《台文通讯精选》

 | | | 转寄

一生ê回想

作者 李刘鸾 2007.03.18

我tī 1904年出生tī台南市元月境街，我今年已经满90岁，感谢上帝特别ê祝福kap照顾，hō͘我心神健康。

我ê阿爹是刘大粒，阿母叶巧，我九岁ê时老母去世，我是排行第三ê女儿。父母真早tō信主，是一个基督教ê家庭，我只有一个兄哥，细汉ê时kap小妹去太平境教会读主日学，老师是高候清连，就是高俊明牧师ê母亲。后来，我读东门女学校，koh进入新楼女学校，就是现今ê长荣女中。我四年毕业后，就帮忙父亲ê店务一直到媒人来提亲。

Hit时我已经二十岁了，对方是一位读台南师范第一届ê毕业生，是屏东万丹ê人李志传。因为伊在学ê时成绩优秀，所以留tī本校附属公学校担任教学。我ê父亲疼爱女儿也有去探听，媒人chia̍p-chia̍p来讲，tùi年头提到年尾，就成了。一方面志传也去请问伊ê老师林茂生先生，伊ê老师kā伊赞成讲：『这只鹿á m̄-thang hō͘走去』，伊就安心了，按呢有缘就成婚，tī 1924年12月30日结婚。婚礼是万丹教会ê高笃行牧师主持ê。

婚后，阮有真美满ê家庭，志传tī附属任教六年满，就去日本深造，读东京帝国音乐学院。伊非常爱音乐koh有天份，毕业后，hō͘教授留tī本校做助教，然后升做副教授，暑假ê时转来台湾，chhōa阮母kiáⁿ去日本世田谷中原，tòa kúi-nā年。

在异地想起故乡有年老ê母亲需要有孝kap照顾，所以就回台，对hit时开始，tī屏东高等女学校教学，总共有十六年久，也升做高等官，亦有做真chē曲。光复后，伊担任屏东高女ê校长有三年久。然后去台北市政府担任督学。Tī台北ê时，特别组织教师交响乐团，热心教育。伊tī教育界五十外年ê贡献，到65岁退休后，tī台北岭头台湾神学院担任音乐主任。

阮拢总有四男六女。大kiáⁿ tī日本横滨读医大，现在tī东京自由丘开业妇产科医院，tī东京神教会事奉。二kiáⁿ tī台北一银总行就职30外年，差不多beh退休了，现在tī台北仁爱教会。三kiáⁿ是日本福岛读医大，现在tī福岛开业外科、胃肠科医院，也tī福岛市基督教会做执事。五kiáⁿ tī多伦多SPAR公司就职20外年，现在tī多伦多基督徒之家事奉。大女儿以前tī台北和平国中教28年，现在已经退休tī 多伦多。二女以前tī屏东女中就职真chē年，现在tòa多伦多，tī联合教会事奉。三女师大毕业后tī大同中学教音乐，现在tī美国印地安那州ê白人教会事奉。四女儿师大美术科毕业，tī台北市女中教美术，现在tī明尼苏达双城教会事奉。五女铭传高商毕业，前在育达商业专科教银行会计，现在tòa多伦多，tī联合教圣歌队。六女台湾大学医学院毕业后，去美国罗镇市，前在梅友医院就职九年，现在夫妇tī查经班kap白人教会事奉。

Tī第二次世界战争ê时，物质欠缺，疏开去旧寮乡下，我hō͘毒蛇咬tioh，生命危险，佳哉无死，感谢上主ê保护。我也勤种菜、果子、木瓜、kin-chio、han-chû等等拢有，当时是何等辛苦，但是总讲一句，感谢上帝ê照顾阮拢平安。

阮注重kiáⁿ儿ê教育，tùi细汉来认bat主，大汉chhōa弟妹去hù主日学，有相疼，有规矩，因为主ê教示，胜过一切，阮心就平安，现今每家庭ê人拢khîn-tiâu tī主，che是上帝特别ê祝福kap恩典，阮感谢无尽。 Tī 18年前，我ê丈夫忽然心脏发作去世离开阮，我非常伤心，不知如何。但是一切拢是主ê旨意，我beh the̍h出勇气，有主ê安慰。圣经教示咱，你若忧闷，着爱祈祷，你若欢喜，tio̍h-ài吟诗，万事交托主，ài用诚实ê心，主会替咱开路。

这次联合教会tùi 94年1月30日开始成人台文班kap罗马字来学习台湾语言，特别请吴医师tī百忙中，tùi汉米顿来指导大家。虽然我对罗马字是本行，但是我beh率先做青年人ê榜样，我也参加。咱应该热心来学习，m̄-thang hō͘ bē记ti̍t咱ê母话，做一个台湾人bē-hiáu讲台湾话，kiám-m̄是真làu-khùi，我简单想起一点á来写，多谢，大家平安。

注：本文原刊tī 1994年6月多伦多台湾同乡会会刊「多城通讯」。李刘鸾女士是台湾民谣「咱台湾」作曲者李志传先生ê夫人。伊对人亲切温柔，记持真好，是咱台湾人典型ê母亲，tī多伦多真受大家ê敬疼，拢叫伊「阿母a」。