《台文通讯精选》

 | | | 转寄

静静ê回想 -- 怀念王育德先生

作者 陈柏寿 2006.02.26

每摆暗暝静静teh回想，台湾人iáu未记载tī历史册ê反抗史，一幕一幕冲激tio̍h我心ê海岸；想tio̍h过去二、三十冬来，台湾人一波过一波，一直teh牺牲，无怨叹，无反悔，为tio̍h反抗中国人ê统治，死mā甘愿。这款精神hō͘我体验tio̍h台湾文化ê中间第一高贵第一纯洁ê一面。过去ê代志虽然亲像白云tī蓝天teh飞；淡淡ê色彩tī koân koân ê所在，一蕊一蕊一直去，jiok mā jiok bē tio̍h，但是每摆想tio̍h chia ê时，心内冲激真大，想爱大声hoah出来，目屎禁bē tiâu。但是每一摆我lóng kā目屎吞落去腹肚内，嘴齿根咬hō͘ ân，tō变做力量。

最近有一项代志hō͘我听tio̍h真艰苦心，是有关台湾独立建国ê路中一位真伟大ê老师王育德先生ê代志--讲啥物王先生透底m̄-bat提起叫大家oa̍t-tńg来使用教会罗马字。(王教授m̄是教会人士)

Taⁿ我有需要kā这幕静静ê回忆讲出来，这是iáu无人teh整理ê「台湾白话文运动史」其中足重要ê一幕。希望我án-ne做，会tàng提供一面镜，送hō͘目前充满本位主义，看本身ê台语作品、研究、字典、发明..khah赢过台语文化ê死活ê台语界。

Hit年我会记得是1985年，世台会tī东京附近ê Hakone举行。开会前几个月王教授tō无暝无日做导演，训练阮几位用台湾话演剧；伊ê 要求真严，教阮咬字发音，一点á to bē使chhìn-chhái。我iáu会记得伊叫我演一个「台独份子」，两撇嘴须，戴一顶乌帽á，讲话真有力，m̄惊国民党teh九怪。

Ta̍k摆排演了后已经是半暝三更，因为阮厝离伊ê厝真近，所以两人lóng做伙坐thakhusih tńg去，但是ta̍k摆伊落车前一定beh先付钱才落车。伊疼惜后辈，m̄是kan-na用嘴讲，是用伊ê全生涯、全牲命ê实际行动来表现hō͘你知。

大会ê 主日礼拜因为我是司会，所以我有拜托好朋友Yoyogi (代代木)教会ê张清庚牧师来讲道。我看台á脚坐约有chiâⁿ百个人，王育德先生mā坐tī hia。张牧师ê讲道是正港ê一流súi，koh有真强ê台湾精神。讲道了后，无想到王教授突然间tùi椅á顶khiā起来，我khah紧请伊起来台á顶讲。伊开嘴ê第一句tō讲：「我m̄-bat听tio̍h chiah-nih súi ê台湾话讲道，我ê心内感激不尽！」接落去伊soah讲出伊对台湾人ê文化战场中ê一句真重要ê话，(对我来讲tō是一种宣言)：「我一世人总共构想台语ê标音法大概有七种，但是今á日beh kā大家讲一句话：请恁kā我一世人所构想发明ê物件，lóng kā in放bē记得，大家lóng koh oa̍t-tńg来使用咱教会一百外冬所teh通用ê教会罗马字！」

虽然无外久以后，阮hit阵流浪日本ê台湾人，tō用目屎送别这位深深受人敬疼ê老师tńg去上帝hia，王先生每一句教示阮ê 话，特别是伊tī大会所宣布hia ê话，深深留tī 阮ê心内；伊虽然tiām-tiām-á离开阮，亲像天顶ê云，静静á tī hia teh飞；但是想tio̍h伊ê话，伊ê谦卑，伊为台语推广ê需要，甘愿放弃家己一世人苦心设计推广ê台语标音法，每摆想tio̍h伊为tio̍h大局，牺牲家己、否定家己ê真正宽宏伟大ê精神，我ê心tō亲像一阵风台时ê海涌，禁bē tiâu大声beh háu出来。

最近蕃薯诗刊有刊一张王育德先生在生亲笔写ê批，tī这张批ê内面王育德教授表示伊放弃伊家己发明ê台语标音法，请大家使用教会罗马字。听讲有人对这张批ê真实性有怀疑，我感觉我有责任kā我亲身经过ê这幕写出来，hō͘大家对王教授这种看台语ê前途比家己ê台语研究koh khah重要，为大局放弃家己设计ê文字系统ê精神，有清楚ê了解。我看这种无私ê表现，是最高贵ê台湾人精神。

阮纽约台湾卫乡教会聪美纪念基金会按25期开始，beh承担「台文通讯」发行人ê责任。出tī对乡土ê疼，阮全教会ê兄弟姊妹beh用全精神，一点一滴来灌沃这khu台湾文化ê田园：经营「台文」变做阮人人ê心血，mā是阮这间小小台湾人教会一项真重要ê使命。阮一定beh用「疼心讲诚实话」，坚持「有疼心啥物long2m7惊」ê精神，kap有心ê台文作者、读者手牵手、心连心，勇敢向前行。