、tùi其中国，kah大部分tùi日本本地，tńg来到in ê故乡，in带tńg来新ê民主精神。自1911年以来，中国一连串ê革命，对台湾人民有深远ê影响，in ê民族意识受tio̍h振奋。

6）社会kah政治ê改革运动
社会环境改善时期结束了后，全岛真chē运动纷纷起动，就是beh kā古老ê风俗现代化。早tī 1915年，cha-po͘人开始剪头鬃尾（国语ê「头鬃尾」），cha-bó͘-gín-á渐渐放弃缚脚ê习惯。到1919年。差不多所有ê cha-po͘人lóng已经剪掉头鬃尾， cha-bó͘-gín-á已经大量tùi缚脚ê习惯解放出来（注：6）。

知识阶级ê崛（ku̍t）起，主要包括留学tńg来ê学生，in无koh chheⁿ-mê跟tòe in祖先保守ê途径。In自由开放、直言无隐瞒、勇敢批评。In觉察现今政治kah社会环境结构ê弊端（pè-toan），in渴望去除chiah-ê弊端，in无满意田总督新政府ê结果，因为它无带hō͘ 台湾人民kah日本人平等ê khiā脚点。In无满意田总督努力设置ê地方议会，因为in ê议员m̄是由人民普选出来ê，所谓「自治」kan-taⁿ是徒有其名而已。所以，in开始政治平等运动，in tī东京议院前，为tio̍h自治á是「地方自治」提出请愿。这以外，in要求文化上ê平等，mā to̍h是，对日本人chit pêng ê文化ê认知，却m̄承认需要废止in固有ê汉文化，来由纯日本文化来代替，hō͘ 两种文化lóng受tio̍h正当ê认知，并透过适当ê教育管道并肩发展。后来in要求第三种平等，to̍h是经济上ê平等，hō͘ in ē-tàng kah日本人享受平等ê权利，去从事工业（注：7）。 就tī chit种情况下，tī 1919年，专为台湾人民制定ê「台湾教育令」颁布。

二）1919年ê台湾教育令

1） 教育令内容

第一章 总则
第一条 Tī台湾对台湾人ê教育是根据本令。
第二条 教育ê本义是根据有关教育ê敕语ê主旨做基础，来培养忠良ê国民。
第三条 教育一定tio̍h适合时代ê需要kah人民ê情况。
第四条 教育分做普通教育、实业教育、专门教育kah师范教育。

第二章 普通教育
第五条 普通教育注意身躯发育、施与德育、传授普通知识kah技能、涵养国民性格并普及国语为目的。
第六条 普通教育施行ê学校分做三种，to̍h是公学校、高等普通学校，kah女子高等普通学校。
第七条 公学校是hō͘ 儿童实施普通教育，并传授日常生活中必要ê知识kah技能ê所在。
第八条 公学校ê修业年限为六年，m̄-koh，根据学校所在地方ê情况，ē-tàng缩短年限。
第九条 公学校入学资格是七岁á是七岁以上者。
第十条 高等普通学校是施与男学生高等普通教育、传授生活中有用ê知识kah技能ê所在。
第十一条 高等普通学校ê修业年限为四年。
第十二条 高等普通学校入学资格是修业年限六年ê公学校毕业生，á是cha-po͘人有同等á是以上学力者。
第十三条 女子高等普通学校，施与女子高等普通教育、养成妇德kah教授生活中有用ê知识kah技能ê所在。
第十四条 女子高等普通学校ê修业年限为三年。
第十五条 女子高等普通学校ê入学资格是，cha-bó͘-gín-á tùi公学校修业年限六年ê毕业生，或是有同等á是以上ê学力者。
第十六条 女子高等普通学校thang设置实科，女子高等普通学校mā ē-tàng kan-taⁿ设置实科。实科ê修业年限是三年以内。有关它ê入学资格是由台湾总督决定。

第三章 实业教育

第十七条 实业教育是传授有关农业、工业、商业kah其它有关ê实业知识kah技能，并兼德性ê养成为目的。
第十八条 实业教育施行ê学校分做实业学校kah简易实业学校。
第十九条 实业学校ê修业年限为三年á是四年。
第二十条 实业学校ê入学资格为修业年限六年ê公学校ê毕业生，或是有同等á是以上学力者。
第二十一条 简易实业学校ê入学资格kah修业年限有关事务由台湾总督决定。

第四章 专门教育

第二十二条 专门教育是教授高等学术、技艺为目的，并注重德性ê涵养。
第二十三条 实施专门教育ê学校称做专门学校
第二十四条 专门学校ê修业年限为三年á是四年。专门学校thang设预科。
第二＋五条 专门学校ê入学资格，是专门学校预科毕业生、高等普通学校毕业生，á是拥有同等á是以上学力者。专门学校预科ê入学资格，是修业年限六年ê公学校毕业生，或是有同等á是以上学力者。

第五章 师范教育

第二十六条 师范教育在tī培育特别有德性涵养ê公学校教员人才为目的。
第二十七条 师范教育施行ê学校称做师范学校。
第二十八条 师范学校设有预科kah本科。预科修业年限为一年，本科为四年。师范学校设有修业年限一年ê公学校教员讲习所
第二十九条 师范学校预科ê入学资格，一定tio̍h是修业年限六年ê公学校毕业生，或是有同等á是以上学力者。师范学校本科ê入学资格是师范学校预科毕业生，或是有同等á是以上ê学力资格者。公学校教员讲习科ê入学资格有关事项由台湾总督决定。
第三十条 高等普通学校á是女子高等普通学校thang设有修业年限一年ê师范科，来培养自愿成做公学校教员者。官立á是公立ê实业学校，lóng thang设有修业年限一年ê师范科，来培养愿意成做简易实用学校教员者。高等普通学校师范科á是女子高等普通学校师范科ê入学资格，是高等普通学校á是女子高等普通学校ê毕业生。实业学校师范科ê入学资格，是实业学校ê毕业生。

第六章 补则

第三十一条 公学校、高等普通学校、女子高等普通学校、实业学校、简易实业学校、专门学校以及师范学校ê教科、编制、设备以及学费等有关规定，由台湾总督决定。
第三十二条 专门学校kah师范学校是官立；公学校、高等普通学校以及女子高等普通学校是官立á是公立。公立学校ê设立á是废止，由台湾总督认可。本令所提以外之特殊教育学校kah其它教育设施，包括私立学校kah教育设施ê有关事项，由台湾总督决定。

附则

1）本令实施日期由台湾总督决定。
本令施行ê时，已存在ê台湾公学校、台湾公立中学校、台湾总督府国语学校附属女学校、台湾总督府医学校，kah台湾总督府国语学校师范部乙科，根据本令，成做公学校、高等普通学校、女子高等普通学校、专门学校kah师范学校。

台湾总督府国语学校国语部，chit-má有学生在学期间继续存在。 本令施行ê时，已存在ê私立学校，暂时照往例管理。

2）明石总督开拆ê教育令要旨（注：8）
「台湾ê教育分做四种，to̍h是普通教育、实业教育、专门教育kah师范教育。普通教育ê目的是beh传授国语kah生活中bē-tàng欠缺ê知识kah技能。Tī女子教育方面，特别注重培养贞洁、顺良、温和ê美德。实业kah专门教育两者lóng以传授所必要ê学术kah技艺为主要目的。讲tio̍h师范教育方面，特别piàⁿ落全力tī品性ê陶冶kah国语ê熟练，án-ne chiah ē-tàng稳固普通教育ê资源kah基础。M̄-koh，对所有无仝教育ê根本大义iáu是tī德性ê涵养，因为án-ne，明确指示所有学校tio̍h以这做指标。･･･・为tio̍h beh hō͘ 师范kah普通教育成做国民性涵养ê来源，chiah-ê学校tio̍h完全khǹg tī政府ê管辖下。」

3) 总督府参事官鼓包美对教育令ê解释（注：9）
鼓先生对本地人kah日本人分开教育ê理由，以及对将来教育令ê改革发展有弹性规定ê演变，有真好ê解释。伊讲：「教育令存在ê理由，就是beh tī日本本地kah岛上ê日本人ê教育令（注：10）以外，特别为本岛人发展一个教育学制，原因是国语对本岛人是一个难关，新附民？洗身躯『皇化』ê时日iáu浅，因为án-ne，伊ê国民性ê涵养自然有koh样。M̄-koh，根据本令第3条，真明显显示本令ê内容ē-tàng『因适合时代ê需要kah人民ê情况』来修改。教育ê基础是道德教育，chit-ê方针tī普通教育尤其是女子教育上特别强调。同时，实业教育特别受tio̍h注重。」

三）1919无台湾教育令所引起ê改变

1）引言
事(tāi)先需要注意ê是，因为chit-ê教育令ê主力是针对本地人ê学校，日本人ê学校课程却一屑á都无改变，对chit点以后iáu会讨论。M̄-koh，根据chit-ê命令，自然有真chē为台湾人设立ê新学校，tī已经存在ê学校里产生真chē变化。

2）初等教育ê重组
照新ê公学校规则，公学校固有ê实业科被取消，soah用简易实业学校所代替，chit-ê简易实业学校通常设khǹg tī公学校里，却是一个独立个机构（注：11）。

3）中等教育ê重组
台湾教育令废除国语学校国语部，而且为男生kah女生ê中等教育新设立高等普通学校。Chit-ê时期以前to̍h已经存在ê公立台中中学校，被改为cha-po͘人高等普通学校；国语学校附属女学校变成女子高等普通学校。除了chiah-ê改变，两间女子高等普通学校新设立，一间tī彰化，设tī 1919年。一间tī台南，设tī 1921年。

4）实业学校ê重组
1919年根据敕（thek）令第69号，设立台中工业学校，chit-ê工业学校kah新规则mā保持一致。Tī台中设立一间新ê商业学校，tī嘉义设立一间农林学校。

5）专门学校ê新创设
Chit时期以前，为本地人来设ê唯一专门教育学校是总督府医学校。Chit-má chit间学校升级为医学专门学校。1919年，tī台北设立农林专门学校，tī台南设立商业专门学校（注：12）。

6）师范教育ê重组
台湾教育令废除国语学校，chit-ê学校bat是hō͘ 本地人师范kah中等教育唯一ê机构，tī台北设立师范学校实行师范教育。国语学校师范部乙科个课程成做chit间新师范学校ê主要课程；师范部甲科chit-má称做公学师范部（注：13）。根据教育令，一间新ê师范学校设tī台南，事实上是国语学校分校ê转型（注：14）。

7）「共学」教育ê试行（注：15）
Tī台湾，日本人kah本地人ê教育是分开ê，mā是有差别ê。总是，chit时期以前，隔离á是差别是理所当然ê，m̄-koh，自从教育令颁布以后，隔离成做正式ê，所以，tī法律上是无法度共学教育。虽然是án-ne，政府想beh看汉人学生kah日本人学生tī仝一个教室接受教育ê后果án怎。Tī 1920年1月8日，所颁布ê府令陈述：「若是学校ê教育措施无受改变，本岛人学生ē-tàng符合内地人儿童ê条件，thang许可in进入日本人学校来读（注：16）。」就án-ne，所谓「共学制」tī chit阶段开始实行（注：17）。

8）学校经费ê重组
因为教育令hō͘ 地方行政发生变化，致使学校ê经费重新分配。1919年以后，无论是日本人á是本地人ê公立中等教育学校，lóng由州政府设立kah掌管。除了教员薪水由国库供给外，所有ê教育费用由州税担当。日本人kah本地人ê初等教育学校由in各自ê市、街，á是庄掌管kah维持，chiah-ê学校教员ê薪水来自州政府ê财库。师范学校kah专门学校就án-ne kah以前仝款，完全由总督府掌管kah维持，国库负责所有ê支出。

四）Chit阶段日本人教育ê发展概况

1）初等教育ê发展
Tī 1918年，初等学校包括分校总共有120间；tī 1919年数目增到128间；tī 1920年为131间，下一年为132间，儿童ê入学数目kah出席率不断teh增加（注：18）。

2）中等教育ê发展
Chit时期有两间中学校，一间tī台北，一间tī台南。Tī chia值得提起ê是，台北中学校第一部tī 1920年完全废除，chit两间学校ê学生总共有1千2百30人。

3）女子中等教育ê发展
Tī chit阶段有四间日本人teh读ê高等女学校。1921年，chiah-ê学校有1千2百27名学生。跟tòe控制权由总督府转移到州政府，chiah-ê学校ê发展却无重大ê改变。

4）实业教育ê发展
Tùi顶阶段既有ê两间学校以外，现阶段并无koh再设chit类ê新学校。

5）日本人专门教育ê发展
Tī 1918年，为日本人设立医学专门部。成做tī台北既有ê本地人医学校ê一个单位。Chit-ê医学专门部有学院ê程度，它ê程度比本地人医学校课程小khóa khah koân。

Tī 1919年，tī台北新设立高等商业学校。Chit间高等商业学校是根据1919年敕（thek）令第61号kah仝hit年府令第62号设立ê。成立chit间学校ê目的是为tio̍h beh培养日本学生积极参与商业，修业年限为三年。中学校毕业生、台湾商业学校毕业生、日本ê甲种商业学校毕业生，á是有同等学力者chiah有资格入学。课程包括修身、商业文、英语、支那语á是马来语、商业地理、商品学、经济kah财政、南支那kah南洋经济事情、法律kah工业大意。

6）日本人ê师范教育
1919年教育令有关师范学校ê规则，只影响本地人ê师范训练，1919年3月24日特别颁布一个府令，制定内地人教员养成规则。根据法令成立两个师范部，一个是小学师范部，一个是公学师范部，chiah-ê师范部是台北师范学校ê单位，提供修业年限一年ê课程。中学校毕业生个年龄tī 17岁到25岁之间ê日本人，thang申请入学。小学师范部课程，在tī培养日本人成做小学校教员，教科目包括修身、教育、国语、历史、地理、数学、理科、图画、音乐、实业・体操kah台湾语。公学师范部ê课程，为tio̍h训练日本人tī台湾人teh读ê学校服务，伊ê教科目历史受删除以外，kah小学师范部个课程类似，m̄-koh，每一礼拜加三点钟ê台湾语课程（注：19）。

五）Chit阶段本地人ê学校发展概况

1）引言
因为新教育令ê影响，致使组织kah内容改变以外，为本地人来设ê种种学校，tī量方面有可观ê发展。

2）初等教育ê发展
因为台湾人父母chit方面渴望koh khah chē ê教育，以及因为in本身财力提高，tī chit阶段初等教育ê设施有明显ê增加。Tī 1918年年底，公学校包括分校，总共有394间，tī 1921年，数目增到531间。1918年入学学童数目为10万8千5百87名，tī 1921年chit-ê数目增到17万3千7百95名。学龄儿童ê入学率，tùi 1918年ê百分之15.71增加到1921年为百分之27.22，tī台湾教育史上，从来m̄-bat有过hiah-ni̍h紧ê成长（注：20）。

3）中等教育ê发展
Kah chit时期ê公学校紧捷（chia̍p）发展ê情况相对照，除了kā台中中学校ê名称改为公立高等普通学校以外，对台湾cha-po͘人ê中等教育差不多无进展thang讲。台中高等普通学校，tùi顶一时期to̍h已经存在，是唯一本地cha-po͘人teh读ê中学校，而且课程kah学生人数lóng无真大ê改变。另外一方面，女子ê中等教育却有大进步，tī 1921年年底，女子高等普通学校有三间，入学学生有605人。

4）本地人实业教育ê发展
本地人ê实业教育是由1919年5月所颁布ê府令第66号管理，根据chit-ê府令，修业年限延到三年。以嘉义农林学校为例，tī它专业方面ê科目以外，教科目iáu包括修身、国语、数学、物理kah化学、博物、英语、地理、体操。两门选修科目，to̍h是农业科kah林业科。由三年级ê男学生选修。1921 chit年，有177位入学学生。

台北工业学校，它ê前身是工业讲习所，它有六门科系，修业年限为三年。每一个学生tùi其中选一科，这包括机械科、电气科、土木建筑科、应用化学科、家具科kah金属细工科。1921年，有185位学生入学。 台中商业学校，它ê修业年限为三年，提供ê教科目包括修身、国语kah汉文、英语、数学、理科、历史、地理、商品、商业要项kah商业实践、簿记、经济、法规、图画kah体操。除了顶面所讲课程以外，iáu需要第二外国语言（支那语á是马来语）。1921年，学生ê人数为197名。根据1919年府令第48号，简易实业学校ê修业年限无超过两年。除了一般教科目如修身、国语、算术以外，实业科tī课程中真受重视。照各地方ê情况，tī下面个科目：农业、商业、工业kah水产中强调其中一项（注：21）。

5）专门教育ê发展
Chit-ê时期对本地人专门教育ê进展是真hō͘人注目ê，tī这以前只有一间学校，to̍h是台北ê医学校。Tī仝一个时期，成立两间短命（注：22）ê专门学校，he to̍h是台南商业专门学校kah台北农林专门学校。 根据1919年台湾教育令kah仝hit年ê敕（thek）令第62号，台北医学校高升为学院程度，koh为日本人设一间医学专门部。为本地人来设ê医科分做预科kah本科，修业年限为每一科各修四年。预科ê教科目包括伦理、国语kah汉文、英语、历史、地理、数学、博物、物理kah化学、图画、唱歌、体操（注：23）。本科ê教科目提供医学上ê专门科目。根据1919年府令第58号，新成立为期一年ê热带医学专攻科kah为期三年ê研究科，前者招收已经有医生执照ê学生；后者只提供hō͘ 本科ê毕业生（注：24）。

根据1919年教育令kah 1919年敕（thek）令第63号，来设立台南商业专门学校，这koh受1919年6月府令第84号ê制定。Chit间学校提供两种课程，预科kah本科，预科ê修业年限为三年。预科所组成ê教科目包括修身、国语kah汉文、英语、历史、地理、数学、理科、图画、唱歌kah体操。本科ê学科目包括修身、国语kah汉文、商业作文、商业算术、簿记kah计理、商业地理、商业历史、东洋经济事情、商品、商业要项kah商业实践、经济财政、统计、法律、工业大意、英语、支那语á是马来语、体操（注：25）。

依照1919年所颁布ê敕（thek）令第127号kah府令第83号，设立台北农林专门学校。它仝款有三年预科kah三年本科ê课程。预科教科目提供修身、国语kah汉文、英语、历史、地理、数学、理科、实科、图画、唱歌、体操。本科分做农业科kah林业科，专门科目只提供hō͘ 本科学生（注：26）。

6）本地人师范教育ê发展
1919年教育令kah仝hit年3月府令第23号，设定本地人ê师范学校ê宗旨kah规则。Tī chit时期有两间师范学校，一间tī台北，一间tī台南。修业年限延为预科一年kah本科四年。预科教科目包括修身、国语kah汉文、数学、图画、音乐、实科、体操。本科是修身、教育、国语、汉文、历史、地理、数学、理科、图画・音乐、实科、体操。有关统计请看第23表。

1919年教育令mā tī 女子高等普通学校里提供师范教育，为tio̍h án-ne，四年高等普通课程koh再加一年ê课程。M̄-koh，chit-ê师范课程只提供hō͘ 台北女子高等普通学校。教科目包括修身、教育、国语、汉文、地理、算术、理科、家事、裁缝、手艺、图画、音乐、体操。有关chit时期ê发展统计参阅第24表。
1919年到1922年之间教育制度

注释
（1）总务首长，通常称做「总务长官」，是代替以前ê「民政长官」名称。
（2）以前澎湖是属tī高雄州辖ê一个「郡」，chit-má成做一个独立「厅」，kah其他两「厅」同格。
（3）见台湾总督府，《进步中の台湾》（台北，1926年〉，页25-27。
（4）矢内原忠雄，《帝国主义下の台湾》，「国家协会」第42卷第9号，东京帝国大学，1929年9月。
（5）抄译自吉野秀公，页369,370。
（6）Chit-ê风俗ê改变起因tī大陆发生变化ê影响，比同化教育ê影响khah大。比较阿诺（Arnold)ê描述（1908年）án-ne讲：「讲tio̍h接受日本人ê习惯，本地ê学生是有往chit-ê方向ê明显表现。M̄-koh，因为家庭ê影响，一定会强烈坚持，尤其像汉人有强烈ê家族意识ê人，iáu-koh留头鬃尾，穿汉式衫裤。本地gín-á因为家庭kah周围环境是正港汉式ê影响，而且本地学生mā m̄ kah日本gín-á往来，因为日本人有为in特别设立ê学校，这hō͘人bē-tàng怀疑ê是，这需要真chē年以后，chiah会有任何接受同族以外ê习惯ê影迹。」（见・Arnold,p.40.)
（7）见矢内原忠雄，《帝国主义下の台湾》，第五章。以及山川均，《殖民政策下の台湾》，束京：Prebus，1919年1月4日。
（8）引自1919年2月1日明石总督ê谕告第1号，见吉野秀公，《台湾教育史》，页385、386。
（9）见吉野秀公，《台湾教育史》，页383一385。
（10）Chiah-ê法令是为tio̍h日本本地ê日本人教育来颁布ê，因此来影响tī台湾ê日本人教育。
（11）见表19。
（12）Chiah-ê学校hông称做「专门」，它ê标准kah美国ê初级学院（the junior cohlege）仝款。
（13）见第四章第三节。
（14）见第四章第三节。
（15）「共学教育」tī chit篇论文里并无意思beh讲是两性合校教育，却是两个民族ê教育，mā to̍h是日本人kah台湾本地人tī仝一个学校受教育。若是tī日本kah台湾有男女合校，情况真少。Tī极偏僻ê庄脚低年级班上可能有，m̄-koh，iáu是真少。
（16）统计请见第19表。
（17）见第五章第三节。「共学教育」ê实际后果，田总督描述如下：「我hō͘符合日语条件ê台湾人ē-tàng进入纯日本人ê小学校，已经得tio̍h非常真好ê后果，对咱ê同化政策有phah算bē到ê好ê影响。」(Hayden, pp.471, 478.)
（18）见表1。
（19）见表23。
（20）统计见表2。
（21）统计见表19。
（22）讲in短命是因为为in只继续三年to̍h hō͘ 1922年颁布ê教育令所废除。
（23）为本地人设立ê chiah-ê专门学校ê预科课程ê内容kah程度，kah高等普通学校相差无几。
（24）统计见表20。
（25）统计见表21。Chit-ê学校主要是收预科ê毕业生以及高等普通学校毕业生。
（26）统计见表22。Chit-ê学校主要是收预科ê毕业生以及高等普通学校毕业生。