《台文通讯精选》

 | | | 转寄

台文通讯发刊辞 - 按会徽讲起…

作者 郑良光 2006.02.12

台文习作会自成立以来，按几个á对台文普及化有使命感ê同乡开始，每一次聚会ê人数拢一直teh增加，到第六次ê时已经有十七个人参加。但是真正hō͘阮感觉欢喜--ê m̄是人数ê增加，是参与者ê热情kap投入。Tī进入第四个月ê时，有会友提起办台文习作会通讯ê构想。这个提议受着热烈ê回应…

有人认为台湾语文面临着灭种ê危机，这份通讯会tàng扮演一个「火种」ê角色，来延续台湾语文ê香火。

有人认为台文普及化需要全民ê参与才有法度达成。特别是教育界、政治界、传播界、工商界、电脑界、学术界、宗教界、文学界、语言学界...等等无仝背景ê专业人才拢来参与才会成功。这个工程是chiah-nih大，台文习作会ê力量是chiah-nih á小，这份通讯会tàng扮演ê角色是亲像一枝小小ê｢蕃á火」，来点一pha火，点to̍h hia ê肯为台语文化牺牲奉献ê蜡烛kap火柴；来照光受污染，渐渐乌暗ê台语社会；来烧除hia ê加tī台语文化ê压制kap污秽。

有人讲，台湾语文工作ê力量过头分散，互相koh无联络，这份通讯tio̍h-ài担任「桥梁」ê角色，hō͘台湾语文工作者会tàng互相鼓励、交换意见、分工合作。

也有人讲，台湾语文不但tī国民党ê电视节目、文字媒体受歧视，tī本土意识ê报纸、杂志也是无受重视，台文作家发表作品ê空间有限，影响了台文创作ê意愿。这份通讯会tàng提供台文作家一个创作ê｢园地」、发表ê｢舞台」。

台文习作会ê会徽就tī这种热烈ê讨论下产生。伊亲像是一pha强beh hoa--去ê火种；一枝小小á ê烧了就化麸ê蕃á火；一条期待人来经过ê桥；一区欠人耕作ê田园；一个可能无观众ê舞台。阮就beh按呢来开始，阮啥物拢无，阮所有--ê kan-na一粒疼台湾ê心kap一个m̄肯放弃ê信念：「今日若将che来放，是永远无希望」。

语言kap文字是有社会性ê物件，台文普及化kap标准化ê运动是m̄是会成功，台湾话是m̄是会tàng继续做台湾地区ê普通话，ài靠所有认同台湾、疼台湾ê人做伙来关心才有法度thang达成。当阮这枝「蕃á火」烧尽ê时，阮相信有chē chē ê蜡烛会kā这pha火传--落-去。

(这篇发刊辞刊tī 1991年7月初1 ê台文通讯创刊号。)