《台语荒漠甘泉（汉罗版）》

 | | | 转寄

读圣经ê问题

作者 Chuniok 2005.08.28

真欢喜读tio̍h欧俊士牧师tī教会公报第2727期呼吁大家重视读台语圣经，大家lóng真努力teh推动用母语读圣经ê运动，但kah-ná有真chē挫折感，原因是咱ê母语受日本kap中国ê外来政权迫害百外年，尤其时国民党政府ê计画tek用国语政策beh来消灭台湾各族群ê母语。连一向坚持母语传教ê长老教会mā一一沦陷，实在令人痛心。

美国ê Harvard[哈佛]大学tī 2001聘请李勤岸教授开台语课，伊mā来阮Boston台湾人ê教会主日学教阮台语，hō͘我觉醒台湾母语ê súi kap拯救台语ê重要性 ，我chiah决心将一向ê华语写作改用台语。2002年，我去参加由台湾罗马字协会主办ê第八届世界台语文化营，我当时以台湾基督长老教会对白话字ê贡献来掠做骄傲，tú-tio̍h人就自我介绍讲我是长老教会ê会友。但有人随指责我讲：「Lín 长老教会siōng无效lah,干单一个郑儿玉牧师，其他lóng无人来参加台湾罗马字协会，共同努力拯救kiông-beh失落ê白话字！」

讲起来mā是事实，讨论会ê中间，我看一位去台前发表意见，伊讲伊是某某学校ê校牧，白话字bat真深，本来应该坐tī台顶做讲员....伊ê意思kah-ná讲主办单位thài无请伊做讲员。这kā咱讲一个事实，台湾基督长老教会kap现此时ê台语文运动已经脱节loh!

顶面hit-ê指责kap事实，刺激我拚命kā白话字学hō͘伊好，koh tòe李勤岸教授参加各种ê台语文运动kap工作，来hō͘ in看讲长老教会ê人tī台语文运动中无缺席。我(1)将陈清俊长老phah好ê白话字圣经(巴克礼)ê电子档案，整理做标准调号ê档案交hō͘圣经公会使用。(2)参与台湾文学馆ê台湾文献(绝大部分lóng是台湾基督长老教会ê)整理kap保存计画。(3)kap陈清俊长老合作，将「红皮圣经」(1972年出版就被国民党政府没收ê白话字圣经)整理做标准调号ê档案，并翻写做汉罗去hō͘陈郑弘尧先生(非基督徒)上网。(4) kap陈清俊长老合作，将 “Pêng-bîn ê Ki-tok-toān”(1933年台湾公报社出版)整理做标准调号ê档案，并翻写做汉罗去hō͘台湾公报社出版。(5)kā日本政府tī 1932年出版ê《台日大辞典》翻译做白话字kap汉罗台语，thang hō͘台语文工作者参考。

Tī参与顶面chiah-ê台语文运动工作中，tùi读圣经ê问题提出淡薄仔浅见hō͘大家参考指教。 (一) 圣经tio̍h不时更新版本：语言是不断进化ê物件，白话字圣经目前干单hit本1932年代ê古典圣经，其中约20% ê厦门话却变成「教会内ê语言」，现代青年基督徒kap教会外ê人听无，这mā ē-sái讲是台湾传福音ê不利所在。当前急务，台湾基督长老教会总会tio̍h紧针对chit-ê问题，出版一本现代台湾人读起来真爽快ê白话字或汉罗版ê圣经。

(二) 神学院tio̍h加强白话字教学：听讲现此时神学院ê学生kap老师lóng马马虎虎teh应付白话字ê课程。用母语传教是siōng好ê,圣经公会用hiah chē钱翻译各种母语ê圣经，mā是chit款ê用意。

(三) 训练礼拜ê读经者用心准备：我bat听一个ê司会者kā「因信称义」读做 “in phoe chheng-gī”，这是不可原谅ê粗心。平常时tio̍h制造读白话字或汉罗版圣经ê环境，鼓励大家吟诗ê时看白话字ê歌词，查经tio̍h使用白话字或汉罗版ê圣经。

(四) 基督徒应该koh khah积极参与现此时ê台语文运动：台湾基督长老教会ê会友ài有使命，继续tī台湾扮演白话字先觉者ê角色。现此时台湾公报社积极teh出版台语圣经kap福音文物，是值得咱大家来鼓掌ê计画。建议台湾公报社出版品ē-tàng kap台语文运动ê网站超连结，hō͘教会内kap教会外有良性ê互动，对台语文运动kap教会传教一定lóng有大帮赞。