《台文通讯精选》

 | | | 转寄

来去Hawaii结婚！

作者 陈柏寿 2007.09.16

『Gokekkong Omededogozaimas! 』主持婚礼ê牧师照英文字母念了，结婚结束啦！公司准备ê超大型ê limousine停tī门口; 一批出去，另外一批入来。入来到出去，前后bē超过30分钟。

「Hawaii是山明水秀，人杰地灵ê好所在，充满着Romantic ê气氛。」Che是作日本生理ê结婚公司tī各地报纸、杂志，甚至飞机顶ê电影ê广告。莫怪日本青年旧年有七万对tī海外结婚，其中七成以上是来Hawaii结ê｡有人讲东京都有23区，Hawaii是东京都ê第24区，专门hō͘人结婚用ê。

顶番我有写一篇『啊那无欲啊那！』描写来Hawaii生活趁食真无简单。但是这种「结婚公司」是百业萧条中ê「一枝独秀」，发展真紧，无人通比。是本地上盖好经营ê大企业。

公司hak有真chē 2/30尺长ê超大型轿车。Hit种车tī纽约kap东京真少有，若有，就是黑社会大lô͘-môa ê标记车，普通人真少坐。 Tī Hawaii，这种车是用来载新娘、新郎ê专用车，内底是阔bòng-bòng,排一kóa假花，二人坐tī内面，感觉真大pān,驶tī路顶，一只车占二、三只车ê路面。Hawaii ê人已经习惯这种光景，kap这种车共存生活。

公司差不多是无本生理，买空卖空，纯服务业。经理是专门去登广告，chhōe顾客ê线路。另外就是Limousine司机、摄影师、专门唱Hawaii歌ê歌手。另外就是专门kā人结婚ê职业「结婚牧师」kap专门kā人弹结婚进行曲ê职业「结婚琴手」。

因为是专门结婚ê职业牧师，所以日本话无必要会通，kan-nā 照字母念ê「证婚辞」念会通，就有饭好食。这种牧师大部份拢无teh牧会，只要去州政府登记一个号码，就有资格。亲像teh看病人按呢，半点钟完成一对，有一日结婚十外场ê牧师，「生理」会使讲真好，收入mā真koân。

若是会晓弹琴，尤其是弹管风琴ê人，来chia是真好，因为真需要这种职业ê琴手。礼拜日尤其是琴手欠人。每一场ê婚礼拢弹仝款ê曲，一日若弹十摆，一年就弹几千摆。所以in是控制结婚式时间ê主脑，in若弹khah紧，结婚典礼就khah紧完成。结婚公司ê琴手一般弹琴拢弹真紧，新郎kap新娘着三步作二步行，亲像机器teh行路。

另外结婚公司拢有安排一位在地ê查某人来唱Hawaii ê「结婚祝歌」。用本地原住民ê词kap调。无人听有伊是teh唱啥，调mā无清新ê气味，有时仔hō͘人感觉去葬式唱khah得当。

想起来mā真可怜：咱作父母ê,kā in chhiâⁿ大汉啦，taⁿ遇着娶嫁ê人生第一大代志ê时，in soah来「离乡背井」，去到一个青疏ê所在，tī一间青疏ê建筑物，tī一位完全无熟悉ê青疏ê牧师ê面前，依赖一位心灵已经麻痹ê琴手kap歌手，完成in ê「人生大事」。

因为结婚公司真欠会晓讲日语ê牧师，所以真chē人来邀请我做这种头路。有真chē摆我去见习这种婚礼，看着牧师若hoah讲：「新郎、新娘入场，亲人朋友请起立！」ê时，只有我kap hit位驶车ê司机khiā起来，全教会拢空空无人。牧师讲：「亲人朋友致谢词！」mā拢无人出声。我ê心肝头，看着hit二位青年ê面，着chat起来。

我想起古早细汉tī古坑溪边厝庄ê日子。若有啥物家庭beh结婚，十日前、八日前全庄tō拢知透透。一年前tō「送定」，全庄各口灶拢食人ê大饼。结婚hit日，全庄ê人拢出动，gín-á tī街仔路走来走去，办桌mā拢占大路街仔办，无人敢讲话。全庄ê人为着hit对新人欢喜。

阮gín-á 人拢tòe tī新娘轿ê后面，沿路走沿路hoah：『新娘súi当当，裤底破一空，后壁爆(pōng)米芳，爆一下新子婿无头鬃！』面拢lu入去轿内，偷看新娘外súi!新娘beh离开亲父母，一边欢喜，一边悲伤，mā有新娘teh流目屎ê。但是人人拢知，he是一种幸福ê目屎，因为伊有亲成五十、朋友七十、厝边隔壁一百ê祝福。 是按怎tī人生上盖重要ê结婚礼典ê时，将家己父母、亲成、朋友放弃一边，离开草根大汉ê故乡，来到这个青疏ê Hawaii呢？ 是m̄是结婚典礼已经m̄是啥物「人生大事」呢？是m̄是基督教ê人文思想，已经将原本真重要ê圣礼典ê一种，世俗化作有也好无也无要紧ê仪式呢？

有人讲tī日本故乡结婚着开500-1000万日圆ê费用，负担bē起，所以来Hawaii。一、二千kho͘美金就会tàng解决。实在讲起来，我tī日本庄脚，结婚真朴素，但是真有情，mā m̄免开啥物大钱。「钱，无应该hō͘人作心灵形骸化ê藉口。

Hawaii已经有真chē大间教会，周间租人作结婚专用ê场所。结婚公司企业化，mā建真chē小小ê教会tī海边，hit种教会真súi，但是无人teh作礼拜，只有专门hō͘人结婚，连礼拜早起mā teh结婚。 In唯一ê理由是：Chia ê无信主ê青年来「教会」结婚，就有机会来接受福音。这种讲法，就是最大ê问题。In beh结婚以前，toh知影一、二千kho͘ hō͘这种结婚公司去处理，就一切ok。In心目中对教会ê第一摆ê印象，亦就是第一大ê误解，就是用「钱」ê目睭来看教会，用世俗ê眼光来款待教会ê圣礼典。

Hia ê暝日轮流teh「处理」结婚典礼ê牧师、司琴、歌手本来是面对着一对心灵上敏感，内心上充实，上热情ê青年。但是因为结婚典礼ê职业化，双方面ê心灵自动化仪式化，完全无法度达到结婚ê美丽、净化、心灵ê提升、心灵ê誓约ê境界。莫怪大部份这种青年tī典礼完成，踏出教会门口ê瞬间，mā kā教会讲「 Sayonara！」啦。

我相信这种「时行」无jōa久一定会传染去台湾。台湾ê青年男女已经开始有人成群结党来去Hawaii结婚啦！我做一位台湾教会ê牧师，苦劝恁m̄-thang来。恁若真正hiah-nih爱来chia结婚，mā m̄-thang交hō͘「结婚公司」去处理。恁thang kap本地唯一ê台湾教会连络，但是ài先kap我有一个约束：提早几日到位，我beh kap恁好好讲道理、准备心;认耶稣基督作恁两位一世人ê救主、受洗礼。然后我才会欢喜kā恁主持恁ê结婚典礼。M̄免钱。若无这种ê觉悟，请恁一定tī家己所疼ê故乡，完成恁ê人生大事。