《台文通讯精选》

 | | | 转寄

O͘-lin-gió kap白玫瑰

作者 Biāu-gio̍k译 2008.11.02

下面是一位同事传来ê电子批，是一位阿妈讲起伊tī圣诞节tú着ê代志，我kā翻译做台文，相信会hō͘你感动流目屎。

我赶kông chông入去一间百货公司，想beh tī圣诞节进前做最后一分钟ê采购。看着百货公司人hiah-ni̍h chē,我开始头疼。想讲可能ài tiàm chia浸真久，我犹koh有真chē代志ài做leh。圣诞节代志真chē,真费气。

我kheh过一群人，来到chhit-thô物ê部门，看着hia ê chhit-thô物所标ê价数( siàu)，我开始怀疑，我ê孙á敢有beh chhit-thô che？来到khǹg o͘-lin-gió ê所在，雄雄看着一个差不多5岁外ê查甫gín-á mo͘h一sian 古锥ê o͘-lin-gió,手一直so o͘-lin-gió ê头毛，koh kā mo͘h tiâu tiâu leh。

我真好奇，目睭一直注意看这个gín-á,想讲he是beh hō͘啥人leh？我看伊行óa去问一个查某人，讲：「阿姨，敢真正我chia ê钱无够？」Hit个查某人有一点á烦，kā应讲：「你知影你chia ê钱无够thang买。」In阿姨叫伊tiàm hia等，m̄ thang乌白走，伊去别位the̍h其他ê物件，一时á tō会随转来。

我看这个gín-á继续mo͘h hit sian o͘-lin-gió｡我tō kā问：「这个o͘-lin-gió是beh hō͘啥人ê?」伊应讲：「Che是阮小妹上盖爱ê圣诞礼物。伊知影圣诞老阿公一定会送一sian hō͘ 伊。」我kā讲圣诞老人可能会送hō͘ 伊。伊讲：「Bē lah，圣诞老阿公bē tàng去阮小妹hia….我beh叫阮阿母chah去hō͘ 伊。」我问伊in小妹是tī tó位？伊用伤心ê目神看我，讲：「伊已经去kap耶稣做伙a。阿爸讲，阿母mā teh beh去kap小妹斗阵a。」一时，我ê心脏险险tō tiāⁿ去。这个gín-á koh看我，讲：「我叫阿爸kā阿母讲，叫伊bān-chiah去leh，ài等我tùi店里转来了才去。」这时这个gín-á问我敢有beh看伊ê像？我kā讲我真爱看。伊kā khiā tī店头前hip ê几张像the̍h出来，伊讲：「我beh叫阿母the̍h这几张像去hō͘小妹，伊才bē bē记得我。我真爱我ê阿母，我无爱伊离开我。M̄-koh阿爸讲，阿母需要去kap小妹做伙。」我看这个gín-á头lê-lê,变kah恬chih-chuh。

我等伊无注意ê时，伸手入去我ê皮包á里，jîm一kóa钱出来。我kā伊讲：「咱敢会使koh算一遍？看你ê钱有够无？」这个gín-á变khah有精神起来，讲：「好！我to知影一定有够ê!」就按呢，我kā我ê钱lām伊ê钱开始算，当然是有够钱thang买o͘-lin-gió｡伊欢喜讲：「感谢主耶稣赐hō͘我有够ê钱。」Koh讲：「我tú-chiah有求耶稣hō͘我有够钱thang买o͘-lin-gió, hō͘阿母chah去hō͘小妹，伊有听着我ê祈祷。我本来mā beh求伊hō͘我钱thang来kā阿母买一蕾白色ê玫瑰花，但是我无求伊。M̄-koh伊hō͘我chiah chē钱会tàng买一sian o͘-lin-gió kap一蕾玫瑰花。阮阿母足爱白色ê玫瑰花。」

几分钟后，in阿姨转来，我tō kā车sak走。Che了后，我ê心情kap tú来买物ê时规个无仝款。我继续无停teh 想这个gín-á｡会记得几日前ê报纸，有报导一个食酒醉驶车ê人lòng死一个细汉查某gín-á,in老母性命真危险，伊ê家属当teh 踌躇是m̄是beh kā维生机( life support)关掉。M̄知这个gín-á kap这个车祸敢有关连？

两日后，报纸ê报导讲，车祸ê家属已经kā维生机关掉a，hit个少年ê查某人已经过身a。我无法度kā hit个gín-á bē记得去，一直teh想，in两个人是m̄是有关连？Hit下晡，我挡bē tiâu tō出去买一kóa白色ê玫瑰花，the̍h去殡仪馆。Tī hia我看着hit个少年ê老母手里the̍h着一sian古锥ê o͘-lin-gió､一蕾真súi ê白玫瑰kap hit个查甫gín-á ê像。离开hia ê时，我ê目屎一直liàn落来，我ê人生观规个改变过来。这个细汉gín-á对伊ê老母kap伊ê小妹ê爱是hiah-ni̍h-á深，m̄-koh一目nih 久，伊ê人生tō hō͘ hit个食酒醉ê lòng kah碎碎碎。