「其余 ê 人有 ê 用枋，有 ê 用船内 ê 物。Tùi án-ni，众人 lóng 得救上山)。」 (使徒行传 27：44)
保罗去罗马坐船 ê 奇妙故事，充满了患难 kap 胜利，正是人生信心 ê 旅行，有光明，有乌暗极好 ê 例。旅途中 siōng 伟大，了不起ê，是 tī 困境、危险 ê 所在，有上帝特别 ê 供应 kap 干涉作为。
一般人误会，掠做做一个基督徒，伊 ê 信心 ê 路程遍地充满花 ê súi，实际 ê 经验 tú-tú 相反。圣经 ê 信息是「已经有做干证 ê 到 hiah chōe，亲像云围咱，」 (希伯来 12：1) chiah-ê 人 ê 一生无 m̄ 是 tī 苦难 kap 得胜相交替，tùi 亚伯到最后一位殉道者 lóng 是 án-ni。
保罗是一个极特殊 ê 例，说明上帝 ê kiáⁿ 儿受苦，精神却 bōe 受击倒，也 bōe 解体破碎 lek 落去。伊 tī 大马色受召了后，做见证，受迫害追赶，人 beh 害伊，为 tio̍h 性命就 ài 逃闪。总是并无天军、天车、天马 tùi 天降落来拯救 chit-ê 圣徒脱离敌人 ê 手，上帝用真简单 koh 平常 ê 方法 hō͘ 伊脱出。「若是伊 ê 学生透暝将伊用篮 tùi 城墙 kā 伊 lūi 落去。」(使徒行传 9：25)伊是 chhàng tī 旧 ê 衫篮内，亲像一捆衫 á 是货物。主耶稣基督 ê 仆人是 tùi 窗 á 口 liu 落去到城墙外口，用低低 ê 姿势逃避敌人 ê 怨恨。
后来咱也知，保罗孤单受关监受苦 chōe-chōe 月日，写讲：「无困，无食」 (哥林多 Ṳ 6：5)，koh 如何 hō͘ 朋友弃 sak，受鞭 phah，甚至上帝应允解救伊以后，iáu tú-tio̍h 海中大风涌 ê 艰苦，到险险死去，也不得不保护想 beh 逃走 ê 水手。最后 in 得 tio̍h 解救，mā m̄ 是 tùi 天降天船来救，也 m̄ 是天使行水面来解救，á 是命令暴雨强风大涌静静 ê 特殊权能。只有用平凡 siōng 自然 ê 方法，用柴，用船 ê 枋，á 是柴箍，能浮 tī 水面，koh 也有人用泅水上岸。
Chit-ê 故事，咱 thang 知上帝为咱性命定一个模式。Chit-ê 好 ê 信息是「tùi 生活 tī 凡间普通环境下，用完全普通 ê 方式，来应付各种普通情况 ê 人。」
上帝 ê 应允 kap 伊 ê 供应无 hō͘ 咱超越这实实在在 ê 世界，kap 日常 ê 苦难，因为咱 ê 信心 beh tùi chiah-ê 平常 ê 事来得完美。上帝也 ài chit-ê 世界，将伊 ê 疼痛 ê 金线 kap 咱日常生活喜乐 kap 苦难织作伙。――tùi「信心 oh 行 ê 道路」
|
|
|
转寄
