《苏老师 ê 台语教室》

 | | | 转寄

阿母ê绿豆椪

作者 吕籽蓉 2023.11.19

阿母ê绿豆椪
今仔日是中秋佳节，天气真凉爽，一早起，阮ê里长伯送来hō͘阮一ki足好食
绿豆椪ê中秋月饼，beh感谢阮做邻长拢有帮伊斗做工课，绿豆椪是阮阿母
在生ê时上佮意食ê口味。伊讲he是阮阿爸kā i送定ê大饼经过70冬阁记牢
牢，虽然伊离开阮已经两冬外，看着物件，阮ê心肝仝款hiah-nī疼tiāⁿ-
tiāⁿ会想着阿母ê形影。

十年前阮ê厝边一寡老大人，chhōe无几ê人，后生惊伊无伴就kā chhōa去
阿莲新起好ê安养院，hia有足济老人伴ta̍k工会当hō͘伊足快乐趣味过日。
hit阵82岁ê阿母心肝内足无想beh去又koh看着chiah-nī用心友孝ê安排，
歹势拒绝就勉强tòa两冬。安养院hia对阮阿母这个老大人精神siuⁿ好，出
头足济真歹配合「其实伊较爱tòa tī家己ê厝内 !」煞变成安养院头壳痛ê
人物，伊是足无爱tòa安养院，伊讲安养院像teh关犯人无自由；阁看着有
一寡人hō͘人pa̍k跤pa̍k手诚可怜，就一直吵beh转来家己ê厝tòa，阮就hām大
兄参详，阿母伫hia逐工bē欢喜，咱kā chhōa tńg来家己照顾，兄哥in
mā ài上班足无闲，一寡亲chiâⁿ拢有建议讲我这一世人无嫁ang，这就是
上天安排ê使命，beh来照顾老母ê啦。阮嘛感觉真有道理听人讲这世人会来
做一家伙，是顶世人修来才有ê缘份，若m̄是报恩，就是来报仇，想着细汉
阿母kā阮疼命命，这马是阮爱来报恩ê好时阵，这马无做以后就无机会ah
啦!会记有一条歌m̄通爱等好额才beh接阿母来tòa，阿母已经无tī ê趁阮这
马阁有能力一定爱把握，机会若失去，这世人永远就拢无ah，好，好，阮
就决定beh来接ê任务，kā兄哥大姐讲，我会当顾阿母，逐家拢足欢喜，一
直kā我感谢，呵ló这ê小妹足有心。

Hō͘阮想tio̍h较早，有答应阮阿爸要kā阿母顾hō͘ sù-sī。阮tio̍h kā 40几
冬ê旧厝宅阁开百几万请人来翻修hō͘好势，就会当kā阿母chhōa转来，阿母
一听着会当转来厝，欢喜甲笑bi-bi，阮阿母ê身体足好，伊讲细汉ê时阵，
阮外公田园足济，伊嘛足做--ê。所以操了有够勇。自从伊搬转来家己厝，
就像生龙活虎像hō͘人放出笼kāng款。Ta̍k工透早就gia̍h椅头仔tī门口埕曝
日头，唱着好听ê日本歌，mā会教阮足济古早歌，阮mā定定ē去参加比赛，
若有着奖拢讲是伊ê功劳，伊若欢喜着hō͘阮一个足爱答喙鼓！阮阿母ê单田
足有力，定定hō͘厝边ê人听甲足爱笑掠做阮母仔囝teh冤家相骂，我拢讲he
是teh练功夫，阮若无tiāⁿ kah伊讲话，头壳会ē退化ē变戆呆i嘛讲这是有
影ê代志，足济老人拢无kah人讲话沓沓仔变痴呆失去记tî。阮阿母足好
喙，足爱讲笑话，若tú着厝边ê人tùi阮门口经过就讲bē煞，有当时害人bē
赴转去煮饭，阮就问伊会喙焦bē?讲Kah喙角全波，有足济朋友诚欣羡阮有
一ê chiah古锥ê阿母。

阮阿母食甲九十二岁彼冬，有当时讲有看tio̍h阮外妈，有当时看tio̍h阮阿
爸，阮拢讲伊是teh陷眠，in早to̍h无tī这ê世间。有当时kā阮讲我对伊诚
好，后摆ē kā我保庇，阮拢讲，a-lí-á-to͘h，阮ê亲族内底你上好命，后
生查某囝拢tī身边照顾，就爱ke食--几冬，有一工，阮ê目睭皮chhoah甲
足利害，有一种无好ê感觉亲像有代志beh发生，暗顿去叫阮阿母食饭，煞
叫bē ìn声，安娘喂啊，ná会按呢，ná有可能咧?拄才有teh叫阮，明明一
个好好人tī hia困，较紧联络兄哥、大姐转来，救护车mā来啊，医生摸伊ê
脉讲阮阿母已经无气，恁有急救--无?阮ê心肝一时痛kah哭bē出来！无相信
这是真--ê，葬仪社ê人kā换寿衫囥tī厅头，等明仔载医生开证明，阮规暝
无困款he物件。隔透早七.八点，慈济ê师兄师姐来助念，每一点钟阁换


2.30人，相连sòa 8点钟加起来百外ê人，阮有够感动--ê，隔天佛光山.冈
山讲堂ê主持师父嘛𤆬来4~50 ê师兄师姐来助念！这是阮大姐结来ê善缘！
ta̍k家拢chiah有心，足感恩--ê，阁看tio̍h阿母ê面色足安详，比在生ê时
较好看，听大嫂讲：ta̍k家来助念ê回响，阿母有得tio̍h，讲阿母足有福
报，真无简单！我嘛kā大兄大嫂感恩，这是in做慈济足济年所结来ê善缘，
阮二兄in狮子会长𤆬bē少人来告别式捻香，花篮花箍双爿排规路，阁有国
乐团ê演奏声，有够气派ta̍k家足呵咾阮阿母真好命，才ū这种场面，阿母！
这就是你这世人ê功果！阿母！天气沓沓仔转寒，阮有送你足济媠衫爱ē记
得穿哦！

阿母你上爱食ê绿豆椪有kā你chhoân--出来拜足好食，母仔ôe无你tī阮ê身
边诚bē惯势，阮ta̍k工拢吼甲行bē出去，雄雄m̄知beh按怎，阮兄姐、阿嫂
in讲我已经kā你照顾甲足好，叫我爱放下，爱振作起来mài按呢阿母ē m̄
甘，ē行bē开kha，用讲--ê较简单beh做是真困难。今年阮有去松年大学读
册学tio̍h足济物件，in拢对我真好请你放心。希望后世人我会当阁来做你
古锥ê囡仔，hō͘你疼惜，大汉kā你iú-hāu。阿母阮beh感谢你，有你ê辛苦
付出hō͘阮生活无烦恼食穿，阁会当去帮助别人ありかどう。阮足爱你，这
句话是咱母仔囝tiāⁿ对讲ê心内话！eng-àm月娘特别光，想着阿母心着
酸，孤单一人赏月光，厝边烘肉芳贡贡，足想beh食m̄敢讲，想着家己有够
戆！啊！无聊ê中秋暗暝啦！

吕籽蓉 中秋暝