「换十字架」是一首诗,讲起有一个厌倦 ê 妇女,伊想伊所背 ê 十字架比别人 khah 重,所以希望 ōe-thang 选另外别人 ê 十字架。当伊困 ê 时,梦见 hō͘ 人 chhōa 到有真 chōe 无 siâng 款 ê 十字架 ê 所在,thang 来选。In ê 形无 siâng,大细无 siâng,其中有一支镶宝石,安黄金 ê 十字架。伊讲:「我 thang 爽快来背 chit 支。」就 giâ chit 支十字架起来,无 phah 算,chit 支相当 tāng,用伊 ê 身体 giâ chit 支就 khiā 无好势,强强 beh 跋倒。宝石金金 sih-sih 实在真 súi,总是对伊 siuⁿ 重 lah。
续落去看 tio̍h 一支真 súi ê 十字架,有刻图样,koh 有星花 tńg-se̍h tī 顶面。 伊想这一定真适合伊。伊一下 the̍h 起来,花 ê 下面有刺,凿破伊 ê 皮肤流血。
最后伊看 tio̍h chit-ê 真朴素 ê 十字架,无宝石,无雕刻,顶面只有写几字表示疼 ê 字,伊 kā 伊 the̍h 起来,确实比其他所有 ê 十字架 khah 好,也容易背。伊一下看,发现 he 是浸过 tī 天顶 ê 光辉内会发光。Koh 看,原来是伊家己 hit 支十字架。伊现在 chiah 知,这是对伊 siōng 好 ê 一支,对伊是 siōng 轻松,适合 ê。
你看,上帝 siōng 清楚咱所需要是 tó chit 种 ê 十字架。咱 bōe 了解别人 ê 十字架是 jōa 重,咱看别人生活 ná 真安逸自在,伊 ê 十字架有花装饰,总是咱若会一一将咱所认为比家己 khah 轻 ê 十字架来试验,就 beh 发现无一支比咱本来 ê,khah 适当。――tùi《生活 ê 窗 á》
若是你紧紧放弃你 ê 十字架,
Tī 世间 á 是别所在你 lóng 无法度koh chhē。
Tī chia,你为上帝 ê 缘故受苦只有 tī 现世,
Tī 未来世界,咱 beh 疼伊,事奉伊,o-ló 天父。 欢喜 ná 来 ná 接近祖家。
Hit 时,咱无 koh 受召来受苦怨戚。 受苦指示 chit 时 ê khang-khè。 一两点钟 ê 受苦 kiám bōe-tàng 忍 neh? 若是伊今日召你脱离你 ê 十字架,
「照你祈祷 hō͘ 你脱离艰苦 ê 十字架。」 你 beh 感觉遗憾 koh pháiⁿ-sè,
「Chiah-nih 紧就 beh 召我 tńg 去天家? 我 ài koh tiap-á 久,因为我 iáu 未 o-ló 上帝。」 所以咱 teh 等 ê,beh 紧紧来,紧紧过, 把握现在,tī 咱身上来荣光天父。