《台语荒漠甘泉（汉罗版）》

 | | | 转寄

读《一枝草一点露――世间 ê súi 》有感

作者 Chuniok 2005.08.21

Chit-ê充满罪恶ê世间kám有súi ? 答案否定ê人真chē,因为in ê 灵魂无法度脱离罪恶 ê束缚，bē晓倚(óa)靠神 ê 气力来行(kiâⁿ)永生 ê平安道路; 答案肯定 ê人 mā真 chē,in tī神ê恩典内面chhōe tio̍h性命ê意义。

《一枝草一点露――世间ê súi 》ê作者纪福赞牧师是上有代表性ê人物，伊tī册ê序言中讲起伊ê亏歉：1991年七月，伊tī将近精神分裂ê状态下犯了大错，hō͘至亲朋友丧失性命，hō͘伊ê家族伤心peh-pak,hō͘伊所尽忠ê上帝见笑，hō͘伊所疼ê教会gông-gia̍h,hō͘伊 ê bó͘-kiáⁿ无thang倚靠，hō͘ chē-chē疼惜伊 ê人连累受苦，也开始伊久长监狱ê省察生活。伊续落去koh讲出伊 ê感激：bat抑是m̄-bat ê朋友亲像上帝ê使者，陪伴伊行过死荫ê山谷，hō͘ 伊ē-tàng等候上帝ê怜悯，见证上帝永远bē变ê恩典。

纪牧师tī受关监ê苦难日子中，犹原尽心、尽性、尽意疼上帝，不断追求性命ê意义。罗荣光牧师tī册ê序中讲：纪牧师用敏锐ê心眼来观察世间万象，大到世界、国家 ê 大事，细到个人ê小故事，用咱台湾人ê父母话写出来，阐(chhián)明上帝ê怜悯kap疼痛，帮赞读者来chhiâu-chhōe性命ê意义，hō͘咱koh khah「对上帝有信，对人民有疼，对土地有情」。

纪牧师用一般讲道ê方式写出143篇真感动人ê人生真理故事，每一篇 lóng有经文、主题故事、类似ê圣经内故事kap祈祷；我每暗beh困前读一篇，假若听一篇真súi ê信息，成做每日ê灵性米粮。Chit本册亲像一面明镜，hō͘我会当清楚看出家己ê内心。当我软弱ê时，hiah-ê信息hō͘我气(khùi)力；tī 患难中得tio̍h大安慰，顺势 ê时知影chún-chat节制，学习顺服上帝ê课程。这确实是一本台湾人自我灵修 ê好册。

Tī「chheⁿ-mê ê得着看」hit篇文中，伊举1997年英国布莱尔首相任命chheⁿ-mê人布朗克特做教育kap就业部长ê例，配合圣经中ê chheⁿ-mê参孙比目光ê参孙hō͘非利士人koh khha头疼」、「信心坚定ê chheⁿ-mê人巴底买得tio̍h医治」kap「chheⁿ-mê ê扫罗比目光ê扫罗koh khah看透人生ê路」，来见证约翰福音第9章3节耶稣应讲：「Chit-ê人无犯罪，伊ê父母亦无，独独beh用伊来显明上帝ê所做。」(台语汉字本圣经)。我从事视障关怀工作十gōa年来，听过真chē有关盲人ê信息，chit篇是上深入hō͘人感动ê。

Tī「简朴知足」文中，提起1990年代所发起ê「自愿简朴运动」 (Voluntary Simplicity Movement)，就是「Thàn(赚) khah少钱，换 khah chē(多)自由生活时间；买khah少物件，换khah chē休息时间。伊举例德蕾沙修女所创设ê「仁爱传道会」ê修女干单有三领粗布衫，一块粗碗，所食ê食物kap in所救济散赤破病ê人食ê仝款，这是现代上简朴ê传道生活方式。Tī现此时资本主义ê过度消费社会中，这chiah是咱追求「世间 ê súi」唯一 ê办法。

读完chit本报咱「世间 ê súi」信息ê好册，hō͘我koh再对人类有信心及ǹg望，有「信、望、爱」ê心来看这个世界，永远to有「世间 ê súi」。

这本册采用「台文通讯」、「台文Bòng报」kap《大学台语文选》所用ê文字，tī李勤岸教授ê指导了后，我lóng有读chia-ê月刊kap册，所以读起来lóng无语言ê落差，母语hō͘我ê感受koh khah深。亲像郑良伟教授tī伊ê序中所讲ê,tī美国监狱内ê牧师用台语写出「世间 ê súi」，对读者有特别ê意义：「培养追求疼痛kap ǹg望 ê态度，增加跨时代、跨文化、跨阶层ê知识，以及培养台文传达情意ê技能。」

对台湾文学贡献上大ê前卫出版社将chit本好册列做「台语文学丛书11」，亲像郑良伟教授所讲：「世间人无分贵贱，无分国度，lóng有人类ê共性：疼痛kap希望会发现「世间ê súí」chit-ê通则....凡是有意识beh追求台语讲道kap听道ê,chit本册提供真丰富ê灵性米粮kap语文典范。

现今台湾国际地位提升，哈佛大学已经tī 2001年开始开台语班，台湾mā开始推动九年一贯母语教学，真理大学也计画开台语班。Chit本册ē-sái讲是chiok好ê台语文读物，请读者tio̍h紧买来读，tam (尝)一下母语ê滋味，这mā是一种「世间 ê súi」。(6/30/2002)