《台文通讯精选》

 | | | 转寄

未忘花

作者 陈雷 2006.06.04

我tī台大病院作实习医师hit年，工作真chē，学业也真重。Tī病院值班ê时，有时有护理系ê学生来实习。若是好运遇着好学生，伊chē少会kā咱帮忙抽血、量血压……。若是pháiⁿ运遇着bē晓ê学生，ta̍k项来请教，咱时间了真chē，教伊khioh小便、洗皮肤……。设使he护士生作普通普通，咱头壳内无乌白想，立场在在，有闲教khah chē，无闲马马虎虎，应付会过。上困难ê就是，若是护士生作bē bái，又koh ta̍k项bē，a̍h就真pháiⁿ处理。咱看着伊，心内想东想西，伊若来请教，咱ná会讲m̄?明明真无闲，mā是耐心笑面，臭ê芳ê拢照起工kā伊教。

Tī五西病房第一遍遇着伊，就是这款真食力ê情形。伊ê学业免论，是按怎考入来护理系，我m̄知。伊ê美丽，选校花、选宝岛小姐犹有chhun。尤其是态度大方，bē晓就来请教。若是kā我看一下，我就kap伊去量血压，kā我笑一下，我就kap伊去khioh小便……。后来，soah连医生ê尊严kap 立场也放舍去，规气亲手替伊去作。一暗bú来，m̄知teh bú啥？头壳内单单有这位小姐ê形影，坐tī我ê对面，khiā tī我ê身边，占去我ê空间……，一大堆自我满意ê幻想，ná有心去看病人？天光来，教授巡病房，直直长长无欢喜ê面。我问题答bē出来，才亲像酒醉醒过来，后悔ná会作出这款糊涂事。

以后有koh几摆 ī病院ê走廊遇着伊，远远就向伊tàm头，特别光彩ê笑容，我自然行慢落来，目睭去chhōe伊ê目睭，有讲bē出来ê美感kap幸福感……。朋友知影我ê问题，kā我讲，这位苗栗来ê客人美人，真chē人teh追求伊，我若是有意思，排tī第十三号。

Hit时我少年无勇气无血气，听着排tī十三号，脚软手软，这项代志就按呢渐渐放无去，却是也无后悔，伊ê印象并无离开去。几十年来，有时tī生活压力真大ê日子，我目睭kheh kheh，the tī胖椅顶，也会koh回想看着伊ê面容，犹原会感触深深ê美丽kap幸福，世事ê重担就会放轻--去，生活ê活力又koh出现来。无预料，hit件少年时ê糊涂事，soah变作了真难得宝贵ê记忆，亲像人生行单调ê长路顶，罕罕一时，好运去看着一蕾路边ê未忘花，hiah-nih美丽，久久bē bē记--得。甚至有时也会自问，行这条路敢就是beh来看这蕾花？到底tó一项看法khah tio̍h?我无答案。请问各位，tī你ê人生中，敢也有几蕾ê未忘花？若是有，我beh招你来吟一首怀念未忘花ê诗：

人生比如海边水，有时来有时去，有时沉落有时起；
人生比如满天星，有粒光有粒暗，有粒向北有粒南；
人生比如夜冻露，有滴低有滴koân ，有滴早去有滴慢；
人生比如蝴蝶梦，有时真有时假，有时欢喜有时望；
人生比如未忘花，有蕾白有蕾红，有蕾未开有蕾芳。