《台文通讯精选》

 | | | 转寄

后宅ê故事

作者 施澄汇 2009.04.18

我出世tī鹿港，阮tau khiā tī chit-má鹿港市á ê西旁。阮tòa ê角头号作「后宅」，因为古早阮ê祖先是ùi泉州ê｢后宅」这个所在过--来，所以kā这个地名chah--过-来。后宅tòa ê人大多数是姓施--ê，到chit-má犹是，所以厝边头尾拢是亲chiâⁿ抑是亲堂á，会使讲是鹿港姓施ê大本营。Tī阮厝边有一间「润泽宫」，阮拢叫作「王爷厅」，服侍「大房头十三王爷」，这尊神明是阮祖先古早分灵过--来-ê，所以这间庙是阮后宅ê信仰中心，也就是阮ê角头庙。

古早后宅óa旧港沟(旧鹿港溪)，是码头区，有chiâⁿ chē ê｢苦力」tòa tī chia，「苦力」就是chit-má ê码头工人，拢是用khùi力teh拚命--ê。阮阿公hit阵就是teh kā人担水thàn钱ê苦力。早期ê码头安全设施无好，三不五时就有苦力teh作khang-khòe ê时，无注意poa̍h落去水--里淹--死。为着希望大家平安，而且超渡chia ê死--去ê灵魂，就tī港沟kîⁿ khiā一tè｢庵嘛呢叭尔牛」ê佛号碑，chit-má这tè碑犹koh有tī--leh。

除了知影旧港沟有苦力poa̍h落去死以外，我也听讲古早有一团乐团(可能是南管乐团)坐船á beh来鹿港表演，tú着风台大水，结果规团ê人soah拢淹--死。了后听讲若是有透风落雨ê暗时，就会听着港沟khîⁿ hit旁有乐团teh演奏ê声。莫怪我细汉ê时，阮阿妈拢m̄ hō͘我tī暗时行ùi hit旁--去。

虽然这条旧港沟tī 1898年，因为hō͘沙á that kah船á驶bōe入--来，日本人kā伊「截弯取直」，渐渐这个所在就变作草埔á。这三、四十年来已经起chiâⁿ chē hoàn-厝大楼，变作市街，完全看bōe出一百外年前是一个港沟码头ê所在。不而过，到chit-má阮后宅ê人犹会tī每年旧历7月25这工，chhoân物件tī这tè佛号碑头前普渡，祭拜早期tī这旁淹--死ê好兄弟á。

Ta̍k年7月25普阿弥陀(佛号碑另外名)ê时，我就会想起这个过去ê代志kap传说。我希望用「鹿港苦力」ê精神，用笔kap纸、相机kap录影机kā我tòa ê这个所在ê种种详细记录--落-来，留hō͘后代ê kiáⁿ孙知影。