《台文通讯精选》

 | | | 转寄

万年溪

作者 苏藤宗 2009.02.15

我有一个确定无法度达成ê梦，tō是tī最近ê将来thàn 2亿5仟万台币。对这条bē少ê钱，我有一个计划，m̄是为着我退休了后ê生活。我beh退休ê时，公司hō͘我ê退休金虽然少少--a，但是有够维持我简单ê生活方式。Tī几年前(大概是1998年)转去屏东以前，我mā m̄ bat梦想beh thàn khah chē ê钱。大家犹会记chit万年溪--无？Hit一日，tī自由路行，看着受着伤害ê溪底，心肝感觉真痛。回想过去，有一种bē tàng避免ê心思来相tîⁿ，比较过去kap现在，也常常hō͘人感觉矛盾kap无一致。但是这个hō͘人感觉真宝贵ê物件变bái--去，实在hō͘人真伤心。

万年溪以前有一个小水坝，有一个大约十尺koân ê水门，一条小沟kā挡--起-来ê水引ùi 屏东糖厂去。Tī上流屏东病院ê附近有一个o͘-sìm桥(吊桥)。水真清气，lim hia ê水也bē感觉奇怪。水门附近是我gín-á ê时常常去siû水ê所在。平常拢有一kóa面熟m̄ bat名ê gín-á做伙siû｡大家拢thǹg裤lān teh siû (hit时阵我大概8、9岁)，peh上水门ê顶koân,嘴hoah讲「lān-pha tēⁿ--leh，chhun死--ê｣，然后跳入去水深ê hit pêng｡有一日，一个gín-á讲，泰山tī非洲hip电影，跳落去溪á水hō͘竹篙插--死。Hit个以后，一、二礼拜，无人敢tùi水门顶koân跳落水。以后chiah知影是一个谣言。Hit时阵是泰山电影ê时代(二届Olympic游泳冠军John Weismuller主演)，我想我看过伊ê每一phō泰山电影。有时阵，阮tō khiā tī水门顶，学泰山ê hoah声「O͘ ...O͘ ..O͘ O͘ ..」，然后跳落去水内底。Tī电影内底，泰山若是hoah这个声，tō是伊beh去救人，抑是伊tú着危险，beh叫伊ê动物朋友来斗相工，伊ê大大小小ê朋友，包括象、狮、豹、猴tō拢赶--来。这时阵，电影观众大声拍pho̍k á,我mā贡献bē少ê phok á声。若是讲che是hō͘人真兴奋，实在是犹koh形容无够。

一年大概有两遍，m̄知啥物原因，水门会开起来放水，附近真chē人tō集来掠鱼、掠虾。顶回转--去(有二十几年，政治ê因素无转去台湾)，清气ê水无--去，水门也生sian，kan-na有无真清气ê乌窟á水kap pùn-sò,无水teh流。你会tàng想，这个情景hō͘我外伤心。转来美国，我开始想，我若有2亿5仟万台币，我tō会提来去hō͘苏嘉全县长，请伊koh提出来仝款ê数目，加--起-来5亿，一定会tàng kā万年溪整顿做一个真súi ê公园，也是对受伤害ê台湾环境ê一个小贡献。我无真爱koh提起日本，但是tī日本坐火车经过溪á,你拢会看着清气ê溪á底kap比较khah清气ê溪á水。火车过溪拢会掠着我ê心，hō͘我心情平静。火车过溪了后，我tō目睭kheh kheh，hō͘我ê心转去清气ê万年溪kap下淡水溪( chit-má叫做高屏溪)。中学时代，坐火车听着kho͘-long kho͘-long过铁桥ê声，去高雄扫街á路、看电影，也是我有钱ê时真爱做ê代志。

几个月前，有台湾ê报纸teh报导讲，屏东有一个文化保存计划，准备beh重建o͘-sìm桥、糖厂ê一kóa日本宿舍、出名ê小提琴家李淑德ê旧厝，设立汪乃文纪念美术馆。这个消息hō͘我真心动。我姊夫ê老父(pē)李志传先生是一位教育先进，做过省立屏东女中校长真chē冬，也是一位真出名ê作曲家。大家真熟ê｢台湾，台湾，咱台湾」tō是伊作曲，蔡培火先生作词--ê｡伊也作屏东市歌kap一条用o͘-sìm桥做背景ê摇gín-á歌。汪乃文先生是一位真温和ê美术家，tī屏东女中教美术几十冬，教过我ê大姐kap小妹。伊bat阮厝ê人，所以有时阵会来阮tau开讲。李淑德女士ê旧厝tī万年溪边，汪乃文ê古厝mā是tī附近。我ê万年溪复活计划(梦)对屏东文化复健有加分ê作用。

M̄-kú,我若有2亿5仟万台币，我可能会改变我ê心思。

(这篇文章原文是用英文写--ê,是作者经过e-mail送hō͘ tī台湾kap美国ê高中同学ê批。作者家己翻译做台文。)