Tī 美国麻州 (Massachusetts) North Hampton ê 所在,有一位古老 ê 墓地,美国开拓时期 ê 宣教师 David Brainerd tâi tī hia。
Tī 主后 1747 年,hit 时伊只有 29 岁,tio̍h-tio̍h 肺痨过身。伊 ê 墓 ê 边 á,有当时美国清教神学家 Jonathan Edwards ê cha-bó͘-kiáⁿ,Jerusha Edwards ê 墓。David Brainerd 真爱 Jerusha Edwards,in 已经订婚,但 sì 结婚 ê 期 iáu-bōe 到伊就过身去。
想看 māi,kap hit-ê 青年 ê 宣教师 ê 死体作伙 tâi tī 墓里 ê,有甚么为基督 ê 真道所发 ê 希望、期待、ǹg 望。Tī hit 时只有回忆,kap 几十个来信归主 ê 印地安人 nā-tiāⁿ!总是 hit 位伟大 ê 清教神学家,Jonathan Edwards,本希望 David Brainerd ōe-thang 做伊 ê kiáⁿ 婿,就将 David Brainerd chit 位青年人短短 ê 一生写做一本小册。Chit 本册亲像发两支翼,飞过大海洋,到剑桥 (Cambridge) 大学一个学生名叫 Henry Martyn ê 书桌 á 顶。
可怜 ê Henry Martyn!伊受好 ê 教育,有才华,有好 ê 前途。伊看了 hit 本 David Brainerd ê 生平传,受感激到性命 lóng bōe 顾得。后来 tī 1812 年,伊 tùi 印度 beh 回英国,伊 kiám 有甚么大 ê 成就?伊 ê 健康真 bái,带病 ǹg 北到土耳其 (Turkey) 近乌海 ê Tokat 城,发烧,倒 tī 一堆 ê 马鞍下遮 teh,就死 tī hia,chiah 三十一岁。
Chiah-ê「浪费掉」ê 性命有甚么目的?Tùi 青年 ê David Brainerd ê 墓,到乌海边 Henry Martyn ê 墓,soah 兴起了现代宣教师 ê 大军。――Leonard Wo͘lsey Bacon
有甚么沙漠,á 大海,你 kā 我差遣?
Hia 有树 ài 锉,有地 ài 开展, 带你 ê 一把种子,掖 tī 远远 ê 心田, 直到收成百倍,来养饲主 kiáⁿ 儿康健。
父 ah!Kā 我讲沙漠大海 jōa 大? 是你 ê 工程 mah?伟大 ê 上帝,差我! 虽 bóng 我 ê 体倒 tī 凶猛 ê 海浪淖, 父 ah!接受我 tī 忠信者 ê 祭坛。