《苏老师 ê 台语教室》

 | | | 转寄

记tī头壳碗ê故事

作者 钟兰英 2023.11.26

记tī头壳碗ê故事 钟兰英(我是客家人teh学写台文)
讲着美浓镇竹山沟，真济人tio̍h会讲，竹山沟有一欉真大欉ê檨仔，边á有
一间土地伯公(客家人ê福德正神)。听人讲，hit欉树仔足老ah。我细汉ê时
bat问过阮阿公，伯公树几岁ah?阿公讲：经过几代人ah，至少200外岁
ah。伯公树ê树kho͘足粗勇。阮细汉ê时，定定几个囡仔手牵手，围着伯公树
ê腰，做伙唱童谣，唱一遍koh一遍。tú-tio̍h外面起风ê时，囡仔随冲到伯
公树跤抢lak落ê檨仔。目只有金金看着黄gìm-gìm koh饱tīⁿ ê檨仔lak
tī涂跤，这时逐个目睭足利，跤手紧，相争koh刺激。伯公kah大树互相做
伴，互相倚靠，大树陪伯公，伯公保庇大树，一日koh一日一年koh一年。

有时阵透早起床，为着beh去伯公跤khioh檨仔，檨仔是当时阮爱食ê物件。
阮细汉ê时，囡仔定定tī伯公跤sńg chhit-thô物仔，大人tī-hia答喙
鼓，讲人ê闲仔话。钟家、曾家ê伙房（家族）有人生囡仔、有嫁娶、农作
物丰收、卖大猪、囡仔考着好学校、揣着好头路，一定爱chhoân牲礼祭拜
伯公，紧kā好消息报hō͘伯公知，感谢伯公ê保庇。伯公树到今将近300岁
ah，koh枝叶旺盛、果实济济，实在无简单。伯公树饲我大汉，伯公保庇我
日日平安。我爱伯公爱大树，祈愿伯公kah大树互相倚靠，世世代代bē分
开。