《台文通讯精选》

 | | | 转寄

大空

作者 徐来 2008.11.09

是九月初ê拜一，hit日m̄知按怎，特别无闲。Chēng透早入办公室，电话就tân无停，客户mā m̄知是m̄是相招，不管有约无约，拢牵前tòe后tī hit日行脚到。

Hit日舞到2点半，tú-tú发落好，想beh行出去食饭ê时，一位少年人，突然间m̄知tùi tó位bùn--出-来，pháiⁿ势pháiⁿ势讲：「真失礼，无kap你约，tú-tú经过chia，顺续kap你参详这张支票beh按怎投资khah好。」替伊问好投资ê利率，一切办好了后，我顺续介绍公司ê电脑银行作业ê服务。Kā伊解释che会tàng省jōa chē ê时间，伊thang一脚步无出大门，tō会tàng付所有ê siàu单。无拍算，伊轻松讲，in tau无装电脑，伊也无爱去摸电脑。若是伊是LKK ê老人，我可能会tàng了解。总--是，少年tang-tang，竟然讲无摸电脑，我却是头一摆听着。Hit时，我已经iau kah大肠告小肠，m̄-koh，我非常好奇，想beh知影背后到底有啥物原因，致使伊完全拒绝用电脑。伊看我ê表情，就笑笑á讲，其实，五年前tùi台湾移民来加拿大进前，伊就bat tī财政部做过代志。Ta̍k日十几点钟所面对ê就是电脑、报表，加班koh加班，也是电脑、报表。就按呢，几nā年了后，伊ê目睭差一点á就报销。「所以我决定以后绝对无摸电脑。」

「是讲，敢会tàng chhōe别种kap电脑无关连ê工作--leh？政府机关是金饭碗，敢thang讲放就放sak？」伊笑笑讲：「我起初mā是有考虑，m̄-koh，hit时ê报表是hō͘人愈看愈起惊。国民党政府ê财政实在真正lām-sám,愈深入研究就愈惊，也就是这个原因，我才会决心出国。」

「若按呢讲，今á日台湾财经ê乱象就无完全是阿扁政府ê失错--lo͘h！」

「唉，冰冻三尺非一日之寒」伊开始用中国话应我，「财经ê低落是世界性ê,阿扁--a去la̍p着这空是不止á大空，真正pháiⁿ做--lah。」