「我实在 kā lín 讲,lín 若有信,亲像一粒芥菜子,lín 就 beh kā chit-ê 山讲:『tùi chia 徙去 hia』,亦 beh 徙去;koh lín teh-beh 无一项 bōe。」(马太 17:20)
愿意将家己性命 ê 安全 kap 生活 ê 特性,完全交 tī 主大权能 ê 手中 ê 基督徒,就是 tī 生活中,伊会做到无一点 á ê 保留,相信主 ê 应允,相信主每句 ê 应允 lóng béh 实现。
Chit 种 ê 基督徒一定会 ta̍k 日「将 lín ê 忧虑卸 hō͘ 上帝」(I 彼得 5:7),有 chit 种 ê 交托,会得 tio̍h 深深 ê 平安。
Chit 种 ê 基督徒会 tī ta̍k 种 ê 环境里,看上帝 ê 旨意,心欢喜,嘴唱歌来接受,lóng bōe 哀怨。
Chit 种 ê 基督徒 tiāⁿ-tio̍h 会将家己 khǹg tī,隐藏 tī 上帝 ê 大权能内,会明白家己 siōng 大 ê nńg-chiáⁿ kap hiah-ê 影响家己,决心去做成忍耐,圣洁 kap 谦卑 ê 各种事物。其实这是一种机会操练,hō͘ 罪 bōe 会 tī 咱本身 ê 身上作用 ê 操练。Án-ni 咱 ná 来 ná 坚强。Chit 种机会操练是,疼咱 ê 天父所赏赐,hō͘ 咱明白并遵行伊 ê 旨意,hō͘ 咱有福气体验 tio̍h 伊 ê 同在 kap 伊 ê 大能。
这一切可能 lóng 是 tùi 天来 ê,因为这 lóng 是上帝 ê 作为。咱若会真正得 tio̍h,就会不断谦卑家己,恭敬 tī 主 ê 脚前,学习追求得 tio̍h koh-khah chōe。
咱会 koh-khah ǹg 望 kap 上帝同行,因为无别项会 khah 满足咱 ê 心。靠 tio̍h 圣灵 ê 能力,咱会每日时时刻刻活 tī 基督里。―H.C. G. Mo͘le
完全 ê 信靠,咱会 tùi 上帝 ài 得 tio̍h jōa-chōe,就 thang 得 tio̍h jōa-chōe,主基督将伊 ê 宝库 ê 锁匙交 tī 咱 ê 手中,叫咱去 the̍h。若是有人会 thang 受允准入银行 ê 保险库,叫伊 thang the̍h 内面 ê 钱,伊若空手 tǹg 来,无钱 thang 生活,án-ni,ài 怪甚么人 ah?上帝 ê 富足 hō͘ 基督徒 thang 白白来 the̍h,伊所得 tio̍h ê 若是真少,又 thang 怪啥人 ê m̄-tio̍h ah?