《台文通讯精选》

 | | | 转寄

我beh学客语

作者 江盖世 2006.04.09

「江先生，你写hit篇『我ê台语生涯』真趣味！」

这句话，是我tī美国巡回推动「1995年百年建国运动」，有一kóa同学或者同乡定定kā我o-ló ê话。因为hit篇文章，bat tī公论报kap自立周报刊过。

「恁讲简单简单一句“趣味”，敢知影he是我十几年来ê心路历程。」每一摆我心内lóng按呢teh想。

＜漂撇ê台语＞

我读建中ê时，内心歧视「台湾国语」，我读台大ê时拚命学卷舌ê｢北京话」，我入去党外阵营ê时，我觉醒：「我是台湾人，为甚物我bē晓讲漂撇ê台语？」

所以，以后规年，阮hit班ê同学拚命teh读「拖福」ê时，我真认真teh学台语。1991年，独盟事件入狱。诗人阿仁来鼓励我：「趁这阵á好好练写台语。」Chit-má我会晓讲、会晓写，虽然m̄是真gâu。

回想éng过，tī台大读册ê时，一kóa中南部ê查某同学，明明会晓讲台语，soah颠倒坚持一定beh讲北京话，为甚物？「惊台湾国语ê腔，会hō͘人笑lah！」这就是国民党歧视台语所造成台湾人ê自卑感。

但是，我chit-má所知影ê台大学弟学妹，受台语文运动ê影响，情形soah无仝a。

「这个赞！台语真gâu讲！bú学运ê，一上台á顶，台语siah-siah叫，赞就是赞！」这种观念ê改变，虽然来了有khah慢，我犹原是足欢喜ê。

＜刘慧真ê启示＞

今年热天，我kap一阵青年朋友，tī新店乌来办一摆「台湾青年歇热研讨营」。会中，有一位学员，叫做刘慧真，伊是师大客语社ê社长。有一摆 ī讨论ê中间，伊讲，伊beh用客语来讲，请伊ê男朋友卢诞春当场翻译。

「Ôa，原来客语慢慢á听，mā是会tàng听bat六、七成，koh hiah-nih súi ....，hmh，我也beh学。」我一面听一面teh想。

研讨营结束进前，我就kā刘慧真讲：「慧真，我决定beh好好来练客语，半年了后请来验收我ê客语程度。」「好a，半年后看你ô͘!」伊笑笑á回答。

＜四界chhōe录音带＞

但是我话讲了siuⁿ过头紧。

Beh学语言，上紧ê方法就是录音带。台大附近ê册店，我一间一间去chhōe。「对不起，我们没有卖客家话录音带。」Chhōe无真m̄甘愿，我四界拍电话问人，结局，人kā我报：「你去长老教会总会chhōe邱善雄牧师。」Chhōe tio̍h这位客家人牧师，伊足热心ê，替我chhōe两套客语录音带，一套是「约翰福音」，一套是「启应文」。

「真好，我会使好好á练，希望我ê『客语生涯』真紧就会tàng成功！」

可惜，这套m̄是一般ê日常用语，是圣经经节，我听起来有khah食力。有时听kah会tuh-ku。这hō͘我真感慨：「为甚物tī台湾ê市面上，有俄语、法语、德语、日语....甚至广东话ê录音带thang学习，thái会无客语leh？国民党垄断ê媒体，koh真少有客语节目，hō͘ beh学ê人轻松就得tio̍h机会来学....」

＜我ê客语之望＞

我希望有一工，我会使用客语来读报纸，来kap苗栗庄脚ê阿公阿婆用客语开讲，来用客语讲「咱beh出头天，台湾ài独立！」

这个望，tang时会成真？「好好á练，我一定会成功ê！」我按呢不时teh kā家己鼓励。