《林茂生博士论文》

 | | | 转寄

第一部 绪论 第一章 导言

作者 英语：林茂生, 华语：林咏梅, 台语：林俊育 2017.08.20

一）引言

西元1895年，日本人拥有台湾chit-ê岛屿，它距离日本本土有六百英里。Tòa tī chit块土地顶面ê台湾人民是汉人kah少数ê土着（注：1）。新统治者真紧to̍h认bat chit块土地有丰富ê资源，koh着手kā它开发。同时in mā着手学校教育制度ê设立，学校教育制度ê设立ē-tàng助长in ê计划；严格讲起来，学校教育制度ê设立是chit-ê岛上前所未有ê。三十四年来，in照in所认为siōng有效能达成目标ê方式，来从事chit项工作。

今á日咱认为台湾真繁荣ā，而且教育以真大ê幅度teh成长，并提供一套完整ê求学体系—tùi小学到大学。虽然有真chē问题产生，m̄-koh，行政者tī探求解决中，造就今á日ê教育制度。日本试探chit种困难ê工作是值得o-ló ê。

二）教育民主理念ê假设

教育问题是任何所在lóng存在ê，因为条件时常teh变迁，教育to̍h需要修正。教育背后有一项基本ê要素，当问题产生ê时，教育者ē-tàng详细观察了后kā它解决，chit-ê要素就显现出来。笔者并无预备tī chia讨论近代教育理论ê基本要素，而且认为世界上所有主要ê国家，民主ê精神充满tī教育是受公认ê。Chit种精神试探向外扩散，并尽伊所ē-tàng ê来施益tī人，因为án-ne，soah带来社会ê团结kah改进（注：2）。

三）台湾ê教育问题

简单来讲，教育问题是教育行政者ê专制kah大多数人民普遍ê民主诉求互相冲突ê结果。因为这是一个殖民地教育问题，它ê特殊性格集中tī课程ê选择，并且环se̍h（华语ê「环绕」）tī文化ê接触顶面，像讲输入新ê风俗、礼仪，以及语言来思考，soah m̄是在tī一般性教育问题ê基本特性上。当行政者试探来kā kan-taⁿ ē-tàng óa靠伊ê民族ê标准提升到伊认为适宜ê水准ê时，教育问题一定变成koh khah复杂kah具体。

四）台湾kah其他国家教育问题ê比较

当咱面对文化接触面ê教育问题ê时，台湾有一种奇异ê特徵，这kah存在tī其它殖民地国家ê问题无lóng仝款。Tī台湾，日本人是行政者（统治者），á台湾人是hō͘ 统治ê人民。Chit两个民族ê文化性质无差别，in ê文化程度mā无gōa大ê无仝。Tī殖民地事务上，tī法国á是英国对in ê非洲殖民统治地关系中，á是荷兰人kah in东印度公司ê殖民关系中，咱chhōe bē-tio̍h对比ê情形。以chit三个国家ê情形来讲，统治者所有ê文化，m̄-nā tī程度上，tī性质上kah in ê属地mā是有差别ê。台湾ê情况mā无法度kah英国人tī印度ê情况相类比，因为咱虽然无法度武断宣告英国kah印度之间tī文化程度上ê高低，m̄-koh，咱tio̍h承认in ê文化tī性质上无仝。讲tio̍h美国kah菲律宾ê情况，咱有介tī两者之间ê例，tī程度kah性质上有某种程度ê差别。对美国ê乌人情况，真oh提出一个thang对应ê例。Tī chit-ê个案ê例里，一个族群若是in bat有某种文化，却已经背离它并已经进入白人ê文化—而且用chit-ê模式来定型。这以外，肤色ê障碍已经是一个特殊ê问题，m̄-koh，这是tī咱讨论范围以外ê。

咱来概略审视世界，却chhōe bē-tio̍h一个情况kah台湾特有ê例来对应。虽然咱粗略处理chit-ê题目，咱m̄相信koh khah彻底ê研究ē-tàng提出一个互相符合ê对应。有可能siōng相近ê是亚尔萨斯・洛林（Alsace Loraine）ê情况，tī hia，法国人kah德国人拥有仝款性质kah仝款程度ê文化，in做厝边tòa做伙，tī历史ê演变中更换in ê统治者而已。讲tio̍h文化ê接触情形，台湾kah韩国差不多完全仝款，m̄-koh，因为tī仝一个帝国体系内，无法度产生有效ê比较。

五）日本文化kah台湾文化ê共同点

如顶面所叙述，占人口百分之九十五ê台湾人是汉人，同时负起教育者责任ê统治阶级是日本人。两个民族之间拥有文化类似ê所在，lóng有继承大陆ê文化遗产。In ê书写语言、in ê思想kah习惯，以及in ê道德kah宗教lóng ē-tàng追溯（sok）到仝一个渊源—汉文化kah一般ê东方文化。Tī chia有一个真无平凡ê情况，一阵有古老传统kah伟大文化遗产ê土生汉人，to̍h是台湾人，受来自有仝一个文化渊源ê少年民族所统治。Chia无肤色ê障碍、无无仝ê思考方式、无无仝ê行为准则，甚至表面上看起来，chit两种人ê外表真类似。

日本人mā一屑á都无疑问，真清楚chit种共同点，in mā了解tio̍h就án-ne来讲，文化ê接触是真容易建立ê。Chit种接触ê基础án怎是真重要ê，因为它影响tio̍h教育。

六）日本tī台湾ê教育政策

Mā可能是日本仰赖外国ê殖民史做她统治台湾ê指南，因为这是她第一pái ê殖民经验。以下是她可能采取ê政策。事(tāi)先，mā是siōng普遍ê政策，to̍h是kā殖民地当做殖民母国经济压榨ê对象。这意思是讲in忽视被统治ê人民，并塑造in习惯来服从，来成做达成殖民政策目标ê自愿代理人。西班牙kah葡萄牙tī美洲、大英帝国tī印度，以及荷兰tī爪哇，lóng采用chit-ê政策。另外两种政策比以上所提过ê koh khah进步，to̍h是同化受统治ê人民以及hō͘ 受统治ê人民自治。前者听讲tī法国ê殖民地真时行（kiâⁿ），后者hông看做是大英帝国殖民地ê进步趋势（注：3）。

日本虽然起初m̄承认，其实是已经着手极有包涵性ê同化政策，并且kā chit-ê政策应用tī教育体系。当teh拟定教育计划ê时，chit种政策to̍h是主导方针，因为固执ài tī教育中实施同化政策，soah引起冲突。

七）研究ê目标

研究ê目标，事(tāi)先是对教育制度本身、发展ê过程kah发展ê主导方针做历史性ê概述; 其次，分析教育活动华语化冲突以及和谐ê原因kah影响，并chhōe出建设性ê改善之道。

八）资料

Chit份研究有两种主要ê资料，to̍h是文献kah个人ê观察。主要ê文献包括〔1）台湾政府ê教育报告，(2）以及主题有关ê书籍、杂志kah通讯，(3）关于种族kah文化问题ê一般文献，以及（4) kah台湾教育情况有关ê其它国家ê教育报告，像讲朝鲜kah菲律宾ê教育报告。讲tio̍h个人ê观察，乃是笔者十几年来所进行ê，tī chit期问，笔者是台湾公、私立学校从事教育ê工作者，mā是知识阶层ê文化运动ê一位领导者。

九）有关参考书籍

有关台湾ê书籍kah杂志是tùi真chē类型ê作家所写ê。(1) Chit类ê作者往往是见闻无深刻ê旅行家，in bat tī chit-ê岛上停留两礼拜á是小khóa khah长一点á，以个人ê观察，koh再借助tī thang利用ê资料来扩充伊ê观察来而写完成ê。Chit类ê册若是由有能力ê作者来写并安插大量相片ê解说，当然是会引起旅行书籍读者ê兴趣，m̄-koh，总括讲起来，这m̄是学术性ê，无够做本研究ê参考资料。（2）第二类书籍ê作者，由某一kóa机关所雇用去发展特定ê观点。Chit类册一定会有偏见ê、片面ê，而且有误导性ê。总讲一句，in ê资料来自政府ê档案，伊ê正确性是无憢疑ê，m̄-koh，细节是经过作者详细挑选，来支持预想ê观点。Chit类册thang归类做宣传ê书刊，用做参考资料ê时tio̍h谨慎审查。(3）第三类ê作者往往是外国领事、seng-lí人kah移民，in tòa过台湾，对当地ê情况有真实ê了解。Chiah-ê人ê贡献是真有价值ê，因为无偏见ê个人观察，kah有历史研究ê才能，会写出一本公正ê好册。(4）第四类ê册是由传教士写ê，in tī chit-ê岛上居留一段真长ê时间。因为居留期间kah岛上真chē社会团体有密切ê接触，作者常常供给广泛（hoat）koh丰富ê资料。Koh khah值得提起ê是，chiah-ê作者thang得益tī前任传教士收集而存留落来ê资料。M̄-koh，大部分ê册对礼仪kah风俗有详细ê记叙，对政治kah社会ê情况就写kah真少。（5）由过去á是chit-má ê领导阶层所写ê本地资料lóng是真有价值。Chiah-ê书籍á是文章，tī精通汉文á是日文，并有够额英文能力ê脚手中，若是ē-tàng以无偏袒koh公平ê态度，若谨慎kā它选择，会提供m̄是凡响ê背景，并呈显出chit-ê主题ê真实情况。

我tùi chiah-ê资料，加上政府ê报告，详细选择我ê书目资料。kah以往仝款，我以个人一生ê经验引chhōa我做选择，并对chit项工作有大大ê帮助。

虽然附上书目具备对chit-ê主题ê角度有关ê资料，其中只有一本英文册直接处理chit-ê问题。Chit本册是阿诺（Julean H. Arnold）ê一篇专论 “Education in Formosa”（中译：《台湾教育》），tī 1908年由华盛顿内政部教育局出版。虽然这写tī二十一年前，笔者认为有所受益koh心存感激。M̄-koh，因为当时ê教育iáu是tī未开发时期á是过渡阶段。因为án-ne，chit本册虽然差不多已经命中问题ê核心，m̄-koh，因为年代ê关系，它ê帮助有限。另外一本册ê题目是《台湾教育史》，由吉野秀公以日文写tī 1927年，它供给ê丰富资料是值得感谢ê，m̄-koh，chit本册比较欠缺对文化问题ê提示。因为入手资料ê欠缺是一个限制，它致使笔者tī chit份教育研究中，tio̍h十分谨慎处理每一个细节，变kah koh khah重要à。任何tùi日本册上引来ê章句，chit篇论文ê笔者担当翻译是m̄是正确ê责任。

十）技巧ê使用

笔者kā试探来ê lóng无偏见来呈现所有ê事实，所使用ê技巧是利用历史kah分析性研究来呈现自古到taⁿ教育发展ê过程。无仝文化ê接触来引起ê现象、造成冲突ê原因kah后果，以及教育致使一种共同文化所扮演ê角色，chiah-ê lóng靠社会学ê调查、观察、描述、归纳kah诠释ê技巧，然后探讨趋势，并估计影响chit类趋势ê各种力量ê功效。第三，用比较方法所做ê严格评估，会用来做出结论，并对台湾目前ê教育问题，提出可行ê解决方法。

十一）一般背景
为tio̍h beh hō͘读者koh khah了解chit项研究ê重要涵意，笔者增加一章关于台湾ê历史kah地理ê背景。Chit章提供读者有关chit-ê岛上所有明显ê消息，像讲过去到chit-má ê政治、社会kah教育状况。M̄-koh，免讲这m̄是chit项研究ê主要部分。所以，包含tī chit章里ê所有资料比其它各章khah欠缺原始性。

十二）Chit项研究所预测bē到ê结果

Chit项研究是由纯粹ê学术观点做出发点，笔者无法度mā无想beh去预测chit项研究ê价值á是结果。M̄-koh，当我列举事实并做出结论ê时，若是ē-tàng hō͘日本人kah台湾人民ê问题明朗化，若是有kóa国家因为有类似ê情况存在， ē-tàng就chit项研究得tio̍h一kóa消息，若是chit项研究ē-tàng帮助行政者对将来教育方面ê努力，m̄-nā tī台湾弯岛上，mā tī中国大陆kah日本本土，hō͘两个民族有koh khah密切友谊ê精神，笔者当然是kā对chiah-ê phah算bē-tio̍h ê价值kah结果，感觉满足。

注释

（1）Tùi chit-má开始，「台湾人」（"Formosan People"）chit-ê名称，主要是teh指当地ê汉人，台湾四百万住民中间，in占百分之九十五。当提起土着ê时就用「蕃人」（"savage"）chit-ê名称。译者按：「蕃人」原文作“say-age"，有伊ê时代背景，tī日本文献中，tī台湾称汉人以外ê土着为蕃人。Tī译文中改用「原住民」叙述，除非需要引用日本官方所使用ê名称。

（2）Tī chia，民主精神ê意涵是「民主ê原则要求竞赛中有平等ê起点，同时期待结果无相一致ê终点。」见Croly, “The Promise of American Life”, p.181, NewYork,Macmillan,1914。

（3）见矢内原忠雄ê《殖民政策の新主题》，页338一340，东京，1928。Tī chit kui篇论文中，「同化」chit-ê位词是用做表明一种政策，chit-ê政策ê「目的在tī强迫它所控制下ê原来ê住民去接受母国ê文化、语言及制度。」（见R.L. Buell, “International Relations”, p.358)