《台文通讯精选》

 | | | 转寄

爱永远bē soah

作者 蔡岱安 2009.02.22

按呢ê一张批，我早就想beh写--a，希望我所写--ê ，会tàng表达出我ê心意。

我定定teh想，亲像你按呢疼我，beh叫我按怎无爱--你-neh？

Kap阿斐结婚了后，有一摆，我家己转去台湾看你。Beh转--来ê时，你坚持beh去火车头送我。上车进前，你kap我相(sio)揽，chim我ê嘴phóe｡上车了后，我坐tī窗á边，ia̍t手叫你先走。你khiā tī月台顶，拢无beh离开，我kā手tah tī玻璃窗á,感觉真亏欠teh kap你相辞。

你突然间走--过-来，kā你ê手kap我ê手相tha̍h,gia̍h头对我笑，不管四围ê人，用无声ê话，隔一层窗á门，m̄甘对我「讲」再会。火车开始慢慢á tín动，你tè火车行，火车紧，就tùi行变走，hit年，你六十岁--a，细汉koh sán,鬓边ê头毛拢白--a，koh按呢tòe火车一直行、一直走。

车--里ê人，真好奇，问--我：「伊敢是你ê老母？」

我摇头：「M̄是，是我ê ta家。」目屎忍bē tiâu,一直流--落-来。

咱「ta家新妇」，抑是讲「母女」ê关系，真早就开始。阿斐大学毕业做兵以前，kā我介绍hō͘你。伊tī我beh出国以前，请假出来kap我订婚。

出国以后，我每两礼拜写一张批hō͘外家厝kap你。外家厝ê批有去无回，颠倒你定定回批hō͘我，鼓励我这个犹未过门ê新妇，替我ê留学生活加油。

阿斐退伍了后也来美国。阮ê学业结束了后，你等待真久ê婚礼举行--a，婚礼订tī我学期考试了后。我ê父母因为身体ê关系，bē tàng来参加，你叫我安心，免烦恼，飞来Boston做新娘就好。你kap阿爸提早来美国准备，连我ê新娘衫，mā拢替我准备好势。

你定定讲你是仝一日teh嫁查某kiáⁿ kap娶新妇。

无m̄ tio̍h,我tī你另外一个后生ê厝，你kā我亲像嫁查某kiáⁿ仝款，嫁--出-去。

婚礼hit日，你比我koh khah紧张。透早就来lòng我ê门，叫我起床，亲像亲生ê老母，替我化妆、穿新娘衫，挂你送--我ê珍珠耳钩、phoàh liān｡你tī我ê身躯边，无闲chhih-chhih，koh照风俗，m̄肯hō͘新郎看着新娘，早早就催家己ê后生出门去教堂，tī hia慢慢á等候新娘。

你koh叫你ê小弟来做「母大舅」，开新娘车。Beh去教会以前，你吩咐我ài khà电话转去台湾，感谢父母教养ê恩情。你也亲嘴kā我ê父母讲，你tī上帝ê面前下愿，永远会kā我这个新妇当做查某kiáⁿ来疼。

你无白贼，婚礼结束了后，你牵我ê手，kā我讲：「kiáⁿ儿是上帝ê礼物，父母只是暂时看顾。今á日，我ê kiáⁿ beh离开父母，kap你结合，成做一体，以后，就拜托你--a。」

婚礼了后，你就转去台湾，m̄ bat koh来美国，kā后生放心交托hō͘我。

你无来美国，阮只好转去台湾看你。阿斐因为工作ê关系，bē tàng ta̍k年转去看你，就派我做代表。虽然kan-na我一个人，你犹是三顿饭拢准备足phong-phài,也无hō͘我做家事，煮饭、洗碗、洗衫，你拢家己来，koh kā我ê洋装、外衫，偷偷á熨hō͘好，khǹg tiàm我ê眠床头。

平常时，我一入门，你浅拖就the̍h到我ê脚前来。听着我起床ê声，趁我teh洗嘴、洗面ê时，就开始hiâⁿ滚水、煮咖啡、准备早顿。食饱了，水果马上切好送--来。我beh出门，你一直交代，m̄-thang去热--着，ài坐计程车，m̄-thang用行--ê｡出外一入门，犹未坐--落-来，一大杯冰凉ê蜜茶就phâng来我ê面前。Kap你做伙去教会礼拜，你也是惊我热--着，the̍h周报，一直替我ia̍t风。行tī路--里，您拢beh牵我ê手，koh顾我过大路。暗时beh困以前，你替我tī房间内kā蚊á香点hō͘好。半眠我起来便所，你马上醒--起-来，问我敢有困好？有hō͘蚊á咬--着-无？敢ài koh我点蚊á香？抑是起来替我拍蚊？

真chē代志，写也写bē完，hō͘人感动，也无法度bē记--得。我亲生ê老母，在生就定定对我讲：「你ê ta家真好，连我也无法度亲像伊hiah-nih-á周到，hiah-nih-á疼--你。」

七年前，我ê老母过身，hit时你家己ê翁婿 ，就是我ê ta官也过身两年--a。你一个人，透早坐火车来，tòe我送我ê老母到墓á边。棺柴beh tâi--落-去ê时，你牵我ê手，流目屎，kap我做伙向我ê老母相辞。

丧事了后，我陪你转去台南。因为心内艰苦，一直困无好，您hō͘我过去kap你仝眠床困，一直安慰我讲，我bē孤单，因为我犹有你这位老母会继续疼我。

Kap阿斐结婚十外年来，其实你家己mā bat遇着真chē苦痛。代先是阿爸tio̍h癌，你惊阮烦恼，无kā阮讲，一个人恬恬照顾。爸爸过身了后，阮希望你来美国做伙tòa,你独身ê大姊忽然间中风，你坚持beh留tī台湾照顾伊。

今á日，你七十岁--a，虽然阮每一礼拜拢会khà电话hō͘你，知影你身体健康，总--是也会烦恼。你颠倒安慰阮讲，有一工，你一定会来美国，m̄-kú,m̄是chit-má｡你讲教会生活无闲，上帝kap教会ê兄姊拢hō͘你平安喜乐，而且大姨过身了后，你开始kap以前女中ê同学定时聚餐，每一礼拜拢做伙去关仔岭洗温泉、唱歌开讲，生活快乐满足，无需要阮担心。

其实阮ná会m̄知影你真正ê心思。你以前讲--过，你结婚以后就kap ta家做伙tòa,中间也照顾过家己ê老母真chē年。翁á某拢tī 一间细间房间内，se̍h来se̍h去，无家己ê空间。真chē人「Chē年媳妇变ta家」了后，拢beh爱kiáⁿ儿新妇好好á款待，但是你无仝，你不时teh替人想，会tàng独立生活，就无爱óa靠别人。

我m̄是你ê亲骨肉，koh有真chē缺点，就因为我是你后生所选--ê,你就一心一意、无条件按呢疼我。

Tī阮ê婚礼，你kap阿爸送阮一本圣经，阿爸tī顶面题字：「我设使若会晓讲人kap天使ê语言，若无仁爱，我就成做响ê铜器，tân ê锣钹(lô-poa̍h )。我设使做先知，明白拢总ê奥妙kap拢总ê知识（chai-bat），koh设使有齐(chiâu)备ê信，够额来移山，若无仁爱，我就无算做是啥物。我设使尽所有ê赈济，koh献我ê身躯hō͘火烧，若无仁爱，就我无得到利益。仁爱是宽容、慈悲；仁爱是无怨妒；仁爱是无夸口、无行见笑ê事，无求家己ê利益，无紧受气，无记得人ê pháiⁿ，无欢喜不义，是kap真理相kap欢喜；凡事忍受，凡事相信，凡事ǹg望，凡事吞忍。仁爱永远bē无--去。」

婚后，真chē人拢o-ló我kap阿斐是「模范夫妻」。阮这对平凡ê翁á某，设使知影按怎tī爱ê路程，互相扶持，互相相疼，互相原谅，he是因为阮有你这位「模范母亲」，hō͘阮会tàng一直拢teh感受着啥物是永远bē无--去、永远bē停soah ê疼。

多谢你！

求上帝继续保守你！

你ê新妇写