《台文通讯精选》

 | | | 转寄

台湾人ê心灵鸡汤

作者 阿秀 2007.06.03

一个大学时代ê老朋友，十几冬无伊ê消息。有一日tī internet ê台文网路遇着，伊无大改变，除了写中文改做写台文，伊犹原tī新竹teh做电子工程师。

选举期间，伊支持阿扁a，情绪high到上高点，tī新竹地区，为阿扁a khiā台、giú票，hit暝伊mā tī中山脚球场。我mā支持阿扁a，我kā伊讲：「对政治人物，我拢bē-tàng全然相信，政治是一时ê，文化才是久久长长」。无想到，伊回批讲：「Chē chē台湾人，不时teh烦恼股票沈大海，目睭看出去，拢是花花蕊蕊ê世界，心bē定，行bē顺，文化两字敢会tàng提来做槟榔担á ê看板？」

无外久，伊koh送一个E-mail来，讲，朋友相招，in beh翻译台文ê「培根论文集」，问我敢会使翻译其中ê几篇。我虽然无时间，但是我真肯定为台文尽心出力ê人，只是我问伊：

(1) 有外chē人看过中文ê「培根论文集」？
(2) 有外chē人肯读台文？
(3) 有外chē人有可能来读台文ê「培根论文集」？

M̄是kā in泼冷水，咱付出精神kap时间，mā ài想咱推广台文ê市场性。

北美洲有一本册叫「Chicken so͘p」，我知影tī台湾有翻译本叫做「心灵鸡汤」，销路非常好。当然这本是好册，但是背景无仝，文化无仝。台湾人应该ài有家己ê心灵鸡汤。无定咱会使试看māi，kā chia ê翻译ê时间来写也好，收集也好，用台文出一本台湾人ê心灵鸡汤，由心起造。心若定，方向若正确，就bē去烦恼股票沈大海，bē受花花蕊蕊ê世界影响，文化也bē单单是槟榔担ê看板。

选举会使用激情，但是beh有合理ê社会、文化ê社会，ài一步一脚印，bē tàng亲像开票，七、八点á就知影阿扁a当选。「台湾人ê心灵鸡汤」，咱大家来加油。