《台文通讯精选》

 | | | 转寄

枫树叶á ê心事

作者 胡民祥 2006.07.02

Tī山谷溪墘，有一片枫树林，枫树满山坪。枫树将根钉tī 山谷kap溪岸，树根钉tī山坪，in食山坪谷地溪边ê土水。阮是枫树林身躯千千万万ê叶á，枫树是阮寄生ê siū，透过枫树，溪谷山坪是阮生湠ê本土，tùi树根到树枝，tī 枫树ê身躯，细细ê毛毛ê水管满满是，细水管送阮按根来ê水，tùi土运来阮心爱ê矿物质。

阮ê叶á有孔，细毛细毛ê孔，细毛ê孔真有本事，in专门食空气中ê废气：二氧化碳。Tī阮每一片叶á，叶绿素工厂一间连过一间，一排过一排。阮ê叶绿素化工厂，见光就运动，in利用日头光能源，将矿物水kap二氧化碳转化做枫糖汁，人类ê生物学家讲阮是进行「光合作用」，制造淀粉质，koh叫做醣类。

阮所以欢喜制糖，有kóa是为着报答枫树ê恩情，感谢in送阮水kap矿物。枫树靠阮提供ê糖汁，春夏拍拚订根、添枝、抽长。In每欉树身变成粗勇，直径大到一米外，身长lò lò，有三四十米koân，身躯胖胖，有二十外米阔。热天时，阮枫叶盖满满，日光hō͘阮吞了了，日光透bē过，枫树下变kah真荫凉，鸟á爱来歇，膨鼠来chhit-thô，鹿á来坐，有时人来纳凉话仙。阮有分享ê本性，太阳光射着ê天生万物拢是兄弟姊妹，tio̍h-ài共有共享共生湠。

阮糖造了有够chē，tùi冬天尾á到隔年春天，阮分kóa hō͘印地安人食甜。当然，koh khah重要ê，是阮后代kiáⁿ孙抽芽生叶ê本钱。靠着阮存tī枫树身躯ê糖汁，春天若来到，阮ê kiáⁿ儿纷纷探头。阮枫叶á生来一定双双对对，叶阔koh平，叶分叉，三到七叉不等，每叉面顶有水管脉，看起来若像人类ê指头á。

阮生做súi súi优雅，春夏色致乌青乌青，秋天若来到，我会为枫树穿红杉，戴黄帽á，换柑á色ê手套。阮将溪谷山坪抹kah红葩葩，súi kah若点胭脂ê少女；风若吹起来，阮是流浪ê吉普赛姑娘，热情风火，大跳西班牙舞，花红洋装四界飞。人类o-ló阮是天生一流ê画家。加拿大民族选阮做in ê国徽，阮顺势飘入in ê国旗，in是阮心爱ê枫á民族。阮选加拿大做枫糖出产ê大本营。

阮枫树叶á亲成朋友，兄弟姊妹chē chē，有百外种族，北半球ê温带气候ê地区阮拢有生湠。Tùi北美北欧到亚洲大陆，到西太平洋群岛，拢有阮ê形影。日本枫á叶幼幼á，分叉五爪，青青红红，秋天来ê时，色彩加重定点。南回归线顶ê美丽岛屿也有阮ê姊妹兄弟，in生tī高山地区，岛屿东部有一个「红叶庄」，就是用阮叶á做庄名，是南岛语族台湾原住民族ê部落，in出过有名ê红叶棒球队，in将东洋来ê日本野球队，拍kah东倒西歪。红叶队掀起七十年代美丽岛小学生拍棒球ê风潮。美丽少棒队年年来到阮枫叶世界ê大本营北美洲，威风猛猛，横扫世界各地来ê球队。

除了枫族近亲，阮也有其他ê表兄姊，生tī无仝款ê草木蔬菜，分散世界各洲陆地，溪湖海kap群岛。Chē chē ê远亲朋友，kap阮仝款食土lim水，收废气，借日光制造百百款，千万种ê醣类。植物学家讲是淀粉，亲像芋á、蕃薯、稻á、土豆、瓜á。阮造糖，无污染环境，无生态破坏，颠倒koh会释放人类万物生存ê要素：氧气。阮是高明ê太阳能专家。

若是讲着能源转化，人类是阮ê对手。人类ê能源专家，大手笔开发资源。人造化工厂制造化学品，可惜连带放毒气；火力发电厂生产电力，可惜连带制造酸雨。能源浪费部份大，回收部份少，副产品拢是问题物品，代价有够大。亲像头前提着ê「红叶庄」ê美丽岛屿， 就是一个典型ê例。人类tio̍h-ài好好研究，好好思考，好好学习阮叶á ê本事。

目前美丽岛屿ê沟á水掠无鱼，蚵á中毒发青，岛民呼吸恶浊ê空气，暝日困tī便所边，每顿食农药菜。这款ê岛屿敢会有将来？岛屿顶阮枫á兄姊看了mā为in流目屎。这个红叶队ê故乡，四百年前，西欧ê航海家去到东洋，经过亚洲大陆东岸ê海峡，看着日出ê方向，有一座森林岛，tùi海边到koân山，树木青翠，花草满平原。岛上飞鸟鸣叫，羌鹿规群出游，猴阵满树林，石虎á狐狸来来去去，山猪熊豹出入，鱼虾龟鼊满溪水，南岛语族群过着桃花乡ê乐畅日子。

十七世纪，西欧人，亚洲大陆移民灌入来，若海涌。短短四百年冬，平地森林消失，koân山树林chhun无几欉。听阮美丽岛ê枫á兄弟ê传报，岛上过去二三十年来，常常小khóa就淹大水。因为，阮ê远亲尖叶族规片规片消失，山变秃头，tú着大雨，水土无法度保留，kap雨水总拚落山，淹过平原出海去。Tī in古都，原本有阮ê表姊妺凤凰树，为着拓宽街路，规排规排总chhò了了，失去古都ê 诗情景致。Tī in浅山名间乡地区，数百年ê老樟脑树，也是一排一排消失，让hō͘公路。

世界各地kap美丽岛屿仝款ê所在chē chē，算bē了，拢是因为人类大部分m̄知阮树á kap树林是好宝。唯一例外ê，是美洲ê印地安人，in是阮ê知己，in知影阮ê本事，in kap阮共存共生湠，in分享阮ê糖汁，in采阮远亲松子渡腹肚，khioh ta树枝起火，抵抗寒冷ê冬天，in bē像现代工业化ê新人类，chhò森林制木材，树林一大片一大片失踪，hō͘阮失去siū，失去乡土。无阮，人类敢tio̍h有将来？

阮树叶á真爱kap人类做朋友，人类kap万物hō͘阮二氧化碳，阮回送氧气，互相依óa，m̄-thang相害，tio̍h-ài做伙生活生湠。阮爱乡土，人类讲阮是落叶归根入土，确实有影。一方面是阮思乡ê本性，一方面是报答乡土ê恩情。阮落土烂，滋养乡土，也是为着代代kiáⁿ孙ê生湠。

阮是枫树叶á，阮生tī溪谷山坪，阮爱生活ê乡土，阮出生双双对对，生成súi súi优雅，阮是永远ê枫树叶á，代代tī山坪溪谷生湠，阮是永远ê枫树叶á，向望快乐ê日子。