《台文通讯精选》

 | | | 转寄

若眠梦

作者 阿秀 2008.11.30

我有一个朋友kā我讲---

伊细汉ê时，定定负责对付出现tī in tau规群ê káu-hiā｡因为按呢，伊希望出现ê káu-hiā lú大群lú好。有时伊会偷the̍h糖，kǹg tī灶脚ê土脚，siâⁿ káu-hiā｡伊对付in ê手法，上爱用火，因为火ê速度真紧，koh会有芳味。伊讲hit当时，伊想小小ê我，单单用报纸，就会tàng烧死hiah chē ê káu-hiā,突然间感觉家己真伟大。

国中ê时，伊学着protein惊烧m̄惊冰。伊mā是the̍h káu-hiā来做实验，冷冻库不时有伊khǹg ê káu-hiā｡伊讲káu-hiā真实冰了会koh活--起-来，若是kā in khǹg tī电火ê顶面，一下手就烧--死，che是伊tī桌á顶ê实验。

我想这一、二工有人teh做实验，in用美国人kap家己ê性命做实验。这个实验到底有啥物意义，无真清楚。人类生存ê任何目的，拢无需要用这款方式来证明。无定着你会讲世间ê悲剧满满是，但是悲剧发生tī世界舞台ê中心，有伊特别ê效果。

Tī大楼倒落去ê所在， 有一个梦tùi hia飞--来---

Che是一个天气真好ê拜二早起，你带着真欢喜ê心情去上班（因为blue Monday táⁿ过去）。Tī世贸大楼ê koân楼顶，有一片真súi真大片ê玻璃窗。目睭看去，大西洋一片ê蓝色，Hudson River ê帆船mā tī你ê目睭前慢慢驶出港口，虽然in听无你ê声，你也是kap in讲：「Good Morning！」白色ê帆点tī蓝色ê海，hō͘你想起生日暗会，tùi情人手中接着ê满天星。

秘书送来一杯烧烧ê咖啡，一时办公室有真厚ê咖啡芳。你kā白色ê牛奶精加入去，无想beh去lā,就亲像无想beh马上处理公事ê心情。你手phâng咖啡，目睭犹原看窗á外，白色ê牛奶精tī咖啡ê内底，家己thòaⁿ开… 啊！一个拜二，有日头有活力ê早起。

你看着远远有海鸟teh飞……，其中一只慢慢向你飞--来，lú飞lú近，lú来lú大。

目睭jôe-jôe--leh,koh看一遍，你才发现m̄是海鸟，是飞龙机，而且是民航机。你感觉真欢喜，che是难得ê经验，以前m̄-bat有飞龙机离大楼chiah近，若有，mā是小型ê后面koh拖一条广告ê布条á｡

这只大飞鸟继续向你飞来，你ê心情tùi欢喜变做怀疑。但是飞龙机并无tòe你ê心情转越，你ê面ùi红变白。时间一秒一秒过去，白色ê牛奶精无koh散开，咖啡家己lak落土脚。你ê眼前一片乌，你无koh有感觉，kan-na会记得--- 一杯犹未lim真芳ê咖啡kap一只真大只向你飞--来ê---海鸟。