《台文通讯精选》

 | | | 转寄

暗时ê后窗

作者 杨照阳 2006.06.11

阿草伯每一摆若讲着伊ê阿良，伊就掠狂；m̄是因为伊卖二分祖公á留落来ê财产hō͘伊读大学，毕业了后koh卖二分地hō͘伊去读硕士、博士leh m̄甘。伊是leh气in kiáⁿ kā伊讲，tī台湾做助教、讲师升到教授ài真久，不如hō͘伊去外国the̍h博士，转来就升副教授，会khah紧出头天。

Ná会知影得着统计学博士以后，观念总改变。伊讲美国教授kā伊讲，有一个大型研究计划需要伊留落来。伊讲tī NASA太空总署内底，teh研究人造卫星飞行路线不断修正，飞行中真chē可能kap无可能发生ê代志。虽然che m̄是真深、真新ê研究问题，但是需要真chē新人去发现新科技、新ê飞行工具种种ê新问题，ná知影koh过十外年。阿草伯脚khǹg tī长椅条(liâu)，嘴连干kiāu，伊讲饲kiáⁿ m̄知影有啥物路用，伊总是食台湾水kap台湾米大汉ê，食果子mā ài拜树头，伊转来台湾做乞食，mā khah赢tī美国teh好额。

Tī半年前，阿良有拍电话转来，伊讲beh退休转来tòa台湾故乡，这摆m̄知有影无,...。阿良有讲伊chit-má是地球村ê一份子，伊是世界公民，科技是无国界，讲真chē大道理...阿草伯a愈想愈气，阿良根本就是芎蕉(黄皮肤，白人思想) 。阿草伯真感慨leh讲：「你看，tī大熊星座kap小熊星座下脚，hit粒北斗星，咱看会着，上盖光，koh永远kā出外人kap行船人指示北方ê方向。」

这时我注意着闪tī 阿草伯目睭ê光线，m̄知是远远星光ê反射抑是伊ê目屎。伊oan-na讲，oan-na继续看远远暗暝ê星：「阿良就亲像一扇台湾ê后窗，讲重要伊m̄是足重要，m̄-koh伊会使供给台湾通风kap光线。但是，我期待伊是一个奉献者，ná亲像一个大门。对一间孤魂厝来讲，门ê贡献khah chē,亲像恁tòa tī台湾teh拍拚ê人拢是一扇一扇ê门，阿良会使算是暗时ê后窗niā-niā。」

阿草伯册读无chē，我听kah花花。阿草姆a坐tī边a teh泡茶hō͘阮lim，倒手the̍h正手ê衫á边teh拭目屎。

我mā leh想，阿良为着beh khah紧踏入太空ê领域，伊chhōe着khah新khah大只、行khah紧ê船，但是伊敢会记得，阿草伯、阿草姆提供ê旅费，kap hia ê kā伊欢送ê台湾人，m̄知伊敢bat眠梦着福尔摩沙--抑是美丽岛从来m̄-bat入伊ê梦？